Respublika aholisining daromadlari va turmush darajasini yanada muttasil oshirib borish, fuqarolarga ijtimoiy madadni kuchaytirish maqsadida:

1. 2010 yilning 1 avgustidan boshlab budjet muassasalari va tashkilotlari xodimlarining ish haqi, pensiyalar hamda ijtimoiy nafaqalar, stipendiyalar miqdori oʻrta hisobda 1,2 baravar oshirilsin.

2. 2010 yilning 1 avgustidan boshlab Oʻzbekiston Respublikasi hududida eng kam:

ish haqi — oyiga 45 215 soʻm;

yoshga doir pensiyalar — oyiga 88 845 soʻm;

yagona tarif setkasi boʻyicha boshlangʻich (nulinchi) razryad — oyiga 45 215 soʻm;

bolalikdan nogironlarga beriladigan nafaqa — oyiga 88 845 soʻm;

zarur ish stajiga ega boʻlmagan keksa yoshdagi va mehnatga layoqatsiz fuqarolarga beriladigan nafaqa oyiga 54 265 soʻm miqdorida belgilansin.

3. Belgilab qoʻyilsinki, ish haqiga qoʻshiladigan ustama va qoʻshimcha haqlarning barcha turlari, shuningdek pensiyalar, ikki yoshgacha boʻlgan bolalarni tarbiyalayotgan onalarga, bolali oilalarga beriladigan nafaqalar hamda eng kam ish haqiga nisbatan belgilangan kompensatsiya va boshqa toʻlovlar 2010 yilning 1 avgustidan boshlab mazkur Farmonda belgilangan eng kam ish haqi miqdoridan kelib chiqqan holda amalga oshiriladi.

4. Belgilansinki, 2010 yilning 1 avgustidan boshlab barcha turdagi pensiyalarning oʻrtacha 1,2 baravar oshirilishi ularning amaldagi qonun hujjatlariga muvofiq qayta hisoblab chiqilishini inobatga olgan holda amalga oshiriladi, bunda 1991 yilning 1 yanvarigacha va undan keyingi yillarda tayinlangan pensiyalarning miqdori tenglashtirilishi nazarda tutiladi.

Oʻzbekiston Respublikasi Moliya vazirligi oʻn kun muddatda pensiyalarni qayta hisoblash tartibini ishlab chiqsin va tasdiqlasin hamda barcha turdagi pensiyalarni oshirishning aniq miqdorlarini belgilasin.

5. Oʻzbekiston Respublikasi Mehnat va aholini ijtimoiy muhofaza qilish vazirligi vazirliklar, idoralar, Qoraqalpogʻiston Respublikasi Vazirlar Kengashi, viloyatlar va Toshkent shahri hokimliklari, budjetdan moliyalanadigan tashkilot hamda muassasalar bilan birgalikda pensiyalar, nafaqalar, stipendiyalar, budjet muassasalari va tashkilotlari xodimlarining lavozim maoshlari miqdorini mazkur Farmon qoidalaridan kelib chiqqan holda oʻz vaqtida qayta hisoblab chiqishni taʼminlasin.

6. Quyidagi tartib oʻrnatilsinki, unga muvofiq 2010 yilning 1 avgustidan boshlab ish haqi, pensiyalar, nafaqa va stipendiyalarning oshirilishi bilan bogʻliq xarajatlar:

budjet muassasalari va tashkilotlari xodimlarining ish haqi oshirilishi 90 foiz miqdorida respublika davlat budjeti mablagʻlari hisobidan hamda 10 foiz miqdorida budjet muassasalari va tashkilotlari smetalari boʻyicha xarajatlarni maqbullashtirish hisobidan;

pensiyalar, ijtimoiy nafaqalar va stipendiyalarning oshirilishi respublika davlat budjeti va Oʻzbekiston Respublikasi Moliya vazirligi huzuridagi budjetdan tashqari Pensiya jamgʻarmasi hisobidan amalga oshiriladi.

7. Xoʻjalik hisobidagi birlashma, korxona va tashkilotlar 2010 yilning 1 avgustidan boshlab mazkur Farmonda belgilangan eng kam ish haqiga muvofiq, ishlab chiqarish samaradorligini oshirish va mehnat sarfini kamaytirish hisobiga ish haqi miqdorini oshirsin.

8. Oʻzbekiston Respublikasi Prezidentining 2009 yil 16 noyabrdagi PF-4152-sonli Farmoni (7-bandi istisno qilingan holda) 2010 yilning 1 avgustidan boshlab oʻz kuchini yoʻqotgan deb hisoblansin.

9. Oʻzbekiston Respublikasi Adliya vazirligi bir oy muddatda qonun hujjatlariga ushbu Farmondan kelib chiqadigan oʻzgartish va qoʻshimchalar toʻgʻrisida Vazirlar Mahkamasiga takliflar kiritsin.

10. Mazkur Farmonning ijrosini nazorat qilish Oʻzbekiston Respublikasi Bosh vaziri Sh.M. Mirziyoyev zimmasiga yuklansin.