Respublika iqtisodiyotiga toʻgʻridan-toʻgʻri xorijiy investitsiyalarni jalb qilish hajmini yanada kengaytirish hamda Ummon Sultonligi bilan ikki tomonlama hamkorlikni mustahkamlash maqsadida:

1. Oʻzbekiston Respublikasi Moliya vazirligi, Iqtisodiyot vazirligi, Tashqi iqtisodiy aloqalar, investitsiyalar va savdo vazirligi hamda Tiklanish va taraqqiyot jamgʻarmasining Tiklanish va taraqqiyot jamgʻarmasi tomonidan Ummon Sultonligining Davlat bosh zaxira jamgʻarmasi bilan birgalikda:

5 mln AQSh dollari miqdorida ustav fondiga hamda investitsiya loyihalari maʼqullanishiga qarab keyinchalik 500 mln dollargacha oshirgan holda 100 mln AQSh dollari miqdoridagi kapitalga ega Oʻzbekiston — Ummon investitsiya kompaniyasini;

3 mln AQSh dollari miqdoridagi ustav fondi ustav fondiga ega “Oʻzomankapital” boshqaruv kompaniyasini tuzish toʻgʻrisidagi takliflari qabul qilinsin.

2. Belgilansinki:

Oʻzbekiston — Ummon investitsiya kompaniyasi va “Oʻzomankapital” boshqaruv kompaniyasi masʼuliyati cheklangan jamiyat shaklida Oʻzbekiston Respublikasi rezidenti sifatida tuziladi;

ushbu kompaniyalar aktivlarining shakllanishida Ummon Sultonligining Davlat bosh zaxira jamgʻarmasi ishtirokidagi ulush 75 foiz, Tiklanish va taraqqiyot jamgʻarmasiniki esa 25 foizni tashkil etadi.

3. Oʻzbekiston Respublikasi Bosh vazirining birinchi oʻrinbosari R.S. Azimov hamda Tiklanish va taraqqiyot jamgʻarmasi ijrochi direktori R.A. Gulyamovga Oʻzbekiston — Ummon investitsiya kompaniyasi va “Oʻzomankapital” boshqaruv kompaniyasini tashkil etish toʻgʻrisidagi Taʼsis bitimini imzolash vakolati berilsin.

4. 2030-yil 1-yanvargacha:

Oʻzbekiston — Ummon investitsiya kompaniyasi foyda soligʻi, shu jumladan olingan dividendlar va foizlar boʻyicha daromaddan foyda soligʻini, obodonlashtirish va ijtimoiy infratuzilmani rivojlantirish soligʻi, mulk soligʻi, shuningdek, mulki va aktivlarini sotishda qoʻshimcha qiymat soligʻi toʻlashdan;

“Oʻzomankapital” boshqaruv kompaniyasi Oʻzbekiston — Ummon investitsiya kompaniyasi tomonidan koʻrsatilgan xizmatlar qismida qoʻshimcha qiymat soligʻini toʻlashdan hamda budjetdan tashqari Pensiya jamgʻarmasi, Respublika yoʻl jamgʻarmasi, Oʻzbekiston Respublikasi Moliya vazirligi huzuridagi budjetdan tashqari Taʼlim va tibbiyot muassasalarining moddiy-texnika bazasini rivojlantirish jamgʻarmasiga majburiy ajratmalardan ozod etilsin.

5. Quyidagilarga:

Oʻzbekiston — Ummon investitsiya kompaniyasiga xorijiy valyutada investitsiyalarni amalga oshirishga va investitsiyalardan daromad olishga;

“Oʻzomankapital” boshqaruv kompaniyasi, shuningdek, Oʻzbekiston — Ummon investitsiya kompaniyasining investitsiyalarini jalb qiluvchi korxonalarga investitsiyalarni jalb qilish, qaytarish hamda investitsiya daromadlarini toʻlash bilan bogʻliq oʻzaro hisob-kitoblarni xorijiy valyutada amalga oshirishga ruxsat berilsin.

Ustav fondining kamida 30 foizi Oʻzbekiston — Ummon investitsiya kompaniyasi mablagʻlari hisobidan shakllantirilgan yangi tashkil etiladigan korxonalarga chet el investitsiyalari ishtirokidagi korxonalar uchun qonun hujjatlarida nazarda tutilgan imtiyoz va preferensiyalar tatbiq etilsin.

6. Oʻzbekiston Respublikasi Tashqi ishlar vazirligi Tiklanish va taraqqiyot jamgʻarmasining buyurtmanomalariga asosan Oʻzbekiston — Ummon investitsiya kompaniyasi va “Oʻzomankapital” boshqaruv kompaniyasiga yollanib ishlash maqsadida jalb etiladigan xorijiy mutaxassislarga vizalar konsullik va boshqa yigʻimlarni undirmasdan belgilangan tartibda rasmiylashtirilishini taʼminlasin.

7. Oʻzbekiston Respublikasi Ichki ishlar vazirligi Oʻzbekiston Respublikasining Tiklanish va taraqqiyot jamgʻarmasi buyurtmanomalariga binoan, Oʻzbekiston — Ummon investitsiya kompaniyasi va “Oʻzomankapital” boshqaruv kompaniyasi xorijiy mutaxassislariga koʻp martalik vizalar belgilangan tartibda berilishi va muddati uzaytirilishini, shuningdek, ularning vaqtinchalik roʻyxatdan oʻtkazilishi va muddati uzaytirilishini davlat bojlari undirmasdan taʼminlasin.

8. Mazkur qarorning ijrosini nazorat qilish Oʻzbekiston Respublikasining Bosh vaziri Sh. Mirziyoyev zimmasiga yuklansin.