Zamonaviy energiya tejovchi texnologiyalarni joriy etish hisobiga generatsiya quvvatlarini yanada rivojlantirish, mamlakat energiya tizimlari ishlashining ishonchliligini oshirish va xavfsizligini kuchaytirish, respublika iste’molchilarini elektr energiyasi bilan barqaror ta’minlash maqsadida:

1. Yaponiya xalqaro hamkorlik agentligi tomonidan “450 MVt quvvatga ega ikkinchi bug‘-gazli qurilmaning qurilishi bilan Navoiy IESni kengaytirish” loyihasini amalga oshirish uchun 40 yil muddatga, 10 yillik imtiyozli davrni o‘z ichiga olgan holda, 34 877 mln. yapon iyenasi miqdorida qarz berilgani ma’lumot uchun qabul qilinsin.

2. Belgilansinki:

“O‘zbekenergo” DAK mazkur loyihaning o‘z vaqtida va to‘liq amalga oshirilishi, shuningdek, Yaponiya xalqaro hamkorlik agentligining qarz mablag‘laridan maqsadli va samarali foydalanilishi uchun mas’ul bo‘lgan ijro etuvchi organ hisoblanadi;

O‘zbekiston Respublikasi Tashqi iqtisodiy faoliyat milliy banki Yaponiya xalqaro hamkorlik agentligining qarziga xizmat ko‘rsatuvchi moliyaviy agent hisoblanadi;

Yaponiya xalqaro hamkorlik agentligining qarzini uzish, shuningdek, u bo‘yicha foizlar, komissiyalarni to‘lash bilan bog‘liq sarf-xarajatlar “O‘zbekenergo” DAKning o‘z mablag‘lari hisobidan amalga oshiriladi.

3. O‘zbekiston Respublikasi moliya vaziriga Yaponiya xalqaro hamkorlik agentligi bilan qarz bitimini hamda O‘zbekiston Respublikasi Tashqi iqtisodiy faoliyat milliy banki va “O‘zbekenergo” DAK bilan Yaponiya xalqaro hamkorlik agentligining qarzidan foydalanish tartibi to‘g‘risidagi agentlik bitimini O‘zbekiston Respublikasi Hukumati nomidan imzolash vakolati berilsin.

4. O‘zbekiston Respublikasi Adliya vazirligi O‘zbekiston Respublikasi Hukumati bilan Yaponiya xalqaro hamkorlik agentligi o‘rtasidagi qarz bitimi bo‘yicha belgilangan tartibda huquqiy xulosa bersin.

5. O‘zbekiston Respublikasi Tashqi iqtisodiy faoliyat milliy banki Yaponiya xalqaro hamkorlik agentligi qarzidan foydalanish maqsadida Yaponiyaning “Tokio-Mitsibushi UFJ. Ltd.” banki bilan banklararo bitim tuzsin.

6. “O‘zbekenergo” DAK uch oy muddatda loyihaning texnik-iqtisodiy asosini ishlab chiqilishi, vakolatli ekspertiza organlari bilan kelishilgan holda, belgilangan tartibda tasdiqlash uchun O‘zbekiston Respublikasi Vazirlar Mahkamasiga kiritilishini ta’minlasin.

7. Ushbu qarorning ijrosini nazorat qilish O‘zbekiston Respublikasi Bosh vazirining birinchi o‘rinbosari R.S. Azimov va O‘zbekiston Respublikasi Bosh vazirining o‘rinbosari G‘.I. Ibragimov zimmasiga yuklansin.