O‘zbekiston Respublikasining “Xalqaro shartnomalar to‘g‘risida”gi Qonuniga muvofiq hamda Xalqaro valyuta jamg‘armasi bilan hamkorlikni kengaytirish maqsadida:

1. Ma’lumot uchun qabul qilinsinki, 2010-yilning 15-dekabridagi Xalqaro valyuta jamg‘armasi boshqaruvchilar Kengashining “Kvotalarni umumiy o‘n to‘rtinchi qayta ko‘rib chiqish va Ijro etuvchi kengashni isloh qilish” haqidagi 66-2-sonli Rezolyutsiyasiga muvofiq Jamg‘armaga a’zo davlatlar tomonidan ratifikatsiya qilinishi lozim bo‘lgan Ijro etuvchi kengashni isloh qilish to‘g‘risidagi Xalqaro valyuta jamg‘armasi Bitimi moddalariga o‘zgartish va qo‘shimchalar kiritish haqida qaror qabul qilingan.

2. 2010-yilning 15-dekabrida Xalqaro valyuta jamg‘armasi boshqaruvchilar Kengashining 66-2-sonli rezolyutsiyasi bilan ma’qullangan Ijro etuvchi kengashni isloh qilish to‘g‘risidagi Xalqaro valyuta jamg‘armasi Bitimi moddalariga kiritilgan tuzatishlar qabul qilinsin.

3. O‘zbekiston Respublikasi Bosh vazirining birinchi o‘rinbosari, moliya vaziri R.S. Azimov O‘zbekiston Respublikasi ushbu tuzatishlarni qabul qilgani to‘g‘risida Xalqaro valyuta jamg‘armasini xabardor qilsin.

4. O‘zbekiston Respublikasi Vazirlar Mahkamasi hamda tegishli vazirlik va idoralar rahbarlari ushbu tuzatishlar kuchga kirgandan keyin belgilangan tartibda O‘zbekiston Respublikasining majburiyatlari bajarilishi ustidan nazoratni ta’minlasinlar.

5. Mazkur qarorning ijrosini nazorat qilish O‘zbekiston Respublikasining Bosh vaziri Sh.M. Mirziyoyev zimmasiga yuklansin.