Milliy valyutani mustahkamlash va uning ichki erkin almashtirilishini taʼminlash, respublikaga chet el investitsiyalarini jalb qilish va isteʼmol bozorini toʻldirish uchun zarur shart-sharoitlar yaratish maqsadida:

1. Oʻzbekiston respublika valyuta birjasida operatsiyalarni yanada erkinlashtirishni amalga oshirish, yuridik va jismoniy shaxslarning milliy valyuta — soʻmni erkin muomaladagi valyutaga erkin almashtirishga boʻlgan talabini qondirish yuzasidan qoʻshimcha chora-tadbirlar koʻrish zarur deb hisoblansin.

Markaziy bank va vakolatli banklar naqd soʻmlarni erkin muomaladagi valyutaga almashtirish hajmlarini koʻpaytirish uchun qoʻshimcha resurslarni qidirib topsinlar, ushbu maqsadlarga 1995-yilning ikkinchi yarim yilida kamida 120 million AQSh dollarini yoʻnaltirsinlar.

2. Belgilab qoʻyilsinki, ichki valyuta bozorida:

— xalq isteʼmol tovarlari ishlab chiqarish va ular bilan respublika ichki bozorini toʻldirish bilan band boʻlgan;

— eksportga, birinchi navbatda Tashqi iqtisodiy aloqalar vazirligining markazlashtirilgan eksport roʻyxatiga kiritilgan mahsulot va tovarlarni ishlab chiqarish bilan band boʻlgan;

— Oʻzbekistonda ishlab chiqarish faoliyatidan belgilangan tartibda olingan foyda va dividendlarning bir qismini repatriatsiya qilishni amalga oshiruvchi;

— respublika iqtisodiyotining bazaviy va yetakchi tarmoqlaridagi ustuvor loyihalarni amalga oshirishda qatnashuvchi xorijiy sarmoya ishtirokidagi qoʻshma korxonalar, jismoniy va yuridik shaxslar erkin muomaladagi valyutaga aylantirish huquqiga koʻproq ega boʻladilar.

3. Belgilab qoʻyilsinki, 1995-yilning 1-iyulidan boshlab koʻrsatib oʻtilgan korxonalar va tashkilotlarga, ularning mulkchilik shakllaridan qatʼi nazar, naqd pulsiz soʻmlarni erkin muomaladagi valyutaga aylantirish Oʻzbekiston respublika valyuta birjasida vakolatli banklarning talabnomalari asosida quyidagi majburiy shartlarga rioya qilgan holda amalga oshiriladi:

— xorijiy sheriklar bilan tuzilgan kontraktlar, shuningdek vakolatli bankning ekspert xulosasi mavjud boʻlishi;

— xorijiy valyutani mablagʻlarni soʻmlarda oldindan ehtiyot qilib qoʻygan holda korxonalarning faqat oʻz mablagʻlari hisobiga sotib olish;

— korxonalarning budjetga va budjetdan tashqari fondlarga toʻlovlar boʻyicha qarzlarining, mahsulot yetkazib beruvchilardan va bank ssudalari boʻyicha muddati oʻtib ketgan qarzlarining yoʻqligi.

— roʻyxatga olingan paytdan boshlab kamida 6 oy mobaynida faoliyatni amalga oshirish.

4. Erkin muomaladagi valyutaga almashtirish boʻyicha valyuta operatsiyalarini oʻtkazishni va ushbu maqsadlar uchun ajratilgan mablagʻlardan belgilangan maqsadda ichki valyuta bozorida foydalanishni, shuningdek birja savdolarida jismoniy va yuridik shaxslarning qatnashishi uchun bir marta ruxsat berish yuzasidan qarorlar qabul qilishni nazorat etish pul-kredit siyosati boʻyicha respublika komissiyasiga yuklansin. Komissiya tarkibi ilovaga* muvofiq qayta tasdiqlansin.

5. Komissiya Oʻzbekiston respublika valyuta birjasida operatsiyalar oʻtkazishning yuqorida koʻrsatib oʻtilgan talablarga javob beradigan tartibini oʻn kun muddatda tasdiqlasin.

6. Belgilab qoʻyilsinki, 1995-yilning 1-iyulidan boshlab, mulkchilik shakllaridan qatʼi nazar, korxona va tashkilotlarga kredit berish faqat Oʻzbekiston Respublikasining milliy valyutasida amalga oshiriladi.

Erkin almashtiriladigan valyutada kreditlar ajratish nazarda tutilgan korxona va tashkilotlarga koʻrsatib oʻtilgan kreditlar vakolatli banklar tomonidan Oʻzbekiston Respublikasining milliy valyutasida, keyinchalik uni Oʻzbekiston respublika valyuta birjasida erkin muomaladagi valyutaga almashtirgan holda, ajratiladi.

Oʻzbekiston Respublikasi Moliya vazirligi koʻrsatib oʻtilgan korxonalarga kredit berish uchun vakolatli banklarga milliy valyutada kredit liniyalari ochsin.

7. Chet el banklari, eksport-import agentliklari va xalqaro moliya tashkilotlari tomonidan ajratiladigan erkin muomaladagi valyuta holidagi qarz mablagʻlarni kreditga berish va qayta mablagʻ bilan taʼminlashning amaldagi tartibi saqlab qolinsin.

Shuningdek, korxona va tashkilotlarga erkin muomaladagi valyutada ilgari berilgan kreditlarni toʻlashning amaldagi tartibi ham saqlab qolinsin.

8. Belgilab qoʻyilsinki:

— mijozlarning talabnomalari boʻyicha vakolatli banklar tomonidan sotib olingan va 7 ish kuni mobaynida foydalanilmagan xorijiy valyuta soʻzsiz qayta sotilishi kerak;

— import kontraktlari boʻyicha avans toʻlovlari kontraktda nazarda tutilgan qiymatning 15 foizidan oshmaydigan, ammo 100000 AQSh dollaridan koʻp boʻlmagan summa doirasida, faqat import qiluvchi korxonaga xizmat koʻrsatadigan Oʻzbekiston Respublikasi vakolatli bankining aloqador bankning muqobil bank kafolati mavjud boʻlgan taqdirdagina yoʻl qoʻyiladi. Mazkur summadan oshadigan avans toʻlovlarini oʻtkazish faqat Oʻzbekiston Respublikasi Tashqi iqtisodiy aloqalar vazirligining xulosasi boʻyicha Oʻzbekiston Respublikasi Vazirlar Mahkamasining ruxsati bilan amalga oshiriladi.

9. Oʻzbekiston Respublikasi Prokuraturasi, Davlat soliq qoʻmitasi korxonalarning eksport-import operatsiyalarni amalga oshirishning belgilangan tartibiga soʻzsiz rioya qilishlari ustidan muntazam nazoratni taʼminlasinlar.

10. Oʻzbekiston Respublikasi Moliya vazirligi, Markaziy bank bir hafta muddatda:

— normativ hujjatlarga tegishli oʻzgartirishlar kiritsinlar;

— shu yilning III choragida davlat qisqa muddatli obligatsiyalarini chiqarish va sotish boʻyicha Vazirlar Mahkamasiga takliflar kiritsinlar;

— Tashqi iqtisodiy aloqalar vazirligi va Davlat soliq qoʻmitasi bilan birgalikda respublikada oʻz tayyor mahsulotini ishlab chiqarishni ragʻbatlantirish maqsadida eksport va import bojlarini qayta koʻrib chiqish boʻyicha Vazirlar Mahkamasiga takliflar kiritsinlar.

11. Oʻzbekiston Respublikasi Moliya vazirligi va Markaziy banki milliy valyuta — soʻmni mustahkamlashga yoʻnaltiriladigan mablagʻlar hajmini yanada koʻpaytirish maqsadida 1996-yil 1-yanvargacha respublikaning oltin-valyuta resurslarini Markaziy bankka berish toʻgʻrisida takliflar kiritsinlar.

12. Vazirlar Mahkamasining 1994-yil 3-maydagi 234-son qaroriga ilova oʻz kuchini yoʻqotgan deb hisoblansin.

13. Mazkur Farmonning bajarilishini nazorat qilish Oʻzbekiston Respublikasi Bosh vazirining oʻrinbosari B.S. Hamidov va Oʻzbekiston Respublikasi Markaziy banki Boshqaruvi raisi F.M. Mullajonov zimmasiga yuklansin.