Oʻzbekiston Respublikasi Prezidentining “Loyiha-tadqiqot tashkilotlari faoliyatini yanada takomillashtirish chora-tadbirlari toʻgʻrisida” 2008-yil 29-apreldagi PQ-847-son qaroriga muvofiq hamda arxitektura-shaharsozlik hujjatlarini yaratish faoliyatini litsenziyalash tartibini takomillashtirish maqsadida Vazirlar Mahkamasi qaror qiladi:

1. Arxitektura-shaharsozlik hujjatlarini yaratish faoliyatini litsenziyalash toʻgʻrisidagi nizom 1-ilovaga muvofiq tasdiqlansin.

2. Belgilab qoʻyilsinki:

arxitektura-shaharsozlik hujjatlarini yaratish boʻyicha litsenziyalar 5 yil muddatga beriladi;

arxitektura-shaharsozlik hujjatlarini yaratish boʻyicha ilgari berilgan litsenziyalar Arxitektura-shaharsozlik hujjatlarini yaratish faoliyatini litsenziyalash toʻgʻrisidagi tasdiqlangan yangi Nizom talablariga muvofiq 2009-yil 1-iyulgacha boʻlgan muddatda qayta roʻyxatdan oʻtkazilishi kerak.

3. Oʻzbekiston Respublikasi “Davarxitektqurilish” qoʻmitasi:

arxitektura-shaharsozlik hujjatlarini yaratish faoliyatini amalga oshirish uchun litsenziyalar berish toʻgʻrisidagi hujjatlarni koʻrib chiqish boʻyicha ekspert komissiya tarkibini mustahkamlasin;

2009-yil 1-iyungacha boʻlgan muddatda litsenziatlar tomonidan litsenziya talablari va shartlari bajarilishi toʻgʻrisidagi axborot bilan toʻldirib boriladigan markazlashtirilgan maʼlumotlar bazasini tashkil etsin;

ommaviy axborot vositalari, shu jumladan Internet tarmogʻi orqali litsenziya talablari va shartlari, shuningdek litsenziyasining amal qilishi toʻxtatib turilgan, toʻxtatilgan yoki litsenziyasi bekor qilingan litsenziatlar toʻgʻrisida muntazam ravishda axborot berib borsin.

4. Oʻzbekiston Respublikasi Hukumatining 2-ilovaga muvofiq ayrim qarorlari oʻz kuchini yoʻqotgan deb hisoblansin.

5. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari N.M. Xanov zimmasiga yuklansin.

1. Ushbu Nizom arxitektura-shaharsozlik hujjatlarini yaratish faoliyatini litsenziyalash tartibini belgilaydi.

Barcha turdagi arxitektura-shaharsozlik hujjatlarini yaratish faoliyati obyektlarni qurish uchun muhandislik-texnik izlanishlarni, dastlabki va yakuniy texnik-iqtisodiy hisob-kitoblarni hamda texnik-iqtisodiy asoslashlarni yaratishni, bino va inshootlarni loyihalashni, qurilishning loyiha-smeta hujjatlarini yaratishni, xoʻjalik, sanoat va boshqa maqsadlardagi binolar va inshootlarni hamda ularning komplekslarini, muhandislik va transport infratuzilmasi binolari va inshootlarini kengaytirish, rekonstruksiya qilish, texnik jihatdan qayta jihozlash va mukammal taʼmirlash, shuningdek ularning mustahkamligi, barqarorligi va ishonchliligi yoʻqolgan taqdirda odamlar xavfsizligiga xavf yoki katta moddiy yoʻqotishlar vujudga keladigan uning muhim funksiyalarini bajarish elementlarini oʻz ichiga oladi.

2. Litsenziya berish, litsenziyaning amal qilishini toʻxtatib turish yoki tugatish, shuningdek uni bekor qilish va qayta rasmiylashtirish toʻgʻrisidagi qarorlar Oʻzbekiston Respublikasi Davlat arxitektura va qurilish qoʻmitasi (keyingi oʻrinlarda “Davarxitektqurilish” qoʻmitasi deb ataladi) tomonidan qabul qilinadi.

Litsenziyalar berish toʻgʻrisidagi hujjatlarni koʻrib chiqish uchun “Davarxitektqurilish” qoʻmitasida Ekspert komissiya (keyingi oʻrinlarda Komissiya deb ataladi) tuziladi. Ekspert komissiya faoliyati “Davarxitektqurilish” qoʻmitasi tomonidan tasdiqlangan nizomga muvofiq tashkil etiladi. Komissiya oʻziga yuklangan funksiyalarni bajarish uchun “Davarxitektqurilish” qoʻmitasi vakillaridan ishchi guruh tuzadi.

3. Arxitektura-shaharsozlik hujjatlarini yaratish faoliyati faqat ushbu Nizomda nazarda tutilgan talablarga muvofiq boʻlgan yuridik shaxslar tomonidan amalga oshiriladi.

Arxitektura-shaharsozlik hujjatlarini yaratish faoliyatini amalga oshirish huquqiga namunaviy (oddiy) litsenziyalar beriladi.

Namunaviy litsenziyalar litsenziya talabgorining arizasiga binoan umuman loyihalash faoliyati turiga yoki ushbu Nizomga 1 va 2-ilovalarga muvofiq arxitektura-shaharsozlik hujjatlari klassifikatorlariga hamda obyektlarni loyihalash va qurish murakkabligi toifalariga muvofiq loyihalashning bir yoki bir necha turlariga (boʻlimlariga) beriladi.

Namunaviy litsenziyalarning amal qilishi loyihalashning barcha bosqichlariga tatbiq etiladi.

4. Arxitektura-shaharsozlik hujjatlarini yaratish boʻyicha faoliyatni amalga oshirish huquqiga litsenziya, loyihalashning murakkablik darajasidan qatʼi nazar, 5 yil muddatga beriladi.

5. Litsenziya berish toʻgʻrisidagi ariza bilan birinchi marta murojaat qilgan tashkilotlarga litsenziya murakkablikning I-II toifalaridan yuqori boʻlmagan loyiha hujjatlarini yaratish boʻyicha faoliyatni amalga oshirish huquqiga beriladi.

Litsenziya talabgorining shtatida 5 yildan kam boʻlmagan muddatda murakkablikning yanada yuqori toifasidagi obyektlarni loyihalash tajribasiga ega boʻlgan hamda ushbu Nizomga 3 va 4-ilovalarda nazarda tutilgan tegishli talablarga javob beradigan bosh muhandislar va arxitektorlar, bosh va yetakchi mutaxassislar mavjud boʻlgan taqdirda “Davarxitektqurilish” qoʻmitasi tomonidan unga obyektlarni loyihalash va qurishning koʻrsatilgan murakkablik toifasiga litsenziya berish masalasi koʻrib chiqiladi.

6. Litsenziya talabgori tomonidan Obyektlarni loyihalash va qurishning murakkablik klassifikatoriga (2-ilova) muvofiq yanada yuqori toifadagi arxitektura-shaharsozlik hujjatlarini yaratish faoliyatiga litsenziya olish uchun loyihalash tashkiloti tomonidan ikki yil mobaynida joriy toifadagi kamida oʻnta obyektni loyihalash boʻyicha bajarilgan ishlarning jami roʻyxati ular yuzasidan arxitektura va qurilish organlari, shuningdek belgilangan hollarda “Davarxitektqurilish” qoʻmitasining davlat ekspertiza va arxitektura-qurilish nazorati organlari bergan xulosalar nusxalari bilan birga hamda ushbu obyektlar boʻyicha mualliflik nazorati daftarlari taqdim etiladi.

7. Arxitektura-shaharsozlik hujjatlarini yaratish faoliyatini amalga oshirishdagi litsenziya talablari va shartlariga quyidagilar kiradi:

a) qonun hujjatlari, tegishli davlat standartlari, shaharsozlik normalari va qoidalari talablariga majburiy rioya etish;

b) yuridik shaxs shtatida doimiy ravishda ishlaydigan (vaqtinchalik jalb qilinganlarni hisobga olmasdan) loyihaning bosh muhandisi va bosh arxitektorining, shuningdek tegishli maxsus kasbiy maʼlumotga ega boʻlgan va ushbu Nizomga 3-ilovada nazarda tutilgan arxitektura-shaharsozlik hujjatlarini yaratish sohasida ish stajiga ega boʻlgan yetakchi va bosh mutaxassislarning quyidagi miqdorda mavjud boʻlishi:

toʻliq kompleksda loyihalash boʻyicha faoliyat turlari uchun (loyihalashning barcha bosqichlarida arxitektura-shaharsozlik hujjatlarini yaratish, shu jumladan loyihalarning DTIA, TIA hamda DTIH, TIHlarini ishlab chiqish) — murakkablikning I-II toifasidagi obyektlar uchun — kamida 12 mutaxassis, murakkablikning III toifasidagi obyektlar uchun — kamida 15 mutaxassis, murakkablikning IV-V toifasidagi obyektlar uchun — kamida 25 mutaxassis;

arxitektura-shaharsozlik hujjatlarining ayrim boʻlimlarini ishlab chiqish boʻyicha faoliyat turlari uchun — kamida 10 mutaxassis.

v) yuridik shaxsda ushbu Nizomning 4-ilovasiga muvofiq faoliyatning litsenziyalanayotgan turini amalga oshirish uchun zarur boʻlgan, unga mulk huquqi bilan yoki boshqa qonuniy asosda tegishli boʻlgan binolar, xonalar, asbob-uskunalar va jihozlarning mavjud boʻlishi;

g) “Davarxitektqurilish” qoʻmitasi tomonidan belgilangan tartibda amalga oshirilayotgan yaratilayotgan loyiha hujjatining sifatini nazorat qilish tizimining, shuningdek belgilangan hollarda mualliflik nazorati hujjatlarining mavjud boʻlishi.

8. Litsenziya olish uchun litsenziya talabgori quyidagi hujjatlarni taqdim etadi:

a) litsenziya berish toʻgʻrisidagi ariza, unda quyidagilar koʻrsatiladi: yuridik shaxsning nomi va tashkiliy-huquqiy shakli, uning joylashgan joyi (pochta manzili), bank muassasasining nomi va bankdagi hisob raqami, litsenziyalanayotgan faoliyatning yuridik shaxs tomonidan amalga oshirilishi moʻljallanayotgan turi;

b) litsenziyalovchi organ tomonidan litsenziya talabgorining arizasi koʻrib chiqilganligi uchun litsenziya talabgorining yigʻimni toʻlaganini tasdiqlovchi hujjat;

v) arxitektura-shaharsozlik hujjatlarini yaratish bilan shugʻullanayotgan xodimlarning roʻyxati, unda ularning egallab turgan lavozimlari, maʼlumoti boʻyicha mutaxassisligi, mutaxassisligi boʻyicha ish staji, ushbu xodimlar loyihalashtirilishida ishtirok etgan asosiy obyektlar roʻyxati koʻrsatiladi;

g) arxitektura-shaharsozlik hujjatlarini yaratish uchun mavjud shart-sharoitlar va texnika vositalari toʻgʻrisidagi maʼlumotlar;

d) davlat roʻyxatidan oʻtkazilganlik toʻgʻrisidagi guvohnomaning nusxasi;

e) quyidagilarning:

tashkilotning taʼsis shartnomasi va ustavining;

tashkilot rahbari hamda soha boʻyicha maʼlumotga ega boʻlgan asosiy xodimlar (loyihaning bosh muhandislari va arxitektorlari, bosh va yetakchi mutaxassislar) diplomlarining, shuningdek mehnat daftarchalarining (notarial tasdiqlangan);

talabgorga mulk huquqi yoki boshqa qonuniy asosda faoliyatning litsenziyalanayotgan turi uchun zarur boʻlgan binolar, xonalar, asbob-uskunalar va jihozlarning tegishliligini tasdiqlovchi hujjatlarning;

turar joyda (kvartirada) faoliyatning litsenziyalanayotgan turini amalga oshirishda mahalliy hokimiyat organlarining turar joyni turar joy boʻlmagan xona toifasiga oʻtkazish toʻgʻrisidagi qarorlarining nusxalari.

9. Litsenziya talabgoridan ushbu Nizomda nazarda tutilmagan hujjatlarni taqdim etishni talab qilishga yoʻl qoʻyilmaydi.

10. Hujjatlar “Davarxitektqurilish” qoʻmitasiga litsenziya talabgori tomonidan bevosita yoxud ularning olinganligi toʻgʻrisidagi bildirishnoma bilan pochta aloqa vositasi orqali yetkazib beriladi.

Hujjatlar “Davarxitektqurilish” qoʻmitasining masʼul shaxsi tomonidan roʻyxat boʻyicha qabul qilinadi, roʻyxatning nusxasi hujjatlar qabul qilingan sana qayd qilingan holda arizachiga yuboriladi (taqdim etiladi).

11. Ishonchli boʻlmagan yoki buzilgan maʼlumotlar taqdim etilganligi uchun litsenziya talabgori qonun hujjatlariga muvofiq javob beradi.

12. Litsenziya talabgorining arizasi koʻrib chiqilganligi uchun Oʻzbekiston Respublikasida belgilangan eng kam oylik ish haqining ikki baravari miqdorida yigʻim undiriladi.

Arizaning koʻrib chiqilganligi uchun yigʻim summasi “Davarxitektqurilish” qoʻmitasining bankdagi hisob raqamiga oʻtkaziladi.

Litsenziya talabgori berilgan arizadan voz kechgan taqdirda toʻlangan yigʻim qaytarilmaydi.

13. Arxitektura-shaharsozlik hujjatlarini yaratish faoliyatini litsenziyalash mazkur Nizomga 5-ilovaga muvofiq sxema boʻyicha amalga oshiriladi.

Komissiyaning litsenziya talabgoriga litsenziya berish yoki litsenziya berishni rad etish toʻgʻrisidagi qarori litsenziya talabgorining arizasi olingan kundan boshlab oʻn besh kundan oshmaydigan muddatda qabul qilinadi.

Komissiya ishchi guruhning taklifi olingandan keyin uni koʻrib chiqadi va qabul qilingan qaror protokolini tasdiqlaydi. Komissiya tomonidan qabul qilingan qaror protokoli Komissiya raisi tomonidan imzolanadi. Favqulodda hollarda Komissiya qarori soʻrov yoʻli bilan qabul qilinishi mumkin.

14. “Davarxitektqurilish” qoʻmitasi litsenziya talabgorini qabul qilingan qaror toʻgʻrisida tegishli qaror qabul qilingandan keyin uch kun mobaynida xabardor qiladi.

Litsenziya berishga qaror qilinganligi toʻgʻrisidagi bildirishnoma litsenziya talabgoriga bank hisob raqami rekvizitlari, davlat bojini toʻlash muddati koʻrsatilgan holda yozma shaklda yuboriladi (topshiriladi). Litsenziya berish haqida qaror qabul qilingani toʻgʻrisidagi bildirishnoma bilan bir vaqtda litsenziya talabgoriga imzolash uchun litsenziya bitimi yuboriladi.

15. Litsenziya bitimi “Davarxitektqurilish” qoʻmitasi va litsenziat oʻrtasida tuziladi va unda quyidagilar boʻlishi kerak:

bitimni imzolagan shaxslarning familiyasi, ismi, otasining ismi, lavozimi;

tomonlarning rekvizitlari;

amalga oshirilishiga litsenziya berilayotgan faoliyat turining nomi;

litsenziatga qoʻyiladigan litsenziya talablari va shartlari;

litsenziyaning amal qilish muddati;

litsenziya bitimi talablari va shartlari buzilganligi uchun tomonlarning javobgarligi;

litsenziat tomonidan litsenziya bitimi talablari va shartlari bajarilishini “Davarxitektqurilish” qoʻmitasi tomonidan nazorat qilish tartibi.

Litsenziya bitimi ikki nusxada — litsenziat va “Davarxitektqurilish” qoʻmitasi uchun bir nusxadan tuziladi.

16. Litsenziya blankalari qatʼiy hisobda turadigan hujjatlar hisoblanadi, hisobga olish seriyasiga, tartib raqamiga va himoyalanganlik darajasiga ega boʻladi. Litsenziya blankalari namunalari “Davarxitektqurilish” qoʻmitasi tomonidan ishlab chiqiladi va tasdiqlanadi hamda “Davarxitektqurilish” qoʻmitasi buyurtmasi boʻyicha “Davlat belgisi” davlat-ishlab chiqarish birlashmasida bosmaxona usulida tayyorlanadi. “Davarxitektqurilish” qoʻmitasi raisi litsenziyalar blankalarining hisobga olinishi, saqlanishi va ulardan maqsadli foydalanilishi uchun shaxsan javob beradi.

Litsenziyalar “Davarxitektqurilish” qoʻmitasi tomonidan rasmiylashtiriladi va “Davarxitektqurilish” qoʻmitasining raisi (uning oʻrinbosari) tomonidan imzolanadi.

17. Litsenziya “Davarxitektqurilish” qoʻmitasi tomonidan litsenziya talabgori tomonidan davlat boji toʻlanganini tasdiqlovchi hujjat taqdim etilgandan va u litsenziya bitimini imzolagandan keyin uch kun muddatda beriladi.

18. Agar litsenziat litsenziya berish toʻgʻrisida qaror qabul qilinganligi haqidagi bildirishnoma yuborilgan (topshirilgan) vaqtdan boshlab uch oy mobaynida “Davarxitektqurilish” qoʻmitasiga litsenziya berilganligi uchun davlat boji toʻlanganligini tasdiqlovchi hujjatni taqdim etmasa yoxud litsenziya bitimini imzolamasa, “Davarxitektqurilish” qoʻmitasi litsenziyani bekor qilish toʻgʻrisida qaror qabul qilishga haqlidir.

19. Litsenziya berish “Faoliyatning ayrim turlarini litsenziyalash toʻgʻrisida”gi Oʻzbekiston Respublikasi Qonunining 17-moddasida nazarda tutilgan asoslar boʻyicha rad etilishi mumkin.

Litsenziya talabgori litsenziya berishni rad etish toʻgʻrisidagi qaror, shuningdek “Davarxitektqurilish” qoʻmitasining mansabdor shaxsi xatti-harakatlari (harakatsizligi) yuzasidan qonun hujjatlarida belgilangan tartibda shikoyat qilish huquqiga egadir.

20. Litsenziya berishni rad etish toʻgʻrisida qaror qabul qilingan taqdirda rad etish toʻgʻrisidagi bildirishnoma litsenziya talabgoriga rad etishning aniq sabablari va litsenziya talabgori koʻrsatib oʻtilgan sabablarni bartaraf etib hujjatlarni takroran koʻrib chiqishga taqdim etishi uchun yetarli boʻlgan muddat koʻrsatilgan holda yozma shaklda yuboriladi (topshiriladi). Litsenziya berishni rad etish haqidagi xabarnomada koʻrsatilgan muddat kamchiliklarni bartaraf etish uchun zarur boʻlgan vaqtga mutanosib boʻlishi kerak.

21. Litsenziya berishni rad etish uchun asos boʻlgan sabablar litsenziya talabgori tomonidan bartaraf etilgan taqdirda, hujjatlarni Komissiya tomonidan takroran koʻrib chiqish litsenziya talabgorining arizasi barcha zarur hujjatlar bilan birgalikda olingan kundan boshlab besh kundan ortiq boʻlmagan muddatda amalga oshiriladi.

Litsenziya talabgorining arizasi takroran koʻrib chiqilganligi uchun yigʻim undirilmaydi.

Litsenziya berish rad etilganligi toʻgʻrisidagi bildirishnomada koʻrsatilgan muddat oʻtgandan keyin berilgan ariza yangidan berilgan ariza hisoblanadi.

22. Litsenziat qayta tashkil etilgan, uning nomi yoki joylashgan joyi (pochta manzili) oʻzgargan taqdirda, litsenziat yoki uning huquqiy vorisi qayta roʻyxatdan oʻtkazilgandan keyin bir oy muddatda “Davarxitektqurilish” qoʻmitasiga koʻrsatib oʻtilgan maʼlumotlarni tasdiqlovchi tegishli hujjatlar ilova qilingan holda litsenziyani qayta rasmiylashtirish toʻgʻrisida ariza berishi shart.

23. Litsenziat litsenziya qayta rasmiylashtirilgunga qadar unda koʻrsatilgan faoliyatni ilgari berilgan litsenziya asosida amalga oshiradi.

Litsenziyani qayta rasmiylashtirishda “Davarxitektqurilish” qoʻmitasi litsenziyalar reyestriga tegishli oʻzgartirishlar kiritadi. Litsenziyani qayta rasmiylashtirish litsenziyalovchi organ tomonidan tegishli hujjatlar ilova qilingan holda litsenziyani qayta rasmiylashtirish toʻgʻrisida ariza olingan kundan boshlab besh kun mobaynida amalga oshiriladi.

Litsenziyalarni qayta rasmiylashtirishda litsenziya talabgorining litsenziya berish toʻgʻrisidagi arizasi koʻrib chiqilganligi uchun toʻlanadigan summaning yarmi miqdorida yigʻim undiriladi.

24. Litsenziyaning amal qilish muddatini uzaytirish litsenziatning arizasiga koʻra amalga oshiriladi.

Litsenziyaning amal qilish muddatini uzaytirish toʻgʻrisidagi ariza “Davarxitektqurilish” qoʻmitasiga litsenziyaning amal qilish muddati oʻtgunga qadar ikki oydan kechikmay berilishi kerak.

Litsenziyaning amal qilish muddatini uzaytirish yoki uzaytirishni rad etish toʻgʻrisidagi qaror litsenziya berish uchun nazarda tutilgan tartibda qabul qilinadi.

25. Litsenziyani qayta rasmiylashtirishda yoki uning amal qilish muddatini uzaytirishda litsenziat “Davarxitektqurilish” qoʻmitasiga arxitektura-shaharsozlik hujjatlarini yaratish sohasida ilgari berilgan litsenziyani qaytarib beradi.

26. Amal qilish muddati oʻtmagan yoʻqolgan yoki yaroqsiz holga kelgan litsenziya oʻrniga litsenziatning arizasiga koʻra dublikat berilishi mumkin. Bunda litsenziat davriy nashrlarda yoʻqolgan litsenziyaning haqiqiy emasligi toʻgʻrisida xabar berishi, shuningdek xabarni “Davarxitektqurilish” qoʻmitasiga taqdim etishi shart.

Litsenziya dublikatlarini berishda litsenziya talabgorining litsenziya berish toʻgʻrisidagi arizasi koʻrib chiqilganligi uchun toʻlanadigan summaning yarmi miqdorida yigʻim undiriladi.

Yigʻim summasi “Davarxitektqurilish” qoʻmitasining bankdagi hisob raqamiga oʻtkaziladi.

27. Litsenziat tomonidan litsenziya talablari va shartlariga rioya etilishi ustidan nazorat “Davarxitektqurilish” qoʻmitasi tomonidan, qonun hujjatlarida belgilangan tartibda amalga oshiriladi.

28. Litsenziya talablari va shartlariga rioya etilishi ustidan nazoratni amalga oshirishda “Davarxitektqurilish” qoʻmitasi oʻz vakolatlari doirasida:

litsenziat tomonidan litsenziya talablari va shartlariga rioya etilishini qonun hujjatlarida belgilangan tartibda rejali tekshirish;

litsenziya talablari va shartlari litsenziat tomonidan buzilganligidan dalolat beruvchi hollar mavjud boʻlgan taqdirda litsenziatning ularga rioya etishini qonunda belgilangan tartibda rejadan tashqari tekshirish;

litsenziya talablari va shartlariga rioya etilishini tekshirish chogʻida paydo boʻladigan masalalar yuzasidan litsenziatdan zarur axborotni soʻrash va olish;

tekshirishlar natijalari asosida, litsenziat tomonidan litsenziya talablari va shartlarining aniq buzilishlarini koʻrsatgan holda dalolatnomalar (maʼlumotnomalar) tuzish;

litsenziatga aniqlangan buzilishlarni bartaraf etish majburiyatini yuklovchi qarorlar chiqarish, bunday buzilishlarni bartaraf etish muddatlarini belgilash;

qonun hujjatlarida belgilangan hollarda litsenziyaning amal qilishini toʻxtatib turish, toʻxtatish yoki litsenziyani bekor qilish masalasi boʻyicha qaror chiqarish yoki sudga murojaat qilish.

29. Litsenziya talablari va shartlariga rioya etilishini tekshirish chogʻida “Davarxitektqurilish” qoʻmitasining tekshiruvchi xodimlari tomonidan ikki nusxada dalolatnoma tuziladi, uning bir nusxasi litsenziatga beriladi, ikkinchi nusxasi “Davarxitektqurilish” qoʻmitasida qoladi.

30. Litsenziyaning amal qilishini toʻxtatib turish “Faoliyatning ayrim turlarini litsenziyalash toʻgʻrisida”gi Oʻzbekiston Respublikasi Qonunining 22-moddasida nazarda tutilgan hollarda va tartibda amalga oshiriladi.

31. Litsenziyaning amal qilishini toʻxtatish “Faoliyatning ayrim turlarini litsenziyalash toʻgʻrisida”gi Oʻzbekiston Respublikasi Qonunining 23-moddasida nazarda tutilgan hollarda va tartibda amalga oshiriladi.

32. Litsenziyani bekor qilish “Faoliyatning ayrim turlarini litsenziyalash toʻgʻrisida”gi Oʻzbekiston Respublikasi Qonunining 24-moddasida nazarda tutilgan hollarda va tartibda amalga oshiriladi.

33. “Davarxitektqurilish” qoʻmitasining litsenziyaning amal qilishini toʻxtatib turish, toʻxtatish yoki litsenziyani bekor qilish toʻgʻrisidagi qarori yuzasidan sudga shikoyat qilinishi mumkin. Bunday qarorning asossiz ekanligi sud tomonidan eʼtirof etilgan taqdirda, “Davarxitektqurilish” qoʻmitasi litsenziat oldida litsenziat koʻrgan zarar miqdorida javob beradi.

34. “Davarxitektqurilish” qoʻmitasi arxitektura-shaharsozlik hujjatlarini yaratish faoliyatini amalga oshirish huquqini beruvchi litsenziyalar reyestrini yuritadi, unda quyidagilar koʻrsatiladi:

yuridik shaxsning nomi, uning tashkiliy-huquqiy shakli, joylashgan joyi (pochta manzili), telefoni va faksi;

rahbarning familiyasi, ismi, otasining ismi;

litsenziyalarning berilgan sanasi va tartib raqami;

litsenziyalarning amal qilish muddati;

faoliyat turi va obyektlarni loyihalashning murakkablik toifasi;

doimiy ravishda ishlaydigan masʼul mutaxassislar roʻyxati;

litsenziyalarni qayta rasmiylashtirish, ularning amal qilish muddatini uzaytirish, toʻxtatib turish va tiklashning asoslari va sanasi;

litsenziyalarning amal qilishini toʻxtatish asoslari va sanasi;

litsenziyalarni bekor qilishning asoslari va sanasi;

dublikat berish asoslari va sanasi.

Litsenziat “Davarxitektqurilish” qoʻmitasiga litsenziyalar reyestrida koʻrsatilgan maʼlumotlardagi har qanday oʻzgarishlarni uch kun muddatda taqdim etishi shart.

35. Litsenziyalarning reyestrlarida mavjud boʻlgan maʼlumotlar litsenziyalovchi organning veb-saytida joylashtiriladi va tanishish uchun ochiq boʻladi.

37. Arxitektura-shaharsozlik hujjatlarini yaratish faoliyatini amalga oshirish huquqini beruvchi litsenziya berganlik va uning amal qilish muddatini uzaytirganlik uchun Oʻzbekiston Respublikasi Vazirlar Mahkamasi tomonidan belgilangan miqdorda davlat boji undiriladi.

38. Davlat boji respublika budjetiga oʻtkaziladi.

1. Oʻzbekiston Respublikasi hududini va hududi qismlarini rivojlantirishni rejalashtirish toʻgʻrisidagi hujjatlar.

2. Oʻzbekiston Respublikasi mintaqalari hududini rivojlantirishni rejalashtirish toʻgʻrisidagi hujjatlar.

3. Aholi punktlari hududlarini rivojlantirish toʻgʻrisidagi hujjatlar.

4. Aholi punktlari hududlarini qurish toʻgʻrisidagi hujjatlar.

5. Qurilish obyekti uchun muhandislik-texnik qidiruvlarini (muhandislik-geodeziya qidiruvlaridan tashqari) bajarish.

6. Uy-joy-xoʻjalik qurilishi uchun obyektlar va komplekslar loyiha-smeta hujjatlarini yaratish, shu jumladan ularning muhandislik tarmoqlari va tizimlarini loyihalashtirish.

7. Sanoat qurilishi uchun obyektlar va komplekslar loyiha-smeta hujjatlarini yaratish, shu jumladan ularning muhandislik tarmoqlari va tizimlarini loyihalashtirish.

8. Suv xoʻjaligi qurilishi uchun obyektlar va komplekslar loyiha-smeta hujjatlarini yaratish, shu jumladan ularning muhandislik tarmoqlari va tizimlarini loyihalashtirish.

9. Qishloq xoʻjaligi qurilishi uchun obyektlar va komplekslar loyiha-smeta hujjatlarini yaratish, shu jumladan ularning muhandislik tarmoqlari va tizimlarini loyihalashtirish.

10. Energetika qurilishi va aloqa obyektlari va komplekslarini loyihalashtirish, shu jumladan ularning muhandislik tarmoqlari va tizimlarini loyihalashtirish.

11. Transport va yoʻl qurilishi obyektlari va komplekslarini loyihalashtirish, shu jumladan ularning muhandislik tarmoqlari va tizimlarini loyihalashtirish.

12. Magistral muhandislik tarmoqlarini (magistral gaz quvurlari, neft quvurlari va neft mahsulotlari quvurlaridan tashqari) loyihalashtirish.

13. Umumiy foydalaniladigan avtomobil yoʻllarini qurish, rekonstruksiya qilish va taʼmirlash uchun loyiha-smeta hujjatlarini yaratish.

14. Arxitektura yodgorliklarini taʼmirlash uchun hujjatlar.

1. Obyektlarning asoslari va poydevorlari boʻlimini loyihalashtirish.

2. Obyektlarning metall konstruksiyalari boʻlimini loyihalashtirish.

3. Obyektlarning temir-beton konstruksiyalari boʻlimini loyihalashtirish.

4. Maxsus obyektlar va inshootlarni loyihalashtirish.

5. Qurilish obyektlarini mukammal va joriy taʼmirlash uchun loyiha-smeta hujjatlari.

6. Binolar va inshootlarning texnik holatini tekshirish.

7. Binolar va inshootlarni mustahkamlash uchun loyiha-smeta hujjatlari.

8. Korroziyaga qarshi himoyani ishlab chiqish.

9. Binolar va inshootlarning muhandislik tarmoqlari va tizimlarini loyihalashtirish:

isitish, ventilatsiya, konditsionerlashtirish;

suv quvuri va kanalizatsiya;

gaz taʼminoti;

gaz asbob-uskunalari;

sovuq taʼminoti;

energiya taʼminoti;

elektr asbob-uskunalari;

elektr bilan yoritish;

elektr bilan isitish;

avtomatlashtirish va parkdan foydalanish koeffitsiyenti;

kuchsiz tokli qurilmalar;

vertikal rejalashtirish.

10. Kapital qurilishda tovarlar, ishlar va xizmatlar xarid qilish uchun tanlov (tender) hujjatlarini tayyorlash.

1. Vazirlar Mahkamasining “Qurilish sohasidagi faoliyatni litsenziyalash toʻgʻrisidagi nizomlarni tasdiqlash haqida” 2003-yil 24-sentabrdagi 410-son qarori 1-bandining ikkinchi xatboshi va qarorga 1-ilova (Oʻzbekiston Respublikasi QT, 2003-y., 9-son, 87-modda).

2. Vazirlar Mahkamasining “Geodeziya va kartografiya faoliyatini litsenziyalash toʻgʻrisidagi nizomni tasdiqlash haqida” 2003-yil 14-noyabrdagi 510-son qarorining 4-bandi (Oʻzbekiston Respublikasi QT, 2003-y., 11-son, 119-modda).

3. Vazirlar Mahkamasining “Oʻzbekiston Respublikasi Hukumatining ayrim qarorlariga oʻzgartirish va qoʻshimchalar kiritish toʻgʻrisida (Oʻzbekiston Respublikasi Prezidentining “Tadbirkorlik faoliyati yuritish uchun ruxsatnoma turlarini qisqartirish va ularni berish tartib-qoidalarini soddalashtirish toʻgʻrisida” 2005-yil 21-sentabrdagi PQ-186-son qarori)” 2006-yil 22-maydagi 92-son qaroriga ilova 26-bandining “a” kichik bandi (Oʻzbekiston Respublikasi QT, 2006-y., 5-son, 34-modda).