Qarorga ko‘ra, Vazirlar Mahkamasining 2024 yil 16 apreldagi 204-son qarori (https://lex.uz/docs/6884060) bilan tasdiqlangan 2024-2025 yillarda yoqilg‘i-energetika resurslari narxlarining bosqichma-bosqich o‘zgarish grafigiga o‘zgartirish va qo‘shimcha kiritildi.

Unga ko‘ra, yoqilg‘i-energetika resurslari narxlarining oshishi muddati 1 apreldan 1 mayga ko‘chirildi.

Shuningdek, 201 kVt·soatdan 1000 kVt·soatgacha bo‘lgan differensiallashgan tarif bo‘yicha isteʼmol miqdori orasiga yangi miqdor kiritildi. Yaʼni 2025 yil 1 maydan isteʼmolchilar 201 kVt·soatdan 500 kVt·soatgacha bo‘lgan yangi miqdor oralig‘ida har bir kilovatt·soat uchun 800 so‘mdan to‘laydi.

Avvalgi tartibga ko‘ra, 201 kVt·soatdan 1000 kVt·soatgacha bo‘lgan qismi uchun 900 so‘mdan haq to‘langan.

Misol uchun, bir oyda o‘rtacha 500 kVt·soat miqdorida elektr energiyasi sarflaydigan xonadon vakillari buning uchun 2025 yil 1 maygacha 360 ming so‘m to‘lashgan (200 kVt·soat bazaviy norma uchun 90 ming so‘m, 201 kVt·soatdan 500 kVt·soat uchun 270 ming so‘m). Tarif o‘zgarishlaridan so‘ng bir oyda o‘rtacha 500 kVt·soat tok ishlatadigan xonadon buning uchun 360 ming so‘m to‘laydi (200 kVt·soat bazaviy norma uchun 120 ming so‘m, 201 kVt·soatdan 500 kVt·soat uchun 240 ming so‘m). Yaʼni ular uchun narx oshayotgani yo‘q.

Bundan tashqari, 2026 yil 1 yanvardan elektr energiyasi va tabiiy gaz narxlari har yili 1 maydan bir marotaba yillik inflyatsiya darajasidan kelib chiqqan holda 10 foizdan yuqori bo‘lmagan miqdorda indeksatsiya qilib boriladi.