Oʻzbekiston Respublikasi Prezidentining “Sogʻliqni saqlash tizimini isloh qilishni yanada chuqurlashtirish va uni rivojlantirish Davlat dasturini amalga oshirishning asosiy yoʻnalishlari toʻgʻrisida” 2007-yil 19-sentabrdagi PF-3923-son Farmonini bajarish yuzasidan hamda hududiy sogʻliqni saqlash muassasalarining tashkiliy tuzilmasini takomillashtirish, aholiga, ayniqsa qishloq joylarda yashovchi aholiga tibbiy yordam koʻrsatish samaradorligi va sifatini oshirish maqsadida Vazirlar Mahkamasi qaror qiladi:

1. Quyidagilar:

Viloyat koʻp tarmoqli tibbiyot markazi toʻgʻrisidagi Nizom va uning tuzilmasi 1 va 1a-ilovalarga muvofiq;

Viloyat bolalar koʻp tarmoqli tibbiyot markazi toʻgʻrisidagi Nizom va uning tuzilmasi 2 va 2a-ilovalarga muvofiq;

Viloyat tibbiy diagnostika markazi toʻgʻrisidagi Nizom va uning tuzilmasi 3 va 3a-ilovalarga muvofiq;

Tuman (shahar) tibbiyot birlashmasi toʻgʻrisidagi Nizom va uning tuzilmasi 4 va 4a-ilovalarga muvofiq;

Qishloq vrachlik punkti toʻgʻrisidagi Nizom va uning tuzilmasi 5 va 5a-ilovalarga muvofiq tasdiqlansin.

2. Quyidagi tartib belgilansin, unga koʻra:

Viloyat koʻp tarmoqli tibbiyot markazining faoliyati aralash tarzda — Davlat budjeti mablagʻlari, oʻz daromadlari va jalb qilinadigan manbalar (grantlar, homiylik mablagʻlari va boshqalar) hisobiga moliyalashtiriladi;

Viloyat tibbiy diagnostika markazining faoliyati pulli konsultatsiya-diagnostika xizmatlari koʻrsatishdan olinadigan oʻz daromadlari va qonun hujjatlarida taqiqlanmagan boshqa manbalar hisobiga moliyalashtiriladi;

Viloyat bolalar koʻp tarmoqli tibbiyot markazi, tuman (shahar) tibbiyot birlashmasi va qishloq vrachlik punktlarining faoliyati Davlat budjeti mablagʻlari hisobiga moliyalashtiriladi.

Bunda budjet mablagʻlari markazlarga belgilangan tartibda ajratiladi, viloyat koʻp tarmoqli tibbiyot markazlarining aholining imtiyozga ega boʻlgan toifalariga tibbiy yordam koʻrsatish, markazlarni asbob-uskunalar va texnika bilan jihozlash, shuningdek budjet mablagʻlari hisobiga mukammal taʼmirlash xarajatlariga haq toʻlash esa Oʻzbekiston Respublikasi Moliya vazirligining Gʻaznachiligi hududiy boʻlinmalari tomonidan amalga oshiriladi.

3. Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari bir oy muddatda viloyat koʻp tarmoqli tibbiyot markazlarini, viloyat bolalar koʻp tarmoqli tibbiyot markazlarini, viloyat tibbiy diagnostika markazlarini, tuman (shahar) tibbiyot birlashmalarini va qishloq vrachlik punktlarini tashkil etish boʻyicha tashkiliy, moliyaviy va boshqa tadbirlar bajarilishini taʼminlasinlar.

4. Oʻzbekiston Respublikasi Sogʻliqni saqlash vazirligi:

markazlar faoliyati monitoringini tizimli asosda olib borsin va mavjud muammolarni tezkorlik bilan hal etsin;

tarmoqni rivojlantirish respublika dasturlarida viloyat koʻp tarmoqli tibbiyot va diagnostika markazlarining faoliyatini tashkil etish va ularni moddiy-texnik jihatdan jihozlash, markazlarni rivojlantirishga investitsiyalar, grantlar va moliyalashtirishning qonun hujjatlarida taqiqlanmagan boshqa manbalarini jalb etish chora-tadbirlarini ustuvor asosda nazarda tutsin;

markazlar faoliyati aniq muvofiqlashtirilishini va ular tomonidan diagnostika va bemorlarni davolashning yagona standartlariga rioya qilinishi, davolash-profilaktika muassasalari amaliyotiga zamonaviy tibbiyot texnologiyalari, boshqarishning iqtisodiy metodlari, aholiga tibbiy xizmat koʻrsatishning ilgʻor tashkiliy shakllari va usullari joriy etilishi ustidan nazoratni taʼminlasin.

Amalga oshirilayotgan ishlar toʻgʻrisida har chorakda, chorakdan keyingi oyning 10-kunigacha Vazirlar Mahkamasiga axborot berilsin.

5. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari R.S. Qosimov zimmasiga yuklansin.

1. Ushbu Nizom viloyat koʻp tarmoqli tibbiyot markazi faoliyatini tashkil etish va moliyalashtirish tartibini belgilaydi.

Viloyat koʻp tarmoqli tibbiyot markazi (keyingi oʻrinlarda Markaz deb ataladi) Oʻzbekiston Respublikasi Prezidentining “Sogʻliqni saqlash tizimini isloh qilishni yanada chuqurlashtirish va uni rivojlantirish Davlat dasturini amalga oshirishning asosiy yoʻnalishlari toʻgʻrisida” 2007-yil 19-sentabrdagi PF-3923-son Farmoniga muvofiq faoliyat koʻrsatib turgan viloyat kasalxonalari va ayrim ixtisoslashtirilgan tibbiyot muassasalari bazasida tashkil etiladi hamda aholiga yuqori malakali ixtisoslashtirilgan statsionar, ambulatoriya konsultativ-diagnostika tibbiyot xizmati koʻrsatuvchi davolash-profilaktika muassasasi hisoblanadi.

2. Markaz davlat muassasasi shaklida tashkil etiladi, mustaqil yuridik shaxs hisoblanadi, mustaqil balansga, banklarda hisob raqamlariga, oʻz nomi yozilgan muhrga, shuningdek oʻzining faoliyati uchun zarur boʻlgan boshqa atributlarga ega boʻladi.

Markaz tibbiyot va farmatsevtika kadrlarini qayta tayyorlash va ularning malakasini oshirish uchun klinik, oʻquv bazasi hisoblanadi.

3. Markaz oʻz faoliyatida Oʻzbekiston Respublikasi qonunlariga, Oʻzbekiston Respublikasi Oliy Majlisi palatalarining qarorlariga va boshqa qarorlariga, Oʻzbekiston Respublikasi Prezidentining farmonlari, qarorlari va farmoyishlariga, Oʻzbekiston Respublikasi Vazirlar Mahkamasining qarorlari va farmoyishlariga, Oʻzbekiston Respublikasi Sogʻliqni saqlash vazirligining buyruqlari va farmoyishlariga, boshqa qonun hujjatlariga, shuningdek ushbu Nizomga amal qiladi.

4. Markaz faoliyatning barcha sohalaridagi oʻz munosabatlarini Markazning maqsadi va faoliyatiga muvofiq yuridik va jismoniy shaxslar bilan qonun hujjatlarida belgilangan tartibda tuzilgan shartnomalar asosida amalga oshiradi.

5. Ushbu Nizom Qoraqalpogʻiston Respublikasi koʻp tarmoqli tibbiyot markaziga ham tatbiq etiladi.

6. Quyidagilar markazni tashkil etish va uning faoliyati maqsadi hisoblanadi:

aholining kasalliklarning asosiy yoʻnalishlari (rejali xirurgiya, terapiya, kardiologiya, otorinolaringologiya va boshqalar) boʻyicha ixtisoslashtirilgan, yuqori texnologiyali diagnostika, davolash va profilaktika tibbiy yordami koʻrsatishga boʻlgan ehtiyojini qondirish;

viloyat tibbiyot muassasalarida tibbiy xizmatlar koʻrsatishning zamonaviy metodlari va texnologiyalari joriy etilishini metodik taʼminlash.

7. Quyidagilar Markazning asosiy vazifalari hisoblanadi:

bemorlarni tekshirish, ularga yuqori malakali tibbiy-konsultativ yordam koʻrsatish;

bemorlarga Oʻzbekiston Respublikasi Sogʻliqni saqlash vazirligi tomonidan tasdiqlangan klinik standartlarga muvofiq yuqori malakali ixtisoslashtirilgan statsionar yordam koʻrsatish;

tuman (shahar) tibbiyot birlashmalari mutaxassislariga konsultativ va tashkiliy-metodik yordam koʻrsatish;

maʼmuriy hudud davolash-profilaktika muassasalari amaliyotiga zamonaviy tibbiy texnologiyalarni va boshqarishning iqtisodiy metodlarini joriy etish;

tibbiyot xodimlarini va farmatsevtika kadrlarini tayyorlash, qayta tayyorlash va ularning malakasini oshirishda qatnashish;

tibbiyot muassasalarida davolash-profilaktika jarayoni sifatini ekspertizadan oʻtkazish;

aholining umumiy kasallanishi va oʻlimini, mehnatga qobiliyatini yoʻqotgan holda kasallanishini, nogironligini oʻrganish;

tibbiy yordamni rivojlantirish maqsadli dasturlarini shartnoma asosida ishlab chiqish va amalga oshirish.

8. Belgilangan maqsadlarga erishish va yuklangan vazifalarni bajarish uchun Markaz qonun hujjatlarida belgilangan tartibda quyidagi huquqlarga ega:

oʻzining balansiga berilgan davlat mulkidan foydalanish va uni tasarruf etish;

asosiy vositalarni ijaraga olish yoki ijaraga berish, kreditlarni, qarz mablagʻlarni, grantlarni va boshqa moliyaviy yordamni jalb qilish;

budjet mablagʻlari va pulli tibbiy xizmatlar koʻrsatishdan olingan daromadlar doirasida Markaz xodimlari mehnatiga haq toʻlash va ularni moddiy ragʻbatlantirish miqdorlarini mustaqil ravishda belgilash;

ilmiy tadqiqotlar oʻtkazishga Davlat budjetidan grantlar olish uchun tanlovlarda qatnashish;

xoʻjalik faoliyatini amalga oshirish jarayonida yaratilgan intellektual mulk obyektlariga mualliflik huquqlarini olish va ulardan foydalanish;

qonun hujjatlariga va Oʻzbekiston Respublikasining xalqaro shartnomalariga muvofiq xorijiy yuridik shaxslar bilan ilmiy va ilmiy-texnikaviy hamkorlikni amalga oshirish;

qonun hujjatlariga, Markaz faoliyati maqsadlariga va faoliyati predmetiga zid boʻlmagan faoliyatning boshqa turlarini amalga oshirish.

9. Markaz koʻrsatiladigan pulli tibbiy xizmatlarning, amalga oshiriladigan ishlarning barcha turlariga tariflar va narxlarni mustaqil ravishda, Sogʻliqni saqlash vazirligi va tegishli moliya organlari bilan kelishgan holda belgilashga haqli.

10. Markaz:

aholiga yuqori malakali ixtisoslashtirilgan tibbiy yordam koʻrsatishi:

tekin asosda — davlat tomonidan qoʻllab-quvvatlashga muhtoj, imtiyozga ega boʻlgan shaxslarga (ushbu Nizomga ilova), shuningdek ambulatoriya yordami koʻrsatishi;

pulli asosda (qonunda belgilangan hollarda — tekin asosda) — Oʻzbekiston Respublikasi fuqarolariga (mazkur bandning uchinchi xatboshida koʻrsatilgan shaxslardan tashqari), shuningdek xorijiy fuqarolar va fuqaroligi boʻlmagan shaxslarga yuqori malakali ixtisoslashtirilgan tibbiy yordam koʻrsatishi;

diagnostika va davolashning tasdiqlangan standartlariga muvofiq tibbiy yordam koʻrsatilishini taʼminlashi;

muntazam ravishda Markaz xodimlarini hamda viloyat davolash-profilaktika muassasalari tibbiyot xodimlarini qayta tayyorlashi va ularning malakasini oshirishi;

ilgʻor tibbiyot muassasalarining ish tajribasini oʻrganishi, umumlashtirishi va ommalashtirishi;

Markaz xodimlariga qonun hujjatlarida nazarda tutilgan mehnatni tashkil etish va unga haq toʻlash, texnika xavfsizligi, ijtimoiy taʼminot va muayyan ijtimoiy muhofaza shartlarini kafolatlashi;

Markazning moddiy-texnika bazasini zamonaviy tibbiyot texnikasi va texnologiyalari bilan mustahkamlashi va rivojlantirishi;

mol-mulkdan belgilangan maqsadlarda foydalanishi, ularning saqlanishini taʼminlashi;

qonun hujjatlariga muvofiq buxgalteriya va statistika hisobini, hisobotni yuritishi shart.

11. Markazning tuzilmasi ilova qilinadi*.

12. Markazga rahbarlikni tegishli maʼmuriy hudud hokimining taqdimnomasiga koʻra Oʻzbekiston Respublikasi Sogʻliqni saqlash vaziri tomonidan lavozimga tayinlanadigan va lavozimdan ozod qilinadigan bosh vrach amalga oshiradi.

13. Bosh vrach oʻrinbosarlarga ega boʻladi. Markaz bosh vrachining oʻrinbosarlari Oʻzbekiston Respublikasi Sogʻliqni saqlash vaziri bilan kelishgan holda Markaz bosh vrachi tomonidan lavozimga tayinlanadi va lavozimdan ozod qilinadi.

14. Markaz bosh vrachi belgilangan tartibda Markaz faoliyatiga umumiy rahbarlikni amalga oshiradi, ishlarni tashkillashtiradi, Markaz nomidan ishonchnomasiz ish koʻradi, barcha tashkilotlarda uning manfaatlarini ifodalaydi, Markaz mol-mulkini tasarruf etadi, shartnomalar, shu jumladan mehnat shartnomalari tuzadi, ishonchnomalar beradi, banklarda hisob raqamlari ochadi, moliyaviy mablagʻlarni tasarruf etish huquqidan foydalanadi, shtatlarni tasdiqlaydi, buyruqlar chiqaradi va Markaz faoliyatining natijalari uchun shaxsan javob beradi.

15. Markaz bosh vrachi boʻlmagan hollarda uning vazifalarini sogʻliqni saqlashni boshqarish hududiy organi bilan kelishgan holda uning oʻrinbosarlaridan biri bajaradi.

16. Markazning moliyaviy-xoʻjalik faoliyati qonun hujjatlarida belgilangan tartibda amalga oshiriladi.

17. Markaz faoliyatining maqsadlariga muvofiq oʻz mol-mulkiga egalik qiladi, ulardan foydalanadi va ularni tasarruf etadi, bunda budjet mablagʻlari va budjetdan tashqari mablagʻlardan samarali foydalanilishini taʼminlaydi.

18. Markazning mol-mulki asosiy vositalar, shuningdek boshqa moddiy boyliklar va moliyaviy resurslardan iborat boʻladi.

19. Markaz vaqtincha foydalanilmayotgan binolarni shartnoma asosida, tushgan mablagʻlardan Markazni rivojlantirish uchun foydalangan holda ijaraga berish, shuningdek asbob-uskunalarni va mol-mulkni qonun hujjatlarida nazarda tutilgan tartibda balansdan chiqarish huquqiga ega.

20. Davlat budjeti mablagʻlari, budjetdan tashqari mablagʻlar va qonun hujjatlarida taqiqlanmagan boshqa manbalar Markazni moliyalashtirish manbalari hisoblanadi.

21. Markazni moliyalashtirish aralash tarzda — Davlat budjeti mablagʻlari (tasdiqlangan xarajatlar smetasiga muvofiq qonun hujjatlarida belgilangan tartibda) Markazning oʻz daromadlari va jalb qilinadigan manbalar (grantlar, homiylik mablagʻlari va boshqalar) hisobiga amalga oshiriladi.

Bunda budjet mablagʻlari Markazga belgilangan tartibda ajratiladi, aholining imtiyozga ega boʻlgan toifalariga tibbiy yordam koʻrsatish, markazlarni asbob-uskunalar va texnika bilan jihozlash, shuningdek budjet mablagʻlari hisobiga mukammal taʼmirlash xarajatlariga haq toʻlash esa Gʻaznachilikning hududiy boʻlinmalari orqali amalga oshiriladi.

22. Markaz qonun hujjatlarida belgilangan tartibda buxgalteriya hisobi va hisobotini yuritadi, ularni Oʻzbekiston Respublikasi Sogʻliqni saqlash vazirligiga Davlat statistika qoʻmitasiga taqdim etadi, hujjatlarning saqlanishi va kelishilgan roʻyxat boʻyicha ularning davlat tomonidan saqlashga berilishi uchun javob beradi.

23. Markazning moliya-xoʻjalik faoliyatini nazorat qilish va tekshirish sogʻliqni saqlash, soliq va moliya organlari, ular vakolatlari doirasida boshqa davlat organlari, shuningdek auditorlik tashkilotlari tomonidan, ular bilan tuzilgan shartnomalar asosida qonun hujjatlarida nazarda tutilgan tartibda amalga oshiriladi.

24. Markaz davlat tasarrufidan chiqarilmaydi va xususiylashtirilmaydi.

25. Markazni qayta tashkil etish va tugatish qonun hujjatlarida belgilangan tartibda amalga oshiriladi.

1. Gʻirt yetimlar.

2. I va II guruh nogironlari.

3. Bolalikdan nogironlar.

4. 1941—1945-yillardagi urush nogironlari va qatnashchilari, shuningdek ularga tenglashtirilgan shaxslar.

5. 1941—1945-yillardagi urush davrida mehnat fronti qatnashchilari.

6. Yoshiga koʻra ishlamayotgan pensionerlar.

7. Chernobil AESdagi avariyani bartaraf etishda nogiron boʻlgan shaxslar.

8. Baynalmilal jangchilar.

9. Fuqarolarning oʻzini oʻzi boshqarish organlaridan nafaqa oluvchi kam taʼminlangan oilalar aʼzolari.

10. Ijtimoiy ahamiyatga ega kasalliklarga chalingan shaxslar.

11. Chaqiruv komissiyalari yoʻllanmalari boʻyicha 15—17 yoshdagi oʻsmirlar va chaqiriq yoshidagi (18—27 yoshar) shaxslar.

1. Ushbu Nizom viloyat bolalar koʻp tarmoqli tibbiyot markazi faoliyatini tashkil etish va moliyalashtirish tartibini belgilaydi.

Viloyat bolalar koʻp tarmoqli tibbiyot markazi (keyingi oʻrinlarda Markaz deb ataladi) Oʻzbekiston Respublikasi Prezidentining “Sogʻliqni saqlash tizimini isloh qilishni yanada chuqurlashtirish va uni rivojlantirish Davlat dasturini amalga oshirishning asosiy yoʻnalishlari toʻgʻrisida” 2007-yil 19-sentabrdagi PF-3923-son Farmoniga muvofiq faoliyat koʻrsatib turgan viloyat bolalar kasalxonalari bazasida tashkil etiladi hamda bolalarga yuqori malakali ixtisoslashtirilgan statsionar, ambulatoriya konsultativ-diagnostika xizmati koʻrsatuvchi davolash-profilaktika muassasasi hisoblanadi.

2. Markaz davlat muassasasi shaklida tashkil etiladi, mustaqil yuridik shaxs hisoblanadi, mustaqil balansga, banklarda hisob raqamlariga, oʻz nomi yozilgan muhrga, shuningdek oʻzining faoliyati uchun zarur boʻlgan boshqa atributlarga ega boʻladi.

Markaz tibbiyot va farmatsevtika kadrlarini qayta tayyorlash va ularning malakasini oshirish uchun klinik, oʻquv bazasi hisoblanadi.

3. Markaz oʻz faoliyatida Oʻzbekiston Respublikasi qonunlariga, Oʻzbekiston Respublikasi Oliy Majlisi palatalarining qarorlari va boshqa qarorlariga, Oʻzbekiston Respublikasi Prezidentining farmonlari, qarorlari va farmoyishlariga, Oʻzbekiston Respublikasi Vazirlar Mahkamasining qarorlari va farmoyishlariga, Oʻzbekiston Respublikasi Sogʻliqni saqlash vazirligining buyruqlari va farmoyishlariga, boshqa qonun hujjatlariga, shuningdek ushbu Nizomga amal qiladi.

4. Markaz faoliyatning barcha sohalaridagi oʻz munosabatlarini Markazning maqsadi va faoliyatiga muvofiq yuridik va jismoniy shaxslar bilan qonun hujjatlarida belgilangan tartibda tuzilgan shartnomalar asosida amalga oshiradi.

5. Ushbu Nizom Qoraqalpogʻiston Respublikasi bolalar koʻp tarmoqli tibbiyot markaziga ham tatbiq etiladi.

6. Quyidagilar markazni tashkil etish va uning faoliyati maqsadi hisoblanadi:

bolalarning kasalliklarning asosiy yoʻnalishlari (rejali xirurgiya, pediatriya, kardiorevmatologiya, otolaringologiya va boshqalar) boʻyicha ixtisoslashtirilgan, yuqori texnologiyali diagnostika, davolash va profilaktika tibbiy yordami koʻrsatishga boʻlgan ehtiyojini qondirish;

viloyat bolalar tibbiyot muassasalarida tibbiy xizmatlar koʻrsatishning zamonaviy metodlari va texnologiyalari joriy etilishini metodik taʼminlash.

7. Quyidagilar Markazning asosiy vazifalari hisoblanadi:

bolalarni tekshirish, ularga yuqori malakali tibbiy-konsultativ yordam koʻrsatish;

bolalarga Oʻzbekiston Respublikasi Sogʻliqni saqlash vazirligi tomonidan tasdiqlangan standartlarga muvofiq yuqori malakali ixtisoslashtirilgan statsionar yordam koʻrsatish;

tuman (shahar) tibbiyot birlashmalari mutaxassislariga konsultativ va tashkiliy-metodik yordam koʻrsatish;

maʼmuriy hudud davolash-profilaktika muassasalari amaliyotiga zamonaviy tibbiy texnologiyalarni va boshqarishning iqtisodiy metodlarini joriy etish;

tibbiyot xodimlarini tayyorlash, qayta tayyorlash va ularning malakasini oshirishda qatnashish;

tibbiyot muassasalarida davolash-profilaktika jarayoni sifatini ekspertizadan oʻtkazish;

aholining umumiy kasallanishi va oʻlimini, mehnatga qobiliyatini yoʻqotgan holda kasallanishini, nogironligini oʻrganish;

tibbiy yordamni rivojlantirish maqsadli dasturlarini shartnoma asosida ishlab chiqish va bajarish.

8. Belgilangan maqsadlarga erishish va yuklangan vazifalarni bajarish uchun Markaz qonun hujjatlarida belgilangan tartibda quyidagi huquqlarga ega:

oʻzining balansiga berilgan davlat mulkidan foydalanish va uni tasarruf etish;

asosiy vositalarni ijaraga olish yoki ijaraga berish, kreditlarni, qarz mablagʻlarni, grantlarni va boshqa moliyaviy yordamni jalb qilish;

budjet mablagʻlari va pulli tibbiy xizmatlar koʻrsatishdan olingan daromadlar doirasida Markaz xodimlari mehnatiga haq toʻlash va ularni moddiy ragʻbatlantirish miqdorlarini qonun hujjatlariga muvofiq mustaqil ravishda belgilash;

bolalar kasalliklari boʻyicha ilmiy tadqiqotlar oʻtkazishga Davlat budjetidan grantlar olish uchun tanlovlarda qatnashish;

xoʻjalik faoliyatini amalga oshirish jarayonida yaratilgan intellektual mulk obyektlariga mualliflik huquqlarini olish va ulardan foydalanish;

qonun hujjatlariga va Oʻzbekiston Respublikasining xalqaro shartnomalariga muvofiq xorijiy yuridik shaxslar bilan ilmiy va ilmiy-texnikaviy hamkorlikni amalga oshirish;

qonun hujjatlariga, Markaz maqsadlariga va faoliyati predmetiga zid boʻlmagan faoliyatning boshqa turlarini amalga oshirish.

9. Markaz koʻrsatiladigan pulli tibbiy xizmatlarning, amalga oshiriladigan ishlarning barcha turlariga tariflar va narxlarni mustaqil ravishda, Sogʻliqni saqlash vazirligi va tegishli moliya organlari bilan kelishgan holda belgilashga haqli.

10. Markaz:

tekin asosda — bolalarga yuqori malakali ixtisoslashtirilgan tibbiy yordam koʻrsatishi;

pulli asosda (qonunda belgilangan hollarda — tekin asosda) — xorijiy fuqarolar va fuqaroligi boʻlmagan shaxslarga yuqori malakali ixtisoslashtirilgan tibbiy yordam koʻrsatishi;

diagnostika va davolashning tasdiqlangan standartlariga muvofiq tibbiy yordam koʻrsatilishini taʼminlashi;

Markaz xodimlarini hamda viloyat davolash-profilaktika muassasalari tibbiyot xodimlarini muntazam ravishda qayta tayyorlashi va ularning malakasini oshirishi;

ilgʻor tibbiyot muassasalarining ish tajribasini oʻrganishi, umumlashtirishi va ommalashtirishi;

Markaz xodimlariga qonun hujjatlarida nazarda tutilgan mehnatni tashkil etish va unga haq toʻlash, texnika xavfsizligi, ijtimoiy taʼminot va muayyan ijtimoiy muhofaza shartlarini kafolatlashi;

Markazning moddiy-texnika bazasini zamonaviy tibbiyot texnikasi va texnologiyalari bilan mustahkamlashi va rivojlantirishi;

mol-mulkdan belgilangan maqsadlarda foydalanishi, ularning saqlanishini taʼminlashi;

qonun hujjatlariga muvofiq buxgalteriya va statistika hisobini, hisobotni yuritishi shart.

11. Markazning tuzilmasi ilova qilinadi*.

12. Markazga rahbarlikni tegishli maʼmuriy hudud hokimining taqdimnomasiga koʻra Oʻzbekiston Respublikasi Sogʻliqni saqlash vaziri tomonidan lavozimga tayinlanadigan va lavozimdan ozod qilinadigan bosh vrach amalga oshiradi.

13. Bosh vrach oʻrinbosarlarga ega boʻladi. Markaz bosh vrachining oʻrinbosarlari Oʻzbekiston Respublikasi Sogʻliqni saqlash vaziri bilan kelishgan holda Markaz bosh vrachi tomonidan lavozimga tayinlanadi va lavozimdan ozod qilinadi.

14. Markaz bosh vrachi belgilangan tartibda Markaz faoliyatiga umumiy rahbarlikni amalga oshiradi, ishlarni tashkillashtiradi, Markaz nomidan ishonchnomasiz ish koʻradi, barcha tashkilotlarda uning manfaatlarini ifodalaydi, Markaz mol-mulkini tasarruf etadi, shartnomalar, shu jumladan mehnat shartnomalari tuzadi, ishonchnomalar beradi, banklarda hisob raqamlari ochadi, moliyaviy mablagʻlarni tasarruf etish huquqidan foydalanadi, shtatlarni tasdiqlaydi, buyruqlar chiqaradi va Markaz faoliyatining natijalari uchun shaxsan javob beradi.

15. Markaz bosh vrachi boʻlmagan hollarda uning vazifalarini sogʻliqni saqlashni boshqarish hududiy organi bilan kelishgan holda uning oʻrinbosarlaridan biri bajaradi.

16. Markazning moliya-xoʻjalik faoliyati qonun hujjatlarida belgilangan tartibda amalga oshiriladi.

17. Markaz faoliyatining maqsadlariga muvofiq oʻz mol-mulkiga egalik qiladi, ulardan foydalanadi va ularni tasarruf etadi, bunda budjet mablagʻlari va budjetdan tashqari mablagʻlardan samarali foydalanilishini taʼminlaydi.

18. Markazning mol-mulki asosiy vositalar, shuningdek boshqa moddiy boyliklar va moliyaviy resurslardan iborat boʻladi.

19. Markaz vaqtincha foydalanilmayotgan binolarni shartnoma asosida, tushgan mablagʻlardan Markazni rivojlantirish uchun foydalangan holda ijaraga berish, shuningdek asbob-uskunalarni va mol-mulkni qonun hujjatlarida nazarda tutilgan tartibda balansdan chiqarish huquqiga ega.

20. Davlat budjeti mablagʻlari, budjetdan tashqari mablagʻlar va qonun hujjatlarida taqiqlanmagan boshqa manbalar Markazni moliyalashtirish manbalari hisoblanadi.

21. Markazni moliyalashtirish tasdiqlangan xarajatlar smetasiga muvofiq qonun hujjatlarida belgilangan tartibda Davlat budjeti mablagʻlari hisobiga, uning xarajatlariga haq toʻlash esa Gʻaznachilikning hududiy boʻlinmalari orqali amalga oshiriladi.

22. Markaz qonun hujjatlarida belgilangan tartibda buxgalteriya hisobi va hisobotini yuritadi, ularni Oʻzbekiston Respublikasi Sogʻliqni saqlash vazirligiga hamda Davlat statistika qoʻmitasiga taqdim etadi, hujjatlarning saqlanishi va kelishilgan roʻyxat boʻyicha ularning davlat tomonidan saqlashga berilishi uchun javob beradi.

23. Markazning moliya-xoʻjalik faoliyatini nazorat qilish va tekshirish sogʻliqni saqlash, soliq va moliya organlari, oʻz vakolatlari doirasida boshqa davlat organlari, shuningdek auditorlik tashkilotlari tomonidan, ular bilan tuzilgan shartnomalar asosida qonun hujjatlarida nazarda tutilgan tartibda amalga oshiriladi.

24. Markaz davlat tasarrufidan chiqarilmaydi va xususiylashtirilmaydi.

25. Markazni qayta tashkil etish va tugatish qonun hujjatlarida belgilangan tartibda amalga oshiriladi.

1. Ushbu Nizom viloyat tibbiy diagnostika markazi faoliyatini tashkil etish va moliyalashtirish tartibini belgilaydi.

Viloyat tibbiy diagnostika markazi (keyingi oʻrinlarda Markaz deb ataladi) Oʻzbekiston Respublikasi Prezidentining “Sogʻliqni saqlash tizimini isloh qilishni yanada chuqurlashtirish va uni rivojlantirish Davlat dasturini amalga oshirishning asosiy yoʻnalishlari toʻgʻrisida” 2007-yil 19-sentabrdagi PF-3923-son Farmoniga muvofiq, faoliyat koʻrsatib turgan viloyat diagnostika markazi bazasida tashkil etiladi hamda aholiga konsultativ-diagnostika xizmati koʻrsatuvchi davolash-profilaktika muassasasi hisoblanadi.

2. Markaz davlat muassasasi shaklida tashkil etiladi, mustaqil yuridik shaxs hisoblanadi, mustaqil balansga, banklarda hisob raqamlariga, oʻz nomi yozilgan gerbli muhrga, shuningdek oʻzining faoliyati uchun zarur boʻlgan boshqa atributlarga ega boʻladi.

Markaz tibbiyot kadrlarini qayta tayyorlash va ularning malakasini oshirish uchun klinik, oʻquv bazasi hisoblanadi.

3. Markaz oʻz faoliyatida Oʻzbekiston Respublikasi qonunlariga, Oʻzbekiston Respublikasi Oliy Majlisi palatalarining qarorlari va boshqa qarorlariga, Oʻzbekiston Respublikasi Prezidentining farmonlari, qarorlari va farmoyishlariga, Oʻzbekiston Respublikasi Vazirlar Mahkamasining qarorlari va farmoyishlariga, Oʻzbekiston Respublikasi Sogʻliqni saqlash vazirligining buyruqlari va farmoyishlariga, boshqa qonun hujjatlariga, shuningdek ushbu Nizomga amal qiladi.

4. Markaz faoliyatning barcha sohalaridagi oʻz munosabatlarini Markazning maqsadlari va faoliyati vazifalariga muvofiq yuridik va jismoniy shaxslar bilan qonun hujjatlarida belgilangan tartibda tuzilgan shartnomalar asosida amalga oshiradi.

5. Ushbu Nizom Qoraqalpogʻiston Respublikasi tibbiy diagnostika markaziga ham tatbiq etiladi.

6. Quyidagilar Markazni tashkil etish va uning faoliyati maqsadi hisoblanadi:

kasalliklarni oʻz vaqtida aniqlash va ularning oldini olish;

zamonaviy yuqori texnologiyali tibbiy diagnostika asbob-uskunalaridan foydalangan holda aholiga qulay konsultativ-diagnostika xizmati koʻrsatish.

7. Quyidagilar Markazning asosiy vazifalari hisoblanadi:

kasallarni tadqiqotlarning zamonaviy, yuqori texnologiyali asbobli va laboratoriya metodlari yordamida tekshirish;

tadqiqotlar va kompleks diagnostika xulosalari natijalarini berish;

davolash-diagnostika jarayonining uzluksizligini taʼminlash maqsadida viloyat davolash-profilaktika muassasalari bilan oʻzaro hamkorlik qilish;

maʼmuriy hudud diagnostika xizmatlari faoliyatiga tashkiliy-metodik rahbarlik qilish;

mahalliy shart-sharoitlardan kelib chiqqan holda diagnostika tadqiqotlari sohasida zamonaviy metodologiyalarni joriy etish;

barcha darajalardagi diagnostika xizmatlarining moddiy-texnika salohiyatini rivojlantirish, ularga oʻzlashtirilgan va diagnostika markazida joriy etilgan tibbiyot texnologiyalarini berish;

tibbiyot xodimlarini tayyorlash, qayta tayyorlash va ularning malakasini oshirishda qatnashish;

qonun hujjatlarida taqiqlanmagan hamda Markaz maqsadlariga va faoliyati predmetiga javob beradigan faoliyatning boshqa turlarini amalga oshirish.

8. Markaz aholiga konsultativ va davolash-diagnostika xizmatlarini toʻlov asosida koʻrsatadi.

9. Belgilangan maqsadlarga erishish va yuklangan vazifalarni bajarish uchun Markaz qonun hujjatlarida belgilangan tartibda quyidagi huquqlarga ega:

oʻzining balansiga berilgan davlat mulkidan foydalanish va uni tasarruf etish;

asosiy vositalarni ijaraga olish yoki ijaraga berish, kreditlarni, qarz mablagʻlarini, grantlarni va boshqa moliyaviy yordamni jalb qilish;

budjet mablagʻlari va pulli tibbiy xizmatlar koʻrsatishdan olingan daromadlar doirasida Markaz xodimlari mehnatiga haq toʻlash va ularni moddiy ragʻbatlantirish miqdorlarini mustaqil ravishda belgilash;

ilmiy tadqiqotlar oʻtkazishga davlat budjetidan grantlar olish uchun tanlovlarda qatnashish;

xoʻjalik faoliyatini amalga oshirish jarayonida yaratilgan intellektual mulk obyektlariga mualliflik huquqlarini olish va ulardan foydalanish;

qonun hujjatlariga va Oʻzbekiston Respublikasining xalqaro shartnomalariga muvofiq xorijiy yuridik shaxslar bilan ilmiy va ilmiy-texnikaviy hamkorlikni amalga oshirish;

qonun hujjatlariga, Markaz maqsadlariga va faoliyati predmetiga zid boʻlmagan faoliyatning boshqa turlarini amalga oshirish.

10. Markaz koʻrsatiladigan pulli tibbiy xizmatlarning, amalga oshiriladigan ishlarning barcha turlariga tariflar va narxlarni mustaqil ravishda, Sogʻliqni saqlash vazirligi va tegishli moliya organlari bilan kelishgan holda belgilashga haqli.

11. Markaz:

aholiga yuqori malakali ixtisoslashtirilgan tibbiy yordam koʻrsatishi;

aholiga diagnostika va davolashning tasdiqlangan standartlariga muvofiq konsultativ-diagnostika va davolash yordami koʻrsatilishini taʼminlashi;

Markaz xodimlarini muntazam ravishda qayta tayyorlashi va ularning malakasini oshirishi;

oʻz faoliyati sohasi boʻyicha ilgʻor ish tajribani oʻrganishi, umumlashtirishi va ommalashtirishi;

Markaz xodimlariga qonun hujjatlarida nazarda tutilgan mehnatni tashkil etish va unga haq toʻlash, texnika xavfsizligi, ijtimoiy taʼminot va muayyan ijtimoiy muhofaza shartlarini kafolatlashi;

Markazning moddiy-texnika bazasini zamonaviy tibbiyot texnikasi va texnologiyalari bilan mustahkamlashi va rivojlantirishi;

mol-mulkdan belgilangan maqsadlarda foydalanishi, ularning saqlanishini taʼminlashi;

qonun hujjatlariga muvofiq buxgalteriya va statistika hisobini, hisobotni yuritishi shart.

12. Markazning tuzilmasi ilova qilinadi*.

13. Markazga rahbarlikni tegishli maʼmuriy hudud hokimining taqdimnomasiga koʻra Oʻzbekiston Respublikasi Sogʻliqni saqlash vaziri tomonidan lavozimga tayinlanadigan va lavozimdan ozod qilinadigan direktor amalga oshiradi.

14. Direktor oʻrinbosarlarga ega boʻladi. Markaz direktorining oʻrinbosarlari sogʻliqni saqlash hududiy organi bilan kelishgan holda Markaz direktori tomonidan lavozimga tayinlanadi va lavozimdan ozod qilinadi.

15. Markaz direktori belgilangan tartibda Markaz faoliyatiga umumiy rahbarlikni amalga oshiradi, ishlarni tashkil etadi, Markaz nomidan ishonchnomasiz ish koʻradi, barcha tashkilotlarda uning manfaatlarini ifodalaydi, Markaz mol-mulkini tasarruf etadi, shartnomalar, shu jumladan mehnat shartnomalari tuzadi, ishonchnomalar beradi, banklarda hisob raqamlari ochadi, moliyaviy mablagʻlarni tasarruf etish huquqidan foydalanadi, shtatlarni tasdiqlaydi, buyruqlar chiqaradi va Markaz faoliyatining natijalari uchun shaxsan javob beradi.

16. Markaz direktori boʻlmagan hollarda uning vazifalarini sogʻliqni saqlash hududiy boshqarmasi bilan kelishgan holda uning oʻrinbosarlardan biri bajaradi.

17. Markazning moliya-xoʻjalik faoliyati qonun hujjatlarida belgilangan tartibda amalga oshiriladi.

18. Markaz faoliyat maqsadlariga muvofiq oʻz mol-mulkiga egalik qiladi, ulardan foydalanadi va ularni tasarruf etadi, bunda budjet mablagʻlari va budjetdan tashqari mablagʻlardan samarali foydalanilishini taʼminlaydi.

19. Markazning mol-mulki asosiy vositalar, shuningdek boshqa moddiy boyliklar va moliyaviy resurslardan iborat boʻladi.

20. Markaz vaqtincha foydalanilmayotgan binolarni shartnoma asosida, tushgan mablagʻlardan Markazni rivojlantirish uchun foydalangan holda ijaraga berish, shuningdek asbob-uskunalarni va mol-mulkni qonun hujjatlarida nazarda tutilgan tartibda balansdan chiqarish huquqiga ega.

21. Pulli konsultatsiya-diagnostika xizmatlari koʻrsatishdan olinadigan tushumlar, korxonalarning, nodavlat jamoat tashkilotlarining xayriya va ixtiyoriy badallari hamda qonun hujjatlarida taqiqlanmagan boshqa manbalar Markazning daromad manbalari hisoblanadi.

22. Markaz qonun hujjatlarida belgilangan tartibda buxgalteriya hisobi va hisobotini yuritadi, ularni Oʻzbekiston Respublikasi Sogʻliqni saqlash vazirligiga va Davlat statistika qoʻmitasiga taqdim etadi, hujjatlarning saqlanishi va kelishilgan roʻyxat boʻyicha ularning davlat tomonidan saqlashga berilishi uchun javob beradi.

23. Markazning moliya-xoʻjalik faoliyatini nazorat qilish va tekshirish sogʻliqni saqlash, soliq va moliya organlari, oʻz vakolatlari doirasida boshqa davlat organlari, shuningdek auditorlik tashkilotlari tomonidan, ular bilan tuzilgan shartnomalar asosida qonun hujjatlarida nazarda tutilgan tartibda amalga oshiriladi.

24. Markazni qayta tashkil etish va tugatish qonun hujjatlarida belgilangan tartibda amalga oshiriladi.

1. Ushbu Nizom tuman (shahar) tibbiyot birlashmasi faoliyatini tashkil etish va moliyalashtirish tartibini belgilaydi.

Tuman (shahar) tibbiyot birlashmasi (keyingi oʻrinlarda Birlashma deb ataladi) Oʻzbekiston Respublikasi Prezidentining “Sogʻliqni saqlash tizimini isloh qilishni yanada chuqurlashtirish va uni rivojlantirish Davlat dasturini amalga oshirishning asosiy yoʻnalishlari toʻgʻrisida” 2007-yil 19-sentabrdagi PF-3923-son Farmoniga muvofiq markaziy tuman (shahar) kasalxonasi, koʻp tarmoqli markaziy tuman poliklinikasi (Toshkent shahrida) negizida tashkil etiladi.

2. Birlashma oʻz faoliyatida ikki tomonlama — tegishli hudud hokimligiga va sogʻliqni saqlashni boshqarish hududiy organiga boʻysunadi.

3. Birlashma davlat muassasasi shaklida tashkil etiladi, mustaqil yuridik shaxs hisoblanadi, mustaqil balansga, banklarda hisob raqamlariga, oʻz nomi yozilgan gerbli muhrga, shuningdek oʻz faoliyati uchun zarur boʻlgan boshqa atributlarga ega boʻladi.

Birlashma tibbiyot kadrlarini tayyorlash, qayta tayyorlash va ularning malakasini oshirish boʻyicha klinik oʻquv bazasi hisoblanadi.

4. Birlashma oʻz faoliyatida Oʻzbekiston Respublikasi qonunlariga, Oʻzbekiston Respublikasi Oliy Majlisi palatalarining qarorlariga va boshqa qarorlariga, Oʻzbekiston Respublikasi Prezidentining farmonlari, qarorlari va farmoyishlariga, Oʻzbekiston Respublikasi Vazirlar Mahkamasining qarorlari va farmoyishlariga, Oʻzbekiston Respublikasi Sogʻliqni saqlash vazirligining buyruqlari va farmoyishlariga, boshqa qonun hujjatlariga hamda ushbu Nizomga amal qiladi.

5. Quyidagilar Birlashmani tashkil etish va faoliyatining maqsadi hisoblanadi:

yagona tashkiliy-metodik rahbarlikni va aholiga koʻrsatilayotgan tibbiy xizmatlar sifatini nazorat qilishni taʼminlaydigan sogʻliqni saqlash birlamchi boʻgʻinining zamonaviy tashkiliy tuzilmasini yaratish;

davolash-profilaktika, sanitariya-maʼrifiy tadbirlarni va tibbiy reabilitatsiya xizmatlarini amalga oshirishda qishloq vrachlik punktlariga, oilaviy poliklinikalarga va boshqa tibbiyot muassasalariga metodologik yordam koʻrsatishning sifat jihatidan yangi darajasini tashkil etish.

6. Birlashmaning asosiy vazifalari:

aholiga sifatli dastlabki ambulatoriya-poliklinika yordami koʻrsatish;

dastlabki shoshilinch, kechiktirib boʻlmaydigan tibbiy yordam koʻrsatishni, bemorlarni statsionar davolashni, shuningdek qishloq vrachlik punktlariga, oilaviy poliklinikalarga, tuman (shahar)ning boshqa tibbiyot muassasalariga tashkiliy-metodik rahbarlikni amalga oshirish;

kasalliklarning, eng avvalo, yuqumli va virusli kasalliklarning oldini olish boʻyicha profilaktika ishlarini hamda taʼsirchan chora-tadbirlarni amalga oshirish;

samarali sanitariya-epidemiologiya nazoratini taʼminlash;

bemorlarga tibbiy yordam koʻrsatishda diagnostika va davolash standartlarini joriy etish, shuningdek tuman (shahar) tibbiyot muassasalari tomonidan ularga rioya etilishini nazorat qilish;

aholi oʻrtasida oilada tibbiy madaniyatni oshirish va sogʻlom turmush tarzini targʻib qilish ishlarini tashkil etish;

tibbiyot kadrlarini joy-joyiga qoʻyish, ulardan oqilona foydalanish, ularning malakasini oshirish hamda ularni tarbiyalash chora-tadbirlarini ishlab chiqish va amalga oshirish;

tuman (shahar) sogʻliqni saqlash muassasalarini prognozlashtirish, moliyalashtirish va ularning moddiy-texnika taʼminotini tashkil qilish.

7. Birlashma belgilangan maqsadlarga erishish va zimmasiga yuklangan vazifalarni bajarish uchun qonun hujjatlarida belgilangan tartibda quyidagi huquqlarga ega:

oʻzining balansiga berilgan davlat mulkidan foydalanish va uni tasarruf etish;

asosiy vositalarni ijaraga olish yoki ijaraga berish, grantlarni va boshqa moliyaviy yordamni jalb etish;

budjetdan ajratiladigan mablagʻlar doirasida Birlashma xodimlari mehnatiga haq toʻlash hamda ularni moddiy ragʻbatlantirish miqdorlarini mustaqil ravishda belgilash;

qonun hujjatlariga, Birlashma faoliyatining maqsadlari va predmetiga zid boʻlmagan boshqa ish turlarini amalga oshirish.

8. Birlashma:

aholiga bepul asosda yuqori malakali konsultatsiya va davolash-profilaktik tibbiy yordam koʻrsatishi;

bemorlarni zamonaviy talablardagi sifat va standartlar darajasida diagnostika qilishi hamda davolashni taʼminlashi va rivojlantirishi;

Birlashma xodimlarini muntazam ravishda qayta tayyorlash va ularning malakasini oshirishni amalga oshirishi;

Birlashma xodimlari uchun mehnatni tashkil etish va unga haq toʻlashning qonun hujjatlarida belgilangan shartlarini kafolatlashi, texnika xavfsizligini, ijtimoiy taʼminotni va muayyan ijtimoiy himoya qilishni taʼminlashi;

Birlashmaning moddiy-texnika bazasini zamonaviy tibbiyot texnikasi va texnologiyalari bilan mustahkamlashi va rivojlantirishi;

mol-mulkdan maqsadli foydalanishi, uning saqlanishini taʼminlashi;

qonun hujjatlariga muvofiq buxgalteriya hisobini va statistik hisobni hamda hisobotlarni yuritishi shart.

9. Birlashma tuzilmasi ilova qilinadi*.

10. Quyidagilar Birlashmaning asosiy tarkibiy boʻlinmalari hisoblanadi:

tumanlar (shaharlar)da — shoshilinch tibbiy yordam boʻlimiga ega boʻlgan markaziy tuman (shahar) kasalxonasi, koʻp tarmoqli markaziy tuman (shahar) poliklinikasi, qishloq vrachlik punktlari, oilaviy poliklinikalar (shaharlarda), dispanserlar, akusherlik komplekslari, ixtisoslashtirilgan kasalxonalar, xususiy tibbiyot muassasalari;

Toshkent shahrida — koʻp tarmoqli markaziy tuman poliklinikasi, oilaviy poliklinikalar, dispanserlar (bemor oʻrinlari fondisiz), chaqaloqlar uylari, xususiy tibbiyot muassasalari.

11. Birlashmaga rahbarlikni tegishli viloyat yoki Toshkent shahar hokimining taqdimiga binoan Oʻzbekiston Respublikasi Sogʻliqni saqlash vaziri tomonidan lavozimga tayinlanadigan va lavozimdan ozod qilinadigan Birlashma boshligʻi — markaziy tuman (shahar) kasalxonasi bosh vrachi, Toshkent shahrida esa — Birlashma boshligʻi — koʻp tarmoqli markaziy tuman poliklinikasi mudiri amalga oshiradi.

12. Tumanlar (shaharlar)dagi Birlashma boshligʻi ambulatoriya-poliklinika yordami boʻyicha oʻrinbosarga — koʻp tarmoqli markaziy tuman (shahar) poliklinikasi mudiriga ega boʻladi. Birlashma boshligʻining oʻrinbosari Qoraqalpogʻiston Respublikasi Sogʻliqni saqlash vaziri, viloyatlar va Toshkent shahar sogʻliqni saqlash boshqarmalari boshliqlari bilan kelishgan holda Birlashma boshligʻi tomonidan lavozimga tayinlanadi va lavozimdan ozod qilinadi.

13. Birlashma boshligʻi belgilangan tartibda Birlashma faoliyatiga umumiy rahbarlikni amalga oshiradi, ishlarni tashkil qiladi, Birlashma nomidan ishonchnomasiz ish olib boradi, barcha tashkilotlarda uning manfaatlarini ifodalaydi, Birlashma mol-mulkini tasarruf etadi, shartnomalar, shu jumladan mehnat shartnomalari tuzadi, ishonchnomalar beradi, banklarda hisob raqamlari ochadi, moliyaviy mablagʻlarni tasarruf etish huquqidan foydalanadi, shtatlarni tasdiqlaydi, buyruqlar chiqaradi hamda Birlashma faoliyati natijalari uchun shaxsan javob beradi.

14. Birlashma boshligʻi boʻlmaganda uning vazifasini oʻrinbosari bajaradi.

15. Birlashmaning moliya-xoʻjalik faoliyati qonun hujjatlarida belgilangan tartibda amalga oshiriladi.

16. Birlashma oʻz mol-mulkiga egalik qiladi, undan faoliyati maqsadlariga muvofiq foydalanadi va uni tasarruf etadi, shu bilan birga budjet mablagʻlari hamda budjetdan tashqari mablagʻlardan samarali foydalanilishini taʼminlaydi.

17. Birlashma mol-mulki asosiy fondlardan, shuningdek boshqa moddiy boyliklardan va moliyaviy resurslardan iborat boʻladi.

18. Birlashma vaqtincha foydalanilmayotgan xonalarni, ulardan aholiga tibbiy yordam koʻrsatish uchun foydalanish maqsadida, shartnoma asosida ijaraga berish, shuningdek asbob-uskunalar va mol-mulkni amaldagi qonun hujjatlarida nazarda tutilgan tartibda balansdan chiqarish huquqiga ega.

19. Davlat budjeti mablagʻlari, xayriya ehsonlari va qonun hujjatlarida taqiqlanmagan boshqa manbalar Birlashmani moliyalashtirish manbalari hisoblanadi.

20. Birlashma xarajatlarini moliyalashtirish (toʻlash) belgilangan tartibda tasdiqlangan xarajatlar smetalariga muvofiq amalga oshiriladi.

21. Birlashmaning moliya-xoʻjalik faoliyatini nazorat qilish qonun hujjatlarida belgilangan tartibda amalga oshiriladi.

22. Birlashmani qayta tashkil etish va tugatish qonun hujjatlarida belgilangan tartibda amalga oshiriladi.

1. Ushbu Nizom qishloq vrachlik punktlari faoliyatini tashkil etish va moliyalashtirish tartibini belgilaydi.

Qishloq vrachlik punkti (keyingi oʻrinlarda QVP deb ataladi) tegishli hududda qishloq aholisiga vrachning dastlabki tibbiy-sanitariya yordami koʻrsatishiga moʻljallangan davolash-profilaktika muassasasi hisoblanadi.

2. QVP qishloq joylarda aholining joylashish tizimi, aholi punktlari soni va yiroqda joylashganligi, xizmat koʻrsatish doirasi, yoʻl tarmogʻi rivojlanganligi, qishloq xoʻjaligi ishlab chiqarishi va ishlab chiqarishning boshqa turlari xususiyati hisobga olingan holda tashkil etiladi.

Xizmat koʻrsatiladigan aholi soniga qarab QVP:

1500 kishigacha xizmat koʻrsatadigan — birinchi tipda;

1500 kishidan 3500 kishigacha xizmat koʻrsatadigan — ikkinchi tipda;

3500 kishidan 6000 kishigacha xizmat koʻrsatadigan — uchinchi tipda;

6000 kishidan 10000 kishigacha xizmat koʻrsatadigan — toʻrtinchi tipda boʻlishi mumkin.

3. QVP vrachlarining shtatdagi tarkibi soni QVP tipiga va xizmat koʻrsatiladigan aholi soniga qarab belgilanadi.

4. QVP davlat muassasasi shaklida tashkil etiladi, mustaqil yuridik shaxs hisoblanadi, mustaqil balansga, banklarda hisob raqamlariga, QVPning toʻliq nomi yozilgan muhrga ega boʻladi.

5. QVP barcha zarur kommunikatsiyalar: elektr, isitish, suv taʼminoti, kanalizatsiya va telefon aloqasi bilan taʼminlangan boʻlishi kerak.

6. QVP oʻz faoliyatida Oʻzbekiston Respublikasi qonunlariga, Oʻzbekiston Respublikasi Oliy Majlisi palatalarining qarorlariga va boshqa qarorlariga, Oʻzbekiston Respublikasi Prezidentining farmonlari, qarorlari va farmoyishlariga, Oʻzbekiston Respublikasi Vazirlar Mahkamasining qarorlari va farmoyishlariga, Oʻzbekiston Respublikasi Sogʻliqni saqlash vazirligining buyruqlari va farmoyishlariga, boshqa qonun hujjatlariga hamda ushbu Nizomga amal qiladi.

7. Umumiy amaliyot vrachi va oilaviy tibbiy-ijtimoiy xizmat koʻrsatish prinsiplari asosida qishloq aholisiga sifatli dastlabki tibbiy-sanitariya yordami koʻrsatish QVPni tashkil etish va uning faoliyati maqsadi hisoblanadi.

8. Quyidagilar QVPning asosiy vazifalari hisoblanadi:

qishloq aholisiga ham alohida mijozlar, ham butun oila darajasida eng koʻp uchraydigan kasalliklar profilaktikasi va ularni davolash boʻyicha tibbiy xizmatlar koʻrsatish;

oʻz vaqtida tibbiy maslahat berish, kam uchraydigan kasalliklar, yoxud kasallik kechishining ogʻir va tipik boʻlmagan variantlari holatida mijozlarni koʻrsatkichlari boʻyicha shifoxonaga yotqizish uchun ixtisoslashtirilgan tibbiyot muassasalariga yoʻllanma berish;

diagnostika va davolash standartlariga muvofiq xizmat koʻrsatilayotgan hudud aholisiga shifoxonaga yotqizilgunga qadar shoshilinch tibbiy yordam koʻrsatish;

xizmat koʻrsatiladigan aholi oʻrtasida kasallanish, jarohatlanish, nogironlik hamda oʻlimning oldini olish va kamaytirish tadbirlarini amalga oshirish;

kasalliklarni aniqlash, ijtimoiy ahamiyatli kasalliklarga, shu jumladan sil, teri-tanosil kasalliklari, xavfli oʻsmalar, OITS va OIV infeksiyasiga qarshi kurash boʻyicha tadbirlarni amalga oshirish maqsadida birinchi navbatda bolalar, oʻsmirlar, bola tugʻish yoshidagi ayollar, yolgʻiz, keksa kishilar, nogironlar, surunkali kasalliklarga chalingan bemorlarni tekshirish uchun oldini olish va maqsadli tibbiy tekshirishlarni tashkil etish;

kompleks sanitariya-epidemiyaga qarshi chora-tadbirlarni (profilaktik emlash, muassasalar va obyektlar, suv taʼminoti va aholi yashaydigan joylarni tozalash ustidan joriy sanitariya nazorati), aholini sanitariya-gigiyenik tarbiyalash, sogʻlom turmush tarzini, shu jumladan oqilona ovqatlanishni targʻib qilish, alkogol isteʼmol qilish, chekish va boshqa zararli odatlarga qarshi kurash olib borish chora-tadbirlarini tashkil etish va amalga oshirish;

ijtimoiy yordam koʻrsatish xodimlari bilan birgalikda yolgʻiz, keksa, nogiron, surunkali kasalliklarga chalingan bemorlar patronajini tashkil etish va tibbiy-ijtimoiy yordam koʻrsatish;

vaqtincha mehnatga layoqatsizlik ekspertizasini belgilangan tartibda oʻtkazish, bemorlarning sogʻligʻi va mehnatga layoqati holatini vrach ekspertizasidan oʻtkazish uchun Vrachlar maslahat komissiyasi va Tibbiy-mehnat ekspert komissiyasiga yoʻllanma berish, kasallikka chalinish va jarohatlanishni pasaytirish chora-tadbirlarini ishlab chiqish;

ommaviy dala ishlari davrida kasalxonadan tashqari yordamni qishloq xoʻjaligi xodimlariga yaqinlashtirish chora-tadbirlarini amalga oshirish;

jihozlash va diagnostika standartlariga muvofiq laboratoriya tadqiqotlari va instrumental tadqiqotlar olib borish.

9. QVP belgilangan maqsadlarga erishish va zimmasiga yuklangan vazifalarni bajarish uchun belgilangan tartibda quyidagi huquqlarga ega:

oʻzining balansiga berilgan davlat mol-mulkidan foydalanish va uni tasarruf etish;

asosiy vositalarni ijaraga olish yoki ijaraga berish, kreditlar, qarz mablagʻlari, grantlar va boshqa moliyaviy yordamni jalb etish;

QVP xodimlari mehnatiga haq toʻlash va ularni moddiy ragʻbatlantirish miqdorlarini mustaqil belgilash;

professional faoliyatni amalga oshirish jarayonida yaratilgan intellektual mol-mulk obyektlariga mualliflik huquqlarini olish va ulardan foydalanish;

qonun hujjatlariga, QVP maqsadlari va faoliyati predmetiga zid boʻlmagan faoliyatning boshqa turlarini amalga oshirish.

10. QVP:

biriktirilgan hudud aholisini malakali vrach yordami bilan taʼminlashi;

bemorlarni ambulatoriyada qabul qilish va ularning uyiga borishni amalga oshirishi;

diagnostika va davolash standartlariga muvofiq shifoxonaga yotqizilgungacha shoshilinch va kechiktirib boʻlmaydigan tibbiy yordam koʻrsatishi;

mijozlarning huquqlariga, shu jumladan mijoz toʻgʻrisidagi tibbiy axborotning maxfiyligi huquqiga rioya qilishi;

QVP xonalarida zarur sanitariya-gigiyena rejimini, aseptika va antiseptika qoidalarini, inyeksiyadan keyin asoratlar, zardobli gepatit, OITS, boshqa yuqumli kasalliklar profilaktikasini taʼminlaydigan instrumentlar va materiallarni sterilizatsiya qilish sharoitlarini taʼminlashi;

mavjud tibbiyot asbob-uskunalari, apparatlar va mol-mulk saqlanishi va ulardan samarali foydalanilishini taʼminlashi;

ommaviy yuqumli kasalliklar, ovqatdan zaharlanishning barcha hollari va favqulodda vaziyatlar toʻgʻrisida tegishli xizmatlarni oʻz vaqtida xabardor qilishi shart.

11. QVPning tuzilmasi ilova qilinadi*.

12. QVPga belgilangan tartibda tuman tibbiyot birlashmasi boshligʻi tomonidan lavozimga tayinlanadigan va lavozimdan ozod etiladigan mudir rahbarlik qiladi.

QVPda QVP mudirining oʻrinbosari huquqlariga ega boʻlgan QVPning moliyaviy menejeri lavozimi joriy etiladi.

13. QVP mudiri belgilangan tartibda QVP faoliyatiga umumiy rahbarlik qiladi, uning ishini tashkil etadi, QVP nomidan ishonchnomasiz ish koʻradi, barcha tashkilotlarda uning manfaatlarini ifodalaydi, QVP mol-mulkini tasarruf qiladi, shartnomalar, shu jumladan mehnat shartnomalari tuzadi, ishonchnomalar beradi, banklarda hisob raqamlari ochadi, moliyaviy mablagʻlarni tasarruf etish huquqidan foydalanadi, shtatlarni tasdiqlaydi, buyruqlar chiqaradi va QVP faoliyati natijalari uchun shaxsan javob beradi.

14. QVP shtatlari Oʻzbekiston Respublikasi Moliya vazirligi bilan kelishgan holda Oʻzbekiston Respublikasi Sogʻliqni saqlash vazirligi tomonidan tasdiqlanadigan normativlar boʻyicha xizmat koʻrsatiladigan aholi sonidan kelib chiqib belgilanadi.

15. QVP faoliyatini nazorat qilish Tuman tibbiyot birlashmasi tomonidan amalga oshiriladi.

16. QVPning moliya-xoʻjalik faoliyati qonun hujjatlarida belgilangan tartibda amalga oshiriladi.

17. QVP faoliyati maqsadlariga muvofiq oʻz mol-mulkiga egalik qiladi, undan foydalanadi va uni tasarruf qiladi, bunda budjet va budjetdan tashqari mablagʻlardan samarali foydalanilishini taʼminlaydi.

18. Asosiy fondlar, shuningdek boshqa moddiy boyliklar va moliyaviy resurslar QVPning mol-mulkini tashkil etadi.

19. Davlat budjeti va budjetdan tashqari mablagʻlar: korxonalar, jamoat tashkilotlari, nodavlat tashkilotlarning xayriya va ixtiyoriy badallari hamda qonun hujjatlarida taqiqlanmagan boshqa manbalar QVPni moliyalashtirish manbalari hisoblanadi.

20. Toʻlaqonli faoliyat koʻrsatishi uchun QVP davlat budjeti mablagʻlari hisobiga tibbiyot asbob-uskunalari, qattiq va yumshoq inventar, tibbiyot mebeli, boshqa mol-mulk, dori-darmon vositalari, sanitariya va gigiyena buyumlari, sarflash materiallari, xoʻjalik ehtiyojlari va boshqa ehtiyojlar uchun vositalar bilan taʼminlanadi.

21. QVPning moliya-xoʻjalik faoliyatini nazorat qilish qonun hujjatlarida belgilangan tartibda amalga oshiriladi.

22. QVP qonun hujjatlarida belgilangan tartibda buxgalteriya hisobi va hisobotini yuritadi, uni tuman tibbiyot birlashmasiga va statistika organlariga taqdim etadi, hujjatlarning saqlanishi va ularning kelishilgan roʻyxatga muvofiq davlat tomonidan saqlashga berilishi uchun javob beradi.

23. QVPning moliya-xoʻjalik faoliyatini nazorat qilish va tekshirish sogʻliqni saqlash organlari, soliq va moliya organlari, boshqa davlat organlari tomonidan ularning vakolatlari doirasida, shuningdek qonun hujjatlarida nazarda tutilgan tartibda auditorlik tashkilotlari bilan tuzilgan shartnomalar asosida auditorlik tashkilotlari tomonidan amalga oshiriladi.

24. QVP davlat tasarrufidan chiqarilmaydi va xususiylashtirilmaydi.

25. QVPni qayta tashkil etish va tugatish qonun hujjatlarida belgilangan tartibda amalga oshiriladi.