“Chet ellik investorlar huquqlarining kafolatlari va ularni himoya qilish choralari toʻgʻrisida” Oʻzbekiston Respublikasi Qonuniga muvofiq va respublikaga toʻgʻridan toʻgʻrixorijiy investitsiyalarni jalb qilish uchun yanada qulay shart-sharoitlarni taʼminlash, xorijiy investitsiyalarni ishonchli huquqiy himoya qilishning amaliy mexanizmini barpo etish, mana shu asosda mamlakatdagi investitsiya muhitini yanada yaxshilash maqsadida Vazirlar Mahkamasi qaror qiladi:

1. Oʻzbekiston Respublikasi Adliya vazirligiga xorijiy investorlarni va xorijiy investitsiyalar ishtirokidagi korxonalarni huquqiy himoya qilishni taʼminlash vazifasi yuklansin.

Oʻzbekiston Respublikasi Adliya vazirligiga quyidagi huquqlar berilsin:

xorijiy investorlarni va xorijiy investitsiyalar ishtirokidagi korxonalarni javobgarlikka tortishning asosliligini zarur hujjatlar, shu jumladan jinoiy, fuqarolik, xoʻjalik va maʼmuriy ishlar materiallari bilan tanishish yoʻli bilan oʻrganib chiqish;

vazirliklar, idoralar va nazorat organlari, shuningdek mahalliy hokimiyat va boshqaruv organlari rahbarlariga qonun hujjatlarining aniqlangan buzilishlari, qonun buzilishini va unga olib keluvchi shart-sharoitlarning sabablarini bartaraf qilish toʻgʻrisida belgilangan muddatlarda bajarilishi majburiy boʻlgan taqdimnomalar kiritish;

mansabdor shaxslar tomonidan xorijiy investorlar va xorijiy investitsiyalar ishtirokidagi korxonalarning huquqlari va qonuniy manfaatlari buzilishi hollari aniqlangan hollarda, shuningdek adliya organlarining qonuniy talablari mansabdor shaxslar tomonidan bajarilmagan taqdirda aybdor mansabdor shaxslarni javobgarlikka tortish toʻgʻrisidagi masalalarni tegishli organlar oldiga qoʻyish;

xorijiy investorlar va xorijiy investitsiyalar ishtirokidagi korxonalarning huquqlarini buzayotgan nazorat qiluvchi hamda mahalliy hokimiyat va boshqaruv organlarining harakati yoki qarorlarini toʻxtatib qoʻyish;

jinoiy, fuqarolik, xoʻjalik va maʼmuriy ishlar boʻyicha xorijiy investorlar va xorijiy investitsiyalar ishtirokidagi korxonalarning huquqlari va qonuniy manfaatlarini buzuvchi sud hujjatlarini davlat boji toʻlamasdan qayta koʻrib chiqish toʻgʻrisida sud instansiyalariga takliflar bilan murojaat qilish;

xorijiy investorlar va xorijiy investitsiyalar ishtirokidagi korxonalarning oʻz huquqlari va qonuniy manfaatlari buzilganligi toʻgʻrisidagi murojaatlarini tekshirish uchun tegishli mutaxassislarni jalb etish.

Belgilansinki, Oʻzbekiston Respublikasi Adliya vazirligining xorijiy investorlar va xorijiy investitsiyalar ishtirokidagi korxonalarning huquqlarini himoya qilishni taʼminlashga doir qarorlari vazirliklar, idoralar, xoʻjalik birlashmalari, viloyatlar, shaharlar va tumanlar hokimliklari tomonidan bajarilishi majburiy hisoblanadi.

2. Oʻzbekiston Respublikasi Adliya vazirligi tuzilmasida shtatdagi xodimlar soni 10 nafar boʻlgan (texnik xodimlardan tashqari) Xorijiy investitsiyalar va xorijiy investitsiyalar ishtirokidagi korxonalarni huquqiy himoya qilish boshqarmasi, Qoraqalpogʻiston Respublikasi Adliya vazirligida, viloyatlar va Toshkent shahar adliya boshqarmalarida esa — ilovaga muvofiq xodimlar soniga ega boʻlgan tegishli boʻlimlar tashkil etilsin.

Oʻzbekiston Respublikasi Moliya vazirligi Oʻzbekiston Respublikasi Adliya vazirligining Xorijiy investitsiyalar va xorijiy investitsiyalar ishtirokidagi korxonalarni huquqiy himoya qilish boshqarmasi va tegishli boʻlimlarning joriy taʼminotini moliyalashtirishni nazarda tutsin.

3. Oʻzbekiston Respublikasi Adliya vazirligi:

ikki hafta muddatda Xorijiy investitsiyalar va xorijiy investitsiyalar ishtirokidagi korxonalarni huquqiy himoya qilish boshqarmasining tuzilmasini va Boshqarma toʻgʻrisidagi nizomni tasdiqlasin;

Oʻzbekiston Respublikasi Moliya vazirligi, Davlat soliq qoʻmitasi, Davlat bojxona qoʻmitasi hamda boshqa manfaatdor vazirliklar va idoralar bilan birgalikda xorijiy investorlar va xorijiy investitsiyalar ishtirokidagi korxonalarga nisbatan amaldagi imtiyozlar va kafolatlar roʻyxatini, ularni qoʻllash boʻyicha sharhlar bilan birgalikda, ikki oy muddatda tayyorlasin;

Xorijiy sarmoyalar boʻyicha agentlik bilan birgalikda Oʻzbekiston Respublikasidagi xorijiy investorlar faoliyatini tartibga soluvchi normativ-huquqiy hujjatlarning tizimlashtirilgan toʻplamini Internet tarmogʻiga joylashtirish uchun xorijiy tillarda uch oy muddatda tayyorlasin.

4. Vazirlar Mahkamasining Tashqi iqtisodiy aloqalar va xorijiy investitsiyalar departamenti xorijiy investorlar va xorijiy investitsiyalar ishtirokidagi korxonalarni huquqiy himoya qilish boʻyicha Oʻzbekiston Respublikasi Adliya vazirligi mintaqaviy boʻlimlarining moddiy-texnika bazasini qoʻllab-quvvatlash uchun grantlar jalb etilishiga koʻmaklashsin.

5. Adliya vazirligi hamda Vazirlar Mahkamasining Tashqi iqtisodiy aloqalar va xorijiy investitsiyalar departamenti xorijiy investitsiyalar ishtirokidagi korxonalar faoliyatining doimiy monitoringini olib borsinlar hamda xorijiy investorlardan tushayotgan murojaatlar va takliflarni batafsil oʻrganib chiqsinlar va toʻgʻridan toʻgʻrixorijiy investitsiyalarni jalb etish va xorijiy investorlarning huquqlari himoya qilinishini taʼminlash boʻyicha ishlarni tashkil etishni yanada yaxshilash yuzasidan aniq takliflar bilan birgalikda tahliliy materiallarni Vazirlar Mahkamasiga yilning har choragida taqdim etsinlar.

6. Oʻzbekiston Respublikasi Adliya vazirligi bir oy muddatda manfaatdor vazirliklar va idoralar bilan birgalikda qonun hujjatlariga mazkur qarordan kelib chiquvchi oʻzgartirish va qoʻshimchalar toʻgʻrisida Vazirlar Mahkamasiga taklif kiritsin, shuningdek vazirliklar va idoralarning normativ hujjatlariga tegishli oʻzgartirish va qoʻshimchalar kiritilishini taʼminlasin.

7. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosarlari R.S. Azimov va E.M. Gʻaniyev zimmasiga yuklansin.