O‘zbekiston Respublikasi Oliy Kengashi qaror qiladi:

O‘zbekiston Respublikasining 1991-yil 15-fevralda qabul qilingan “O‘zbekiston Respublikasi fuqarolaridan, ajnabiy fuqarolardan va fuqaroligi bo‘lmagan shaxslardan olinadigan daromad solig‘i to‘g‘risida”gi Qonuniga (O‘zbekiston Respublikasi Oliy Kengashining Axborotnomasi, 1991-yil, № 4, 88-modda) quyidagi o‘zgartishlar va qo‘shimchalar kiritilsin:

1. 3-modda 1-bandining “i”, “k” va “n” bandchalari quyidagi tahrirda bayon etilsin:

“i) fuqarolarning mulkchilik huquqi asosida o‘zlariga tegishli bo‘lgan mol-mulkni sotishdan oladigan pullari, mazkur mol-mulkni tadbirkorlik va boshqa faoliyatni amalga oshirish chog‘ida sotishdan olinadigan daromadlar bundan mustasnodir;

k) fuqarolarning shaxsiy yordamchi xo‘jalikda chorva mollar, quyonlar, nutriya, baliq, parranda va boshqa jonivorlarni boqib, ularni xoh tirik vaznda, xoh so‘ygan holda sotishdan va qayta ishlash asosida olingan mahsulotlarini sotishdan, asalarichilik mahsulotlari, shuningdek mazkur xo‘jalikda yetishtirilgan dehqonchilik mahsulotlarini natural holida va qayta ishlab sotishdan oladigan daromadlari. Fuqaroning shaxsiy yordamchi xo‘jaligi borligi mahalliy hokimiyat organining ma’lumotnomasi bilan tasdiqlanadi;”

“n) fuqarolarning sug‘urta yuzasidan oladigan pullari, sug‘urta bo‘yicha sug‘urta badallari korxonalar, muassasalar va tashkilotlar hisobidan beriladigan hollar bundan mustasnodir;”

2. 4-moddada:

2-bandning birinchi xatboshisida “sakkiz barobari” degan so‘zlar “to‘rt barobari” degan so‘zlar bilan almashtirilsin;

2-bandning “d” bandchasi “qahramon onalar” degan so‘zlardan keyin “o‘n va undan ortiq bolalari bo‘lgan ayollar” degan so‘zlar bilan to‘ldirilsin;

2-band quyidagi mazmundagi “n” bandcha bilan to‘ldirilsin:

“n) O‘zbekiston Respublikasi bojxona xizmatining xodimlari barcha daromadlari yuzasidan”.

3-bandning “v” bandchasi chiqarib tashlansin;

3-bandning “g”, “d” va “e” bandchalari tegishincha “v”, “g” va “d” bandchalari deb hisoblansin.

3. 8-moddaning 1-bandida keltirilgan jadval quyidagi tahrirda bayon etilsin:

“1. Fuqarolarning ish haqi, mukofotlari va boshqa daromadlari summasidan quyidagi miqdorda soliq undiriladi:

8-moddaning 3-bandi chiqarib tashlansin.

4. 13-modda quyidagi tahrirda bayon etilsin:

1. Fuqarolarning har qanday daromadlariga, shu jumladan tadbirkorlik faoliyatidan oladigan daromadlariga asosiy ish (xizmat, o‘qish) joylaridan olayotgan daromadlari bilan bir vaqtda Qonunning ushbu moddasida nazarda tutilgan tartibda soliq solinishi lozim.

2. Ushbu moddaning 1-bandida aytib o‘tilgan daromadlardan soliq mazkur Qonunning 12 va 16-moddalarida belgilangan tartibda, tadbirkorlik faoliyatidan orttiriladigan daromadlaridan esa soliq mazkur Qonunning 15-moddasida nazarda tutilgan tartibda hisoblab chiqariladi va ushlab qolinadi.

Bunda fuqarolarning daromadlaridan Qonunda belgilangan soliq solinmaydigan minimumning oylik miqdori summasi istisno qilinmaydi.

Fuqarolar yil davomida soliq solinadigan yillik jami daromadga asosan soliqni mustaqil ravishda hisoblab chiqarishlari va soliq solinadigan umumiy daromaddan hisoblab chiqarilgan soliq summasi bilan daromad to‘lovchi manba tomonidan ushlab qolingan soliq summasi o‘rtasidagi farqni yilning har choragida kamida bir marta budjetga to‘lashlari mumkin. Kalendar yili tugaganidan keyin bu daromadlar to‘g‘risidagi ma’lumotlar fuqarolarning doimiy yashash joyidagi soliq organiga belgilangan tartibda taqdim etiladigan deklaratsiyaga kiritilishi lozim.

Daromadlarni to‘lagan korxonalar, muassasalar, tashkilotlar hamda tadbirkor sifatida ro‘yxatga olingan fuqarolar har yili hisobot yilidan keyingi yilning 1-martidan kechikmay o‘zlari turgan joydagi soliq organlariga o‘tgan yili o‘zlari daromad to‘lagan shaxslarning doimiy yashash joyini ko‘rsatgan holda ularga to‘langan daromad summasi va ulardan undirilgan soliqlar summasi to‘g‘risida ma’lumot taqdim etadilar. Aytib o‘tilgan ma’lumotlar daromadlar olgan shaxslarning doimiy yashash joyidagi soliq organlariga yuboriladi. Soliq organlari fuqarolar bir yilda olgan daromadlari to‘g‘risidagi deklaratsiyani taqdim etganlarida ana shu ma’lumotlarni e’tiborga oladilar.

Korxonalar, muassasalar va tashkilotlar tomonidan fuqaroga mualliflik haqi to‘lash hamda Fan, adabiyot va san’at asarlarini nashr qilganlik, ijro etganlik yoki ulardan o‘zga tarzda foydalanganlik uchun haq to‘lash, kashfiyotlar, ixtirolar va sanoat namunalarining mualliflarini taqdirlash, shuningdek yillik jami daromad bo‘yicha soliqni hisoblab chiqarish vaqtida hujjatlar bilan tasdiqlangan xarajatlar hisobga olinadi. Agar bu xarajatlarni hujjatlar bilan tasdiqlashning iloji bo‘lmasa, u holda bunday xarajatlar O‘zbekiston Respublikasi Hukumati belgilagan tartibda hisobga olinadi.

3. Fan, adabiyot va san’at asarlarini yaratish, nashr etish, ijro etish yoki ulardan o‘zga tarzda foydalanish uchun shartnoma mavjud bo‘lgan taqdirda shu shartnoma hisobidan avans sifatida to‘lanadigan haq uzil-kesil hisob-kitob vaqtida qo‘shib hisoblanadi hamda soliq solish maqsadida shartnoma amal qilgan yil miqdoriga taqsimlanadi.

Bunday shartnoma bo‘lmagan taqdirda, agar asarni yaratganlik yoki birinchi marta nashr etganlik uchun to‘lanadigan haq minimal oylik ish haqi miqdorining 12 barobaridan oshsa, bu summa to‘lovchining arizasi bo‘yicha 3 yilga taqsimlanadi”.

5. 14-modda quyidagi tahrirda bayon etilsin:

1. Amalda olingan daromadlar va qilingan sarf-xarajatlar to‘g‘risidagi deklaratsiya fuqarolar tomonidan o‘zlarining doimiy yashash joylaridagi soliq organiga hisobot yilidan keyingi yilning 1-aprelidan kechikmay taqdim etiladi.

Ushbu Qonunning 12-moddasiga muvofiq soliq to‘lagan fuqaro deklaratsiya taqdim etishdan ozod qilinadi.

Basharti yil davomida ushbu Qonunning 15-moddasida aytib o‘tilgan daromad manbalari paydo bo‘lib qolgudek bo‘lsa, fuqarolar bunday manbalar paydo bo‘lgan kundan bir oy o‘tganidan keyin besh kunlik muddat ichida deklaratsiya topshiradilar. Deklaratsiyada birinchi oydagi faoliyat natijasida olgan daromadlarining miqdori va joriy yilning oxirigacha olinishi kutilayotgan daromad miqdori ko‘rsatiladi.

Daromad manbai joriy yilning oxiriga qadar to‘xtagan taqdirda u to‘xtagan kundan boshlab besh kunlik muddat ichida deklaratsiya taqdim etiladi.

Deklaratsiya fuqarolar bir yil davomida olgan barcha daromadlarini, bu daromadlarning manbalari hamda hisoblab chiqarilgan va to‘langan soliq summalarini ko‘rsatadilar.

Ushbu Qonunning 12, 13 va 15-moddalarida nazarda tutilgan soliq solinadigan daromadlar olinganligi to‘g‘risidagi ma’lumotlar deklaratsiyada alohida ifoda etiladi.

2. Soliq solinadigan yillik jami daromad bo‘yicha soliqni hisoblab chiqarish ushbu Qonunning 8-moddasida nazarda tutilgan stavkalar bo‘yicha amalga oshiriladi.

Hisoblab chiqarilgan soliq summasi va yil davomida o‘tkazilgan soliq summalari o‘rtasidagi farq hisobot yilidan keyingi yilning 1-iyunidan kechikmay, yil davomida qayta hisoblab chiqilgan taqdirda esa soliq organiga deklaratsiya topshirilgan kundan e’tiboran ikki oylik muddat ichida fuqarolar tomonidan to‘lanishi yoki soliq organlari tomonidan fuqarolarga qaytarilishi lozim”.