O‘zbekiston Respublikasi Oliy Kengashi qaror qiladi:

1. “Hakamlik sudi va xo‘jalik nizolarini hal etish tartibi to‘g‘risida”gi O‘zbekiston Respublikasining Qonuni 1992-yil 1-yanvardan boshlab kuchga kiritilsin.

2. “Hakamlik sudi va xo‘jalik nizolarini hal etish tartibi to‘g‘risida”gi O‘zbekiston Respublikasi Qonuni kuchga kiritilgunga qadar O‘zbekiston Respublikasining hakamlik sudlari o‘z faoliyatini O‘zbekiston Respublikasining amaldagi qonunlariga muvofiq amalga oshiradilar.

3. Belgilab qo‘yilsinki, O‘zbekiston Respublikasi hakamlik sudlarining malaka hay’atlari faoliyatini tashkil etish, hakamlik sudlarining hakamlarini attestatsiyadan o‘tkazish, ularga malaka klasslari berish, shuningdek, intizomiy javobgarlikka tortish va lavozimdan ozod etish tartibi O‘zbekiston Respublikasi umumiy sudlarining sudyalari uchun belgilab qo‘yilgan amaldagi qonunlarga muvofiq amalga oshiriladi.

4. O‘zbekiston Respublikasi Oliy hakamlik sudi 1992-yil 1-yanvarga qadar O‘zbekiston Respublikasi Oliy Kengashi muhokamasiga amaldagi qonun hujjatlarini “Hakamlik sudi va xo‘jalik nizolarini hal etish tartibi to‘g‘risida”gi O‘zbekiston Respublikasi Qonuniga muvofiqlashtirish haqidagi takliflarni taqdim etsin.

5. O‘zbekiston Respublikasi Prezidenti huzuridagi Vazirlar Mahkamasi 1992-yil 1-yanvarga qadar:

O‘zbekiston Respublikasi vazirliklari, davlat qo‘mitalari va idoralaridagi hakamliklarni tugatsin;

Hukumat qarorlarini “Hakamlik sudi va xo‘jalik nizolarini hal etish tartibi to‘g‘risida”gi O‘zbekiston Respublikasi Qonuniga muvofiqlashtirsin;

vazirliklar, davlat qo‘mitalari va idoralari O‘zbekiston Respublikasining ushbu Qonuniga zid bo‘lgan o‘z normativ hujjatlarini, shu jumladan yo‘riqnoma hamda qoidalarini qayta ko‘rib chiqishlari va bekor qilishlarini ta’minlasin.

6. O‘zbekiston Respublikasi Oliy Kengashi Rayosatiga O‘zbekiston Respublikasi hakamlik sudlarining umumiy sonini tasdiqlash vazifasi topshirilsin.

7. Hakamlik sudlari xodimlarining ish haqi respublika budjeti hisobidan to‘lanadi; hakamlik sudlari xodimlarining moddiy ta’minoti, ularga tibbiy va maishiy xizmat ko‘rsatish O‘zbekiston Respublikasining tegishli umumiy sudlari uchun belgilab qo‘yilgan tartibda amalga oshiriladi, deb belgilab qo‘yilsin.

8. Hakamlik sudlarining moddiy-texnika ta’minoti, ularni tashkiliy-texnikaviy vositalar bilan jihozlash, shuningdek xizmat binolari va avtotransport bilan ta’minlash O‘zbekiston Respublikasi Prezidenti huzuridagi Vazirlar Mahkamasi zimmasiga yuklatilsin.