1. O‘zbekiston Respublikasi hududida 1994-yil 1-yanvardan boshlab:

ish haqining eng kam miqdori oyiga 30.000 so‘m-kupon qilib belgilansin, ish haqi shunga muvofiq ravishda oshirilsin;

fuqarolarning soliq undirilmaydigan daromadining eng kam miqdori oyiga 30.000 so‘m-kupon qilib belgilansin;

mehnat pensiyasining eng kam miqdori oyiga 32.450 so‘m-kupon qilib belgilansin, hozirgi vaqtda amaldagi barcha pensiya turlari miqdori shunga muvofiq ravishda oshirilsin.

2. Oliy o‘quv yurtlari talabalari, texnikumlar va hunar-texnika bilim yurtlari o‘quvchilarining stipendiyalari o‘rtacha 1,2 baravar ko‘paytirilsin.

1994-yil 1-yanvardan boshlab talabalar oshxonalari va bufetlarida tushlik ovqat qiymatidan 50 foizlik chegirma o‘rniga har bir talaba (o‘quvchi)ga oyiga 10.000 so‘m-kupon miqdorida pul kompensatsiyasi belgilansin.

3. Vazirliklar va idoralar, Qoraqalpog‘iston Respublikasi Vazirlar Kengashi, viloyatlar va Toshkent shahri hokimlari, budjetdan pul bilan ta’minlanadigan tashkilotlar va muassasalar, O‘zbekiston Respublikasi Ijtimoiy ta’minot vazirligi mazkur Farmonda belgilangan ish haqining eng kam miqdoriga asoslanib, mehnatga haq to‘lashning yagona tarif jadvali razryadlariga muvofiq ravishda xodimlarning mansab maoshlarini, shuningdek, pensiyalar miqdorini o‘z vaqtida qayta hisoblab chiqishni ta’minlasinlar.

4. Budjet hisobidan pul bilan ta’minlanadigan muassasalar va tashkilotlar xodimlari ish haqi, pensiyalar va stipendiyalar miqdorini oshirish bilan bog‘liq xarajatlar respublika davlat budjeti va ijtimoiy sug‘urta jamg‘armasi mablag‘i hisobidan qoplansin.

5. Mulkchilik shaklidan qat’i nazar, xo‘jalik hisobidagi korxonalarga va tashkilotlarga daromad manbalarini qidirib topishga qarab ish haqini mazkur Farmonga muvofiq oshirish, daromadlar vaqtincha yetarli bo‘lmagan taqdirda esa, bank muassasalari tomonidan shu maqsad uchun beriladigan kredit hisobidan oshirish tavsiya etilsin.

6. Mazkur Farmonning ijrosini nazorat qilish O‘zbekiston Respublikasi Vazirlar Mahkamasi zimmasiga yuklansin.