Oʻzbekiston Respublikasi shaharlari, tumanlari va boshqa aholi punktlarida, shuningdek iqtisodiyot tarmoqlari va ijtimoiy soha obyektlarida yongʻin xavfsizligini taʼminlash chora-tadbirlarini kuchaytirish maqsadida:

1. 2009-yil 23-noyabrdan 23-dekabrgacha yongʻin xavfsizligi oyligi oʻtkazilsin.

Quyidagilar yongʻin xavfsizligi oyligining asosiy vazifalari etib belgilansin:

idoraviy boʻysunishi va mulkchilik shakllaridan qatʼi nazar, korxonalar, muassasalar va tashkilotlar obyektlarini, shuningdek uy-joy fondini yongʻin xavfsizligi talablariga muvofiq holga keltirish;

respublikaning toifalangan va oʻta muhim obyektlarida yongʻin xavfsizligini mustahkamlash boʻyicha kompleks chora-tadbirlarni amalga oshirish,

2. Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari, davlat va xoʻjalik boshqaruvi organlari yongʻin xavfsizligi oyligini tashkil etish va oʻtkazish boʻyicha komissiyalar tuzsinlar, rejalashtirilgan tadbirlarning amalga oshirilishini har oʻn kunda komissiya hayʼat, boshqaruv, kengash yigʻilishlarida koʻrib chiqsinlar hamda tegishli xizmatlar, muassasalar va tashkilotlar rahbarlarining hisobotlarini eshitsinlar.

3. Davlat va xoʻjalik boshqaruvi organlari:

hayʼatlar, boshqaruvlar, kengashlar majlislarida oʻzlariga qarashli obyektlar va uy-joy fondining texnik holati, yongʻin xavfsizligi masalalarini koʻrib chiqsinlar;

obyektlar va uy-joy fondini yongʻinga xavfsiz holatga keltirish uchun ajratilgan mablagʻlarning qatʼiy ravishda maqsadli foydalanilishiga erishsinlar;

gaz, energetika, suv xoʻjaligi va isitish moslamalarining holati va sozligiga alohida eʼtibor qaratsinlar;

yongʻin xavfsizligi qoidalari buzilishining har bir holati boʻyicha puxta tekshiruvlar oʻtkazsinlar, yongʻin roʻy berishiga yoʻl qoʻygan rahbarlarga nisbatan qonun hujjatlariga muvofiq choralar koʻrsinlar;

obyektlardagi yongʻin xavfsizligi boʻlinmalarini oʻt oʻchirish texnikasi, asbob-uskunalar va anjomlar bilan taʼminlash chora-tadbirlarini koʻrsinlar;

ishchilar, xizmatchilar, taʼlim muassasalari oʻquvchilari va aholi oʻrtasida tushuntirish ishlarini kuchaytirsinlar, jamoatchilikni yongʻinlarning oldini olish tadbirlariga keng jalb etsinlar;

yongʻinga qarshi suv taʼminoti manbalari (gidrantlar, rezervuarlar, suv hovuzlari, ichki oʻt oʻchirish joʻmraklari)ni soz holatga keltirish chora-tadbirlarini koʻrsinlar.

4. Oʻzbekiston milliy teleradiokompaniyasi, ommaviy axborot vositalari:

yongʻin xavfsizligi oyligi oʻtkazilishini keng yoritsinlar;

fuqarolarning oʻzini-oʻzi boshqarish va yongʻin nazorati organlari bilan birgalikda yongʻin xavfsizligini taʼminlash masalalari uzoq vaqtdan buyon hal etilmay kelinayotgan obyektlar va aholi punktlari boʻyicha reydlar uyushtirsinlar.

5. Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari, davlat va xoʻjalik boshqaruvi organlari amalga oshirilgan ishlar toʻgʻrisida 2009-yil 25-dekabrgacha Oʻzbekiston Respublikasi Vazirlar Mahkamasiga axborot bersinlar.

6. Mazkur farmoyishning bajarilishini nazorat qilish Oʻzbekiston Respublikasi Bosh vazirining oʻrinbosari B.A. Xoʻjayev zimmasiga yuklansin.