Kuchli jala va seysmik taʼsir natijasida 1991-yilning 4-may kuni Toshkent viloyatining Angren shahridagi Jigariston posyolkasi rayonida tabiiy ofat — koʻchki yuz berdi va u moddiy zarar yetkazdi. Uy-joylar, xoʻjalik imoratlari, kommunikatsiyalar, yoʻllar va boshqa inshootlar zararlandi. Qurbon boʻlganlar bor.

Vazirlar Mahkamasi qayd qiladiki, Jigariston posyolkasida yuz bergan koʻchki tasodifiy va kutilmagan hodisa emas. 1990-yilning aprel oyidayoq yoki voqea yuz berishidan bir yil oldin OʻzSSJ Davlat geologiya qoʻmitasining injenerlik-geologiya xizmati 33 xonadondan aholini xavfsiz joyga darhol koʻchirish haqida xalq deputatlari Angren shahar Soveti (oʻrtoq Yusupaliyev)ga rasmiy xatlar yoʻllagan edi.

OʻzSSJ Vazirlar Mahkamasi 1990-yilning 5-may kuni Toshkent viloyat ijroiya qoʻmitasi (oʻrtoq Saydaliyev)ga va “Sredazugol” ishlab chiqarish birlashmasi (oʻrtoq Leleko)ga bu masalani darhol koʻrib chiqib, qabul qilingan chora-tadbirlar haqida jumhuriyat Hukumatini 10 kun muddat ichida xabardor qilishni topshirgan edi. Lekin hech qanday amaliy chora-tadbirlar koʻrilmadi.

Bu masalaga nomaʼlum sabablarga koʻra xavfli zonadan koʻchishni rad etgan Jigariston aholisining gaplariga uchib, Angren shahar ijroiya qoʻmitasi rahbarlari mazkur masalaga murosasozlik bilan, befarq munosabatda boʻlganliklarini alohida qayd qilish kerak.

Mazkur rahbarlar sansalorlik, ishda uyushqoqsizlikka yoʻl qoʻydilar, bu bilan ana shu fojianing oldini olish yuzasidan oʻz vaqtida chora koʻrilmadi.

Zarar koʻrgan aholiga zarur yordam koʻrsatish va tabiiy ofat oqibatlarini tugatish uchun hukumat komissiyasi va favqulodda jumhuriyat shtabi tuzildi. Odamlar xavfli zonadan darhol koʻchirildi, ularga uy-joy berildi, moddiy yordam koʻrsatildi. Ovqatlanish va tibbiy yordam koʻrsatish, jamoat tartibini saqlash, kundalik ehtiyoj mollari va qurilish materiallari bilan savdo qilish punktlari tashkil etildi.

Vazirlar Mahkamasi qaror qiladi:

1. Xalq deputatlari Angren shahar Sovetining raisi oʻrtoq S.Y.Yusupaliyevning va Angren shahar ijroiya qoʻmitasining raisi oʻrtoq A.M.Aliqulovning boʻlib oʻtgan voqea yuzasidan javobgarliklari haqidagi masalani xalq deputatlari Toshkent viloyat Sovetida koʻrib chiqish zarur va maqsadga muvofiq deb hisoblansin.

2. Kechiktirib boʻlmaydigan masalalarni hal etishda sustkashlikka yoʻl qoʻyganligi va yuzaga kelgan xavfli vaziyatda odamlar taqdiriga befarq munosabatda boʻlganligi uchun “Sredazugol” ishlab chiqarish birlashmasining bosh direktori oʻrtoq A.I.Leleko qattiq ogohlantirilsin. Oʻrtoq A.I.Leleko mansabdor shaxslarning javobgarlik darajasini aniqlab, Vazirlar Mahkamasiga axborot bersin.

3. Toshkent viloyat ijroiya qoʻmitasi, Angren shahar ijroiya qoʻmitasi, “Sredazugol” ishlab chiqarish birlashmasi 2 hafta muddat ichida odamlarning koʻchki xavfi boʻlgan zonada bundan buyon xavf-xatarsiz yashashini taʼminlaydigan chora-tadbirlarni ishlab chiqsinlar.

4. Vazirliklar, idoralar, Toshkent viloyat ijroiya qoʻmitasi, Angren shahar ijroiya qoʻmitasi, “Sredazugol” ishlab chiqarish birlashmasi hamda Jigariston posyolkasidagi tabiiy ofat — koʻchki oqibatlarini tugatishda qatnashuvchi boshqa tashkilotlarning birinchi rahbarlari zimmasiga qisqa muddat ichida barcha zarur kuchlar, texnika va moddiy resurslarni toʻplab, sentyabr oyida 50 ta yakka tartibdagi uy-joylarni foydalanishga topshirish vazifasi yuklansin, ular suv, elektr energiya, aloqa va yoʻllar bilan taʼminlansin, shuningdek, 1176 oʻquvchi oʻrniga ega boʻlgan umumiy taʼlim maktabi, 280 oʻrinli bolalar bogʻchasi qurilishi boshlab yuborilsin.

5. OʻzSSJ Davlat qurilish ishlari qoʻmitasi (oʻrtoq Temkin), OʻzSSJ Davlat geologiya qoʻmitasi (oʻrtoq Shoyoqubov), “Oʻzgidromet” (oʻrtoq Chub) xalq deputatlari mahalliy Sovetlarining ijroiya qoʻmitalari, vazirliklar va idoralar bilan birgalikda 2 oy muddat ichida aholi yashaydigan joylarni, sanoat korxonalarini va boshqa xalq xoʻjaligi obyektlarini tabiatning xavfli hurujidan himoya qilish masalalarini kompleks hal etishga qaratilgan takliflarni tayyorlab Vazirlar Mahkamasiga taqdim etsinlar.

6. OʻzSSJ Davlat qurilish ishlari qoʻmitasi manfaatdor tashkilotlar ishtirokida 3 oy muddat ichida ilmiy-ishlab chikarish kompleksi (Oʻzbekiston SSJ “GlavINJzashchita”)ni tashkil etish haqida taklif kiritsin, u prognozlash, loyihalash, himoya inshootlarini qurish va ishga tushirish, ekzogen jarayonlarning oldini olish yuzasidan profilaktik chora-tadbirlarni oʻtkazish masalalarini hal qilishi kerak.

7. Mazkur qarorning bajarilishini nazorat qilish Oʻzbekiston SSJ Prezidenti huzuridagi Vazirlar Mahkamasining tegishli tarmoq boʻlimlari zimmasiga yuklatilsin.