Respublikada naqd xorijiy valyuta muomalasining amaldagi tartibini takomillashtirish va tashqi aloqalarni rivojlantirish uchun qulay sharoit yaratish maqsadida:

1. 1998-yil 1-apreldan boshlab respublikadan tashqariga naqd xorijiy valyuta olib chiqib ketishning quyidagi tartibi belgilansin:

— rezidentlarga — 1500 AQSh dollariga teng miqdorda;

norezidentlarga — bojxonaga taqdim etilgan deklaratsiyaga muvofiq respublikaga keltirilgan valyuta miqdorida.

Koʻrsatilgan miqdordan ortiqcha naqd xorijiy valyutani olib ketishga Oʻzbekiston Respublikasi Markaziy banki yoki xorijiy valyuta bilan operatsiyalarni oʻtkazishga asosiy litsenziyasi boʻlgan vakolatli banklarning ruxsati bilan yoʻl qoʻyiladi.

2. Jismoniy shaxslar Oʻzbekiston Respublikasi rezidentlari va norezidentlariga 1998-yil 1-apreldan boshlab belgilangan tartibda bojxona deklaratsiyalarini toʻldirish sharti bilan 10000 AQSh dollariga teng miqdorda naqd xorijiy valyutani respublikaga erkin olib kelishiga ruxsat etilsin.

Naqd xorijiy valyuta belgilangan miqdordan ortiq olib kelingan taqdirda uning 10 ming AQSh dollaridan ziyod qismidan 1 foiz miqdorida boj toʻlovi olinadi.

3. Oʻzbekiston Respublikasining xorijiy valyuta bilan operatsiya oʻtkazishga asosiy litsenziyasi boʻlgan vakolatli banklariga jismoniy shaxslarga hisob raqamlari va omonatga qoʻyilgan naqd xorijiy valyutasini olgan taqdirda, shuningdek, xizmat safari xarajatlari uchun respublikadan xorijiy valyutani olib ketish huquqini tasdiqlaydigan hujjatlarni berishga ruxsat etilsin.

4. “Oʻzbekiston havo yoʻllari” milliy aviakompaniyasi va “Oʻzbekiston temir yoʻllari” davlat aksiyadorlik kompaniyasiga maxsus kassalar ochib, Oʻzbekiston Respublikasi norezidentlariga xalqaro yoʻlovchilarni tashishga erkin almashtiriladigan valyutaga bilet sotish huquqi berilsin.

5. Oʻzbekiston Respublikasi Davlat bojxona qoʻmitasi “Oʻzbekiston havo yoʻllari” milliy aviakompaniyasi bilan birgalikda aviatsiya transportida respublika hududi orqali oʻtadigan Oʻzbekiston Respublikasi norezidentlari uchun bojxona deklaratsiyasiga muvofiq, qoʻshimcha hujjat va maʼlumotnomalar talab qilmay, bojxona hujjatlarini rasmiylashtirish hamda naqd xorijiy valyutani olib kelish va olib ketish ustidan nazoratning soddalashtirilgan tartibini oʻrnatsin.

6. Oʻzbekiston Respublikasi Prezidentining 1996-yil 24-oktabrdagi “Respublikada naqd xorijiy valyuta muomalasini tartibga solish choralari toʻgʻrisida”gi Farmonining 3-bandi bekor qilinsin.

7. Oʻzbekiston Respublikasi Davlat bojxona qoʻmitasi, Markaziy banki, Moliya vazirligi va Adliya vazirligi amaldagi idoraviy meʼyoriy hujjat va yoʻriqnomalarni uch kun muddatda ushbu Farmon talablariga muvofiqlashtirsin.

8. Ushbu Farmonning bajarilishini nazorat qilish Oʻzbekiston Respublikasi Markaziy banki raisi F. Mullajonov va Oʻzbekiston Respublikasi Davlat bojxona qoʻmitasi raisi Oʻ. Komilov zimmasiga yuklansin.