O‘zbekiston Respublikasi Oliy Kengashi qaror qiladi:

1. “Fuqarolarning o‘zini o‘zi boshqarish organlari to‘g‘risida”gi O‘zbekiston Respublikasi Qonuni matbuotda e’lon qilingan kundan e’tiboran amalga kiritilsin.

2. O‘zbekiston Respublikasining Vazirlar Mahkamasi Hukumat qarorlarini “Fuqarolarning o‘zini o‘zi boshqarish organlari to‘g‘risida”gi O‘zbekiston Respublikasi Qonuniga muvofiqlashtirsin.

3. Tumanlar va shaharlarning hokimlari joriy yilning 1-dekabrigacha o‘zini o‘zi boshqarish organlari amal qiladigan hududlarning tegralarini belgilab olsinlar hamda yig‘inlarning raislari (oqsoqollari) va ularning maslahatchilari saylovini o‘tkazsinlar.

4. O‘zini o‘zi boshqarish organlari amal qiladigan hududlarning tegralari aniqlangunga hamda yig‘inlarning raislari (oqsoqollari) Qonunda belgilangan tartibda saylangunga qadar ularning vazifalarini bajarib turish xalq deputatlari shaharcha, qishloq va ovul Kengashlarining raislari zimmasiga, mahallalarda esa — mahalla qo‘mitalarining raislari zimmasiga yuklatilsin.

5. Belgilab qo‘yilsinki, O‘zbekiston Respublikasining “Ma’muriy huquqbuzarliklar to‘g‘risida”gi Kodeksi “Mahalliy davlat hokimiyati to‘g‘risida”gi hamda “Fuqarolarning o‘zini o‘zi boshqarish organlari to‘g‘risida”gi qonunlarga muvofiq holga keltirgunga qadar ilgari xalq deputatlari tuman, shahar, shahardagi tuman, shaharcha, qishloq, ovul Kengashlari ijroiya qo‘mitalari huzuridagi ma’muriy komissiyalar ixtiyoriga berilgan ma’muriy huquqbuzarlik to‘g‘risidagi ishlari tegishli ravishda tuman, shahar hokimliklari va shaharcha, qishloq, ovul o‘zini o‘zi boshqarish organlari huzuridagi ma’muriy komissiyalar ko‘rib chiqiladi.

6. Quyidagilar o‘z kuchini yo‘qotgan deb hisoblansin:

1980-yil 14-marta qabul qilingan “O‘zbekiston Respublikasi xalq deputatlari posyolka Soveti to‘g‘risida”gi O‘zbekiston Respublikasi Qonuni (O‘zbekiston Respublikasi Oliy Sovetining Vedomostlari, 1980-yil, № 9, 108-modda);

1980-yil 14-martda qabul qilingan “O‘zbekiston Respublikasi xalq deputatlari qishloq Soveti to‘g‘risida”gi O‘zbekiston Respublikasi Qonuni (O‘zbekiston Respublikasi Oliy Sovetining Vedomostlari, 1980-yil, № 9, 109-modda);

O‘zbekiston Respublikasi shaharlari, posyolkalari va qishloqlaridagi mahalla (kvartal) komitetlari to‘g‘risidagi Nizomni tasdiqlash haqidagi O‘zbekiston Respublikasi Oliy Soveti Rayosatining 1983-yil 4-iyuldagi Farmoni (O‘zbekiston Respublikasi Oliy Sovetining Vedomostlari, 1983-yil, № 20, 330-modda);

O‘zbekiston Respublikasida grajdanlarning istiqomat joylaridagi umumiy yig‘ilishlari, yig‘inlari to‘g‘risidagi Nizomni tasdiqlash haqidagi O‘zbekiston Respublikasi Oliy Soveti Rayosatining 1988-yil 30-noyabrdagi Farmoni (O‘zbekiston Respublikasi Oliy Sovetining Vedomostlari, 1988-yil, № 34, 398-modda).