Sanoatda va konchilikda ishlarning bexatar olib borilishini boshqarishni yanada takomillashtirish va nazorat qilish samaradorligini ta’minlash maqsadida:

1. Sanoatda va konchilikda ishlarning bexatar olib borilishini nazorat qilish davlat qo‘mitasi Sanoatda va konchilikda ishlarning bexatar olib borilishini nazorat qilish agentligiga aylantirilsin.

Belgilab qo‘yilsinki, Agentlik qayta tashkil etilayotgan O‘zbekiston Respublikasi Sanoatda va konchilikda ishlarning bexatar olib borilishini nazorat qilish davlat qo‘mitasining huquqiy vorisi hisoblanadi.

2. Quyidagilar Agentlikning asosiy vazifalari etib belgilansin:

O‘zbekiston Respublikasi hududida barcha yuridik va jismoniy shaxslar tomonidan sanoatda ishlarning bexatar olib borilishi bo‘yicha qonunchilik hamda me’yoriy-texnik hujjatlar talablariga, yer osti boyliklaridan foydalanish va ularni muhofaza qilish, mineral xomashyoni qayta ishlash va metallurgiya jihatidan saralash, shuningdek, kon ishlarining geologiya-marksheyder ta’minoti talablariga rioya qilinishi ustidan davlat nazoratini tashkil etish va amalga oshirish;

o‘ta xavfli ishlab chiqarish bilan bog‘liq korxonalarning (mulkchiligining tashkiliy-huquqiy shaklidan qat’i nazar) texnika xavfsizligi bo‘yicha me’yoriy hujjatlarini belgilangan tartibda ishlab chiqish va tasdiqlash;

O‘zbekiston Respublikasining kon-qutqaruv xizmatlariga tezkor va uslubiy rahbarlik qilish.

3. O‘zbekiston Respublikasi Adliya vazirligi bir oy muddatda O‘zbekiston Respublikasining qonunchilik hujjatlariga ushbu Farmondan kelib chiqadigan o‘zgartirishlar va qo‘shimchalar kiritish to‘g‘risida takliflar kiritsin.

4. O‘zbekiston Respublikasi Vazirlar Mahkamasi bir hafta muddatda Sanoatda va konchilikda ishlarning bexatar olib borilishini nazorat qilish agentligi faoliyatini tashkil etish masalalari bo‘yicha qaror qabul qilsin.