Oʻzbekiston Respublikasi Soliq kodeksi, “Davlat soliq xizmati toʻgʻrisida”gi Qonunining 7-moddasi va Oʻzbekiston Respublikasi Prezidentining 2007-yil 19-iyundagi “Oʻzbekiston Respublikasi Prezidentining 1998-yil 10-oktabrdagi “Qishloq xoʻjaligi tovar ishlab chiqaruvchilar uchun yagona yer soligʻini joriy etish toʻgʻrisida”gi PF-2086-sonli Farmoniga qoʻshimchalar kiritish haqidagi” PF-3886-sonli Farmoniga (Oʻzbekiston Respublikasi qonun hujjatlari toʻplami 2007-yil, 25-26-son, 259-modda) muvofiq qaror qilamiz:

1.Oʻzbekiston Respublikasi Moliya vazirligi va Davlat soliq qoʻmitasining 2002-yil 31-yanvardagi 29, 2002-27-son qarori bilan tasdiqlangan Qishloq xoʻjaligi tovar ishlab chiqaruvchilari tomonidan yagona yer soligʻini hisoblab chiqarish va toʻlash tartibi toʻgʻrisidagi Yoʻriqnomaning (2002-yil 5-mart, roʻyxat raqami 1102 — Meʼyoriy hujjatlar axborotnomasi, 2002-y., 5-son; 2003-y., 1-2-son; Oʻzbekiston Respublikasi qonun hujjatlari toʻplami, 2004-y., 7-son, 87-modda; 2005-y., 5-6-son, 44-modda; 2006-y., 28-29-son, 276-modda; 2007-y., 4-5-son 52-modda) 18-bandi quyidagi mazmundagi xatboshilar bilan toʻldirilsin:

“Tadbirkorlik subyektlari — yuridik shaxslar ixtiyoriy tugatilganda yuridik shaxslarni davlat roʻyxatidan oʻtkazgan organ ixtiyoriy tugatish toʻgʻrisida qabul qilingan qaror haqida xabardor qilingan kundan boshlab yagona yer soligʻini hisoblab yozish toʻxtatiladi.

Ixtiyoriy tugatish, shuningdek tadbirkorlik subyekti — yuridik shaxs faoliyatini ixtiyoriy toʻxtatish va faoliyatini tiklash tartib-taomillari qonun hujjatlarida belgilangan muddatlarda tugallanmagan taqdirda soliq imtiyoz qoʻllanadigan butun davr uchun toʻliq hajmda olinadi”.

2. Mazkur qaror Oʻzbekiston Respublikasi Adliya vazirligida davlat roʻyxatiga olingan kundan boshlab oʻn kun oʻtgach kuchga kiradi.