LexUZ sharhi
Mazkur Farmon O‘zbekiston Respublikasi Prezidentining 2021-yil 30-apreldagi PF-6218-sonli “Milliy qonunchilik bazasini kompleks tizimlashtirish chora-tadbirlari to‘g‘risida”gi Farmoniga asosan o‘z kuchini yo‘qotgan.
Bolali oilalarga ijtimoiy yordam aniq berilishini kuchaytirish, aholini ijtimoiy muhofaza qilish borasidagi chora-tadbirlarni ro‘yobga chiqarishda fuqarolarning o‘zini o‘zi boshqarish organlari roli va mas’uliyatini oshirish maqsadida:
1.14 yoshgacha voyaga yetmagan bolalari bo‘lgan oilalarga har oylik nafaqalarni shunday nafaqaga muhtoj oilalargagina berish va uni fuqarolarning o‘zini o‘zi boshqarish organlari tomonidan to‘lash to‘g‘risida fuqarolarning o‘zini o‘zi boshqarish organlari (shaharchalar, qishloqlar, ovullar, mahallalar fuqarolari yig‘inlari)ning takliflari qabul qilinsin.
(1-band O‘zbekiston Respublikasi Prezidentining 2012-yil 26-dekabrdagi PF-4491-sonli Farmoni tahririda — O‘R QHT, 2012-y., 52-son, 586-modda)
2. Belgilab qo‘yilsinki, 14 yoshgacha voyaga yetmagan bolalari bo‘lgan oilalarga har oylik nafaqalar fuqarolarning o‘zini o‘zi boshqarish organlari (shaharchalar, qishloqlar, ovullar, mahallalar fuqarolarining yig‘inlari) tomonidan oilalarning shunday nafaqaga muhtojligi hisobga olingan holda tayinlanadi va to‘lanadi.
14 yoshgacha voyaga yetmagan bolalari bo‘lgan oilalarga har oylik nafaqalar berish to‘g‘risidagi qarorni qabul qilish chog‘ida ijtimoiy adolat tamoyillariga og‘ishmay rioya etish, keng oshkoralik va ochiqlikni ta’minlash, budjet mablag‘laridan maqsadli va samarali foydalanishga erishish majburiy shartlar deb hisoblansin.
(2-band O‘zbekiston Respublikasi Prezidentining 2012-yil 26-dekabrdagi PF-4491-sonli Farmoni tahririda — O‘R QHT, 2012-y., 52-son, 586-modda)
3. Fuqarolarning o‘zini o‘zi boshqarish barcha organlarida yuridik shaxs huquqiga ega bo‘lgan maxsus jamg‘armalar tashkil qilsin, ularning mablag‘lari bolali muhtoj oilalarga nafaqa to‘lash uchun sarflansin.
O‘zbekiston Respublikasining Xalq banki 1996-yilning 31-dekabriga qadar fuqarolarning o‘zini o‘zi boshqarish organlariga yuridik shaxs huquqi bilan “Bolalar nafaqalari” maxsus hisobvaraqlari (ilova hisobvaraqlari)ni ochsin.
O‘zbekiston Respublikasi Moliya vazirligi 1997-yilgi budjetni belgilash chog‘ida ushbu nafaqaga muhtoj oilalarning haqiqiy ehtiyojlarini hisobga olgan holda bolali oilalarga nafaqalar to‘lash uchun zarur mablag‘larni ko‘zda tutsin.
4. Qoraqalpog‘iston Respublikasi Vazirlar Kengashi, viloyatlar va Toshkent shahar hokimliklari, vazirliklar, idoralar, uyushmalar, konsernlar, korporatsiyalar, korxonalar va tashkilotlar, xayriya jamg‘armalari hamda tadbirkorlik tuzilmalari mavjud imkoniyatlarga muvofiq o‘z mablag‘lari hisobidan bolali oilalarga har tomonlama qo‘shimcha ijtimoiy yordam bersinlar.
5. Vazirlar Mahkamasi o‘n kun muddatda mazkur Farmonni amalga oshirish yuzasidan qaror qabul qilib, unda 16 yoshgacha bolalari bo‘lgan oilalarga nafaqa tayinlash va to‘lash tartibi o‘rnatilishini ko‘zda tutsin.
6. Ommaviy axborot vositalari bolali oilalarga nafaqa tayinlash va to‘lash tartibi to‘g‘risida tushuntirish ishlarini faol suratda olib borsinlar, aholining ijtimoiy muhofazasini ta’minlash borasida fuqarolarning o‘zini o‘zi boshqarish organlari faoliyati to‘g‘risida jamoatchilikni keng ko‘lamda xabardor qilib tursinlar.
7. O‘zbekiston Respublikasi Prezidentining 1996-yil 4-martdagi PF-1383-son Farmoni 1997-yilning 1-yanvaridan o‘z kuchini yo‘qotgan deb hisoblansin (2-band bundan mustasno).