2001-yil hosili uchun 2000-yil sentyabr—dekabr oylarida oʻtkaziladigan kuzgi-qishki agrotexnika tadbirlarini oʻz vaqtida mablagʻ bilan taʼminlash maqsadida Vazirlar Mahkamasi qaror qiladi:

1. Oʻzbekiston Respublikasi Moliya vazirligining 2001-yilgi paxta va boshoqli ekinlar don hosili uchun 2000-yilda oʻtkaziladigan kuzgi-qishki agrotexnika tadbirlariga 2000-yilga belgilangan davlat xaridlari hajmidan kelib chiqib avans berish toʻgʻrisidagi taklifiga rozilik berilsin.

2. “Oʻzdavpaxtasanoatsotish” uyushmasi va “Oʻzdonmahsulot” davlat-aksiyadorlik korporatsiyasi Oʻzbekiston Respublikasi Qishloq va suv xoʻjaligi vazirligi, “Oʻzmevasabzavotuzumsanoat-xolding” kompaniyasi, Qoraqalpogʻiston Respublikasi Vazirlar Kengashi va viloyatlar hokimliklari bilan birgalikda qishloq xoʻjaligi korxonalari bilan 2000-yil 1-oktabrgacha 2001-yil paxta va boshoqli ekinlar don hosiliga kontraktatsiya shartnomalari tuzilishini taʼminlasinlar, ushbu shartnomalarda avans berish miqdorlarini 2000-yilga belgilangan davlat xaridlari hajmidan va xarid narxlaridan kelib chiqib nazarda tutsinlar.

Belgilab qoʻyilsinki, 2001-yil hosili uchun kontraktatsiya shartnomalarining uzil-kesil shartlari paxta, boshoqli ekinlar doni yetishtirish prognozi hamda ularning xarid narxlari belgilangan tartibda tasdiqlangandan keyin belgilanadi.

4. “Oʻzdavpaxtasanoatsotish” uyushmasi va “Oʻzdonmahsulot” davlat-aksiyadorlik korporatsiyasi Oʻzbekiston Respublikasi Qishloq va suv xoʻjaligi vazirligi, “Oʻzagrosugʻurta” kompaniyasi, Qoraqalpogʻiston Respublikasi Vazirlar Kengashi, viloyatlar va tumanlar hokimliklari 2001-yil hosili paxta, boshoqli ekinlar doni yetishtirishga avans berishni tasdiqlangan texnologiya kartalari boʻyicha xarajatlardan va moddiy-texnika zaxiralariga limitlardan kelib chiqib xoʻjaliklar bilan tuzilgan kontraktatsiya shartnomalari asosida taʼminlasinlar.

5. “Oʻzagrosugʻurta” davlat-aksiyadorlik sugʻurta kompaniyasi Qoraqalpogʻiston Respublikasi Vazirlar Kengashi, viloyatlar, tumanlar hokimliklari va qishloq xoʻjaligi korxonalari rahbarlari bilan birgalikda paxta, boshoqli ekinlar va sholi hosilining tabiiy ofatlar hamda boshqa kutilmagan hodisalardan nobud boʻlishi ehtimoliga oʻz vaqtida ixtiyoriy sugʻurta qilinishini taʼminlash chora-tadbirlarini koʻrsinlar.

6. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosarlari R.S. Azimov va T.X. Xoltoyev zimmasiga yuklansin.