Pochta aloqasini, axborot tizimlari va telekommunikatsiyalarni boshqarishni yanada takomillashtirish, bozor munosabatlarini rivojlantirish, mulkni davlat tasarrufidan chiqarish jarayonlarini chuqurlashtirish va shu sohaga xorijiy sarmoyalarni jalb etish maqsadida:

1. O‘zbekiston Respublikasi Aloqa vazirligi tugatilsin hamda uning negizida O‘zbekiston pochta va telekommunikatsiyalar agentligi tashkil qilinsin.

2. O‘zbekiston pochta va telekommunikatsiyalar agentligi zimmasiga quyidagi asosiy vazifalarni hal etish yuklatilsin:

mahalliy, shaharlararo, xalqaro telefon-telegraf va pochta aloqasini, radioaloqa, radioeshittirish va televideniye tarmoqlarini vujudga keltirish, ularning faoliyati va xizmatlar ko‘rsatish sohasidagi siyosatni ishlab chiqib, amalga oshirish;

pochta aloqasi va telekommunikatsiyalar sohasidagi faoliyatni yo‘naltirish hamda boshqarishni takomillashtirish, marketing tadqiqotlari va monitoringni tashkil qilish, bozor islohotlarini chuqurlashtirish, bu sohada raqobat muhitini yaratish va rivojlantirish;

telekommunikatsiya tizimlari hamda texnologiyalarini rivojlantirish va takomillashtirishga xorijiy sarmoyalarni jalb etish uchun shart-sharoitlarni vujudga keltirish;

telekommunikatsiya texnologiyalarini yaratish, joriy etish va foydalanish bo‘yicha yagona shartlar hamda talablarni tasdiqlash, shuningdek mazkur shartlar va talablarga rioya etilishi ustidan davlat nazoratini tashkil qilish;

iste’molchilarning huquqlarini himoya qilishga doir chora-tadbirlarni amalga oshirish, milliy telekommunikatsiya tarmog‘i faoliyatining axborot sohasidagi xavfsizligini ta’minlash.

3. O‘zbekiston Respublikasi Davlat mulki qo‘mitasi xamda umumiy foydalanishdagi telekommunikatsiya va pochta tarmoqlarining ishlashini ta’minlaydigan xo‘jalik yurituvchi subyektlarning “O‘zbekiston pochtasi” davlat-aksiyadorlik kompaniyasini tashkil qilish to‘g‘risidagi taklifi ma’qullansin.

4. O‘zbekiston pochta va telekommunikatsiyalar agentligi huzurida pochta va telekommunikatsiyalarni davlat yo‘li bilan qo‘llab-quvvatlovchi budjetdan tashqari Jamg‘arma tashkil qilinib, quyidagilar shu Jamg‘arma faoliyatining asosiy vazifalari va yo‘nalishlari sifatida belgilab qo‘yilsin:

pochta aloqasi hamda telekommunikatsiyalar tarmoqlari va vositalarini rivojlantirish, texnika bilan qayta qurollantirish va qaytadan tiklash sohasidagi ustuvor hamda ijtimoiy jihatdan ahamiyatli loyihalar va ilmiy-tadqiqot ishlarini moliyalash;

mutaxassislar tayyorlash va qayta tayyorlash tizimini rivojlantirishni moliyalashda qatnashish;

O‘zbekiston pochta va telekommunikatsiyalar agentligi mahkamasining faoliyatini, shuningdek uning tizimiga kiruvchi mustaqil daromad manbalariga ega bo‘lmagan telekommunikatsiya tizimlarini tartibga soluvchi, boshqaruvchi va nazorat qiluvchi davlat organlarining faoliyatini moliyalash.

5. Shu narsa belgilansinki, O‘zbekiston pochta va telekommunikatsiyalar agentligi tomonidan amaldagi qonunlarga muvofiq o‘z vakolati doirasida chiqariladigan normativ hujjatlar telekommunikatsiya va pochta aloqasi xizmati ko‘rsatuvchi yoki ulardan foydalanuvchi, shuningdek mulkchilik shakllaridan qat’i nazar telekommunikatsiya va pochta tizimlari hamda inshootlarini loyihalash va qurish ishlarini amalga oshiruvchi barcha yuridik va jismoniy shaxslar tomonidan ijro etish uchun majburiydir.

6. “O‘zbekiston pochtasi” davlat aksiyadorlik kompaniyasi tarkibiga kiruvchi davlat korxonalari va aksiyadorlik jamiyatlari 1998-yilning 1-yanvaridan boshlab asosiy faoliyat bo‘yicha foydadan soliq to‘lashdan 2 yil muddatga ozod qilinsin, bunda bo‘shab qolgan mablag‘lar ularning moddiy-texnika bazasini mustahkamlashga yo‘naltirilishi shart.

7. O‘zbekiston Respublikasi Adliya vazirligi bir oy muddatda O‘zbekiston Respublikasining qonunchiligiga ushbu Farmondan kelib chiqadigan o‘zgartish va qo‘shimchalar to‘g‘risidagi takliflarni kiritsin.

8. O‘zbekiston Respublikasi Vazirlar Mahkamasi ikki hafta muddat ichida O‘zbekiston pochta va telekommunikatsiyalar agentligi faoliyatini tashkil qilish masalalari bo‘yicha qaror tayyorlasin.