Eksportga mo‘ljallangan mahsulotlar ishlab chiqarishni ko‘paytirish, importning o‘rnini bosuvchi ishlab chiqarishlarni kengaytirish maqsadida hamda Buyuk Britaniya Hukumatining O‘zbekiston Respublikasi uchun kreditlarni sug‘urta qilish haqidagi qarorini e’tiborga olib Vazirlar Mahkamasi qaror qiladi:

1. O‘zbekiston Respublikasi Tashqi iqtisodiy faoliyat milliy bankining O‘zbekistonga texnologiyalar va asbob-uskunalar yetkazib berishni mablag‘ bilan ta’minlash yuzasidan “Barklayz bank” (Buyuk Britaniya) bilan uzoq muddatli Umumiy bitim tuzish haqidagi taklifiga rozilik berilsin.

2. O‘zbekiston Respublikasi Tashqi iqtisodiy faoliyat milliy banki:

ikki oy muddatda Buyuk Britaniyaning eksport kreditlarini kafolatlash departamentining sug‘urta qoplamasi ostida “Barklayz bank” bilan 75 mln funt sterling summasidagi Umumiy bitimni imzolasin va bu haqda respublika Hukumatiga axborot bersin;

“O‘zistiqbolstat” davlat qo‘mitasi va O‘zbekiston Respublikasi Tashqi iqtisodiy aloqalar vazirligi bilan birgalikda kredit berishning asosiy prinsiplariga va loyihalarning to‘liq o‘zini qoplashiga qat’iy rioya qilgan holda texnik-iqtisodiy asoslanishi kompleks ekspertizadan o‘tgan Angliya texnologiyalari va asbob-uskunalari yetkazib berilishining “Barklayz bank” kredit liniyasi hisobidan mablag‘ bilan ta’minlanishi mo‘ljallanayotgan loyihalarni tanlov asosida tanlab olsin. Ekspert xulosalari ijobiy bo‘lgan taqdirda loyihalar ro‘yxatini kelishish uchun Vazirlar Mahkamasiga kiritsin;

respublika uchun ustuvor ahamiyatga ega bo‘lgan va eksportga mo‘ljallangan hamda importning o‘rnini bosishga yo‘naltirilgan loyihalar yuzasidan xalqaro kreditlarni mablag‘ bilan qayta ta’minlash bo‘yicha “Barklayz bank” bilan yakka tartibdagi kredit bitimini tuzsin.

3. O‘zbekiston Respublikasi Bosh vazirining o‘rinbosari, Moliya vaziri B.S. Hamidovga, Vazirlar Mahkamasining qarori asosida, “Barklayz bankidan olinadigan kreditlar yuzasidan O‘zbekiston Respublikasi Hukumati nomidan kafolatni har bir loyiha uchun alohida imzolash vakolati berilsin.

4. O‘zbekiston Respublikasi Adliya vazirligi “Barklayz bank” bilan O‘zbekiston Respublikasi Tashqi iqtisodiy faoliyat milliy banki o‘rtasida tuzilgan Umumiy bitim qoidalariga, yakka tartibdagi kredit bitimlariga muvofiq O‘zbekiston Respublikasi hukumati kafolatlari yuzasidan yuridik xulosalarni belgilangan tartibda rasmiylashtirsin.

5. Mazkur qarorning bajarilishini nazorat qilish O‘zbekiston Respublikasi Bosh vazirining o‘rinbosari B.S. Hamidov zimmasiga yuklansin.

Mazkur qarorning qanday bajarilayotganligi to‘g‘risida respublika Hukumatiga yilning har choragida axborot berilsin.