Davlat tasarrufidan chiqarish va xususiylashtirish jarayonini jadallashtirish, past rentabelli, zarar koʻrib ishlayotgan, iqtisodiy nochor davlat korxonalarini, past likvidli obyektlarni va xususiylashtirilgan korxonalarning davlat aktivlarini real mulkdorlarga sotish, shuningdek ushbu korxonalarni zamonaviylashtirish va barqaror rivojlantirishga toʻgʻridan-toʻgʻri investitsiyalarni jalb qilish maqsadida Vazirlar Mahkamasi qaror qiladi:

1. Quyidagilar:

Past rentabelli, zarar koʻrib ishlayotgan, iqtisodiy nochor davlat korxonalarini, past likvidli obyektlarni investor tomonidan investitsiya majburiyatlari qabul qilinishi sharti bilan investorlarga tanlov asosida bepul berish toʻgʻrisidagi nizom 1-ilovaga muvofiq;

Xususiylashtirilgan korxonalarning davlat aktivlari boshlangʻich narxini bosqichma-bosqich pasaytirish tartibi toʻgʻrisidagi nizom 2-ilovaga muvofiq tasdiqlansin.

2. Davlat mulkini xorijiy investorlarga sotish boʻyicha tender savdolari oʻtkazuvchi Davlat komissiyasi (R.S. Azimov)ga:

investor tomonidan investitsiya majburiyatlari qabul qilinishi sharti bilan bepul beriladigan past rentabelli, zarar koʻrib ishlayotgan, iqtisodiy nochor davlat korxonalari, past likvidli obyektlar roʻyxatini tasdiqlash toʻgʻrisida qaror qabul qilish;

istisno hollarda Oʻzbekiston Respublikasi Davlat mulki qoʻmitasi xulosasiga koʻra investorlar tomonidan investitsiya majburiyatlarining bajarilishini 12 oydan ortiq boʻlmagan muddatga uzaytirish vakolati berilsin.

3. Belgilab qoʻyilsinki:

davlat korxonalari va obyektlar faqat tanlov asosida eng yaxshi investitsiya loyihalarini va korxonaning kreditorlik qarzini toʻlashni oʻz ichiga oluvchi majburiyatlarni taklif etgan investorlarga investitsiya majburiyatlari qabul qilinishi sharti bilan bepul beriladi, bunda investor tomonidan investitsiya majburiyatlarini bajarish uchun qoʻshilayotgan pul mablagʻlari, moddiy boyliklar va boshqa aktivlarga daromad (foyda) soligʻi solinmaydi;

korxonani (obyektni) investitsiya majburiyatlari qabul qilinishi sharti bilan bepul olgan investor tomonidan shartnoma majburiyatlari bajarilmaganda yoki zarur darajada bajarilmaganda, bepul berish toʻgʻrisidagi shartnoma qonun hujjatlarida belgilangan tartibda bekor qilinadi, bunda obyekt belgilangan tartibda investitsiya majburiyatlari qabul qilinishi sharti bilan qaytadan sotuvga qoʻyilishi kerak;

investor tomonidan investitsiya majburiyatlari qabul qilinishi sharti bilan investorlarga bepul berilgan past rentabelli, zarar koʻrib ishlayotgan, iqtisodiy nochor korxonalarning budjetga va budjetdan tashqari fondlarga toʻlovlar boʻyicha oldingi yillardagi toʻlanishiga ishonch boʻlmagan qarzlari, shu jumladan ular boʻyicha penya va jarimalar hisobdan chiqariladi;

mulkdor — yuridik yoki jismoniy shaxs investitsiya majburiyatlari qabul qilinishi sharti bilan bepul olingan past rentabelli, zarar koʻrib ishlayotgan, iqtisodiy nochor davlat korxonasi (uning mol-mulki), past likvidli obyekt boʻyicha tegishli ravishda daromad (foyda) soligʻiga hamda jismoniy shaxslar daromadidan olinadigan soliqqa tortilmaydi.

4. Oʻzbekiston Respublikasi Davlat mulki qoʻmitasi, Oʻzbekiston Teleradio kompaniyasi ommaviy axborot vositalarida mazkur qaror ahamiyatini, shuningdek past rentabelli, zarar koʻrib ishlayotgan, iqtisodiy nochor korxonalarni, past likvidli obyektlarni investitsiya majburiyatlari qabul qilinishi sharti bilan mamlakatimiz investorlariga va xorijiy investorlarga bepul berishning hamda xususiylashtirilgan korxonalar davlat aktivlarini ularning nominal qiymatidan past narxlarda sotishning borishini keng yoritish ishlarini tashkil etsinlar.

5. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari R.S. Azimov zimmasiga yuklansin.

1. Mazkur Nizom past rentabelli, zarar koʻrib ishlayotgan, iqtisodiy nochor davlat korxonalarini, past likvidli obyektlarni investor tomonidan investitsiya majburiyatlari qabul qilinishi sharti bilan investorlarga (shu jumladan xorijiy investorlarga) tanlov asosida bepul berish tartibini belgilab beradi.

2. Mazkur Nizomda quyidagi atamalardan foydalaniladi:

sotish obyekti – past rentabelli, zarar koʻrib ishlayotgan, iqtisodiy nochor davlat korxonalari va past likvidli obyektlar;

investor – oldi-sotdi shartnomasiga muvofiq pul mablagʻlari, mulkiy boyliklar va ularga huquqlarni investitsiya qiluvchi yuridik va jismoniy shaxs;

sotuvchi – Oʻzbekiston Respublikasi Davlat mulki qoʻmitasi yoki uning hududiy boshqarmasi (sotilayotgan har bir obyekt boʻyicha sotuvchini tayinlash toʻgʻrisidagi qaror Davlat mulkini xorijiy investorlarga sotish boʻyicha tender savdolari oʻtkazuvchi Davlat komissiyasi tomonidan qabul qilinadi);

investitsiya majburiyatlari – investorning biznes-rejaga va tuzilgan oldi-sotdi shartnomasiga muvofiq sotib olingan korxonaga (obyektga) investitsiya qoʻyish boʻyicha majburiyatlari;

Komissiya – hududiy tanlov komissiyasi.

3. Investitsiya majburiyatlari boʻyicha investitsiyalar:

pul mablagʻlari qoʻyish, shu jumladan korxonaning kreditorlik qarzlari investor tomonidan qoplanishi;

ishlab chiqarishni texnika bilan qayta jihozlash va rekonstruksiya qilish uchun asbob-uskunalar, ehtiyot qismlar va butlovchi materiallar yetkazib berish;

qonun hujjatlariga muvofiq boshqa moddiy boyliklarni qoʻyish shaklida amalga oshirilishi mumkin.

4. Obyektni investitsiya majburiyatlari bajarilishi sharti bilan bepul berish uchun Oʻzbekiston Respublikasi Davlat mulki qoʻmitasi tomonidan tashkil etiladigan tanlov savdolari natijalari boʻyicha tanlov gʻolibi toʻgʻrisidagi qaror hududiy tanlov komissiyalari tomonidan qabul qilinadi, ularga tegishli ravishda Qoraqalpogʻiston Respublikasi Vazirlar Kengashi raisi, viloyatlar va Toshkent shahar hokimlari boshchilik qiladi va tarkibiga Oʻzbekiston Respublikasi Davlat mulki qoʻmitasi hududiy organlari rahbarlari (tanlov komissiyasi raisining oʻrinbosari sifatida), Iqtisodiyot vazirligi huzuridagi Iqtisodiy nochor korxonalar ishlari qoʻmitasi, Moliya vazirligi, Monopoliyadan chiqarish va raqobatni qoʻllab-quvvatlash qoʻmitasi, Davlat soliq qoʻmitasi, Tovar ishlab chiqaruvchilar va tadbirkorlar palatasi, Dehqon va fermer xoʻjaliklari uyushmasining hududiy organlari rahbarlari kiradi.

5. Investor tomonidan investitsiya majburiyatlari qabul qilinishi sharti bilan tanlov asosida bepul beriladigan obyektlar roʻyxati Oʻzbekiston Respublikasi Davlat mulki qoʻmitasi va Iqtisodiyot vazirligi huzuridagi Iqtisodiy nochor korxonalar ishlari qoʻmitasi tomonidan yilning har choragida mazkur Nizomga 1 va 2-ilovaga muvofiq shakllar boʻyicha taqdim etiladigan tegishli asoslashlar asosida Oʻzbekiston Respublikasi Vazirlar Mahkamasining 2003-yil 21-avgustdagi 362-son qaroriga muvofiq tashkil etilgan Davlat mulkini xorijiy investorlarga sotish boʻyicha tender savdolari oʻtkazuvchi Davlat komissiyasi tomonidan Oʻzbekiston Respublikasi Vazirlar Mahkamasining tegishli komplekslari bilan kelishgan holda tasdiqlanadi.

6. Quyidagilar:

korxonaning shahar asosi va respublika uchun strategik ahamiyatga ega emasligi;

obyektdan foydalanish samaradorligini oshirish uchun obyektni yangi mulkdorga berish zarur boʻlganda sotish narxi pasaytirilishi hisobga olingan holda taklif etilayotgan sotish narxiga investorlardan talab yoʻqligi;

korxonaning surunkali zarar koʻrib ishlashi, past rentabelliligi (5 foizdan yuqori boʻlmagan), iqtisodiy nochorligi va toʻlovga qobiliyatli emasligi obyektni bepul berishning asosiy mezonlari hisoblanadi.

7. Sotuv obyektini sotish boʻyicha tanlov oʻtkazish toʻgʻrisidagi eʼlon ommaviy axborot vositalarida tanlov oʻtkazilishidan kamida 2 oy oldin eʼlon qilinishi kerak.

8. Sotuv obyektlarini sotish mazkur Nizomda nazarda tutilgan xususiyatlar hisobga olingan holda Oʻzbekiston Respublikasi Vazirlar Mahkamasining 1997-yil 18-avgustdagi 404-son qarori bilan tasdiqlangan Korxonalarni va xususiylashtiriladigan davlat korxonalari aksiyalarini sotish boʻyicha tenderlar oʻtkazish tartibiga muvofiq Komissiyaning qarori asosida amalga oshiriladi (Davlat mulkini xorijiy investorlarga sotish boʻyicha tender savdolari oʻtkazuvchi Davlat komissiyasi tomonidan sotiladigan obyektlardan tashqari).

9. Xohish bildirgan barcha jismoniy va yuridik shaxslar, shu jumladan Oʻzbekiston Respublikasining norezidentlari tanlovda qatnashishga qoʻyiladi.

10. Tanlovda qatnashish uchun investor ommaviy axborot vositalarida oldindan eʼlon qilingan tanlov oʻtkazilishi sanasidan kamida uch kun oldin Komissiyaning koʻrib chiqishi uchun muhrlab qoʻyilgan konvertda tanlov taklifini taqdim etadi.

11. Tanlov taklifida biznes-reja, bajarish muddatlari koʻrsatilgan holda investitsiya dasturi (loyiha), asbob-uskunalar yetkazib berish (agar u nazarda tutilgan boʻlsa), uning texnologik parametrlari, ishlab chiqarilayotgan mahsulotning rejalashtirilayotgan assortimenti va uning raqobatbardoshliligi, xom ashyo, ishlab chiqarish samaradorligini oshirish, mavjud asbob-uskunalar va ishlab chiqarish maydonlaridan foydalanish tadbirlari, kutilayotgan iqtisodiy samara, shuningdek sotish obyektini moliyaviy-xoʻjalik jihatdan sogʻlomlashtirish yoki uning hududidan xoʻjalik maqsadlarida foydalanishni tiklash boʻyicha investorning boshqa majburiyatlari va rejalari qayd etilgan boʻlishi kerak.

12. Tanlov taklifini baholashda biznes-rejaning samaradorligi, marketing rejalari va moliyaviy rejalarning asoslanganligi belgilovchi ahamiyatga ega boʻladi.

13. Tanlov qatnashchilari (qatnashchisi) tomonidan taqdim etilgan tanlov taklifini va biznes-rejani koʻrib chiqish natijalari boʻyicha Komissiya tanlov gʻolibini aniqlaydi.

14. Eng jozibali tanlov taklifini taqdim etgan va uni amalga oshirish uchun real moliyaviy imkoniyatlarga ega boʻlgan qatnashchi tanlov gʻolibi deb eʼtirof etiladi.

15. Tanlov gʻolibi Komissiya aʼzolarining oddiy koʻpchilik ovozi bilan aniqlanadi, ovozlar teng boʻlib qolgan taqdirda Komissiya raisining ovozi hal qiluvchi ovoz hisoblanadi.

16. Tanlov gʻolibini tanlash toʻgʻrisida Komissiya tomonidan qaror qabul qilinishi uchun tanlovda uning aʼzolarining kamida 75 foizi hozir boʻlishi kerak.

17. Agar tanlovda bitta qatnashchi ishtirok etsa, tanlov boʻlib oʻtmagan deb hisoblanadi. Komissiya talabgor tomonidan taqdim etilgan tanlov taklifini koʻrib chiqish yakunlari boʻyicha sotuv obyektini yagona talabgorga sotish imkoniyatini koʻrib chiqishga haqlidir.

18. Sotuvchi Komissiyaning qarori asosida tanlov gʻolibi bilan investor tomonidan investitsiya majburiyatlari qabul qilinishi sharti bilan obyektni bepul berish toʻgʻrisida shartnoma tuzadi.

Agar sotuvchi funksiyasini Oʻzbekiston Respublikasi Davlat mulki qoʻmitasining hududiy boshqarmasi amalga oshirsa, shartnomaning bir nusxasi hisobga qoʻyish, nazorat va monitoring olib borish uchun Davlat mulki qoʻmitasiga yuboriladi.

19. Shartnomada quyidagilar nazarda tutilishi kerak:

shartnoma mavzusi;

investitsiya majburiyatlari hajmi, turlari va uni bajarish jadvali;

yetkazib berilayotgan asbob-uskunalarning texnik shartlari va tavsifi (agar bu nazarda tutilgan boʻlsa);

mulkchilik huquqini berish tartibi, obyektga egalik qilish, undan foydalanish va uni tasarruf etish shartlari va muddatlari;

sotuv obyekti mol-mulki saqlanishi uchun javobgarlik;

shartnoma majburiyatlari bajarilmaganligi yoki zarur darajada bajarilmaganligi uchun tomonlarning javobgarligi;

investor tomonidan investitsiya majburiyatlari bajarilishining borishi toʻgʻrisida Sotuvchiga hisobot taqdim etish muddatlari va tartibi;

nizolarni hal etish tartibi.

Tomonlarning kelishuviga koʻra shartnomada boshqa shartlar ham aks ettirilishi mumkin.

20. Agar tanlov oʻtkazish yakunlari boʻyicha sotuv obyektini sotish toʻgʻrisida qaror qabul qilinmasa, tanlov oʻtkazilmagan deb hisoblanadi, bunda tanlov komissiyasi tomonidan tanlovni takroriy oʻtkazish sanasi tayinlanadi, biroq ushbu sana tanlovni koʻchirish toʻgʻrisida qaror qabul qilingan kundan boshlab kamida 2 oy boʻlishi kerak.

21. Past rentabelli, zarar koʻrib ishlayotgan, iqtisodiy nochor davlat korxonalarini, past likvidli obyektlarni yangi mulkdorga berish balans (qoldiq) qiymat boʻyicha amalga oshiriladi.

22. Davlat korxonalarini investor tomonidan investitsiya majburiyatlari qabul qilinishi sharti bilan investorlarga bepul berish toʻgʻrisida shartnoma rasmiylashtirilgandan keyin ushbu korxonalarning budjetga va budjetdan tashqari fondlarga toʻlovlar boʻyicha oldingi yillardagi toʻlanishiga ishonch boʻlmagan qarzlari, shu jumladan ular boʻyicha penya va jarimalar hisobdan chiqariladi;

23. Shartnoma shartlariga muvofiq investitsiya majburiyatlari toʻliq bajarilganidan va investitsiya majburiyatlari bajarilishi toʻgʻrisida Sotuvchiga hisobot taqdim etilgandan keyin sotish obyektiga mulkchilik huquqi investorga oʻtadi.

24. Investitsiya majburiyatlari bajarilishining borishi toʻgʻrisidagi hisobotda:

toʻlov topshirigʻi nusxalari, bojxona deklaratsiyalari, asbob-uskunalarning texnik holati koʻrsatilgan holda ularni oʻrnatish dalolatnomalari;

investitsiya dasturi (loyiha) bajarilishining borishi toʻgʻrisidagi axborot, shu jumladan hisobot taqdim etish sanasida ularda nazarda tutilgan moliyaviy-iqtisodiy parametrlar;

obyekt sotilgungacha va hisobot taqdim etilishi paytida obyektning moliyaviy-iqtisodiy holati toʻgʻrisidagi maʼlumotlar boʻlishi kerak.

25. Investitsiya majburiyatlari toʻliq bajarilgunga qadar investor Sotuvchi bilan:

qiymati unga berilgan obyekt qoldiq balans qiymatining 25 foizidan ortiq boʻlgan mol-mulkni sotish bilan bogʻliq bitishuvlar tuzish;

korxonaning taʼsis hujjatlariga muassislarning oʻzgarishi bilan bogʻliq oʻzgartirishlarni kiritish masalalarini kelishishi shart.

26. Investor tomonidan investitsiya majburiyatlari toʻliq bajarilishi munosabati boʻyicha Sotuvchi investitsiya majburiyatlari bajarilishini qabul qilish boʻyicha komissiya tashkil etadi.

27. Investitsiya majburiyatlari bajarilishini qabul qilish boʻyicha komissiya Sotuvchining buyrugʻi bilan tashkil etiladi va kamida 5 kishidan iborat boʻladi. Komissiya tarkibiga kelishuv boʻyicha moliyaviy va iqtisodiy organlar xodimlari (Iqtisodiyot vazirligi, Moliya vazirligi, Iqtisodiyot vazirligi huzuridagi Iqtisodiy nochor korxonalar ishlari qoʻmitasi yoki ularning hududiy boʻlinmalarining mutaxassislari), manfaatdor banklar, tarmoq uyushmalari, konsernlari, korporatsiyalari va tegishli hokimliklarning xodimlari jalb etilishi mumkin.

28. Komissiya ishining yakunlari boʻyicha qabul qilish dalolatnomasi tuziladi, Sotuvchi ushbu dalolatnoma asosida sotilgan obyektga investorning mulkchilik huquqini (dalolatnomani) rasmiylashtiradi.

29. Shartnoma majburiyatlari va investitsiya majburiyatlari bajarilmagan yoki zarur darajada bajarilmagan taqdirda Sotuvchi investorga oldi-sotdi shartnomasi shartlari bajarilmaganligi toʻgʻrisida rasmiy taqdimnoma yuboradi.

Oldi-sotdi shartnomasi shartlari bajarilmasa, Sotuvchi tomonidan rasmiy taqdimnoma kiritilgandan soʻng obyektni investor tomonidan investitsiya majburiyatlari qabul qilinishi sharti bilan investorlarga bepul berish toʻgʻrisidagi shartnoma qonun hujjatlarida belgilangan tartibda bekor qilinadi. Bunda obyekt mazkur Nizomda nazarda tutilgan tartibda takroran sotuvga qoʻyilishi kerak.

Mazkur Nizom birja va birjadan tashqari savdolarning elektron tizimlariga qoʻyiladigan xususiylashtirilgan korxonalarning davlat aktivlari va obyektlar boshlangʻich narxini bosqichma-bosqich pasaytirish tartibini boshqaradi.

1. Boshlangʻich narxni bosqichma-bosqich pasaytirish tartibi xususiylashtirilgan korxonalarning nominal qiymatdan yuqori narxda savdoga qoʻyilgan aksiyalariga savdoga qoʻyilgan kundan boshlab oʻn kun oʻtgandan keyin (milliy valyutada savdoga qoʻyilgan aksiyalar boʻyicha) hamda bir oy oʻtgandan keyin (erkin muomaladagi valyutada savdoga qoʻyilgan aksiyalar boʻyicha) talab boʻlmaganda qoʻllanadi.

2. Savdoga qoʻyilgan aksiyalar narxi har savdo sessiyasida ularning boshlangʻich narxidan 5 foizga pasaytiriladi.

3. Savdoga qoʻyish narxida muayyan darajaga erishilgandan keyin aksiya sotib olish uchun ikki va undan ortiq investordan buyurtma tushgan taqdirda narxni bosqichma-bosqich 5 foizga oshirib kimoshdi savdosi oʻtkaziladi.

4. Aksiyalarni savdoga qoʻyishning eng past narxi uning nominal qiymatidan past boʻlmasligi kerak. Xususiylashtirilgan korxonalar aksiyalarining erkin muomaladagi valyutadagi eng past narxi ushbu korxonani xususiylashtirish toʻgʻrisida qaror qabul qilingan kunda Oʻzbekiston Respublikasi Markaziy banki kursi boʻyicha belgilangan nominal qiymatdan past boʻlmasligi kerak.

5. Narx nominal qiymatga yetgandan keyin aksiyaga bir oy mobaynida talab boʻlmagani holda Davlat mulki qoʻmitasining vakolatli agenti (“Davinkom” davlat investitsiya firmasi) ushbu aksiyadorlik jamiyatlarining aksiyalarini rasmiy birja byulletenidan chiqarish toʻgʻrisidagi taklif bilan ularning roʻyxatini Oʻzbekiston Respublikasi Davlat mulki qoʻmitasiga taqdim etadi.

6. Ushbu roʻyxat olingandan keyin Oʻzbekiston Respublikasi Davlat mulki qoʻmitasi ularning bundan keyin birja savdolarida boʻlishi yoki ularni rasmiy birja byulletenidan chiqarish toʻgʻrisida qaror qabul qiladi.

7. Aksiyadorlik jamiyatlari rasmiy birja byulletenidan chiqarilgandan keyin ularning aksiyalari Oʻzbekiston Respublikasi Davlat mulki qoʻmitasi, Moliya vazirligi va Iqtisodiyot vazirligi tomonidan tasdiqlangan hamda Oʻzbekiston Respublikasi Adliya vazirligida 2003-yil 16-iyulda 1255 tartib raqami bilan roʻyxatdan oʻtkazilgan Davlat aktivlarini nominal qiymatidan past narxda sotish tartibi toʻgʻrisidagi Nizomga muvofiq Oʻzbekiston Respublikasi Davlat mulki qoʻmitasi tomonidan sotiladi.

8. Sotuvga qoʻyiladigan korxonalar, obyektlarning (ulushlar, mol-mulkning) boshlangʻich narxi qonun hujjatlarida belgilangan tartibda aniqlangan baholash qiymati boʻyicha belgilanadi.

9. Korxonalar, obyektlar (ulushlar, mol-mulk) Respublika koʻchmas mulk birjasining birja savdosiga Davlat mulki qoʻmitasining vakolatli agenti (“Davinkom” davlat investitsiya firmasi yoxud shartnoma asosida Davlat mulki qoʻmitasi nomidan ish koʻruvchi yuridik shaxs) tomonidan belgilangan tartibda 3 oydan ortiq boʻlmagan muddatga qoʻyiladi.

10. Savdoga qoʻyilgandan keyin bir oydan keyin ushbu korxonalarga, obyektlarga (ulushlar, mol-mulkka) talab boʻlmasa, har savdo sessiyasi mobaynida boshlangʻich narxga nisbatan pasaytirishning qatʼiy bosqichliligi 5 foiz belgilangan holda boshlangʻich narxni bosqichma-bosqich pasaytirish mexanizmi qoʻllanadi. Bunda korxonaning, obyektning (ulush, mol-mulkning) pasaytirilgan narxi qoldiq balans qiymatdan past boʻlishi mumkin emas.

Korxonaning, obyektning (ulush, mol-mulkning) erkin muomaladagi valyutadagi eng past narxi ushbu obyektni davlat tasarrufidan chiqarish toʻgʻrisida qaror qabul qilingan kunda Oʻzbekiston Respublikasi Markaziy banki kursi boʻyicha belgilangan qoldiq balans qiymatdan past boʻlmasligi kerak.

11. Birja savdolari davomida ikki va undan ortiq xaridor korxonani, obyektni (ulush, mol-mulkni) shakllangan narx boʻyicha sotib olishga buyurtma bergan taqdirda, savdoga qoʻyish narxining kamida 5 foiziga narxni koʻtarish yoʻli bilan kimoshdi savdosi rejimi qoʻllanadi. Eng yuqori narxni taklif etgan xaridor savdo gʻolibi deb eʼlon qilinadi.

12. Birja savdolarini oʻtkazish va bitishuvlar tuzish tartib-qoidasi qonun hujjatlarida belgilangan tartibda amalga oshiriladi.

Korxona, obyekt (ulush, mol-mulk) mazkur Nizomning 9—11-bandalariga muvofiq sotilmagan holda Davlat mulki qoʻmitasining vakolatli agenti Oʻzbekiston Respublikasi Davlat mulki qoʻmitasini bundan xabardor qiladi. Olingan axborot asosida Davlat mulki qoʻmitasi uning birja savdolarida bundan keyin boʻlishi yoki uni savdodan chiqarish toʻgʻrisida qaror qabul qiladi.

13. Korxona, obyekt (ulush, mol-mulk) birja savdosidan chiqarilgandan keyin uni sotish Oʻzbekiston Respublikasi Davlat mulki qoʻmitasi, Moliya vazirligi va Iqtisodiyot vazirligi tomonidan tasdiqlangan hamda Oʻzbekiston Respublikasi Adliya vazirligida 2003-yil 16-iyulda 1255 tartib raqami bilan roʻyxatdan oʻtkazilgan Davlat aktivlarini nominal qiymatidan past narxda sotish tartibi toʻgʻrisidagi nizomga muvofiq amalga oshiriladi.