1-modda. Oʻzbekiston Respublikasining 1994-yil 5-mayda qabul qilingan “Bankrotlik toʻgʻrisida”gi 1054–XII-sonli Qonuniga (Oʻzbekiston Respublikasining 2003-yil 24-aprelda qabul qilingan 474–II-sonli Qonuni bilan tasdiqlangan tahririda) (Oʻzbekiston Respublikasi Oliy Majlisining Axborotnomasi, 2003-yil, № 5, 63-modda; Oʻzbekiston Respublikasi Oliy Majlisi palatalarining Axborotnomasi, 2005-yil, № 12, 414-modda; 2008-yil, № 12, 640-modda; 2009-yil, № 1, 1-modda, № 4, 133-modda, № 9, 330-modda; 2010-yil, № 9, 337-modda) quyidagi oʻzgartish va qoʻshimchalar kiritilsin:

1) 10-moddaning oʻn birinchi qismidagi “besh” degan soʻz “ikki” degan soʻz bilan almashtirilsin;

2) 49-moddaning birinchi jumlasidagi “uch” degan soʻz “ikki” degan soʻz bilan almashtirilsin;

3) 52-moddaning toʻrtinchi qismidagi “oʻn” degan soʻz “yetti” degan soʻz bilan almashtirilsin;

4) 59-moddaning birinchi qismi birinchi jumlasidagi “bir oylik” degan soʻzlar “oʻn besh kunlik” degan soʻzlar bilan almashtirilsin;

5) 71-moddaning birinchi qismi uchinchi jumlasidagi “oʻn” degan soʻz “besh” degan soʻz bilan almashtirilsin;

6) 110-moddaning:

oʻn uchinchi qismi quyidagi tahrirda bayon etilsin:

“Takroriy kim oshdi savdosini oʻtkazish maqsadida tashqi boshqaruvchi kreditorlar yigʻilishi yoki kreditorlar qoʻmitasining qaroriga muvofiq korxonani (biznesni) sotish toʻgʻrisidagi yangi xabarni amalga oshmagan deb topilgan yoki korxona (biznes) sotilmagan kim oshdi savdosining sanasidan eʼtiboran oʻn besh kun ichida, ushbu Qonunning mazkur moddasida va 53-moddasida nazarda tutilgan tartibda eʼlon qiladi. Bunda kim oshdi savdosi xabar eʼlon qilingan sanadan eʼtiboran kamida oʻn besh kunlik muddat oʻtgach, oʻtkaziladi. Korxonani (biznesni) sotish narxi kreditorlar yigʻilishi yoki kreditorlar qoʻmitasining qaroriga koʻra pasaytirilishi mumkin, biroq bunda pasaytirish avvalgi kim oshdi savdosidagi narxning 10 foizidan koʻp boʻlmasligi kerak”;

oʻn beshinchi qismidagi “bir oydan” degan soʻzlar “oʻn besh kundan” degan soʻzlar bilan almashtirilsin;

7) 124-modda quyidagi mazmundagi beshinchi qism bilan toʻldirilsin:

“Xoʻjalik sudi qarzdorning faoliyati xususiyatidan kelib chiqib, qarzdorni bankrot deb topish toʻgʻrisidagi qarorida kreditorlar yigʻilishining va (yoki) tegishli davlat va xoʻjalik boshqaruvi organlarining, mahalliy davlat hokimiyati organlarining iltimosnomasiga koʻra qarzdorning faoliyatini toʻxtatmasdan tugatishga doir ish yuritish oʻtkazilishini koʻrsatishi mumkin”;

8) 127-moddaning ikkinchi qismi beshinchi xatboshisidagi “ikki oy” degan soʻzlar “bir oy” degan soʻzlar bilan almashtirilsin;

9) 134-moddaning oʻn birinchi qismi “mazkur Qonunning 142¹ va 143-moddalarida koʻrsatilgan hollar bundan mustasno” degan soʻzlar bilan toʻldirilsin;

10) 135-moddaning sakkizinchi qismi quyidagi tahrirda bayon etilsin:

“Qonun hujjatlarida ayrim qarzdor korxonani (biznesni) yoki uning mol-mulki bir qismini banklarga sotishning yoki oʻtkazishning boshqacha tartibi nazarda tutilishi mumkin”;

11) 142-moddaning ikkinchi qismi beshinchi xatboshisi quyidagi tahrirda bayon etilsin:

“qarzdorning ushbu Qonunning 142¹ va 143-moddalarida nazarda tutilgan mol-mulki toʻgʻrisidagi maʼlumotlar”;

12) quyidagi mazmundagi 142¹-modda bilan toʻldirilsin:

Majburiy toʻlovlar va moliyaviy sanksiyalar boʻyicha qarzdorligi mavjud boʻlgan qarzdorning sotishga taklif qilingan, lekin tugatishga doir ish yuritish mobaynida realizatsiya qilinmagan mol-mulki tugatish boshqaruvchisi tomonidan mahalliy davlat hokimiyati organlari balansiga quyidagi hollarda oʻtkaziladi, agar majburiy toʻlovlar va moliyaviy sanksiyalar boʻyicha qarzdorlik miqdori:

qarzdorning mol-mulki qiymatiga teng yoki undan ortiq boʻlsa, — birinchi navbatdagi boshqa kreditorlar ushbu mol-mulkni oʻz talablarini qanoatlantirish hisobiga qabul qilishni rad etganda;

qarzdorning mol-mulki qiymatidan kam boʻlsa, — barcha navbatdagi kreditorlar ushbu mol-mulkni oʻz talablarini qanoatlantirish hisobiga qabul qilishni rad etganda.

Qarzdorning ushbu moddaning birinchi qismida koʻrsatilgan mol-mulki toʻgʻrisida tugatish boshqaruvchisi mahalliy davlat hokimiyati organlarini yozma shaklda xabardor qiladi.

Mahalliy davlat hokimiyati organlari yozma xabar olingan paytdan eʼtiboran oʻn besh kun ichida mol-mulkni balansga oladi va uni saqlab turishga doir barcha xarajatlarni oʻz zimmasiga oladi. Mol-mulkni qabul qilishdan bosh tortilgan yoki boʻyin tovlangan taqdirda, tugatish boshqaruvchisi tegishli organni mazkur mol-mulkni qabul qilishga majburlash toʻgʻrisidagi ariza bilan xoʻjalik sudiga murojaat etishga haqli. Xoʻjalik sudi mol-mulk mahalliy davlat hokimiyati organlarining balansiga oʻtkazilganligi toʻgʻrisidagi hujjatlar asosida tugatishga doir ish yuritishni tamomlash haqida ajrim chiqaradi.

Ushbu moddaning birinchi qismiga muvofiq balansiga mol-mulk oʻtkazilgan mahalliy davlat hokimiyati organi bu mol-mulkni belgilangan tartibda ochiq kim oshdi savdosida realizatsiya qilish tashabbusi bilan chiqishi mumkin. Bunda koʻchmas mol-mulk, shuningdek aksiyalar, xoʻjalik jamiyatlarining ustav fondlaridagi ulushlar davlat mulkini boshqarish boʻyicha vakolatli organ tomonidan ochiq kim oshdi savdosiga qoʻyiladi, tushgan mablagʻlar esa qonun hujjatlarida nazarda tutilgan tartibda taqsimlanadi. Boshqa mol-mulk ixtisoslashtirilgan savdo tashkilotlari orqali ochiq kim oshdi savdosiga qoʻyiladi, tushgan mablagʻlar esa mahalliy budjet daromadiga yoʻnaltiriladi, qarzdorning qabul qilib olingan mol-mulkni saqlash boʻyicha qilingan xarajatlarini qoplash uchun mahalliy davlat hokimiyati organlari tasarrufida qoldiriladigan mablagʻlar bundan mustasno.

Qarzdorning mol-mulki ochiq kim oshdi savdosiga qoʻyilgan paytdan eʼtiboran bir yil ichida realizatsiya qilinmagan taqdirda, mahalliy davlat hokimiyati organlari ushbu mol-mulkka nisbatan davlat mulkini tasarruf etishning qonun hujjatlarida nazarda tutilgan tartibda boshqa usullarini ham qoʻllaydi”;

13) 143-modda:

quyidagi mazmundagi birinchi qism bilan toʻldirilsin:

“Qarzdorning sotishga taklif qilingan, lekin tugatishga doir ish yuritish mobaynida realizatsiya qilinmagan mol-mulki tugatish boshqaruvchisi tomonidan kreditorlarga kreditorlik qarzlarini uzish hisobiga taklif etiladi. Kreditor ushbu mol-mulkni qabul qilishga rozilik berish yoki uni rad etish yoxud ushbu masalani qonunda belgilangan hollarda kreditorning kuzatuv kengashiga yoki muassislari (ishtirokchilari) umumiy yigʻilishiga koʻrib chiqish uchun kiritish toʻgʻrisida tugatish boshqaruvchisini realizatsiya qilinmagan mol-mulk haqida taklif olingan kundan eʼtiboran oʻn kun ichida yozma shaklda xabardor etadi. Kreditor tomonidan yozma xabarning belgilangan muddatda taqdim etilmaganligi mol-mulkni qabul qilish rad etilishiga tenglashtiriladi”;

birinchi, ikkinchi va uchinchi qismlari tegishincha ikkinchi, uchinchi va toʻrtinchi qismlar deb hisoblansin;

ikkinchi qismi “shuningdek” degan soʻzdan keyin “majburiy toʻlovlar va moliyaviy sanksiyalar boʻyicha qarzdorligi boʻlmagan” degan soʻzlar bilan toʻldirilsin;

uchinchi qismidagi “bir oylik muddat” degan soʻzlar “oʻn besh kun” degan soʻzlar bilan almashtirilsin.

2-modda. Ushbu Qonun rasmiy eʼlon qilingan kundan eʼtiboran kuchga kiradi.