Oʻzbekiston Respublikasi Prezidentining 2009-yil 3-avgustdagi PQ-1167-son “Qishloq joylarda uy-joy qurilishi koʻlamini kengaytirishga oid qoʻshimcha chora-tadbirlar toʻgʻrisida”gi qarorini bajarish yuzasidan hamda “Qishloq qurilish bank” aksiyadorlik tijorat bankining “Qishloq qurilish invest” injiniring kompaniyasining oʻz ishlab chiqarish bazasini tashkil etish maqsadida Vazirlar Mahkamasi qaror qiladi:

1. “TAPOiCh” davlat aksiyadorlik jamiyati, Oʻzbekiston Respublikasi Moliya vazirligi, “Davarxitektqurilish” qoʻmitasi, Davlat mulki qoʻmitasi va “Qishloq qurilish bank” ATB “Qishloq qurilish invest” injiniring kompaniyasining TAPOiCh” DAB tomonidan Toshkent shahri, Elbek koʻchasi, 61-uy manzilida joylashgan, 1,8 ga yer uchastkasiga ega boʻlgan yogʻochga ishlov berish fabrikasi (texnologik uskunalarisiz)ni “Qishloq qurilish invest” injiniring kompaniyasiga mustaqil baholovchi tashkilot tomonidan 1048,3 mln soʻm miqdorida belgilangan qiymatda sotish toʻgʻrisidagi taklifiga rozilik berilsin.

2. “TAPOich” davlat aksiyadorlik jamiyati bir oy muddatda:

maxsus hisob raqami mablagʻlari hisobiga yogʻochga ishlov berish fabrikasi hududidan texnologik asbob-uskunalar demontaj qilinishi va olib chiqib ketilishini, keyinchalik belgilangan tartibda sotilishini taʼminlasin;

Oʻzbekiston Respublikasi Davlat mulki qoʻmitasi hamda boshqa manfaatdor vazirliklar va idoralar bilan birgalikda qonun hujjatlariga ushbu qarordan kelib chiqadigan oʻzgartirish va qoʻshimchalar toʻgʻrisida Vazirlar Mahkamasiga taklif kiritsin.

3. Mazkur qarorning bajarilishini nazorat qilish Oʻzbekiston Respublikasi Bosh vazirining birinchi oʻrinbosari R.S. Azimov va Oʻzbekiston Respublikasi Bosh vazirining oʻrinbosari B.A. Xodjayev zimmasiga yuklansin.