Davlat tasarrufidan chiqarish va xususiylashtirish jarayonlarini yanada chuqurlashtirish, respublikaning matbaa tarmogʻini rivojlantirishga, texnika bilan qayta qurollantirish va yangilashga xorijiy sarmoyalarni keng koʻlamda jalb etish uchun qulay shart-sharoitlarni vujudga keltirish asosida axborot-noshirlik faoliyatini tashkil qilishni takomillashtirish maqsadida:

1. Oʻzbekiston Respublikasi Hukumatining 2000-yil 3-apreldagi 159-f qarori bilan tuzilgan Ishchi komissiyasining, Oʻzbekiston Respublikasi Davlat mulki qoʻmitasining Oʻzbekiston Respublikasi Prezidenti devoni Ishlar boshqarmasi huzuridagi “Sharq” nashriyot-matbaa konsernini “Sharq” nashriyot-matbaa aksiyadorlik kompaniyasi etib oʻzgartirish toʻgʻrisidagi taklifi qabul qilinsin.

2. Quyidagilar “Sharq” nashriyot-matbaa aksiyadorlik kompaniyasi faoliyatining asosiy vazifalari va yoʻnalishlari etib belgilansin:

respublikada nashriyot-matbaa ishini yanada rivojlantirish va sifatini oshirish;

aholining yuqori sifatli matbuot mahsulotiga boʻlgan talab-ehtiyojlarini toʻliqroq qondirish, nashriyot-matbaa mahsuloti bozorini shakllantirishda faol ishtirok etish;

xoʻjalik yuritishning bozor usullarini keng joriy etish, kompaniyaning moliyaviy-iqtisodiy ahvoli;

matbaa ishlab chiqarishini texnika bilan qayta qurollantirish va yangilashga xorijiy sarmoyalarni jalb etish boʻyicha chora-tadbirlar kompleksini amalga oshirish, ilgʻor xorijiy texnologiyalarni matbaa sohasiga tatbiq qilish.

3. Belgilab qoʻyilsinki, “Sharq” nashriyot-matbaa aksiyadorlik kompaniyasi:

ochiq turdagi aksiyadorlik jamiyati shaklida taʼsis etiladi va u yuridik shaxs sanaladi;

“Sharq” nashriyot-matbaa konserni tomonidan tuzilgan shartnomalar va majburiyatlar boʻyicha huquqiy voris hisoblanadi.

4. “Sharq” nashriyot-matbaa konsernini tashkil etish toʻgʻrisida” Oʻzbekiston Respublikasi Prezidentining 1991-yil 5-noyabrdagi PF-286-son Farmoni oʻz kuchini yoʻqotgan deb hisoblansin.

5. Oʻzbekiston Respublikasi Vazirlar Mahkamasi bir hafta muddatda ushbu Farmonni amalga oshirish yuzasidan qaror qabul qilsin.