O‘quvchilarning iste’dodlarini namoyon etish va ijodiy qobiliyatlarini rivojlantirishga, ularda mustaqil O‘zbekiston fuqarosining yuksak ma’naviy fazilatlarini shakllantirishga muhim ahamiyat berib:

1. Tadqiqotchilik faoliyatini muvaffaqiyatli amalga oshirayotgan va butun o‘qish davrida a’lo baholarga o‘qigan oxirgi o‘quv yili talabalari uchun O‘zbekiston Respublikasi Prezidentining davlat stipendiyasi ta’sis etilsin. Uning soni magistratura mutaxassisliklari bo‘yicha jami 22 ta, bakalavriat ta’lim yo‘nalishlari bo‘yicha har bir oliy ta’lim muassasasi uchun bittadan etib belgilansin.

2. Barcha fanlardan o‘zlashtirish ko‘rsatkichlari “a’lo” (ko‘pi bilan 25 foizi “yaxshi”) bo‘lgan hamda ijodiy ishda qatnashadigan bakalavriat ta’lim yo‘nalishida o‘qiyotgan oxirgi ikki kurs (keyingi o‘rinlarda — yuqori kurs) talabalari uchun quyidagi nomli davlat stipendiyalari ta’sis etilsin: texnika yo‘nalishlarida — Beruniy, tibbiyot yo‘nalishlarida — Ibn Sino, gumanitar yo‘nalishlarda — Navoiy, tasviriy va amaliy san’at hamda dizayn yo‘nalishlarida — Kamoliddin Behzod, tabiiy yo‘nalishlarda — Ulug‘bek, kinematografiya yo‘nalishida — Xudoybergan Devonov, tarix va geografiya yo‘nalishlarida — Bobur, jismoniy tarbiya va sport yo‘nalishlarida — Pahlavon Mahmud, pedagogika yo‘nalishida — Abdulla Avloniy, O‘zbekiston xalqaro islomshunoslik akademiyasida — Imom al-Buxoriy, Qoraqalpog‘iston Respublikasidagi oliy ta’lim muassasalarida — To‘lepbergen Qaipbergenov va Ibroyim Yusupov, shuningdek, barcha yo‘nalishlarda — Islom Karimov nomli.

Belgilansinki:

Beruniy, Ibn Sino, Navoiy, Kamoliddin Behzod va Ulug‘bek nomli davlat stipendiyalari bakalavriat ta’lim yo‘nalishlari bo‘yicha yuqori kurslarning har ming nafar talabasiga bittadan;

Imom al-Buxoriy nomli davlat stipendiyasi O‘zbekiston xalqaro islomshunoslik akademiyasining uch nafar yuqori kurs talabasiga;

Xudoybergan Devonov nomli davlat stipendiyasi kinematografiya sohasi uchun kadrlar tayyorlovchi har bir oliy ta’lim muassasasining bir nafar yuqori kurs talabasiga;

Bobur nomli davlat stipendiyasi tarix va geografiya yo‘nalishlari uchun kadrlar tayyorlovchi har bir oliy ta’lim muassasasining bir nafar yuqori kurs talabasiga;

Pahlavon Mahmud nomli davlat stipendiyasi jismoniy tarbiya va sport yo‘nalishlari uchun kadrlar tayyorlovchi har bir oliy ta’lim muassasasining bir nafar yuqori kurs talabasiga;

Abdulla Avloniy nomli davlat stipendiyasi pedagogika yo‘nalishidagi har bir oliy ta’lim tashkilotining bir nafar oxirgi ikki kurs talabasiga;

To‘lepbergen Qaipbergenov va Ibroyim Yusupov nomli davlat stipendiyalari Qoraqalpog‘iston Respublikasidagi har bir oliy ta’lim muassasasining bir nafar yuqori kurs talabasiga;

Islom Karimov nomli davlat stipendiyasi har bir oliy ta’lim muassasasining bir nafar yuqori kurs talabasiga tayinlanadi.

3. Oliy va o‘rta maxsus ta’lim vazirligi, Fanlar akademiyasi, fan va texnika davlat qo‘mitasi, Oliy Attestatsiya komissiyasi 20 kun muddat ichida talabalarga davlat stipendiyalarini berish to‘g‘risidagi Nizom va Tartibni ishlab chiqib, O‘zbekiston Respublikasi Vazirlar Mahkamasining tasdiqlashi uchun taqdim etsinlar.

4. Belgilab qo‘yilsinki, davlat stipendiyalarini oluvchi talabalarga tegishli ko‘krak nishonlari va guvohnomalar beriladi. Ular oliy ta’lim tashkilotini tamomlaganlaridan keyin yosh mutaxassislar qatori malaka oshirish va o‘qishni davom ettirish uchun chet ellarga yuborish chog‘ida ustunlikka ega bo‘ladilar.

5. O‘zbekiston Respublikasi Xalq ta’limi vazirligi, Madaniyat ishlari vazirligi va Davlat sport qo‘mitasi:

— maktab yoshlari orasida vaqti-vaqti bilan turli respublika musobaqalarini o‘tkazsinlar, yoshlarning xalqaro musobaqalarda faol ishtirok etishlariga butun choralar bilan ko‘maklashsinlar;

— 20 kunlik muddat ichida maktab o‘quvchilari orasida respublika olimpiadalari, konkurslari va musobaqalarini o‘tkazishning Nizomi va Tartibini ishlab chiqsinlar hamda O‘zbekiston Respublikasi Vazirlar Mahkamasining tasdig‘iga taqdim etsinlar.

6. Olimpiadalar, konkurslar va musobaqalarning g‘oliblariga quyidagi pul mukofotlari:

— I—V o‘rinlarni olgan g‘oliblarga talaba stipendiyasi miqdorining o‘n karradan olti karragacha ko‘p bo‘lgan xalqaro mukofotlar;

— I—II—III o‘rinlarni olgan g‘oliblarga talaba stipendiyasining uch—ikki—bir karra ko‘p bo‘lgan respublika mukofotlari belgilansin:

8. O‘zbekiston Respublikasi Moliya vazirligi 1993-yildan boshlab har yili ana shu maqsadlar uchun zarur mablag‘lar ajratishni ko‘zda tutsin.

9. O‘zbekiston Respublikasi Oliy va o‘rta maxsus ta’lim vazirligi, oliy o‘quv yurtlari bo‘lgan vazirliklar va idoralar:

— 1993-yilning 1-martidan ushbu Farmonda qayd etilmagan davlat stipendiyalarini bekor qilsinlar;

— ularga belgilagan stipendiya jamg‘armasi doirasida oliy ta’lim tashkilotlarining taqdimnomalariga ko‘ra va Vazirlar Mahkamasi bilan kelishib, O‘zbekistonning aqliy va ma’naviy boyligini rivojlantirishga katta hissa qo‘shgan atoqli fan va madaniyat arboblari sharafiga bir yarim barobar hajmli maxsus stipendiyalar ta’sis etish huquqi berilsin.

10. O‘zbekiston Respublikasi Vazirlar Mahkamasi 20 kunlik muddat ichida ushbu Farmonni ro‘yobga chiqarishga doir qaror qabul qilsin.