LexUZ sharhi
Mazkur Farmon O‘zbekiston Respublikasi Prezidentining 2020-yil 27-sentabrdagi PF-6075-sonli “O‘z ahamiyatini yo‘qotgan qonunchilik hujjatlarini qayta ko‘rib chiqish tizimini joriy etish orqali mamlakatda ishbilarmonlik muhitini yaxshilash chora-tadbirlari to‘g‘risida”gi Farmoniga asosan o‘z kuchini yo‘qotgan.
Iste’mol mollari va xizmatlariga narxlar oshib borayotgan sharoitda respublika aholisini ijtimoiy himoya qilish maqsadida:
1. O‘qituvchilar, tarbiyachilarning, o‘rta maxsus va hunar-texnika bilim yurtlari muallimlarining, professor-o‘qituvchilar tarkibining, shifokorlar, ilmiy xodimlarning ish haqi 1,8 baravar, budjet hisobidagi boshqa tashkilotlar va muassasalar xodimlarining ish haqi — 1,5 baravar oshirilsin.
2. Ish haqini oshirish bilan bog‘liq qo‘shimcha xarajatlarning 25 foizi budjetdagi muassasalar va tashkilotlar smetalari bo‘yicha umumiy sarf-xarajatlarni qisqartirish hisobiga ta’minlansin.
3. Oliy o‘quv yurtlari talabalarining, aspirantlarning, doktorantlarning stipendiyalari, kiyim-bosh va ovqat bilan ta’minlanmaydigan hunar-texnika bilim yurtlari hamda texnikumlar o‘quvchilarining stipendiyalari 1,5 baravar ko‘paytirilsin. Imtiyozli ovqatlanish uchun har oylik qo‘shimcha to‘lovlarning avvalgi miqdorlari hamda talabalarning oshxonalari va bufetlarida tushlik ovqatlarning qiymatidan 50 foizli chegirmalar saqlab qolinsin.
LexUZ sharhi
3-bandning imtiyozli ovqatlanish uchun oylik qo‘shimcha haq to‘lashga oid qismi O‘zbekiston Respublikasi Prezidentining 1992-yil 25-avgustdagi PF-458-son Farmoniga muvofiq o‘z kuchini yo‘qotgan.
(4, 5, 6-bandlar O‘zbekiston Respublikasi Prezidentining 1992-yil 25-avgustdagi PF-458-son Farmoni bilan o‘z kuchini yo‘qotgan — Oliy Kengash Axborotnomasi, 1992-y., 10-son, 414-modda)
7. Aholi daromadlarining darajasini to‘g‘rilab olish maqsadida oyiga 5000 so‘mgacha bo‘lgan ish haqidan daromad solig‘i miqdorlarini kamaytirish zarur deb hisoblansin va oyiga 5000 so‘mdan oshadigan ish haqidan olinadigan daromad solig‘ining tegishli miqdorda oshirilishi joriy qilinsin.
O‘zbekiston Respublikasining Vazirlar Mahkamasi O‘zbekiston Respublikasining fuqarolaridan, ajnabiy fuqarolaridan, va fuqaroligi bo‘lmagan shaxslardan daromad solig‘i olish to‘g‘risidagi qonunni o‘zgartirish haqida O‘zbekiston Respublikasining Oliy Kengashiga takliflar kiritsin.
8. Respublika vazirliklari, idoralari, uyushmalari, konsernlari, korxonalari va xo‘jaliklari mehnat unumdorligini o‘stirish va ishlab chiqarish (ishlar va xizmatlar)ining hajmlarini oshirish hisobiga ushbu Farmonda belgilangan minimumni e’tiborga olgan holda ishlovchilarining maoshi yanada oshirilishini ta’minlasinlar.
9. O‘zbekiston Respublikasi Prezidenti huzuridagi Vazirlar Mahkamasi ushbu Farmonni ro‘yobga chiqarishga oid tashkiliy chora-tadbirlarni ko‘zda tutuvchi qaror qabul qilsin.
10. O‘zbekiston Respublikasining Adliya vazirligi bir oy muddat ichida amaldagi qonunlarni mazkur Farmonga muvofiq holga keltirish to‘g‘risidagi takliflarni tayyorlasin.
11. Farmonning bajarilishini nazorat qilish O‘zbekiston Respublikasi Prezidenti huzuridagi Vazirlar Mahkamasining zimmasiga yuklansin.