Mehnatga haq toʻlash boʻyicha qarzdorlik hosil boʻlishiga yoʻl qoʻymaslik va ish haqining oʻz vaqtida toʻlanishi hamda ushbu maqsadlar uchun ajratilgan mablagʻlardan maqsadli foydalanish yuzasidan vazirliklar, idoralar va xoʻjalik yurituvchi subyektlar rahbarlarining javobgarligini oshirish maqsadida Vazirlar Mahkamasi qaror qiladi:

1. Vazirliklar, idoralar va xoʻjalik yurituvchi subyektlarning ish haqi oʻz vaqtida berilishini taʼminlash va ushbu maqsadlar uchun ajratilgan mablagʻlardan maqsadli foydalanish boʻyicha ishlari qoniqarsiz deb eʼtirof etilsin.

Belgilansinki, vazirliklar va idoralarning, xoʻjalik yurituvchi subyektlar va xizmat koʻrsatuvchi tijorat banklarining birinchi rahbarlari ish haqining oʻz vaqtida toʻlanishini taʼminlash va ushbu maqsadlar uchun nazarda tutilgan mablagʻlardan maqsadli foydalanilishi uchun shaxsan javob beradilar.

2. Vazirliklar, idoralar va xoʻjalik yurituvchi subyektlar rahbarlari:

bir hafta muddatda oʻzlariga qarashli boʻlinmalarda mehnatga haq toʻlash boʻyicha hisob-kitoblarning holatini xatlovdan oʻtkazsinlar va mavjud qarzlarni toʻlash yuzasidan aniq chora-tadbirlar koʻrsinlar;

debitorlik qarzlarini undirish va oʻzlariga qarashli korxonalar va tashkilotlarda ish haqi boʻyicha mavjud qarzlarning 1999-yil 1-dekabrgacha toʻliq toʻlanishini taʼminlash uchun oʻzlarining boshqa resurslarini safarbar etish yuzasidan qoʻshimcha chora-tadbirlar koʻrsinlar.

3. Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari xoʻjalik yurituvchi subyektlar tomonidan mehnatga haq toʻlash boʻyicha hisob-kitoblarning oʻz vaqtida amalga oshirilishi ustidan doimiy nazorat oʻrnatsinlar, toʻlovlar kechiktirilishining har bir holatini hisob-kitoblar mexanizmini takomillashtirish va budjetga toʻlovlar intizomini mustahkamlash boʻyicha mintaqaviy komissiyalar majlislarida koʻrib chiqsinlar.

4. Oʻzbekiston Respublikasi Monopoliyadan chiqarish va raqobatni rivojlantirish davlat qoʻmitasi bankrot korxonalarni tugatish komissiyalari bilan birgalikda qarzdorlardan mablagʻlarni undirishni hamda mol-mulkni sotishni jadallashtirish chora-tadbirlarini koʻrsinlar, olingan mablagʻlarni qonun hujjatlarida, belgilangan tar tibda mehnatga haq toʻlash boʻyicha qarzlarini toʻlashga yoʻnaltirsin.

5. Tijorat banklari:

ish haqiga kreditlar berilganda yagona ijtimoiy toʻlov hamda fuqarolarning Oʻzbekiston Respublikasi Moliya vazirligi huzuridagi budjetdan tashqari Pensiya jamgʻarmasiga majburiy sugʻurta badallari toʻlanishi nazarda tutilsin;

mehnatga haq toʻlashga yoʻnaltiriladigan maqsadli mablagʻlar harakati va ularning xoʻjalik yurituvchi subyektlar tomonidan belgilangan maqsadlar uchun qatʼiy foydalanilishi ustidan taʼsirchan nazorat oʻrnatsinlar;

ish haqi toʻlash uchun olingan naqd pul mablagʻlaridan belgilangan maqsadlarda foydalanilmaslikning har bir holati boʻyicha materiallarni mazkur holat aniqlangan kundan boshlab 5 kun mobaynida prokuratura organlariga bersinlar.

6. Oʻzbekiston Respublikasi Prokuraturasi ish haqi boʻyicha qarzlarni toʻlashga yoʻnaltirilgan mablagʻlardan maqsadli foydalanilmasligiga yoʻl qoʻyayotgan xoʻjalik yurituvchi subyektlarning mansabdor shaxslari qonun hujjatlarida nazarda tutilgan javobgarlikka tortilishi ustidan nazoratni kuchaytirsin.

7. Hisob-kitoblar mexanizmini takomillashtirish va budjetga toʻlovlar intizomini mustahkamlash boʻyicha Hukumat komissiyasi;

shaharlar asosi boʻlgan korxonalar va tashkilotlarning mehnatga haq toʻlash boʻyicha qarzlarini belgilangan muddatlarda toʻliq hajmda qoplash boʻyicha tezkorlik bilan aniq chora-tadbirlar koʻrsin va qarorlar qabul qilsin, mablagʻlar harakati sxemasini belgilasin;

vazirliklar va idoralarda ish haqining toʻlanishini har oʻn kunda koʻrib borsin, rahbarlarning masʼuliyatini belgilasin. Chora-tadbirlar koʻrilmagan va mablagʻlardan maqsadli foydalanilmagan hollarda materiallarni aybdorlarni javobgarlikka tortish uchun prokuratura organlariga bersin.

8. Oʻzbekiston Respublikasi Moliya vazirligi huzuridagi Davlat ehtiyojlari uchun xarid qilinadigan qishloq xoʻjalik mahsulotlarining hisob-kitob jamgʻarmasi 1999-yil noyabr-dekabr oylarida joriy ish haqi toʻlash va xizmat koʻrsatuvchi korxonalar bilan rejali hisob-kitoblarni taʼminlash uchun paxta yetishtiruvchi xoʻjaliklariga 2,0 mlrd soʻm, “Oʻzkimyosanoat” uyushmasi korxonalari va tashkilotlariga — 500 mln soʻm miqdoridagi maqsadli mablagʻlarni maxsus transhlar bilan ajratsin,

9. Oʻzbekiston Respublikasi Adliya vazirligi manfaatdor vazirliklar va idoralar bilan birgalikda xodimlarga ish haqi toʻlashga ajratilayotgan mablagʻlardan maqsadli foydalanilmasligiga yoʻl qoʻyayotgan korxonalar va tashkilotlarning rahbarlarini javobgarlikka tortish boʻyicha qonun hujjatlariga oʻzgartirish va qoʻshimchalar kiritish yuzasidan bir oy muddatda Vazirlar Mahkamasiga takliflar kiritsin.

10. Mazkur qarorning bajarilishini nazorat qilish Bosh vazirning oʻrinbosari B.S.Hamidov va Oʻzbekiston Respublikasi Markaziy banki raisi F.M.Mullajonov zimmasiga yuklansin.