Mustaqil va suveren mamlakat sifatida O‘zbekiston davlat tarixining yangi ehtiyojlaridan, uni rivojlantirish istiqbollari va strategiyasini har tomonlama asoslash hamda ilmiy jihatdan puxta ishlab chiqish, jahon demokratik islohotlari va konstitutsiyaviy hokimiyatning samarali ishlashi tajribasini hisobga olish, respublika ichki va tashqi siyosatining ustuvor yo‘nalishlarini ishlab chiqish, uning iqtisodiy va ijtimoiy turmushida tub islohotlarni amalga oshirish, shuningdek uning milliy manfaatlarini himoya qilish zaruratidan kelib chiqib:

1. O‘zbekiston Respublikasining Prezidenti huzurida Jahon muammolari instituti tashkil qilinsin.

2. Quyidagilar institut faoliyatining asosiy vazifalari va yo‘nalishlari etib belgilansin:

— O‘zbekistonning davlat, siyosiy, iqtisodiy va ma’naviy taraqqiyoti muqobil konsepsiyalari hamda andozalarini ishlab chiqish va ekspert bahosini berish;

— umumjahon taraqqiyoti tendensiyalari va xususiyatlari to‘g‘risida tahliliy materiallar tayyorlash hamda ularning taraqqiyot istiqbolini belgilash;

— eng nufuzli xalqaro, hukumatlararo va mintaqaviy siyosiy hamda iqtisodiy institutlar faoliyatining asosiy yo‘nalishlari va xususiyatini tahlil qilish;

— turli mamlakatlar bilan mintaqalarning siyosiy va iqtisodiy turmushini qiyosiy o‘rganish, ularning rivojlanish tajribasini umumlashtirish;

— tashqi siyosiy faoliyatda O‘zbekiston milliy manfaatlarining yo‘nalishlarini belgilashga doir tadqiqotlarni tashkil etish hamda ularga muhofaza qilishga oid tavsiyanomalarni tayyorlash;

— harbiy siyosat sohasida tadqiqotlar o‘tkazish va respublikaning mudofaa konsepsiyasini ishlab chiqishda qatnashish;

— O‘zbekistonda ijtimoiy sohaga yo‘naltirilgan bozor iqtisodi uning tarmoqlari majmuini shakllantirish jarayonlarini har tomonlama tahlil etish;

— respublikaning boshqa mamlakatlar bilan iqtisodiy hamkorlik qilishida eng maqbul yo‘llar va yo‘nalishlarni izlash;

— respublika xorijiy sheriklar bilan tuzadigan iqtisodiy va bitimlarining loyihalarini ekspertizadan o‘tkazish;

— jahon maydonida umumiy savdo holatini o‘rganish va O‘zbekistonning iqtisodiy manfaatlarini himoya qilish shakllarini izlash;

— jahon tajribasini hisobga olib O‘zbekistonda davlat boshqaruvini takomillashtirishga oid takliflar va tavsiyalarni tayyorlash;

— respublikada qabul qilinadigan qonunlar va huquqqa oid hujjatlarning loyihalariga xalqaro huquq nuqtai nazaridan ekspert bahosini berish;

— millatlararo munosabatlarni o‘rganish hamda milliy va fuqarolar totuvligini ta’minlashga oid tavsiyalarni ishlab chiqish;

— muntazam suratda sotsiologik savol-javoblar o‘tkazish va ekspert baholar berish yo‘li bilan respublikaning ichki va tashqi siyosati to‘g‘risida jamoatchilikning, shu jumladan xalqaro jamoatchilikning fikrini o‘rganish O‘zbekiston to‘g‘risida xolisona tasavvurlarni shakllantirish yuzasidan tavsiyanomalar ishlab chiqish;

— jahon matbuoti va vaqtli nashrlarining tezkor sharhlarini tayyorlash;

— siyosiy va iqtisodiy tusdagi vaqtli ma’lumotnomalar chiqarish.

3. Aniq tadqiqot dasturlari va ilmiy topshiriqlarni bajarish uchun yuqori malakali mutaxassislar shartnoma asosida institutda ishlashga qabul qilinsin.

Institutga qo‘shma tadqiqotlar o‘tkazish uchun katta ilmiy markazlarning mavjud potensialini, taniqli olimlarni, shu jumladan xorijiy mamlakatlarning taniqli olimlarini o‘rindoshlik sharti bilan jalb etish va yakka shaxsiy shartnomalar tuzish huquqi berilsin.

Institutga amaldagi qonunlarga muvofiq shartnomaviy asosda tadqiqot ishlarini bajarishga ruxsat berilsin.

4. Institutga o‘zbek, ingliz va rus tillarida yiliga 6-marta har bir soni 6—8 bosma tabog‘i hajmida bo‘lgan “O‘zbekiston va hozirgi dunyo” nomli ijtimoiy-siyosiy jurnal, shuningdek vaqtli nashrlar hamda mavzularga oid to‘plam chiqarishga ruxsat etilsin.

5. Jahon muammolari institutini tashkil etish bilan bog‘liq tashkiliy va moliyaviy masalalarni hal etish uchun O‘zbekiston Respublikasi Prezidenti huzuridagi Davlat kotibi o‘rtoq R.R. Rajabov raisligida komissiya tuzilsin.

Komissiyaga bir hafta muddat ichida mazkur Farmon bajarilishini ta’minlash yuzasidan O‘zbekiston Respublikasi Prezidenti farmoyishining loyihasini taqdim etish topshirilsin.