Oʻzbekiston Respublikasi Prezidentining “Oʻzbekiston Respublikasining 2014-yilgi asosiy makroiqtisodiy koʻrsatkichlari prognozi va Davlat budjeti parametrlari toʻgʻrisida” 2013-yil 25-dekabrdagi PQ-2099-son qaroriga muvofiq, shuningdek obyektlarni markazlashtirilgan manbalar hisobiga qurishda yagona buyurtmachi xizmatlari (keyingi oʻrinlarda yagona buyurtmachi xizmatlari deb ataladi) xodimlarining mehnatiga haq toʻlash tizimini takomillashtirish maqsadida Vazirlar Mahkamasi qaror qiladi:

1. Oʻzbekiston Respublikasi Prezidentining “Oʻzbekiston Respublikasining 2014-yilgi asosiy makroiqtisodiy koʻrsatkichlari prognozi va Davlat budjeti parametrlari toʻgʻrisida” 2013-yil 25-dekabrdagi PQ-2099-son qaroriga va Vazirlar Mahkamasining “Kapital qurilishda xoʻjalik munosabatlari mexanizmini takomillashtirish chora-tadbirlari toʻgʻrisida” 2003-yil 12-sentabrdagi 395-son qaroriga muvofiq yagona buyurtmachi xizmatlarining rahbarlari, xodimlari va mutaxassislari mehnatiga haq toʻlash boʻyicha razryadlar va tarif koeffitsiyentlari Vazirlar Mahkamasining “Davlat hokimiyati va boshqaruvi organlari, sud organlari va notarial idoralar xodimlari mehnatiga haq toʻlashning tarif setkasini joriy etish toʻgʻrisida” 1996-yil 12-apreldagi 147-son qaroriga muvofiq belgilanishi maʼlumot uchun qabul qilinsin.

2. 2014-yil 1-yanvardan boshlab yagona buyurtmachi xizmatlari (injiniring kompaniyalari) rahbar xodimlari va mutaxassislari uchun yagona tarif setkasi boʻyicha mehnatga haq toʻlashning amaldagi tarif koeffitsiyentlariga cheklangan oshiruvchi koeffitsiyentlar ilovaga muvofiq belgilansin.

3. Vazirliklar, idoralar va yagona buyurtmachi xizmatlari rahbarlari yagona buyurtmachi xizmatlari xodimlarini moddiy ragʻbatlantirishni kapital qoʻyilmalardan foydalanish samaradorligiga, bajarilgan ishlar sifati va hajmiga qarab tabaqalashtirib amalga oshirsinlar.

4. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari B.I. Zakirov zimmasiga yuklansin.