“Oʻzbekiston Respublikasida unifikatsiyalashtirilgan “Bir oyna” bojxona axborot tizimini joriy etish yoʻli bilan bojxona xizmatini modernizatsiya qilish” loyihasini amalga oshirish uchun Koreya Respublikasi Hukumati tomonidan ajratib berilayotgan grantdan samarali va maqsadli foydalanishni taʼminlash maqsadida:

1. Maʼlumot uchun qabul qilinsinki:

Oʻzbekiston Respublikasi Hukumati bilan Koreya Respublikasi Hukumati oʻrtasida 2013-yil uchun grant yordamini ajratish toʻgʻrisida 2013-yil 3-dekabrda imzolangan Hadli bitim (keyingi oʻrinlarda — Hadli bitim) doirasida Koreya Respublikasi Hukumati Oʻzbekiston Respublikasi Hukumatiga 2014 — 2016-yillarda Oʻzbekiston Respublikasida unifikatsiyalashtirilgan “Bir oyna” bojxona axborot tizimini joriy etish yoʻli bilan bojxona xizmatini modernizatsiya qilish loyihasini amalga oshirish uchun 5,5 mln AQSH dollari miqdorida grant mablagʻlari ajratadi;

Koreya tomonidan mazkur loyihani amalga oshirishda “KOICA” xalqaro hamkorlik koreys agentligi masʼul ijro etuvchi agentlik hisoblanadi.

2. Belgilansinki:

mazkur loyihaning asosiy vazifalari unifikatsiyalashtirilgan “Bir oyna” bojxona axborot tizimini ishlab chiqish va joriy etish, kelgusida uni interaktiv davlat xizmatlarining Yagona portaliga birlashtirish, shuningdek uni amalga oshirish uchun zarur dasturiy taʼminot, yordamchi materiallar va asbob-uskunalar yetkazib berish hisoblanadi;

Oʻzbekiston Respublikasi Davlat bojxona qoʻmitasi ajratilayotgan grantdan maqsadli foydalanish va mazkur loyihani samarali amalga oshirish uchun Oʻzbekiston tomonidan masʼul boʻlgan ijro etuvchi organ hisoblanadi.

3. Oʻzbekiston Respublikasi Davlat bojxona qoʻmitasi Tashqi iqtisodiy aloqalar, investitsiyalar va savdo vazirligi bilan birgalikda Oʻzbekiston Respublikasida unifikatsiyalashtirilgan “Bir oyna” bojxona axborot tizimini joriy etish yoʻli bilan bojxona xizmatini modernizatsiya qilish loyihasini amalga oshirishga Koreya Respublikasi Hukumatining grantini jalb qilish uchun belgilangan tartibda barcha zarur tartib-taomillar bajarilishini taʼminlasin.

4. Maʼlumot uchun qabul qilinsinki:

mazkur loyihani amalga oshirish doirasida amaldagi qonunchilikka muvofiq grant mablagʻlari hisobidan olib kirilayotgan va sotib olinayotgan tovar (ish, xizmat)lar bojxona toʻlovlaridan, shuningdek qoʻshilgan qiymat soligʻidan ozod qilinadi;

Hadli bitimga muvofiq mazkur loyihani amalga oshirish doirasida Koreya Respublikasi fuqarolari jismoniy shaxslardan olinadigan daromad soligʻidan ozod qilinadilar.

5. Oʻzbekiston Respublikasida unifikatsiyalashtirilgan “Bir oyna” bojxona axborot tizimini joriy etish yoʻli bilan bojxona xizmatini modernizatsiya qilish loyihasini amalga oshirishda ishtirok etayotgan Oʻzbekiston Respublikasi norezidentlari yuridik shaxslarning foyda soligʻidan ozod qilinsin.

6. “Oʻzbekiston havo yoʻllari” Milliy aviakompaniyasi va “Oʻzbekiston temir yoʻllari” davlat-aksiyadorlik temir yoʻl kompaniyasi mazkur loyihani amalga oshirish doirasida olib kelinayotgan tovarlarni tegishli ravishda Oʻzbekiston Respublikasi aeroportlari va temir yoʻl stansiyalarida ortish- tushirish va saqlash ishlarini haq undirmasdan oʻtkazishni taʼminlasin.

7. Oʻzbekiston Respublikasi Tashqi ishlar vazirligi Davlat bojxona qoʻmitasining talabnomasiga binoan mazkur loyihani amalga oshirishda ishtirok etayotgan yuqori malakali xorijiy mutaxassislarga belgilangan tartibda kirish vizalarini konsullik yigʻimlari va boshqa yigʻimlarni undirmay rasmiylashtirishni taʼminlasin.

8. Oʻzbekiston Respublikasi Tashqi ishlar vazirligi Davlat bojxona qoʻmitasining talabnomasiga binoan mazkur loyihani amalga oshirishda ishtirok etayotgan xorijiy mutaxassislarga belgilangan tartibda davlat bojlari toʻlashdan ozod qilgan holda koʻp martalik vizalar berish va muddatini uzaytirish, shuningdek ularni yashash joyida vaqtincha roʻyxatdan oʻtkazish va vaqtincha roʻyxatdan oʻtkazish muddatini uzaytirishni taʼminlasin.

9. Ushbu qarorning ijrosini nazorat qilish Oʻzbekiston Respublikasining Bosh vaziri Sh.M. Mirziyoyev zimmasiga yuklansin.