Toshkent viloyatining yer resurslaridan samarali va oqilona foydalanishni taʼminlash maqsadida Vazirlar Mahkamasi qaror qiladi:

1. Oʻzbekiston Respublikasi Mudofaa vazirligi, Qishloq va suv xoʻjaligi vazirligi, “Yergeodezkadastr” davlat qoʻmitasi va Toshkent viloyati hokimligining Oʻzbekiston Respublikasi Mudofaa vazirligining Toshkent viloyati Qibray tumanida joylashgan “Turkiston” davlat unitar korxonasini (keyingi oʻrinlarda “Turkiston” DUK deb ataladi) tugatish toʻgʻrisidagi taklifiga rozilik berilsin.

2. “Turkiston” DUKni tugatish komissiyasining tarkibi ilovaga muvofiq tasdiqlansin.

3. Tugatish komissiyasi (Musayev D.O.):

“Turkiston” DUKni tugatish boʻyicha kompleks chora-tadbirlarni qonun hujjatlarida belgilangan tartibda amalga oshirsin;

kreditorlarni aniqlasin va tugatish paytida hosil boʻlgan kreditorlik qarzlar qaytarilishini taʼminlasin;

debitorlik qarzlar undirilishini taʼminlasin;

qishloq xoʻjaligi tovar ishlab chiqaruvchilariga sotiladigan va mahalliy davlat hokimiyati organlariga beriladigan mol-mulk roʻyxatini aniqlasin;

mol-mulk ustun darajada tugatilayotgan unitar korxona hududida tashkil etilayotgan fermer xoʻjaliklariga sotilishini nazarda tutsin;

ixtisoslashtirilgan chorvachilik fermalarini mulkiy kompleks sifatida sotishni nazarda tutsin;

tugatish davrida “Turkiston” DUK mol-mulki saqlanishini taʼminlasin;

oraliq tugatish balansi va tugatish balansini tasdiqlasin.

4. Belgilansinki, tugatilayotgan “Turkiston” DUK mol-mulki tugatish komissiyasining qarori boʻyicha tender asosida sotiladi.

5. Belgilab qoʻyilsinki, tugatilayotgan “Turkiston” DUK mol-mulkini sotishdan tushadigan mablagʻlar:

tugatish ishlari boʻyicha xarajatlarni qoplashga va qonun hujjatlarida belgilangan izchillik bilan korxonaning kreditorlik qarzini qaytarishga;

barcha majburiyatlar qoplangandan keyin — respublika budjetiga yoʻnaltiriladi.

6. Oʻzbekiston Respublikasi Mudofaa vazirligi, “Yergeodezkadastr” davlat qoʻmitasi bir oy muddatda:

tugatilayotgan “Turkiston” DUKning yer maydonlarini;

tugatish komissiyasining qarori asosida — ijtimoiy infratuzilma va ishlab chiqarish infratuzilmasi obyektlarini (bolalar bogʻchasi, maktab, avtomobil yoʻli, elektr uzatish liniyalari va transformator qurilmalari va boshqalarni) belgilangan tartibda Toshkent viloyati hokimligiga bersin.

7. Toshkent viloyati hokimligi tugatilayotgan “Turkiston” DUK hududida fermer xoʻjaliklari tashkil etish uchun talabgorlar orasida ochiq va oshkora tanlovlar oʻtkazsin, gʻoliblarni aniqlashda ijtimoiy adolat, xolislik va ochiq-oshkoralik tamoyillariga qatʼiy rioya qilinishini taʼminlasin.

Qarorning ushbu bandi bajarilishi toʻgʻrisida 2009-yil 1-iyulda Oʻzbekiston Respublikasi Vazirlar Mahkamasiga axborot berilsin.

8. Toshkent viloyati hokimligi, Oʻzbekiston Respublikasi Qishloq va suv xoʻjaligi vazirligi, Fermer xoʻjaliklari uyushmasi, “Oʻzneftmahsulot” aksiyadorlik kompaniyasi, “Oʻzkimyosanoat” davlat-aksiyadorlik kompaniyasi hamda boshqa manfaatdor vazirliklar va idoralar tugatish komissiyasi bilan birgalikda tugatilayotgan “Turkiston” DUK mol-mulkidan samarali foydalanishni hamda uning binolari va inshootlari bazasida qishloq xoʻjaligi tovar ishlab chiqaruvchilariga xizmat koʻrsatadigan ishlab chiqarish va bozor infratuzilmasi obyektlari tashkil etilishini taʼminlasinlar.

9. Oʻzbekiston Respublikasi Mehnat va aholini ijtimoiy muhofaza qilish vazirligi Toshkent viloyati hokimligi bilan birgalikda “Turkiston” DUKning boʻshab qolayotgan xodimlarini ishga joylashtirishda amaliy yordam koʻrsatsin.

10. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari A.N. Aripov zimmasiga yuklansin.