Yerlarni haydash ishlarining o‘z vaqtida va sifatli bajarilishini ta’minlash hamda qishloq xo‘jaligi yerlarini ekish ishlariga tayyorlash, fermer xo‘jaliklarining mashina-traktor parklari, shu jumladan muqobil mashina-traktor parklarining yer haydash traktorlariga bo‘lgan ehtiyojini yanada to‘liq qondirish, shuningdek Xalqaro taraqqiyot uyushmasining “Qishloq xo‘jaligi korxonalarini qo‘llab-quvvatlash. II faza” loyihasi doirasidagi kreditidan samarali foydalanish maqsadida Vazirlar Mahkamasi qaror qiladi:

1. O‘zbekiston Respublikasi Qishloq va suv xo‘jaligi vazirligining “Qishloq xo‘jaligi korxonalarini qo‘llab-quvvatlash. II faza” loyihasini amalga oshirish uchun Xalqaro taraqqiyot uyushmasi krediti (keyingi o‘rinlarda XTU krediti deb ataladi) hisobiga “O‘zKeysTraktor” qo‘shma korxonasida ishlab chiqarilgan 150 ta “New Nolland TS-6070” rusumli yer haydash traktorlari sotib olish to‘g‘risidagi taklifiga rozilik berilsin.

2. Belgilab qo‘yilsinki, yer haydash traktorlarini sotib olish “Qishloq xo‘jaligi korxonalarini qo‘llab-quvvatlash. II faza” loyihasini bajarishda qatnashuvchi tijorat banklari orqali milliy valyutada, “Agrobank” va “Mikrokreditbank” ochiq aksiyadorlik tijorat banklariga kredit liniyalari doirasida XTU krediti hisobidan ajratilgan tegishli ravishda 3,0 mln AQSh dollari va 2,5 mln AQSh dollari miqdorida xorijiy valyutadagi limitlarni qayta taqsimlash hisobiga ular uchun milliy valyutadagi kredit mablag‘lari limitlarini ko‘paytirgan holda amalga oshiriladi.

3. O‘zbekiston Respublikasi Moliya vazirligi belgilangan tartibda:

tegishli ravishda 3,0 mln AQSh dollari va 2,5 mln AQSh dollariga teng ekvivalentdagi milliy valyutadagi mablag‘larning davlat tashqi qarziga xizmat ko‘rsatish uchun respublika budjetida nazarda tutilgan mablag‘lar hisobidan O‘zbekiston Respublikasi Markaziy bankining mablag‘ ko‘chirilayotgan sanada amaldagi kursi bo‘yicha “Agrobank” va “Mikrokreditbank” ochiq aksiyadorlik tijorat banklarining hisob raqamlariga o‘tkazilishini;

“Agrobank” va “Mikrokreditbank” ochiq aksiyadorlik tijorat banklaridan sotib olingan xorijiy valyutadagi jami 5,5 mln AQSh dollari miqdoridagi mablag‘larning, zarurat bo‘lganda, ulardan O‘zbekiston Respublikasining XTU krediti bo‘yicha tashqi majburiyatlariga xizmat ko‘rsatishda yetishmayotgan qismi uchun foydalanish huquqi bilan depozitga joylashtirilishini ta’minlasin.

4. O‘zbekiston Respublikasi Moliya vaziriga “Agrobank” va “Mikrokreditbank” ochiq aksiyadorlik tijorat banklari bilan tuzilgan qayta kreditlash to‘g‘risidagi bitimga o‘zgartirishlarni O‘zbekiston Respublikasi nomidan imzolash vakolati berilsin.

5. Mazkur qarorning bajarilishini nazorat qilish O‘zbekiston Respublikasi Bosh vazirining birinchi o‘rinbosari R.S. Azimov zimmasiga yuklansin.