Yer va suv resurslaridan oqilona foydalanish, respublika aholisining guruchga boʻlgan ehtiyojini taʼminlash maqsadida Vazirlar Mahkamasi qaror qiladi:

1. Oʻzbekiston Respublikasi Makroiqtisodiyot va statistika vazirligi, Qishloq va suv xoʻjaligi vazirligi, Qoraqalpogʻiston Respublikasi Vazirlar Kengashi, viloyatlar hokimliklarining 2001-yilda sholi ekiladigan maydonlar, sholi yetishtirish va uni davlat resurslariga topshirish hajmlari toʻgʻrisidagi taklifiga 1-ilovaga muvofiq rozilik berilsin.

Oʻzbekiston Respublikasi Vazirlar Mahkamasining 2000-yil 25-maydagi 417-son qaroriga muvofiq Andijon, Buxoro, Jizzax, Qashqadaryo, Navoiy, Namangan, Samarqand va Fargʻona viloyatlari xoʻjaliklarida sholi ekishning maqsadga muvofiq emas deb eʼtirof etilgani maʼlumot uchun qabul qilinsin.

2. Oʻzbekiston Respublikasi Qishloq va suv xoʻjaligi vazirligi “Oʻzdonmahsulot” davlat-aksiyadorlik korporatsiyasi, Qishloq xoʻjaligi ilmiy-ishlab chiqarish markazi, Qoraqalpogʻiston Respublikasi Vazirlar Kengashi va viloyatlar hokimliklari bilan birgalikda 2001-yilda sholining yuqori hosilli, ertapishar navlarining qulay agrotexnik muddatlarda ekilishini taʼminlasinlar. Shu bilan birga sholi ekiladigan maydonlar suv bilan kafolatli taʼminlangan tumanlarda joylashtirilsin. Yer resurslaridan samarali foydalanish maqsadida sholini koʻchat usulida ekish texnologiyasi keng qoʻllansin, buning uchun mavjud maxsus texnika parkidan foydalanilsin.

3. Oʻzbekiston Respublikasi Qishloq va suv xoʻjaligi vazirligining Qoraqalpogʻiston Respublikasi va viloyatlarga 2001-yil hosilidan urugʻlik sholi yetishtirish va “Oʻzdonmahsulot” davlat-aksiyadorlik korporatsiyasi korxonalariga yetkazib berish boʻyicha 2-ilovaga muvofiq topshiriq belgilash toʻgʻrisidagi taklifi qabul qilinsin.

Belgilab qoʻyilsinki, urugʻchilik xoʻjaliklari davlat resurslariga tovarbop sholi sotishni faqat urugʻlik sholi gʻamlash topshirigʻi bajarilgandan keyingina amalga oshiradilar.

4. “Oʻzdonmahsulot” davlat-aksiyadorlik korporatsiyasi, Oʻzbekiston Respublikasi Qishloq va suv xoʻjaligi vazirligi Qoraqalpogʻiston Respublikasi Vazirlar Kengashi va viloyatlar hokimliklari bilan birgalikda tovarbop va urugʻlik sholi xarid qilish yuzasidan kontraktatsiya shartnomalari tuzilishini 2001-yil 1-fevralgacha taʼminlasinlar.

5. “Oʻzdonmahsulot” davlat-aksiyadorlik korporatsiyasi va Oʻzbekiston Respublikasi Moliya vazirligi huzuridagi Davlat ehtiyojlari uchun xarid qilinadigan qishloq xoʻjaligi mahsulotlarining hisob-kitob jamgʻarmasi 2001-yil 1-avgustgacha sholichilik xoʻjaliklariga tovarbop va urugʻlik sholi davlat xaridlari umumiy summasining 50 foizgachasi miqdorida bosqichma-bosqich avans berib turishni amalga oshirsinlar.

6. “Oʻzdonmahsulot” davlat-aksiyadorlik korporatsiyasiga sholichilik xoʻjaliklariga 2001-yil hosili uchun davlat resurslaridagi tovarbop sholidan 19,0 ming tonna urugʻlik berishga ruxsat etilsin.

7. Oʻzbekiston Respublikasi Moliya vazirligi Qishloq va suv xoʻjaligi vazirligi bilan birgalikda tovar va urugʻlik uchun xarid qilinadigan sholining xarid (shartnomaviy) narxlari boʻyicha 2001-yil 1-avgustgacha taklif kiritsin.

8. Mazkur qarorning bajarilishini nazorat qilish Oʻzbekiston Respublikasi Prezidentining Davlat maslahatchisi I.H. Joʻrabekov va Oʻzbekiston Respublikasi Bosh vazirining oʻrinbosari T. Xoltoyev zimmasiga yuklansin.