Xalqimizning zamonlar sinovidan o‘tib kelayotgan, dunyo sivilizatsiyasi rivojiga salmoqli hissa bo‘lib qo‘shilgan boy tarixiy merosi, milliy madaniyatimiz va san’atimizning noyob durdonalari va bugungi yutuqlaridan keng jamoatchilikni yanada ko‘proq bahramand etish, ushbu sohaning qadimiy an’analarini asrab-avaylash, hozirgi kun talablari bilan uyg‘un holda rivojlantirish va har tomonlama targ‘ib etish, yoshlarni ona yurtga muhabbat, azaliy qadriyatlarimizga hurmat ruhida tarbiyalash maqsadida:

1. O‘zbekiston Respublikasi Madaniyat va sport ishlari vazirligi, Toshkent shahar hokimligi, Badiiy akademiya, ijodiy uyushmalar va madaniy jamoatchilik vakillarining:

Toshkent shahrining Chilonzor tumanidagi Alisher Navoiy nomidagi milliy bog‘ hududida barpo etilgan yangi san’at koshonasiga “Madaniyat va san’at ko‘rgazmasi” deb nom berish to‘g‘risidagi taklifiga rozilik berilsin;

qurilish-obodonlashtirish va jihozlash ishlari nihoyasiga yetgach, Madaniyat va san’at ko‘rgazmasi binosi Toshkent shahar hokimligi balansidan Madaniyat va sport ishlari vazirligi balansiga bepul o‘tkazilsin.

2. Quyidagilar Madaniyat va san’at ko‘rgazmasining asosiy vazifalari etib belgilansin:

– xalqimizning asrlar davomida shakllangan madaniyat va san’at sohasidagi bebaho merosini namoyish qilish, uning milliy va umumbashariy madaniyat taraqqiyotidagi o‘rni va ahamiyatini keng targ‘ib etish;

– tasviriy, amaliy va xalq hunarmandchiligi san’ati yo‘nalishlarida faoliyat ko‘rsatayotgan ijodkorlar asarlari asosida milliy istiqlol, erkin va farovon hayot g‘oyalarini tarannum etadigan, an’anaviy san’atimiz va qadriyatlarimizga nisbatan yuksak hurmat-ehtirom tuyg‘ularini uyg‘otadigan doimiy yangilanib turadigan ko‘rgazmalar tashkil etishni yo‘lga qo‘yish;

– mamlakatimiz va xorijdagi yetakchi badiiy galereyalar va ko‘rgazmalar bilan hamkorlikda turli mavzudagi ko‘rgazmalar uyushtirish;

– xalqimizning boy tarixi, urf-odat va an’analari, bugungi jo‘shqin hayot manzaralari, yurtimiz odamlarining siymolari, ularning orzu-intilishlarini har tomonlama chuqur aks ettiradigan badiiy fotoko‘rgazmalar o‘tkazish;

– madaniyat va san’atimizning mashhur namoyondalari, yosh ijodkorlar, rassom va haykaltaroshlar, hunarmand ustalar, fotograflar, sozandalar bilan suhbatlar, ijodiy uchrashuvlar o‘tkazish, milliy va jahon mumtoz san’ati namunalarini namoyon etadigan ixcham konsert dasturlari tashkil etish.

3. O‘zbekiston Respublikasi Madaniyat va sport ishlari vazirligi bir oy muddatda:

Madaniyat va san’at ko‘rgazmasining faoliyati haqidagi nizomni ishlab chiqsin va belgilangan tartibda tasdiqlasin;

Moliya vazirligi bilan birgalikda amaldagi me’yorlarga muvofiq Madaniyat va san’at ko‘rgazmasining shtatlar jadvalini ishlab chiqsin va tasdiqlasin.

4. O‘zbekiston Respublikasi Moliya vazirligi:

2006-yil sentyabr oyidan boshlab Madaniyat va san’at ko‘rgazmasi binosidan foydalanish, uni saqlash hamda jihozlash bilan bog‘liq xarajatlarga, uning asosiy faoliyatidan tushadigan daromadlarni hisobga olgan holda, davlat budjetidan mablag‘ ajratsin;

2006-yilda Madaniyat va san’at ko‘rgazmasi binosidan foydalanish, uni saqlash va jihozlash bilan bog‘liq xarajatlarni davlat budjetida madaniyat sohasi uchun ko‘zda tutilgan mablag‘lar doirasida amalga oshirsin;

respublika budjetining tasdiqlangan xarajatlar ko‘rsatkichlariga tegishli o‘zgartirishlar kiritilishini ta’minlasin.

5. Mazkur qaror ijrosini nazorat qilish O‘zbekiston Respublikasi Bosh vaziri Sh. Mirziyoyev zimmasiga yuklansin.