Respublikada Badiiy gimnastikani yanada rivojlantirish, iqtidorli bolalarni, ayniqsa qishloq joylardagi qizlarni, oʻquvchi yoshlarni Badiiy gimnastika bilan muntazam shugʻullanishga faol jalb etish, ularning safidan mamlakat terma jamoalarining ishonchli zaxirasini shakllantirish maqsadida:

1. Oʻzbekiston Respublikasi Madaniyat va sport ishlari vazirligi, Xalq taʼlimi vazirligi, Oʻzbekiston Milliy olimpiya qoʻmitasi va Oʻzbekiston Gimnastika federatsiyasining Oʻzbekiston Respublikasi Madaniyat va sport ishlari vazirligiga karashli Universal sport saroyi negizida Oʻzbekiston Respublikasi Madaniyat va sport ishlari vazirligi huzuridagi Badiiy gimnastika boʻyicha bolalar-oʻsmirlar ixtisoslashtirilgan respublika olimpiya zaxirasi sport maktabi (keyingi oʻrinlarda – Badiiy gimnastika boʻyicha BOʻIROZSM)ni tashkil etish toʻgʻrisidagi taklifiga rozilik berilsin.

2. Belgilansinki:

Badiiy gimnastika boʻyicha BOʻIROZSM internati bilan maktabdan tashqari sport-taʼlim muassasasi hisoblanadi, uning oʻquvchi-sportchilari turarjoy, toʻrt mahal ovqatlanish, sport ekipirovkasi va ixtisoslashtirilgan kiyim, sport uskunalari hamda anjomlari bilan taʼminlanadi;

Badiiy gimnastika boʻyicha BOʻIROZSMdagi oʻqish muddati 5 yil va oʻquvchi-sportchilar umumiy kontingenti 60 nafar boʻlib, qoidaga koʻra, har yili 12 nafar iqtidorli oʻquvchi-sportchilar 10 yoshdan qabul qilinadi;

Badiiy gimnastika boʻyicha BOʻIROZSM oʻquvchi-sportchilarining umumtaʼlim dasturlari boʻyicha taʼlim olishlari Toshkent shahrining yaqin atrofda joylashgan umumtaʼlim maktablarida amalga oshiriladi.

3. Quyidagilar Badiiy gimnastika boʻyicha BOʻIROZSMning asosiy vazifalari etib belgilansin:

badiiy gimnastika bilan shugʻullanish uchun zarur sport koʻnikmalariga ega boʻlgan iqtidorli va istiqbolli bolalarni sinchkovlik bilan tanlab olish, ularda qobiliyat, sport salohiyatini, tanlangan sport turida professional koʻnikmalar va mahoratni rivojlantirish;

respublikaning terma jamoalari uchun sport zaxirasi va yuksak mahoratli sportchilarni tayyorlash boʻyicha eng yangi ilmiy-metodik tavsiyalar va badiiy gimnastika sohasida erishilgan yutuqlar asosida oʻquv-mashq jarayonlarini tashkil etish;

mahorati yuqori darajada boʻlgan sportchilarni tayyorlash boʻyicha oʻquv-mashq jarayonlarini tashkil etish uchun zarur zamonaviy moddiy-texnik bazani va malakali murabbiylar tarkibini yaratish;

sportchilar va murabbiylar tarkibining professional mahoratini oshirish boʻyicha tajriba almashish borasida xorijiy gimnastika maktablari, akademiyalari va klublari bilan hamkorlikni rivojlantirish.

4. Oʻzbekiston Respublikasi Madaniyat va sport ishlari vazirligi huzuridagi Badiiy gimnastika boʻyicha bolalar-oʻsmirlar ixtisoslashtirilgan respublika olimpiya sport maktabining boshqaruv xodimlari cheklangan soni 9 nafar kishidan iborat boʻlgan tuzilmasi 1-ilovaga* muvofiq tasdiqlansin.

Vazirlar Mahkamasi ikki hafta muddatda Badiiy gimnastika boʻyicha bolalar-oʻsmirlar ixtisoslashtirilgan respublika olimpiya sport maktabi oʻquvchi-sportchilarini yashash uchun anjomlar, oziq-ovqat, sport anjomlari, sport ekipirovkasi va ixtisoslashtirilgan kiyim bilan taʼminlash normativlarini tasdiqlasin.

5. Belgilansinki:

Badiiy gimnastika boʻyicha BOʻIROZSMga qabul qilish gimnastika klublari va sport maktablarida dastlabki tayyorgarlikdan oʻtgan, badiiy gimnastika bilan shugʻullanishda zarur sport koʻnikmasiga hamda yuqori darajadagi sportchining tegishli salohiyatiga ega boʻlgan iqtidorli bolalar orasidan, qatʼiy tanlov asosida amalga oshiriladi;

Badiiy gimnastika boʻyicha BOʻIROZSM oʻquvchi-sportchilari yuqori darajadagi gimnastlarni tayyorlash maxsus dasturlari boʻyicha, sportchilarni tayyorlash keng xalqaro tajribasini hisobga olgan holda oʻqitiladi;

Badiiy gimnastika boʻyicha BOʻIROZSM faoliyatini moliyalashtirish respublika budjeti mablagʻlari, maktab faoliyati ixtisosligi boʻyicha pullik xizmatlar koʻrsatishdan tushadigan mablagʻlar, jismoniy va yuridik shaxslarning, shu jumladan nodavlat notijorat tashkilotlarining xayriya yordamlari, shuningdek qonun hujjatlarida taqiqlanmagan boshqa manbalar hisobidan amalga oshiriladi.

6. Oʻzbekiston Respublikasi Madaniyat va sport ishlari vazirligi Oʻzbekiston Gimnastika federatsiyasi bilan birgalikda:

bir oy muddatda Badiiy gimnastika boʻyicha BOʻIROZSMning Ustavi belgilangan tartibda tasdiqlanishini, shuningdek uning yuridik shaxs sifatida davlat roʻyxatidan oʻtkazilishini taʼminlasin;

ikki oy muddatda Badiiy gimnastika boʻyicha BOʻIROZSMga oʻquvchi-sportchilarni konkurs asosida tanlab olish va qabul qilish tartibi toʻgʻrisidagi nizomni ishlab chiqsin va belgilangan tartibda tasdiqlasin.

Badiiy gimnastika boʻyicha BOʻIROZSMni malakali mutaxassislar bilan toʻldirish, oʻquv-mashq jarayonini yetarli darajada tashkil etish uchun zarur oʻquv-metodik adabiyotlarni butlab olgan holda oʻquv xonalarini jihozlash chora-tadbirlarini amalga oshirish;

Badiiy gimnastika boʻyicha BOʻIROZSMga oʻqish uchun yuborilayotgan iqtidorli bolalarni tanlab olish chora-tadbirlari rejasini har yili tasdiqlab borish;

Badiiy gimnastika boʻyicha BOʻIROZSM oʻquvchi-sportchilarini tayyorlash sifatini tizimli monitoring qilishni taʼminlash, zarur hollarda esa oʻquv-mashq jarayonini takomillashtirish boʻyicha tegishli takliflar kiritish.

7. Oʻzbekiston Respublikasi Xalq taʼlimi vazirligi Badiiy gimnastika boʻyicha BOʻIROZSM oʻquvchi-sportchilarini Toshkent shahrining yaqin atrofdagi umumtaʼlim maktablarida umumtaʼlim dasturlari boʻyicha oʻqitishni tashkil etish borasidagi zarur chora-tadbirlarni koʻrsin.

8. Oʻzbekiston Respublikasi Madaniyat va sport ishlari vazirligi, Iqtisodiyot vazirligi, Moliya vazirligining Badiiy gimnastika boʻyicha BOʻIROZSM oʻquvchi-sportchilarining yashash, mashgʻulotlarni olib borish va ovqatlanishini tashkil etish uchun bino qurish, uni 2012-yilning 1-avgustida foydalanishga topshirish toʻgʻrisidagi taklifi qabul qilinsin.

Quyidagilar:

Badiiy gimnastika boʻyicha BOʻIROZSM — yashash, mashgʻulotlarni olib borish va ovqatlanishni tashkil etish uchun bino qurilishining buyurtmachisi etib;

bino qurilishi loyihasining bosh loyihachisi etib “ToshkentboshplanLITI” DK;

binoni barpo etish boʻyicha bosh pudratchi qurilish tashkiloti etib — “Savdo taraqqiyoti” DUK belgilansin.

9. Oʻzbekiston Respublikasi Madaniyat va sport ishlari vazirligi, Moliya vazirligi Badiiy gimnastika boʻyicha BOʻIROZSM, “ToshkentboshplanLITI” DK va boshqa manfaatdor tuzilmalar bilan hamkorlikda 2011-yilning 1-dekabrigacha boʻlgan muddatda Badiiy gimnastika boʻyicha BOʻIROZSM uchun yashash, mashgʻulotlarni olib borish va ovqatlanishni tashkil etish uchun quriladigan binoning zarur loyiha-smeta hujjatlarini ishlab chiqsin hamda 2012-yilning 1-yanvarigacha ularni belgilangan tartibda tasdiqlasin.

Toshkent shahar hokimligi Badiiy gimnastika boʻyicha BOʻIROZSMga yashash, mashgʻulotlarni olib borish va ovqatlanishni tashkil etish uchun bino qurilishiga zarur yer uchastkasini belgilangan tartibda ajratsin.

Oʻzbekiston Respublikasi Iqtisodiyot vazirligi va Moliya vazirligi Oʻzbekiston Respublikasining 2012-yilgi Investitsiya dasturini shakllantirishda, Oʻzbekiston Respublikasi Madaniyat va sport ishlari vazirligining asoslangan hisob-kitoblari asosida Badiiy gimnastika boʻyicha BOʻIROZSM obyektlari qurilishining yakunlanishiga kapital mablagʻlar limitini nazarda tutsin.

10. Oʻzbekiston Respublikasi Davlat arxitektura va qurilish qoʻmitasi Badiiy gimnastika boʻyicha BOʻIROZSM uchun yashash, mashgʻulotlarni olib borish va ovqatlanishni tashkil etish binosini qurish va jihozlash loyiha-smeta hujjatlari ekspertizasi belgilangan tartibda oʻtkazilishini taʼminlasin hamda qurilish-montaj ishlarining sifatli bajarilishi ustidan nazorat oʻrnatsin.

11. Badiiy gimnastika boʻyicha BOʻIROZSMda mashgʻulotlar 2012-yilning 1-yanvaridan boshlanishi belgilab qoʻyilsin.

12. Oʻzbekiston Respublikasi Moliya vazirligi:

2011-yilda Badiiy gimnastika boʻyicha BOʻIROZSMni saqlash uchun zarur mablagʻ ajratilishini taʼminlasin hamda 2012-yildan boshlab Oʻzbekiston Respublikasi Davlat budjeti parametrlarini shakllantirishda taʼlim sohasiga ajratiladigan mablagʻlar doirasida uni taʼminlashga mablagʻ sarflanishini nazarda tutsin;

3 dona xizmat avtotransporti, shu jumladan bir dona avtobusni taʼminlash limitini belgilasin.

“Oʻzavtosanoat” aksiyadorlik kompaniyasi Badiiy gimnastika boʻyicha BOʻIROZSMni bepul asosda avtotransport vositalari bilan taʼminlasin.

13. Badiiy gimnastika boʻyicha BOʻIROZSM 2016-yilning 1-yanvarigacha, istisno tariqasida, Oʻzbekiston Respublikasi Vazirlar Mahkamasi tomonidan tasdiqlanadigan roʻyxatlar boʻyicha jihozlash va faoliyat yuritish uchun olib kelinadigan sport anjomlari, uskunalar, adabiyot, multimedia mahsuloti va moddiy-texnik resurslari bojxona toʻlovlari toʻlashdan (bojxona rasmiylashtiruvi yigʻimlaridan tashqari) ozod etilsin.

14. Vazirlar Mahkamasining qarorlariga 2-ilovaga muvofiq oʻzgartish va qoʻshimchalar kiritilsin.

15. Mazkur Qarorning ijrosini nazorat qilish Oʻzbekiston Respublikasining Bosh vaziri Sh.M. Mirziyoyev zimmasiga yuklansin.

1. Vazirlar Mahkamasining “Universal sport saroyini Oʻzbekiston Respublikasi Madaniyat va sport ishlari vazirligi balansiga topshirish toʻgʻrisida” 2007-yil 30-yanvardagi 22-sonli qarori oʻz kuchini yoʻqotgan deb hisoblansin.

2. Vazirlar Mahkamasining “Oʻzbekiston Respublikasi Madaniyat va sport ishlari vazirligi toʻgʻrisidagi nizomni tasdiqlash haqida” 2005-yil 5-apreldagi 96-sonli qarorida (Oʻzbekiston Respublikasi QT, 2005-y., 3-4-sonlar, 20-modda):

a) 2-ilovaning 31-bandi quyidagi tahrirda bayon etilsin:

“31. Badiiy gimnastika boʻyicha bolalar-oʻsmirlar ixtisoslashtirilgan respublika olimpiya zaxirasi sport maktabi”;

b) 3-ilovada mutasaddilik qilinadigan tashkilotlarning uchinchi blokidagi beshinchi xatboshi quyidagi tahrirda bayon etilsin:

“Badiiy gimnastika boʻyicha bolalar-oʻsmirlar ixtisoslashtirilgan respublika olimpiya sport maktabi”.