Oʻzbekiston Respublikasi Hukumati va Rossiya Federatsiyasi Hukumati, bundan keyin Tomonlar deb ataluvchilar,

Oʻzbekiston Respublikasi va Rossiya Federatsiyasi xalqlarining insonparvarlik va madaniy qadriyatlar bilan oʻzaro tanishishga, ular oʻrtasidagi anʼanaviy aloqalarni saqlash, oʻzaro boyitish va rivojlantirishga boʻlgan qiziqishlarini hisobga olib,

jamoatchilikning Oʻzbekiston Respublikasida va Rossiya Federatsiyasida siyosiy, iqtisodiy, madaniy, ilmiy va taʼlim jarayonlari rivojlanishi toʻgʻrisida xabardorligini oshirishga katta ahamiyat berib,

1992-yil 30-maydagi Oʻzbekiston Respublikasi va Rossiya Federatsiyasi oʻrtasida davlatlararo munosabatlar, doʻstlik va hamkorlik asoslari toʻgʻrisida Shartnoma, 1993-yil 19-martdagi madaniyat, fan, texnika, taʼlim, sogʻliqni saqlash, axborot, sport va turizm sohalaridagi hamkorlik toʻgʻrisidagi Bitim, boshqa ikki tomonlama hujjatlar ruhida ikki tomonlama insonparvarlik, madaniy, ilmiy-texnikaviy va axborot aloqalarini rivojlantirishga koʻmaklashishga intilib,

quyidagilar toʻgʻrisida kelishib oldilar:

Tomonlar Moskvada Oʻzbekiston Respublikasi axborot, madaniyat-maʼrifat markazini hamda Toshkentda Rossiya fan va madaniyat markazini, bundan keyin Markazlar deb ataladi, taʼsis etadilar.

Tomonlar oʻzaro kelishuv asosida ikki davlatning boshqa shaharlarida Markazlarining filiallarini ochishlari mumkin.

Markazlar va ular filiallarining faoliyatlari xalqaro huquqning umum tan olingan normalari, ushbu Bitim qoidalari asosida va Markazlar joylashgan davlatlarning qonunlarini hisobga olgan holda amalga oshiriladi.

Oʻzbekiston Respublikasining Moskvadagi axborot, madaniyat-maʼrifat markazi va uning filiallari oʻz faoliyatlarini Oʻzbekiston Respublikasining Rossiya Federatsiyasidagi diplomatik vakolatxonasi boshligʻi rahbarligida amalga oshiradi.

Rossiya fan va madaniyat markazi va uning filiallari oʻz faoliyatlarini Rossiya Federatsiyasining Oʻzbekiston Respublikasidagi diplomatik vakolatxonasi boshligʻining va koʻrsatilgan Markaz va uning filiallari ishini taʼminlaydigan Rossiya Federatsiyasi Hukumati huzuridagi Rossiya xalqaro ilmiy va madaniy hamkorlik markazi rahbarligida amalga oshiradi.

Oʻz faoliyatini amalga oshirish maqsadida Markazlar Markaz joylashgan davlatning vazirliklari, boshqa davlat muassasalari va tashkilotlari, mahalliy hokimiyat organlari, uyushmalari, assotsiatsiyalari, jamgʻarmalari, shuningdek alohida fuqarolari bilan toʻgʻridan-toʻgʻri aloqalar oʻrnatishlari mumkin.

Markaz joylashgan davlat Tomonining roziligi bilan Markazlar oʻz binolaridan tashqarida faoliyatlarini amalga oshirishlari mumkin.

Quyidagilar Markazlarning asosiy vazifalari hisoblanadi:

ikki tomonlama insonparvarlik, madaniy, ilmiy-texnikaviy, axborot hamkorlik dasturlarini bajarishda qatnashish;

Markaz joylashgan davlat jamoatchiligini oʻz mamlakatining tarixi va madaniyati, ichki va tashqi siyosati va uning ijtimoiy va iqtisodiy hayotida roʻy berayotgan hodisalar bilan tanishtirish;

ikki davlat ijodiy, madaniy-maʼrifiy, ilmiy va professional tashkilotlari oʻrtasida aloqalarni oʻrnatishga va hamkorlikni kengaytirishga koʻmaklashish;

ikki davlat tillarini oʻrganishda koʻmaklashish;

ikkala davlat ilmiy-texnikaviy va madaniy hamkorligini kengaytirish uchun qulay shart-sharoitlar yaratish maqsadida Markazlarning axborot imkoniyatlaridan foydalanish;

Oʻzbekiston Respublikasi va Rossiya Federatsiyasi shaharlari va oʻlkalari oʻrtasida sheriklik munosabatlarini oʻrnatish va rivojlantirishda koʻmaklashish;

madaniyat, fan va texnika sohasida axborot-reklama ishlarini tashkil etish.

Markazlar oʻz zimmalariga yuklangan vazifalarga muvofiq:

oʻz mamlakatlarining madaniy, ilmiy-texnikaviy, jamoat-siyosiy va iqtisodiy rivojlanishi masalalari boʻyicha axborot-maʼlumot fondlari va banklarini tashkil qiladilar, xalqaro, insonparvarlik, ilmiy, madaniy va amaliy hamkorlik muammolari boʻyicha konferensiya, simpozium, seminar, maslahatlashishlar oʻtkazadilar;

Markaz joylashgan mamlakatning manfaatdor tashkilotlariga, alohida fuqarolariga oʻz davlatlarining madaniy-maʼrifiy, ilmiy taʼlim va professional tashkilotlari bilan aloqalar oʻrnatish masalalari boʻyicha axborot va maslahat xizmatini amalga oshiradilar;

Markaz joylashgan davlatda doimiy yashovchi vatandoshlar oʻrtasida madaniy-maʼrifiy va axborot ishini amalga oshiradilar, ularning birlashmalari bilan aloqada boʻladilar, professional turistik guruhlar bilan oʻzaro almashishda koʻmaklashadilar;

badiiy jamoalarning va alohida ijrochilarning chiqishlarini, tele- va kino tomoshalarni tashkil qiladilar;

eksponatlar, fotosuratlar, badiiy asarlar va xalq ijodkorligi buyumlari, kitob koʻrgazmalarini oʻtkazadilar;

oʻz faoliyatining turli yoʻnalishlari boʻyicha jamoat kengashlari va klublarini tashkil qiladilar, ularning ishlariga mahalliy jamoatchilikning va ishbilarmon doiralarning nufuzli vakillarini, taniqli fan va madaniyat arboblarini, shuningdek ikkala davlat xorijiy vakolatxonalari, tashkilotlari, ommaviy axborot vositalari vakillarini jalb etadilar;

davlatlari xalqlarining tili va madaniyatini oʻrganish kurslarini, Markaz joylashgan davlat fuqarolari uchun oʻquv stajirovkalarini tashkil qiladilar, mahalliy ilmiy va oʻquv muassasalarida ishlayotgan ilmiy xodimlarga hamda til va adabiyot oʻqituvchilariga uslubiy yordam koʻrsatadilar;

Markaz joylashgan davlat fuqarolarini oʻz davlatlariga oʻqishga va stajirovkaga tanlash va yuborishda koʻmaklashadilar;

oʻz davlatlarining Markaz joylashgan davlatdagi oʻquv yurtlari bitiruvchilarining uyushma va klublarining ishiga koʻmaklashadilar, shunday assotsiatsiya va klublarning bu oʻquv yurtlari bilan aloqalarini qoʻllashga yordam koʻrsatadilar, shuningdek Markaz joylashgan davlatda bitiruvchilar uchun malaka oshirish boʻyicha seminarlar tashkil qiladilar;

Markaz joylashgan davlatning manfaatdor tashkilotlari va alohida fuqarolari uchun Markazlarda kutubxonalar va boshqa axborot xizmatlari ishini taʼminlaydilar;

Markaz joylashgan davlatning doʻstlik assotsiatsiyalar va jamiyatlari, oʻquv, madaniy va ilmiy muassasalari, uchinchi mamlakatlarning madaniy-axborot markazlari bilan hamkorlik qiladilar.

Markaz joylashgan davlat qoidalarini hisobga olgan holda Markazlar ushbu Bitim maqsadiga javob beruvchi faoliyatning hamda boshqa turlarini amalga oshirishlari mumkin.

Markaz joylashgan davlatning qonunlariga muvofiq Markazlar yuridik shaxs huquqlaridan foydalanadilar.

Tomonlar Markaz oʻtkazadigan tadbirlarga jamoatchilikning toʻsiqsiz kirishini taʼminlaydilar.

Tomonlar oʻzarolik asosida markazlar xodimlari va binolarining, shuningdek ular oʻtkazadigan tadbirlarning xavfsizligini taʼminlash boʻyicha zarur choralarni koʻradilar.

Markazlarning faoliyati notijorat asosda amalga oshiriladi. Ayni bir vaqtda Markazlar oʻz xarajatlarini qisman qoplash uchun:

oʻzlari tashkil qiladigan tadbirlarda qatnashish, til oʻrganish kurslarida oʻqitish va faoliyatning boshqa turlari uchun haq olishlari;

vaqtli nashrlar, katalog, afisha, dastur, kitob, kartina va reproduksiyalarni, axborotni yozib olish usulidan qatʼi nazar, audiovizual, shuningdek didaktik materiallarni, ular uyushtiradigan tadbirlar bilan bevosita bogʻliq boʻlgan boshqa buyumlarni, ushbu buyumlar ularni turilgan mamlakatning savdo tarmoqlari orqali sotmaslik va bu savdo faoliyati qoidalariga zarar etkazmasligi, shuningdek intellektual mulk egalari huquqlarini buzmasligi sharti bilan, sotishlari;

Markaz binolarida unga keluvchilarga xizmat koʻrsatish uchun kitob doʻkonlari, restoranlar, kafe, kafeteriylar va sovgʻa doʻkonlariga, shuningdek Markaz mehmonlari vaqtincha yashash uchun mehmonxona binolariga ega boʻlishlari;

Markazga qarashli binolarni ijaraga berishlari mumkin.

Tomonlar oʻzarolik shartlarida qabul qiluvchi davlat qoidalariga muvofiq bir-birlariga Markazlar uchun qulay er uchastkalari berilishiga, shuningdek binolar ijaraga berishiga, olinishiga yoki qurilishiga koʻmaklashadilar.

Markazlarning binolarini loyihalash, qurish va obodonlashtirish boʻyicha ishlarni, ularni qurish yoki obodanlashtirishga ruxsat olingandan keyin, Markaz joylashgan davlatning shaharsozlik qoidalariga muvofiq holda, yuborayotgan tomon amalga oshiradi. Yuboruvchi Tomon tegishli ishlarni bajarish uchun pudratchilarni mustaqil ravishda tayinlash huquqiga ega.

Markazlar va ularning xodimlari uchun soliq rejimi oʻzarolik prinsipini hisobga olgan holda Markaz joylashgan davlat qonunlari bilan belgilanadi.

Tomonlardan har biri oʻz Markazining xodimlarini tayinlaydi. Ushbu xodimlar yuborayotgan davlat, Markaz joylashgan davlat yoki uchinchi davlat fuqarolaridan iborat boʻlishi mumkin. Uchinchi davlat fuqarosining Markaz joylashgan davlatning vakolatli organlari bilan muvofiqlashtirilishi kerak.

Markazlarning direktorlari va ularning oʻrinbosarlari yuboruvchi davlat elchixonasining diplomatik xodimlari boʻlishlari mumkin.

Markazlar xodimlarining soni oʻzaro ahdlashuv boʻyicha belgilanadi.

Tomonlar Markazlarni xodimlar bilan butlash toʻgʻrisida, shuningdek xodimlarning vazifasini bajarishga kirishishi va ular ishining toʻxtatilishi toʻgʻrisida bir-birlarini oʻzaro xabardor qiladilar.

Markazlarning yuboruvchi davlat fuqarolari boʻlgan va joylashgan mamlakatda doimiy yashamaydigan xodimlariga va ularning oila aʼzolariga yuboruvchi davlatning mehnat toʻgʻrisidagi qonunlari va ijtimoiy taʼminot rejimi tatbiq etiladi.

Qabul qiluvchi Tomon yuboruvchi Tomon Markazi xodimlariga hamda ular bilan birga yashovchi oila aʼzolariga markazda ishlash muddati davrida ularga tegishli koʻchirish mumkin boʻlgan, shu jumladan transport vositalarini, bojxona toʻlovlaridan ozod qilgan holda, olib kelish va olib ketish uchun ruxsat beradi, bojxona rasmiylashtirilishi, saqlash va shu kabi boshqa xizmatlar uchun yigʻimlar bundan mustasno. Qayd etilgan buyumlar faqat bojxona toʻlovlari toʻlangan va turilgan davlat qonunlari bilan belgilangan boshqa talablar bajarilgan taqdirda begonalashtirilishi mumkin. Ushbu modda koʻzda tutilgan imtiyozlarning amal qilishi Markaz joylashgan davlatning fuqarolari boʻlgan yoki uning hududida doimiy yashaydigan shaxslar boʻlgan Markaz xodimlariga taalluqli boʻlmaydi.

Har bir Tomon oʻzarolik asosida boshqa Tomon Markazi xodimlari aʼzolariga, shuningdek ularning birga yashaydigan oila aʼzolariga uning davlati qonunlarida koʻzda tutilgan vizalar va qabul qiluvchi davlatda yashashga ruxsatnomalar berish masalalari boʻyicha imtiyozlarni beradi.

Tomonlardan har biri zarurat boʻlganda boshqa Tomonga uning Markazining xodimlari uchun turar joy tanlashda koʻmaklashadi.

Ushbu Bitimni talqin qilish va qoʻllash bilan yuzaga keladigan masalalar muzokaralar yoʻli bilan hal qilinadi.

Ushbu Bitim Tomonlarning uning kuchga kirishi uchun zarur boʻlgan tegishli davlat ichki protseduralarini bajarganliklarini tasdiqlovchi oxirgi yozma bildirishnoma sanasidan boshlab kuchga kiradi.

Ushbu Bitim besh yil muddatga tuziladi. Tomonlardan biri oʻzining Bitimning amal qilishini toʻxtatish niyati toʻgʻrisida tegishli davr tugashidan kamida olti oy oldin boshqa Tomonni yozma ravishda xabardor qilmaguncha uning amal qilishi keyingi besh yillik davrlarga oʻz-oʻzidan uzaytiriladi.

Moskva shahrida 1998-yil 6-mayda ikki nusxada, har biri oʻzbek va rus tillarida tuzildi, ikkala matn bir xil kuchga ega.