Oʻzbekiston Respublikasi Prezidentining “Xalq taʼlimi muassasalarini moliyalashtirish mexanizmini takomillashtirish toʻgʻrisida” 2007-yil 26-fevraldagi PF-3857-son Farmonini va Oʻzbekiston Respublikasi Prezidentining “Umumtaʼlim maktablarining namunaviy shtatlarini tartibga solish chora-tadbirlari toʻgʻrisida” 2007-yil 29-martdagi PQ-609-son qarorini bajarish yuzasidan, shuningdek, budjetning gʻazna ijrosi sharoitlarida xalq taʼlimi muassasalarida buxgalteriya hisobi va hisobotini yaxshilash maqsadida Vazirlar Mahkamasi qaror qiladi:

1. Xalq taʼlimi muassasalarini hisob-kitob-moliyaviy jihatdan taʼminlash, ularning sarf-xarajatlarini hisobga olish va nazorat qilish funksiyalari hamda tuzilmalarini Qoraqalpogʻiston Respublikasi Xalq taʼlimi vazirligi, viloyatlar va Toshkent shahar xalq taʼlimi boshqarmalari, tuman va shahar xalq taʼlimi boʻlimlaridan tegishli moliya organlariga topshirish boʻyicha Respublika komissiyasi 1-ilovaga muvofiq tarkibda tashkil etilsin.

Oʻzbekiston Respublikasi Moliya vazirligi va Xalq taʼlimi vazirligi Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari bilan birgalikda 2-ilovaga muvofiq tarkibda tegishli hududiy komissiyalar tashkil etsinlar.

Respublika komissiyasiga va hududiy komissiyalarga 2007-yil 1-iyungacha boʻlgan muddatda:

xalq taʼlimi muassasalariga markazlashtirilgan xoʻjalik xizmati koʻrsatish boʻyicha markazlashtirilgan buxgalteriyalar va guruhlarning mol-mulkini belgilangan tartibda tegishli moliya organlari balansiga qabul qilib olish uchun ushbu mol-mulkni xatlovdan oʻtkazishni tashkil etish;

har bir xalq taʼlimi muassasasi boʻyicha xarajatlar smetalari va moliyaviy hujjatlarning moddama-modda xatlovdan oʻtkazilishini taʼminlash, bunda muassasalarning kommunal, foydalanish xarajatlari va boshqa sarf-xarajatlarga boʻlgan ehtiyoji ularning oʻquvchilar soniga va tipiga qarab ushbu muassasalarning xarajatlar smetalarida nazarda tutilgan ajratiladigan mablagʻlarga muvofiq boʻlishiga alohida eʼtibor berish;

xalq taʼlimi muassasalarining tegishli tashkilotlar va muassasalar bilan qarzlarini 2007-yil 1-apreldagi holatiga koʻra solishtirish dalolatnomalari tuzilishini nazorat qilish, shuningdek, ushbu muassasalarning debitorlik-kreditorlik qarzlarini undirish va uzish boʻyicha zarur chora-tadbirlar koʻrilishini taʼminlash vazifalarini amalga oshirish yuklansin.

2. Oʻzbekiston Respublikasi Moliya vazirligi, Qoraqalpogʻiston Respublikasi Moliya vazirligi, viloyatlar va Toshkent shahar moliya boshqarmalari, tuman va shahar moliya boʻlimlari 2007-yil 1-iyungacha xalq taʼlimi muassasalari xarajatlar smetalari va shtat jadvallarining belgilangan tartibda qayta roʻyxatdan oʻtkazilishini taʼminlasinlar.

Belgilab qoʻyilsinki, xalq taʼlimi muassasalarining barcha hisob-kitob operatsiyalari 2007-yil 1-aprel — 30-iyun davrida qatʼiy ravishda tegishli hududiy moliya organlari bilan kelishgan holda amalga oshiriladi.

3. Oʻzbekiston Respublikasi Moliya vazirligining Gʻaznachiligi belgilangan tartibda:

yuridik shaxs maqomini olgan xalq taʼlimi muassasalarining belgilangan tartibda yangidan roʻyxatdan oʻtkazilgan yakka tartibdagi xarajatlar smetalari ijro uchun qabul qilinishini;

ularning tovarlar yetkazib beruvchilar (ishlarni bajaruvchilar, xizmatlar koʻrsatuvchilar) bilan shartnomalarini ilgari markazlashtirilgan buxgalteriyalar bilan tuzilgan shartnomalarni hisobga olgan holda qatʼiy ravishda ushbu muassasalarning yakka tartibdagi xarajatlar smetalarida koʻrsatilgan summalar doirasida va maqsadlarga muvofiq qayta tuzilishini va qayta roʻyxatdan oʻtkazilishini;

yuridik shaxs maqomini olgan xalq taʼlimi muassasalari tomonidan tuziladigan shartnomalarning sifati, ularning maqsadga muvofiqligi va, qoidaga koʻra, vositachilik xizmatlarini istisno etgan holda narxlarning asoslanganligi monitoringi olib borilishini;

toʻlovlar yuridik shaxs maqomini olgan xalq taʼlimi muassasalarining hududiy moliya organlari bilan birgalikda tuzgan buyurtmanomalariga muvofiq, yil boshidan boshlab ular boʻyicha qilingan xarajatlar markazlashtirilgan buxgalteriyalar tomonidan hisobga olingan holda amalga oshirilishini taʼminlasin.

4. Belgilansinki, Direktor jamgʻarmasi mablagʻlari budjet tasnifining 01130 “Umumtaʼlim muassasalarining oʻrnak koʻrsatgan xodimlarini ragʻbatlantirish direktor jamgʻarmasi mablagʻlari” kodi boʻyicha alohida satrda ajratib koʻrsatilgan holda har bir umumtaʼlim muassasasi taʼminotiga xarajatlar smetasida nazarda tutiladi.

5. Xalq taʼlimi muassasalarida buxgalteriya hisobi va hisobotlarning yuritilishi, budjet mablagʻlaridan maqsadli foydalanilishi, shartnoma intizomi taʼminlanishi hamda debitorlik va kreditorlik qarzdorlikka yoʻl qoʻymaslik yuzasidan javobgarlik ushbu muassasalarning rahbarlari va buxgalterlariga, hududiy moliya organlariga va Moliya vazirligining Gʻaznachiligi boʻlinmalariga yuklansin.

6. Oʻzbekiston Respublikasi Moliya vazirligi:

bir hafta muddatda Qoraqalpogʻiston Respublikasi Moliya vazirligining, viloyatlar va Toshkent shahar moliya boshqarmalarining, tuman va shahar moliya organlarining xalq taʼlimi muassasalarini moliyalashtirish boʻlimlari namunaviy tuzilmasini tasdiqlasin, unda boʻlimlar xodimlari sonining xizmat koʻrsatiladigan muassasalar soniga bogʻliq holda belgilanishini nazarda tutsin;

hududiy moliya organlarining xalq taʼlimi muassasalarini moliyalashtirish boʻlimlari boshliqlari va bosh buxgalterlarini Oʻzbekiston Respublikasi Moliya vazirligi bilan kelishgan holda lavozimga tayinlanadigan va lavozimdan ozod etiladigan xodimlar lavozimlari roʻyxatiga kiritsin.

7. Oʻzbekiston Respublikasi Xalq taʼlimi vazirligi, Qoraqalpogʻiston Respublikasi Xalq taʼlimi vazirligi, viloyatlar va Toshkent shahar xalq taʼlimi boshqarmalari, tuman va shahar xalq taʼlimi boʻlimlari hududiy moliya organlari bilan birgalikda 2007-yil mobaynida maktab-internatlar va umumtaʼlim maktablarini malakali buxgalterlar bilan taʼminlasinlar.

8. Xalq taʼlimi muassasalarini va hududiy moliya organlarini yuqori malakali kadrlar bilan taʼminlash uchun doimiy ishlaydigan Xalq taʼlimi muassasalarining markazlashtirilgan buxgalteriyalari va moliya xodimlarini attestatsiyadan oʻtkazish boʻyicha Respublika idoralararo attestatsiya komissiyasi 3-ilovaga muvofiq tarkibda tashkil etilsin, bunda tegishli xodimlarni har uch yilda attestatsiyadan oʻtkazish nazarda tutilsin.

Respublika idoralararo attestatsiya komissiyasi:

oʻn kun muddatda xalq taʼlimi muassasalarining markazlashtirilgan buxgalteriyalari va moliya xodimlarini attestatsiyadan oʻtkazish tartibini ishlab chiqishni hamda hududiy moliya organlariga va xalq taʼlimi muassasalariga yetkazishni;

joylarda tashkil etiladigan hududiy attestatsiya komissiyalari bilan birgalikda 2007-yil 1-iyungacha boʻlgan muddatda koʻrsatib oʻtilgan xodimlar toifalarini ularning malakasi va kasb darajasiga nisbatan qoʻyiladigan talablarni hisobga olgan holda attestatsiyadan oʻtkazishni taʼminlasin.

9. Oʻzbekiston Respublikasi Adliya vazirligi manfaatdor vazirliklar va idoralar bilan birgalikda bir oy muddatda:

qonun hujjatlariga ushbu qarordan kelib chiqadigan oʻzgartirish va qoʻshimchalar toʻgʻrisida Vazirlar Mahkamasiga takliflar kiritsin;

vazirliklar va idoralar normativ hujjatlarining ushbu qarorga muvofiqlashtirilishini taʼminlasin.

10. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosarlari R.S. Azimov va R.S. Qosimov zimmasiga yuklansin.

1. Azimov R.S. — Oʻzbekiston Respublikasi Moliya vaziri, komissiya raisi

2. Joʻrayev T.I. — Oʻzbekiston Respublikasi Xalq taʼlimi vaziri, komissiya raisining oʻrinbosari;

3. Qoʻchqorov J.A. — Oʻzbekiston Respublikasi Moliya vazirining oʻrinbosari;

4. Sobirov O.Z. — Oʻzbekiston Respublikasi Xalq taʼlimi vazirining oʻrinbosari;

5. Agzamov M.I. — Oʻzbekiston Respublikasi Moliya vazirligi Nazorat-taftish bosh boshqarmasi boshligʻi;

6. Nurmatov U.E. — Oʻzbekiston Respublikasi Moliya vazirligi Hududiy moliyalar bosh boshqarmasi boshligʻi;

7. Sorokina T.V. — Oʻzbekiston Respublikasi Moliya vazirligi Ijtimoiy soha va ilm—fanni moliyalashtirish bosh boshqarmasi boshligʻining oʻrinbosari;

8. Boʻronov B.E. — Oʻzbekiston Respublikasi Moliya vazirligi Davlat budjeti bosh boshqarmasi boshligʻining birinchi oʻrinbosari;

9. Yoʻldoshev K.O. — Oʻzbekiston Respublikasi Xalq taʼlimi vazirligi Moliyalashtirish, buxgalteriya hisobi va hisobot boshqarmasi boshligʻi;

10. Sultonov I.A. — Oʻzbekiston Respublikasi Xalq taʼlimi vazirligi Moliyalashtirish, buxgalteriya hisobi va hisobot boshqarmasi boshligʻining oʻrinbosari;

11. Daulanov U.B. — Oʻzbekiston Respublikasi Xalq taʼlimi vazirligining bosh buxgalteri.

1. Hududiy moliya organi boshligʻi — komissiya raisi;

2. Hududiy xalq taʼlimi organi boshligʻi — komissiya raisining oʻrinbosari;

3. Hududiy moliya organi budjet boʻlimining boshligʻi — komissiya aʼzosi;

4. Hududiy moliya organi bosh buxgalteri — komissiya aʼzosi;

5. Hududiy xalq taʼlimi organining markazlashtirilgan buxgalteriyasi bosh buxgalteri — komissiya aʼzosi;

6. Hududiy xalq taʼlimi organining markazlashtirilgan buxgalteriyasi bosh iqtisodchisi — komissiya aʼzosi;

7. Budjet muassasalari xarajatlari monitoringini amalga oshirish uchun tuman (shahar)ga birkitilgan nazoratchi-taftishchi — komissiya aʼzosi.

1. Tursunov Yo.E. — Oʻzbekiston Respublikasi Moliya vazirining oʻrinbosari, komissiya raisi;

2. Sobirov O.Z. — Oʻzbekiston Respublikasi Xalq taʼlimi vazirining oʻrinbosari, komissiya hamraisi;

3. Nurmatov U.E. — Oʻzbekiston Respublikasi Moliya vazirligi Hududiy moliyalar bosh boshqarmasi boshligʻi;

4. Sorokina T.V. — Oʻzbekiston Respublikasi Moliya vazirligi Ijtimoiy soha va ilm—fanni moliyalashtirish bosh boshqarmasi boshligʻining oʻrinbosari;

5. Boʻronov B.E. — Oʻzbekiston Respublikasi Moliya vazirligi Davlat budjeti bosh boshqarmasi boshligʻining birinchi oʻrinbosari;

6. Peretolchin S.I. — Oʻzbekiston Respublikasi Moliya vazirligi Kadrlar boshqarmasi boshligʻi vazifasini bajaruvchi;

7. Yoʻldoshev K.O. — Oʻzbekiston Respublikasi Xalq taʼlimi vazirligi Moliyalashtirish, buxgalteriya hisobi va hisoboti boshqarmasi boshligʻi;

8. Sultonov I.A. — Oʻzbekiston Respublikasi Xalq taʼlimi vazirligi Moliyalashtirish, buxgalteriya hisobi va hisoboti boshqarmasi boshligʻining oʻrinbosari;

9. Daulanov U.B. — Oʻzbekiston Respublikasi Xalq taʼlimi vazirligining bosh buxgalteri.