Kadrlar tayyorlash milliy dasturi talablariga va belgilangan ta’lim standartlariga muvofiq respublika ta’lim muassasalari o‘quvchilarining yuqori sifatli maktab daftarlari, kundaliklar va rasm chizish albomlariga bo‘lgan ehtiyojlarini yanada to‘liqroq ta’minlash, shuningdek maktab-yozuv buyumlari ishlab chiqarayotgan mamlakat poligrafiya korxonalarini texnik va texnologik qayta jihozlash uchun qulay shart-sharoitlar yaratish maqsadida:

1. 2010 – 2014-yillar davrida poligrafiya faoliyati bilan shug‘ullanayotgan yuridik shaxslar O‘zbekiston Respublikasida ishlab chiqarilmaydigan va maktab daftarlari, kundaliklar hamda rasm chizish albomlari tayyorlashda foydalaniladigan texnologik uskunalar, ehtiyot qismlar va qog‘oz xomashyosini O‘zbekiston Respublikasi Vazirlar Mahkamasi tomonidan tasdiqlanadigan ro‘yxatlar bo‘yicha import qilishda bojxona to‘lovlari (bojxona rasmiylashtiruvi yig‘imlaridan tashqari) to‘lashdan ozod etilsin.

2. O‘zbekiston Respublikasi Davlat soliq qo‘mitasi hamda O‘zbekiston Respublikasi Prezidenti Administratsiyasi huzuridagi Axborot va ommaviy kommunikatsiyalar agentligi mazkur qarorga muvofiq bojxona to‘lovlari imtiyozlari qo‘llanilgan holda maktab daftarlari, kundaliklar va rasm chizish albomlari ishlab chiqarish uchun respublikaga keltiriladigan texnologik uskunalar, ehtiyot qismlar va qog‘oz xomashyosining maqsadli ishlatilishi ustidan qat’iy nazorat o‘rnatsin.

Belgilansinki, import qilinadigan tovarlardan maqsadga xilof ravishda foydalanish hollarida qonun hujjatlarida belgilangan tartibda soliq organlari taqdimnomasiga ko‘ra bojxona to‘lovlarining tegishli summasi bojxona organlari tomonidan budjetga undirilib olinadi.

3. Mazkur qarorning ijrosini nazorat qilish O‘zbekiston Respublikasi Bosh vazirining birinchi o‘rinbosari R.S. Azimov va O‘zbekiston Respublikasi Bosh vazirining o‘rinbosari A.N. Aripov zimmalariga yuklansin.