Oʻzbekiston Respublikasi Hukumati va Turkiya Jumhuriyati Hukumati, bundan keyin Ahdlashuvchi Tomonlar deb ataluvchilar,

oʻz davlatlari oʻrtasida barqaror va balansli asosda oʻzaro manfaatli iqtisodiy va tijoriy aloqalarini ragʻbatlantirish va diverenfikatsiyalashtirishni istab,

ikkala mamlakatning iqtisodiy potensialidan samarali foydalanish uchun qulay sharoitlar yaratishga alohida ahamiyat berib,

xalqaro huquq, tenglik, umumiy foyda va oʻzaro hurmat prinsiplari doirasida oʻzlarining iqtisodiy va tijorat aloqalarini yanada mustahkamlashga intilib,

quyidagilar toʻgʻrisida kelishib oldilar:

Ahdlashuvchi Tomonlar amaldagi oʻz milliy qonunlariga muvofiq mavjud imkoniyatlar doirasida uzoq muddatli, barqaror va balansli asosda oʻz iqtisodiy aloqalarini rivojlantirish va diversifikatsiyalash uchun zaruriy tadbirlar koʻradilar.

Ahdlashuvchi Tomonlar Tariflar va Savdo boʻyicha Bosh Bitim va Jahon Savdo Tashkiloti tuzilishi toʻgʻrisida Bitimga muvofiq har ikki mamlakat oʻrtasida tovarlar importi va eksportiga nisbatan qoʻllaniladigan boj toʻlovlari va boshqa yigʻimlarga nisbatan bir-birlariga eng koʻp qulaylik yaratish rejimini taqdim etadilar.

Qoidalar quyidagilarga nisbatan tatbiq etilmaydi:

a) chegaraoldi va sohil savdosini yengillashtirish maqsadida qoʻshni davlatlar uchun yaratilgan yoki yaratiladigan imtiyozlar;

b) Ahdlashuvchi Tomonlardan biri qatnashchisi boʻlgan yoki kelgusida qatnashchisi boʻlishi mumkin boʻlgan erkin savdo zonalari, bojxona uyushmalari toʻgʻrisidagi bitimlar yoxud boshqa mintaqaviy bitimlar doirasida uchinchi mamlakatlarga berilgan yoki beriladigan imtiyozlar;

v) savdo va iqtisodiy hamkorlik sohasida maxsus sharoitlar yaratish maqsadida rivojlanayotgan mamlakatlarga berilgan yoki beriladigan imtiyozlar.

Ahdlashuvchi Tomonlar savdo bitishuvlarining hamma kanal va vositalaridan foydalangan holda hamda oʻzlarining amaldagi tegishli qonunlariga muvofiq har ikki mamlakat oʻrtasidagi savdo aloqalari va xizmatlarni ragʻbatlantirish, kengaytirish hamda ularga koʻmaklashish uchun barcha kuchlarni safarbar etadilar.

Agar oʻzga tarzda kelishilgan boʻlmasalar, ikki mamlakat oʻrtasidagi savdo va xizmatlarga taalluqli barcha toʻlovlar har bir Ahdlashuvchi Tomonning amalda boʻlgan valyutani tartibga solish qoidalari va boshqa tegishli qonunlarga muvofiq konvertatsiya qilinadigan valyutalarda amalga oshiriladi.

Ahdlashuvchi Tomonlar oʻzlarining tegishli tashkilot, kompaniya va tadbirkorlarini ular oʻrtasidagi kontraktlar vositasida har bir mamlakatda amalda boʻlgan milliy qonunlarga muvofiq savdo almashuvi va xizmatlarni yanada rivojlantirish va diversifikatsiyalash borasida qoʻllab-quvvatlaydilar.

Oʻzaro iqtisodiy va tijorat faoliyatlarini rivojlantirishda bank ishining muhim ahamiyatga ega ekanligini eʼtiborga olgan holda Ahdlashuvchi Tomonlar moliya va bank ishi sohasida tegishli tashkilotlar oʻrtasidagi hamkorlikni ragʻbatlantirishga rozi boʻldilar.

Ikki mamlakat oʻrtasidagi toʻlovlar va tovar almashuvini yengillashtirish maqsadida, ikkala mamlakatda amalda boʻlgan qonun va qoidalarga muvofiq, Ahdlashuvchi Tomonlar, boshqa Tomonning soʻrovi boʻyicha, ikki mamlakat oʻrtasidagi savdo va iqtisodiy aloqalarni rivojlantirish uchun oʻzlarining barcha tegishli maʼlumotlarini taqdim etadilar.

Ikki mamlakat oʻrtasidagi savdoni yanada rivojlantirish maqsadida Ahdlashuvchi Tomonlar Ќoʻshma oʻzbek-turk ishbilarmonlar kengashi faoliyatini qoʻllab-quvvatlashga hamda oʻz ishbilarmon kishilari oʻrtasidagi aloqalarni va mamlakatlariga tijorat vakillari, guruhlari hamda delegatsiyalarining tashriflarini ragʻbatlantirishga va yengillashtirishga rozi boʻldilar.

Shuningdek, Ahdlashuvchi Tomonlar xalqaro yarmarkalar, koʻrgazmalar va oʻz mamlakatlarida tashkil etiladigan boshqa faoliyatda ishtirok etishni ragʻbatlantirishga kelishdilar.

Ahdlashuvchi Tomonlar, oʻzlarining amaldagi qonunlariga muvofiq, mamlakatga import qilinadigan notijorat namunalarni hamda koʻrgazmalar va yarmarkalar uchun vaqtincha import qilinadigan tovarlarni boj toʻlovlari va soliqlardan ozod qilishga kelishdilar.

Ahdlashuvchi Tomonlar oʻz mamlakatlari oʻrtasidagi hamkorlikni, ayniqsa sanoat, energetika, transport tashishlar, qishloq xoʻjaligi, togʻ-kon tarmogʻi, texnologiyalar, kontraktatsiya boʻyicha xizmatlar koʻrsatish hamda oʻzaro manfaatli boʻlgan boshqa sohalardagi hamkorlikni qoʻllab-quvvatlashga rozilik bildirdilar.

Ahdlashuvchi Tomonlar, bu xususda, amaldagi oʻz milliy qonunlari va xalqaro majburiyatlarga muvofiq iqtisodiy hamkorlikni rivojlantirish uchun qulay sharoitlar bilan taʼminlashga hamda diskriminatsion choralardan voz kechishga kelishdilar.

1995-yil 19-iyulda imzolangan Bitimga muvofiq tuzilgan Oʻzbek-turk hukumatlararo qoʻshma komissiyasi mazkur Bitimning bajarilishiga koʻmaklashadi hamda tijoriy va iqtisodiy aloqalarni yanada kengaytirish uchun ushbu Bitimni bajarish jarayonida yuzaga keladigan masalalarni koʻrib chiqadi.

Ushbu Bitimga muvofiq tuzilgan tijorat bitishuvlari yoki iqtisodiy aloqalardan kelib chiquvchi kelishmovchiliklar, agar Ahdlashuvchi Tomonlar kelishmovchiliklarni boshqa tinch yoʻllar vositasida hal etishga rozi boʻlmasalar, oʻzaro kelishuvga binoan xalqaro arbitrajga topshiriladi.

Har bir Ahdlashuvchi Tomon diplomatik kanallar orqali yozma xabarnoma yuborish yoʻli bilan ushbu Bitimni oʻzgartirish yoki qayta koʻrib chiqish uchun boshqa Tomonga soʻrov berishi mumkin.

Ushbu Bitim toʻxtatilgan holda uning qoidalari Bitim amalda boʻlgan davr mobaynida tuzilgan barcha kontraktlarga nisbatan qoʻllanilishini davom ettiradilar.

Ahdlashuvchi Tomonlar ushbu Bitim kuchga kirgan sanadan boshlab 1991-yil 19-dekabrdagi Oʻzbekiston Respublikasi va Turkiya Jumhuriyati oʻrtasida iqtisodiy va savdo hamkorligi toʻgʻrisida Bitim amal qilishining tugatilishi toʻgʻrisida kelishib oldilar.

Ahdlashuvchi Tomonlar diplomatik kanallar orqali bir-birlarini oʻzlarining tegishli milliy qonunlarga muvofiq ushbu Bitim kuchga kirishi uchun zarur boʻlgan ichki protseduralar bajarilganligi toʻgʻrisida xabardor qiladilar.

Ushbu Bitim bildirish protsedurasi tugatilishi kunidan eʼtiboran kuchga kiradi va besh yillik davr mobaynida amal qiladi.

Ahdlashuvchi Tomonlardan hech biri ushbu Bitimning amal qilish muddati toʻxtatiladigan sanadan kamida olti oy avval diplomatik kanallar orqali uning amal qilishini toʻxtatish niyati toʻgʻrisida boshqa Ahdlashuvchi Tomonni xabardor qilmasa, ushbu Bitim keyingi bir yillik davrlarga oʻz-oʻzidan uzaytiriladi.

Toshkent shahrida 1998-yil 13-aprelda, ikki nusxada, har biri oʻzbek, turk va ingliz tillarida tuzildi, barcha matnlar bir xil kuchga ega.

Talqin etishda kelishmovchiliklar boʻlgan holda ingliz tilidagi matn ustuvor hisoblanadi.