O‘zbekiston Respublikasi Prezidentining
Farmoni
1993 YILNING 1 APRELIDAN MEHNAT HAQI, PENSIYALAR VA STIPENDIYALARNING MIQDORLARINI OShIRISh TO‘G‘RISIDA
Mazkur Farmon O‘zbekiston Respublikasi Prezidentining 2020-yil 27-sentabrdagi PF-6075-sonli “O‘z ahamiyatini yo‘qotgan qonunchilik hujjatlarini qayta ko‘rib chiqish tizimini joriy etish orqali mamlakatda ishbilarmonlik muhitini yaxshilash chora-tadbirlari to‘g‘risida”gi Farmoniga asosan o‘z kuchini yo‘qotgan.
Iste’mol mollari va xizmatlarning narxlari to‘xtovsiz o‘sib borayotgan sharoitda O‘zbekiston Respublikasi aholisini ijtimoiy muhofaza qilish maqsadida:
1. Shu yilning 1-aprelidan boshlab O‘zbekiston Respublikasining hududida ish haqining eng oz miqdori oyiga 3.000 so‘m miqdorida belgilansin yoki ishlovchilarning mansab okladlari 1.2 baravar oshirilsin.
2. Fuqarolarning soliq olinmaydigan daromadlarining eng past darajasi oyiga 3.000 so‘m miqdorida belgilansin.
3. Hozirgi vaqtda berilayotgan barcha turdagi pensiyalarning miqdori 30 foiz oshirilib, mehnat pensiyasining eng oz miqdori oyiga 3.250 so‘m qilib belgilansin.
4. Oliy o‘quv yurtlari talabalarining stipendiyalari, kiyim-bosh va ovqat bilan ta’minlanmaydigan texnikumlar hamda hunar-texnika bilim yurtlari o‘quvchilarining stipendiyalari 1,2 baravar ko‘paytirilsin. Talabalarning oshxonalari va bufetlarida tushlik ovqatlarning qiymatidan 50 foizli chegirmalar saqlab qolinsin.
5. O‘zbekiston Respublikasining Moliya vazirligi ish haqi, pensiyalar va stipendiyalarni oshirishga mazkur Farmonda ko‘zda tutilgan sarf-xarajatlarni pul bilan ta’minlash manbalarini aniqlasin.
6. Budjetdan pul bilan ta’minlanadigan vazirliklar va idoralar, Qoraqalpog‘iston Respublikasining Vazirlar Kengashi, viloyatlar hamda Toshkent shahar hokimlari, tashkilotlari va muassasalar ushbu Farmonda belgilangan eng oz ish haqi miqdoriga asoslanib, mehnatga haq to‘lash bo‘yicha yagona tarif setkasi razryadlariga muvofiq xodimlarning mansab okladlari o‘z vaqtida qaytadan hisoblab chiqilishini ta’minlasinlar.
7. Xo‘jalik hisobidagi birlashmalar, korxonalar va tashkilotlar ushbu maqsadlarga o‘zlarining mablag‘ manbalarini qidirib topishlariga qarab mazkur Farmonda belgilangan mehnat haqining eng oz miqdorini joriy etsinlar.
8. O‘zbekiston Respublikasining Markaziy banki respublika korxonalari, tashkilotlari va muassasalariga ish haqi o‘z vaqtida to‘lanishini taminlovchi choralar ko‘rsin.
O‘zbekiston Respublikasining Prezidenti I. KARIMOV
Toshkent sh.,
1993-yil 18-mart,
PF-580-son
(O‘zbekiston Respublikasi Oliy Kengashining Axborotnomasi, 1993-y., 3-son, 154-modda)