|
Ҳужжат кучини йўқотган " " 23.02.2019
|
Ўзбекистон Республикаси Вазирлар Маҳкамасининг
қарори
ЎСИМЛИКЛАРНИ ҲИМОЯ ҚИЛИШ КИМЁВИЙ ПРЕПАРАТЛАРИНИ ЕТКАЗИБ БЕРИШ ВА УЛАРДАН ФОЙДАЛАНИШ САМАРАДОРЛИГИНИ НАЗОРАТ ҚИЛИШ ТИЗИМИНИ ТАКОМИЛЛАШТИРИШ ЧОРА-ТАДБИРЛАРИ ТЎҒРИСИДА
LexUZ шарҳиМазкур қарор Ўзбекистон Республикаси Вазирлар Маҳкамасининг 2019 йил 23 февралдаги 161-сонли «Ўзбекистон Республикаси Ҳукуматининг айрим қарорларига ўзгартириш ва қўшимчалар киритиш, шунингдек, баъзиларини ўз кучини йўқотган деб ҳисоблаш тўғрисида (Ўзбекистон Республикаси Президентининг «Идоралараро коллегиал органларни тубдан қисқартириш ва янада оптималлаштириш чора-тадбирлари тўғрисида» 2018 йил 28 августдаги ПФ-5527-сон Фармони)»ги қарорига асосан ўз кучини йўқотган.
Ўзбекистон Республикаси Президентининг «Қишлоқ хўжалигини ўсимликларни ҳимоя қилиш кимёвий препаратлари билан таъминлаш тизимини такомиллаштириш чора-тадбирлари тўғрисида» 2006 йил 31 январдаги ПҚ–272-сон қарорини бажариш ҳамда кимёвий препаратларни етказиб бериш ва улардан самарали фойдаланиш юзасидан назоратни кучайтириш мақсадида Вазирлар Маҳкамаси қарор қилади:
1. Қуйидагилар:
Ўзбекистон Республикаси Қишлоқ хўжалиги вазирлиги ҳузуридаги Ўсимликларни ҳимоя қилиш кимёвий воситаларига эҳтиёжни аниқлаш ва улардан самарали фойдаланиш бўйича идоралараро комиссия тўғрисидаги низом 1-иловага мувофиқ;
(1-банднинг иккинчи хатбошиси Ўзбекистон Республикаси Вазирлар Маҳкамасининг 2018 йил 7 декабрдаги 995-сонли қарори таҳририда — Қонун ҳужжатлари маълумотлари миллий базаси, 10.12.2018 й., 09/18/995/2287-сон)
Вазирликлар, идоралар ва ташкилотларнинг қишлоқ хўжалигини кимёвий препаратлар билан таъминлаш борасида ҳамкорлик қилиши тартиби 2-иловага мувофиқ;
Таъсирчан моддалар ва тайёр кимёвий препаратлар импорти бўйича таклифларни кўриб чиқиш ва хулосалар бериш тартиби тўғрисидаги низом 5-иловага мувофиқ тасдиқлансин.
2. Ўзбекистон Республикаси Қишлоқ хўжалиги вазирлиги ҳузуридаги Ўсимликларни ҳимоя қилиш кимёвий воситаларига эҳтиёжни аниқлаш ва улардан самарали фойдаланиш бўйича идоралараро комиссия (Б. Юсупов) комиссияга юкланган вазифаларни бажариш бўйича унинг ишлари самарали ташкил этилишини таъминласин.
(2-банд Ўзбекистон Республикаси Вазирлар Маҳкамасининг 2018 йил 7 декабрдаги 995-сонли қарори таҳририда — Қонун ҳужжатлари маълумотлари миллий базаси, 10.12.2018 й., 09/18/995/2287-сон)
Олдинги таҳрирга қаранг.
(3-банд Ўзбекистон Республикаси Вазирлар Маҳкамасининг 2017 йил 13 мартдаги 131-сон қарорига асосан ўз кучини йўқотган — ЎР ҚҲТ, 2017 й., 11-сон, 161-модда)
4. Мазкур қарорнинг бажарилишини назорат қилиш Қишлоқ ва сув хўжалиги, қишлоқ хўжалиги маҳсулотларини қайта ишлаш ҳамда истеъмол товарлари масалалари ахборот-таҳлил департаментига юклансин.
Ўзбекистон Республикасининг Бош вазири Ш. МИРЗИЁЕВ
Тошкент ш.,
2006 йил 24 февраль,
31-сон
Ўзбекистон Республикаси Қишлоқ хўжалиги вазирлиги ҳузуридаги Ўсимликларни ҳимоя қилиш кимёвий воситаларига эҳтиёжни аниқлаш ва улардан самарали фойдаланиш бўйича идоралараро комиссия тўғрисида
НИЗОМ
(1-илова номи Ўзбекистон Республикаси Вазирлар Маҳкамасининг 2018 йил 7 декабрдаги 995-сонли қарори таҳририда — Қонун ҳужжатлари маълумотлари миллий базаси, 10.12.2018 й., 09/18/995/2287-сон)
I. Умумий қоидалар
1. Ўзбекистон Республикаси Қишлоқ хўжалиги вазирлиги ҳузуридаги Ўсимликларни ҳимоя қилиш кимёвий воситаларига эҳтиёжни аниқлаш ва улардан самарали фойдаланиш бўйича идоралараро комиссия (кейинги ўринларда Идоралараро комиссия деб юритилади) Ўзбекистон Республикаси Президентининг 2006 йил 31 январдаги ПҚ–272-сон қарорига мувофиқ ташкил этилган ҳамда ўсимликларни ҳимоя қилиш кимёвий воситаларига эҳтиёжни шакллантириш ишларини, уларнинг тақсимланишини ва қишлоқ хўжалигида самарали фойдаланилишини ташкил қилиш устидан назоратни амалга оширади.
(1-банд Ўзбекистон Республикаси Вазирлар Маҳкамасининг 2018 йил 7 декабрдаги 995-сонли қарори таҳририда — Қонун ҳужжатлари маълумотлари миллий базаси, 10.12.2018 й., 09/18/995/2287-сон)
II. Идоралараро комиссиянинг асосий вазифалари ва функциялари
2. Қуйидагилар Идоралараро комиссиянинг асосий вазифалари ҳисобланади:
қишлоқ хўжалиги товар ишлаб чиқарувчиларининг тайёр кимёвий препаратларга, таъсирчан моддалар ва компонентларга эҳтиёжини ҳар йилги буюртманомалар асосида аниқлаш, шу жумладан уларни республика корхоналарида ишлаб чиқариш ва импорт бўйича келтириш ҳажмларини аниқлаш;
кимёвий препаратларни қишлоқ хўжалиги товар ишлаб чиқарувчилари бўйича тақсимлаш, пестицидларни қўлланиш регламентларига, шунингдек препаратларни сарфлаш нормаларига риоя қилиш йўли билан улардан самарали фойдаланиш чора-тадбирларини амалга ошириш устидан назоратни таъминлаш;
«Ўзстандарт» агентлигининг ихтисослаштирилган лабораторияларида муқобил ва олиб келиш назоратини қўллаш асосида республика корхоналарида ишлаб чиқарилаётган ва импорт бўйича келтирилаётган ўсимликларни ҳимоя қилиш воситалари сифатига бўлган талабларга риоя қилиш чора-тадбирларини амалга ошириш;
қишлоқ хўжалиги экинларини касалликлар ва зараркунандалардан ҳимоя қилиш бўйича ишлатилган препаратларнинг тўлиқлиги ва таъсирининг самарадорлигини баҳолаш юзасидан фермер хўжаликларига хизматлар кўрсатиш учун шарт-шароитлар яратишда кўмаклашиш;
кимёвий ҳимоя қилиш воситаларининг сақланиши ва сақланиш сифатини мунтазам текширишларни ташкил этиш, ўсимликларни ҳимоя қилиш воситаларининг фойдаланиш муддати ўтган қолдиқларини аниқлаш ва улардан фойдаланишни тўхтатиш.
III. Идоралараро комиссия ишини ташкил этиш
3. Идоралараро комиссия қонун ҳужжатлари ва ушбу Низом асосида фаолият кўрсатади.
4. Ўзбекистон Республикаси Қишлоқ хўжалиги вазирлиги марказий аппаратининг тегишли бошқармаси Идоралараро комиссиянинг ишчи органи ҳисобланади.
(4-банднинг биринчи хатбошиси Ўзбекистон Республикаси Вазирлар Маҳкамасининг 2018 йил 7 декабрдаги 995-сонли қарори таҳририда — Қонун ҳужжатлари маълумотлари миллий базаси, 10.12.2018 й., 09/18/995/2287-сон)
Ишчи орган ўсимликларни ҳимоя қилиш воситаларига эҳтиёж тўғрисидаги буюртманомаларни қабул қилади, уларни умумлаштиради, ўсимликларни ҳимоя қилиш кимёвий воситаларининг тақсимланиши, қўлланиши ва самарадорлиги мониторингини олиб боради, пестицидлардан самарасиз фойдаланиш ҳолларига оид материалларни тўплайди, Идоралараро комиссия мажлислари учун материаллар тайёрлайди, мажлислар протоколларини юритади, Идоралараро комиссия қарорларини фойдаланувчиларга етказади ва ушбу Низомдан келиб чиқадиган бошқа ташкилий ишларни амалга оширади.
5. Идоралараро комиссия ўз мажлисларини заруриятга кўра, бироқ ҳар чоракда камида бир марта ўтказади.
IV. Идоралараро комиссиянинг ҳуқуқлари ва мажбуриятлари
6. Идоралараро комиссия қуйидаги ҳуқуқ ва мажбуриятларга эга:
ўсимликларни ҳимоя қилиш воситаларига эҳтиёжни ҳар йилги буюртманомалар асосида шакллантириш, уларни республика корхоналарида ишлаб чиқариш ва импорт бўйича келтириш ҳажмини аниқлаш;
Ишчи органдан ишлаб чиқаришда қўлланадиган пестицидларнинг биологик самарадорлиги бўйича материалларни сўраб олиш;
(6-банднинг учинчи хатбошиси Ўзбекистон Республикаси Вазирлар Маҳкамасининг 2017 йил 13 мартдаги 131-сонли қарори таҳририда — ЎР ҚҲТ, 2017 й., 11-сон, 161-модда)
кимёвий ҳимоя воситаларининг сақланиши ва сақланиш сифатини мунтазам текширишларни ташкил этиш.
7. Идоралараро комиссия, шунингдек, ушбу Низомдан келиб чиқадиган бошқа ҳуқуқлар ва мажбуриятларга ҳам эга бўлади.
V. Раҳбарият
8. Ўзбекистон Республикаси Қишлоқ хўжалиги вазири Идоралараро комиссиянинг раиси ҳисобланади.
(8-банд Ўзбекистон Республикаси Вазирлар Маҳкамасининг 2018 йил 7 декабрдаги 995-сонли қарори таҳририда — Қонун ҳужжатлари маълумотлари миллий базаси, 10.12.2018 й., 09/18/995/2287-сон)
9. Идоралараро комиссия раиси Идоралараро комиссия ишини ташкил этади ва унинг фаолиятига умумий раҳбарликни амалга оширади.
VI. Идоралараро комиссия фаолиятини тўхтатиш тартиби
10. Идоралараро комиссия фаолияти қонун ҳужжатларида белгиланган тартибда тўхтатилади.
Вазирликлар, идоралар ва ташкилотларнинг қишлоқ хўжалигини кимёвий препаратлар билан таъминлаш борасида ҳамкорлик қилиш
ТАРТИБИ
(2-илова матни Ўзбекистон Республикаси Вазирлар Маҳкамасининг 2018 йил 7 декабрдаги 995-сонли қарори таҳририда — Қонун ҳужжатлари маълумотлари миллий базаси, 10.12.2018 й., 09/18/995/2287-сон)
Қишлоқ хўжалиги учун таъсирчан моддалар ва тайёр кимёвий препаратлар харид қилиш бўйича идоралараро тендер комиссияси
ТАРКИБИ
|
Ғаниев Э.М. |
— |
Ташқи иқтисодий алоқалар, инвестициялар ва савдо вазири, комиссия раиси |
|
Абдусаматов Б.Х. |
— |
Ўзбекистон Республикаси Давлат табиатни муҳофаза қилиш қўмитаси раиси |
|
Сайдалиев С.С. |
— |
Соғлиқни сақлаш вазирининг ўринбосари, Ўзбекистон Республикаси бош Давлат санитария врачи |
|
Мирзаев М.М. |
— |
Молия вазирининг ўринбосари |
|
Халияров Ю.Д. |
— |
«Ўзкимёсаноат» АЖ раисининг ўринбосари |
|
Мирзаев Ш.Ш. |
— |
«Агробанк» АТБ бошқаруви раисининг ўринбосари |
|
Давлатов А.К. |
— |
Иқтисодиёт вазирлиги ҳузуридаги Товар бозорлари конъюнктурасини ўрганиш ҳамда инвестиция лойиҳалари ва дастурлари экспертизаси республика маркази директори |
|
Очилов Р.О. |
— |
«Ўзагрокимёҳимоя» АЖ раисининг ўринбосари |
|
Саъдуллаев А.У. |
— |
«Ўзагрокимёҳимоя» АЖ ҳузуридаги ўсимликларни ҳимоя қилиш илмий-тадқиқот институти директори |
|
лавозими бўйича |
— |
Ўзбекистон Республикаси Фанлар академияси Қишлоқ хўжалиги ва озиқ-овқат таъминоти илмий-ишлаб чиқариш маркази бош директори |
|
Ходжаев З.М. |
— |
Навоий «Электркимёзавод» АЖ қўшма корхонаси бошқаруви раиси |
Изоҳ: Комиссия аъзолари бошқа ишга ўтган тақдирда унинг таркибига ушбу лавозимга янгидан тайинланган ёки тегишли функцияларни бажариш зиммасига юкланган шахслар киритилади.
(3-илова Ўзбекистон Республикаси Вазирлар Маҳкамасининг 2018 йил 7 декабрдаги 995-сонли қарори таҳририда — Қонун ҳужжатлари маълумотлари миллий базаси, 10.12.2018 й., 09/18/995/2287-сон)
Қишлоқ хўжалиги учун таъсирчан моддалар ва тайёр кимёвий препаратлар харид қилиш бўйича идоралараро тендер комиссияси тўғрисида
НИЗОМ
I. Умумий қоидалар
1. Қишлоқ хўжалиги учун таъсирчан моддалар ва тайёр кимёвий препаратлар харид қилиш бўйича идоралараро тендер комиссияси (кейинги ўринларда Комиссия деб юритилади) Ўзбекистон Республикаси Президентининг «Қишлоқ хўжалигини ўсимликларни ҳимоя қилиш кимёвий препаратлари билан таъминлаш тизимини такомиллаштириш чора-тадбирлари тўғрисида» 2006 йил 31 январдаги ПҚ–272-сон қарорини бажариш юзасидан ташкил этилган.
2. Комиссия таъсирчан моддаларни ва Ўзбекистон Республикасида қўлланиш учун рухсат этилган етишмайдиган тайёр кимёвий препаратларни тендер асосида импорт бўйича харид қилиш самарадорлигини ошириш мақсадида ташкил этилган.
II. Комиссиянинг вазифалари ва функциялари
3. Қуйидагилар Комиссиянинг асосий вазифалари ва функциялари ҳисобланади:
таъсирчан моддалар ва тайёр кимёвий препаратлар харид қилиш бўйича республиканинг иқтисодий манфаатларини таъминлаш;
таъсирчан моддалар ва тайёр кимёвий препаратлар импорти бўйича энг рақобатбардошли таклифларни танлаб олишни таъминлаш;
тендер қатнашчилари учун тенг рақобат шарт-шароитлари яратиш, талабларнинг ягоналигини ва таклифларни баҳолашнинг холисоналигини таъминлаш;
тендерларни ўтказиш муддатлари ва шакли, тендерлар ғолиблари билан протоколларни имзолаш ва контрактлар тузиш муддатлари тўғрисида қарорлар қабул қилиш;
тушган тендер таклифларини баҳолаш, тендерлар натижалари бўйича қарорлар қабул қилиш ва тендер ғолибларини аниқлаш;
Комиссияга юкланган вазифалар ва функцияларга мувофиқ Ўзбекистон Республикаси қонун ҳужжатларига зид бўлмаган бошқа қарорлар қабул қилиш.
III. Комиссия ишини ташкил этиш
4. Комиссия қонун ҳужжатлари ва ушбу Низом асосида фаолият кўрсатади.
5. Комиссия ўз ишлари тартибини мустақил равишда ишлаб чиқади ва тасдиқлайди. Комиссиянинг барча қарорлари тендер комиссияси аъзолари умумий сонининг оддий кўпчилик овози билан қабул қилинади. Овозлар тенг бўлган тақдирда тендер комиссияси раисининг овози ҳал қилувчи ҳисобланади.
6. Ўзбекистон Республикаси Ташқи иқтисодий алоқалар, инвестициялар ва савдо вазирлигининг «Ўзбектендерконсалтинг» агентлиги Комиссиянинг ишчи органи ҳисобланади.
Ишчи орган тендерларни ўтказишни амалда ташкил этишни (аризалар қабул қилишни ва уларни ҳисобга олишни, сақлашни ва махфийликни, етказиб берувчиларни малакали танлаб олишни, тушадиган таклифларни эксперт баҳолашни, хоналар ва ёрдамчи ходимлар беришни, реклама ишларини ташкил этишни, тендер комиссияси ҳужжатларини расмийлаштиришни) амалга оширади.
7. Комиссия тендер таклифларини баҳолаш учун эксперт ва консалтинг ташкилотлари вакилларини жалб этиши мумкин.
8. Комиссия тушган таклифларнинг тендер шартларига мувофиқлигини текширади ҳамда энг рақобатли нархлар, етказиб бериш, тўлов шартлари ва тендер шартларида белгиланган бошқа мезонлар бўйича импорт қилинган препаратлар ва таъсирчан моддалардан фойдаланишнинг иқтисодий, экологик ва ижтимоий омилларини ҳисобга олган ҳолда ғолибларни аниқлайди. Шунингдек тақдим этилган тендер таклифларининг қўшимча техник, ташкилий ва тижорат афзалликлари, шунингдек тендер қатнашчисининг обрўси ҳам эътиборга олиниши мумкин.
9. Комиссиянинг тендер ғолиби тўғрисидаги қарори протокол билан расмийлаштирилади. Протокол тендер комиссиясининг қатнашган аъзолари томонидан имзоланади ва тендер комиссияси раиси томонидан тасдиқланади.
10. Комиссия қарорлари юзасидан қонун ҳужжатларига мувофиқ шикоят қилиниши мумкин.
11. Комиссия таркиби Ўзбекистон Республикаси Вазирлар Маҳкамасининг қарори билан тасдиқланади. Комиссия таркибига кирувчи мансабдор шахслар бошқа ишга ўтган тақдирда ушбу лавозимларга янгидан тайинланган шахслар Комиссия таркибига киритилади.
IV. Жавобгарлик
12. Тендер таклифларини кўриб чиқиш ва баҳолаш тўғрисидаги ахборот махфий ҳисобланади ва Комиссия аъзолари мазкур ахборотнинг ошкор қилинганлиги учун қонун ҳужжатларига мувофиқ жавоб берадилар.
Таъсирчан моддалар ва тайёр кимёвий препаратлар импорти бўйича таклифларни кўриб чиқиш ва хулосалар бериш тартиби тўғрисида
НИЗОМ
I. Умумий қоидалар
1. Мазкур Низом Ўзбекистон Республикаси Президентининг «Қишлоқ хўжалигини ўсимликларни ҳимоя қилиш кимёвий препаратлари билан таъминлаш тизимини такомиллаштириш чора-тадбирлари тўғрисида» 2006 йил 31 январдаги ПҚ–272-сон қарорига мувофиқ ишлаб чиқилган ҳамда тегишли хулоса берилган ҳолда Ўзбекистон Республикасида қўллаш учун рухсат берилган таъсирчан моддалар ва етишмаётган тайёр кимёвий препаратлар импорти бўйича таклифларни кўриб чиқиш ва қарорлар қабул қилиш тартибини белгилайди.
2. Ўзбекистон Республикаси қишлоқ хўжалигини кимёвий препаратлар билан таъминлаш тизимини такомиллаштириш, шу жумладан уларни харид қилиш самарадорлигини ошириш мазкур Низомнинг мақсади ҳисобланади.
3. Таъсирчан моддалар ва тайёр кимёвий препаратлар импорти бўйича таклифларни кўриб чиқиш ва хулосалар бериш тендер савдолари ўтказиш асосида амалга оширилади.
4. Қуйидагилар тендерлар ўтказишнинг мақсади ҳисобланади: давлат бюджети, давлат бюджетида жамланадиган бюджетдан ташқари мақсадли жамғармалар маблағларидан, Ҳукумат кафолати остидаги хорижий кредитлардан ва ўсимликларни ҳимоя қилишнинг кимёвий воситаларини харид қилиш учун йўналтириладиган хорижий грантлардан фойдаланиш самарадорлигини ошириш, сифатли кимёвий препаратлар ва таъсирчан моддалар харид қилинишини таъминлаш.
5. Тендер харидларида иштирок этадиган Ватанимиз ишлаб чиқарувчилари (етказиб берувчилар) билан ҳисоб-китоб миллий валюта — сўмда амалга оширилади.
6. Қарорлар қабул қилишдаги очиқ-ошкоралик ва холислик, Ватанимиз ишлаб чиқарувчилари (етказиб берувчилар)нинг устуворлиги сақланиб қолган ҳолда тендерларда қатнашиш учун тенг рақобат шарт-шароитларини яратиш тендерлар ўтказишни ташкил этишнинг асосий принциплари ҳисобланади.
7. Тендер шартлари Ўзбекистон Республикаси қонун ҳужжатларига мувофиқ ва:
кимёвий препаратларни ишлаб чиқариш ва харид қилиш бўйича баланснинг асосий параметрларини тасдиқлашга доир қарор;
буюртмачининг техник талаблари;
санитария-карантин, ветеринария хизматларининг йўриқнома материаллари;
тендер мавзусига боғлиқ равишда Соғлиқни сақлаш вазирлиги ва «Ўзстандарт» агентлиги талаблари;
Ўзбекистон Республикаси қишлоқ хўжалигида қўллаш учун рухсат берилган ўсимликлар зараркунандалари, касалликларига ва бегона ўтларга қарши курашнинг кимёвий ва биологик воситалари, дефолиантлар ва ўсимликлар ўсиши регуляторлари рўйхати асосида ишлаб чиқилади.
II. Тендерларни ташкил этиш
8. Тендерлар қишлоқ хўжалиги учун таъсирчан моддалар ва тайёр кимёвий препаратларни харид қилиш бўйича идоралараро тендер комиссияси (кейинги ўринларда матнда «Тендер комиссияси» деб юритилади) томонидан ўтказилади. Тендер комиссияси тендерларни ўтказиш бўйича доимий орган ҳисобланади ва тегишли Низом асосида иш кўради.
9. Ўзбекистон Республикаси Ташқи иқтисодий алоқалар, инвестициялар ва савдо вазирлиги ҳузуридаги «Ўзбектендерконсалтинг» агентлиги тендер комиссиясининг ишчи органи ҳисобланади.
III. Тендер турлари
10. Ўтказиш усулига қараб тендерлар очиқ ёки ёпиқ бўлиши мумкин. Тендерлар ўтказиш тури буюртмачи томонидан белгиланади.
11. Очиқ тендерларда барча юридик шахслар қатнашиши мумкин.
12. Ёпиқ тендерлар фавқулодда ҳолларда Вазирлар Маҳкамаси билан келишув бўйича буюртмачи томонидан олдиндан белгиланган, таклифномалар юбориладиган ташкилотлар иштирокида ўтказилади.
IV. Тендерларни ташкил этиш ва ўтказиш босқичлари
13. Тендерни ташкил этиш ва ўтказиш қуйидаги босқичларни ўз ичига олади:
тендер мавзусини белгилаш;
тендер ҳужжатларини тайёрлаш (ихтисослаштирилган техник ва тижорат маслаҳатчиларини жалб этган ҳолда);
оммавий ахборот воситаларида тендерни эълон қилиш ва/ёки тендернинг потенциал қатнашчиларига тендерда иштирок этишга таклифномалар юбориш;
тендер қатнашчиларидан тендер таклифларини қабул қилиш;
тендернинг потенциал қатнашчиларини аниқлаш;
тушган тендер таклифларини баҳолаш ва тендер ғолибини аниқлаш;
тендер ғолиби билан контрактни имзолаш.
V. Тендерни тайёрлаш ва у тўғрисидаги эълонни чоп этиш
14. Ишчи орган тендер (тендер савдолари) ўтказилишидан камида 30 кун олдин оммавий ахборот воситаларида тегишли ахборотни эълон қилиш орқали ва/ёки талабгорларнинг манзилига почта, телефакс орқали ёхуд бошқа шаклда расмий таклифномалар юбориш воситасида тендер тўғрисидаги ахборотни талабгорлар эътиборига етказади, бунда ҳам мамлакат ичида, ҳам чет элда энг кўп тарқалган ва ихтисослаштирилган журналлар, газеталарни танлаш мажбурий шарт ҳисобланади, ёпиқ тендерлар ўтказишда оммавий ахборот воситаларида тендер тўғрисидаги эълон чоп этилмайди.
15. Тендерлар тўғрисидаги ахборотда қуйидаги ахборотлар мавжуд бўлади:
ишчи органнинг номи;
тендер мавзуси;
мўлжалланаётган товар етказиб берилиши бажарилиши шартлари ва муддатлари;
тендерда қатнашиш учун талабгорларни олдиндан малакали танлаб олиш муддатлари;
тендер ҳужжатларини олиш мумкин бўлган тендер комиссияси ишчи органининг манзили, алоқа боғлаш телефони ва телефакси;
тендер ҳужжатлари қиймати;
тендер таклифи берилган тақдирда тендерда қатнашиш учун закалат суммаси (банк кафолати);
тендер комиссияси таклифларини қабул қилишнинг охирги муддати (кун ва соат кўрсатилган ҳолда);
тўлов шартлари, закалат суммасини ва тендер ҳужжатларига ҳақ тўлаш учун банк реквизитлари.
VI. Тендер ҳужжатларига қўйиладиган асосий шартлар
16. Тендер ҳужжатлари қуйидагиларни ўз ичига олади:
тендер қатнашчиси учун йўриқнома;
тендернинг техник қисми;
тендернинг тижорат қисми;
контракт проформаси.
17. Тендер қатнашчиси учун йўриқномада қуйидагилар мавжуд бўлади:
тендер комиссиясининг ишчи органи вакиллари билан алоқа қилиш учун манзил ва алоқа қилиш телефонлари, улардан тендерлар ўтказилишига доир тушунтиришлар олиш мумкин;
тендер комиссиясига юбориладиган тендер таклифи нусхалари сони тўғрисидаги кўрсатма;
тендер таклифини расмийлаштириш тартиби ва унга виза қўйишга қўйиладиган талаб;
тендер таклифи қатнашчи томонидан тендер комиссиясига тақдим этилгандан кейин тендер таклифига ўзгартиришлар киритиш ва уларни расмийлаштириш тартиби;
нарх ва валютани тақдим этишга доир кўрсатма;
тендер комиссиясига таклифларни бериш тартиб-қоидасига қўйиладиган талаб;
қайд этилган вақт мобайнида тендер қатнашчисининг таклифи қайтарилмаслигини кафолатлайдиган пул закалати (банк кафолати) миқдори, уни қўйиш ва қайтариш тартиби);
буюртмачининг хоҳишига кўра — тендер савдолари натижалари бўйича тузилган контрактни зарур даражада бажариш юзасидан пул кафолати (гаров шаклида) миқдори, уни қўшиш ва қайтариш тартиби;
тендер ҳужжатлари талабларига асосланган таклифлар билан биргаликда тендер қатнашчиларига қўйилиши мумкин бўлган муқобил таклифлар тўғрисидаги маълумот;
тендер қатнашчисининг асосли илтимосига кўра тендерларни ёпиш санасини кўчириш мумкинлиги ҳақидаги кўрсатма;
ўтказиладиган тендерлар доирасида тузиладиган ҳар қандай ҳужжатнинг махфийлигига ҳавола;
таклифлар билдирилган конвертларни очиш тартиб-қоидасининг тавсифи ва тендер комиссияси томонидан тендер ғолибини аниқлаш муддати.
18. Тендернинг техник қисмида харид қилинадиган товарга қўйиладиган зарур технология талаблари мавжуд бўлади.
19. Тендер ҳужжатларининг тижорат қисми қуйидагиларни ўз ичига олади:
етказиб бериш шартлари;
тўлов шартлари ва тўлов жадвали;
битишувни молиялаштириш манбаи;
20. Контракт проформаси контрактларга қўйиладиган талабларга, жумладан:
контрактнинг халқаро савдо ҳуқуқининг умумий қабул қилинган нормаларига мувофиқлигига;
контрактнинг Ўзбекистон Республикаси қонун ҳужжатлари ва норматив ҳужжатларига мувофиқлигига жавоб бериши керак.
Битим (контракт) проформасини тузишда буюртмачи ёки ишчи орган ихтисослаштирилган консалтинг фирмаларига шартнома асосида маслаҳат сўраб мурожаат қилишга ҳақлидир.
VII. Тендер қатнашчилари
21. Тендерларда маҳсулотнинг юқори сифатини ва уни ўз вақтида етказиб беришни кафолатлайдиган, тендерда қатнашиш учун қўйиладиган шартларни бажарган кимёвий препаратлар ва таъсирчан моддаларнинг эътироф этилган ишлаб чиқарувчилари ёки уларнинг расмий дилерлари қатнашиши мумкин.
22. Тендерда қатнашиш хоҳишини билдирган талабгорлар эълон берилгандан кейин тендер ҳужжатларини оладилар. Тендер ҳужжатлари ҳар бир талабгорга тўлов асосида берилади. Тендер ҳужжатларини олиш учун тўлов миқдори тендер комиссияси томонидан белгиланади. Ватанимиз ишлаб чиқарувчилари (етказиб берувчилар) учун тендер ҳужжатларини олганлик учун тўлов миқдори сўмда белгиланади.
23. Ишчи орган тушган буюртмалар ва мазкур Низом асосида талабгорларни олдиндан малакали танлаб олиш учун материалларни тўплайди ва тизимлаштиради.
VIII. Тендерда қатнашиш учун талабгорларни танлаб олиш
24. Тендер бошлангунга қадар тендерда қатнашиш учун қўйиладиган талабгорлар тендер комиссияси томонидан малакали танлаб олинади.
25. Ишчи орган томонидан амалга ошириладиган талабгорларни малакали танлаб олишда:
қайта ташкил этиш, тугатиш ёки банкротлик босқичида турган;
малакали танлаб олиш учун барча зарур ҳужжатларни белгиланган муддатда тақдим этмаган;
илгари тузилган контрактлар бўйича қабул қилинган мажбуриятларни зарур тарзда бажармаган;
тендер эълон қилингунга қадар кўпи билан 6 ой олдин таъсис этилган;
буюртмачи билан суд ёки ҳакамлик муҳокамаси ҳолатида бўлган;
тижорат ва молиявий кўрсаткичлар бўйича тендер комиссияси талабларига жавоб бермайдиган ташкилотлар тендерда қатнашиш учун қўйилмайди.
26. Танлаб олинган қатнашчилар рўйхати тендер комиссияси томонидан тасдиқланади.
27. Тендерда қатнашишга қўйишни рад этиш тўғрисидаги қарор тендер комиссияси томонидан қабул қилинади ва бу ҳақда ишчи орган талабгорларни ёзма шаклда хабардор қилади.
IX. Тендер ўтказиш регламенти
28. Оммавий ахборот воситаларида тендер ўтказиш тўғрисидаги эълон расман чоп этилган сана ёки почта (сана почта штемпели бўйича аниқланади), телефакс орқали ёки бошқа шаклда тендер иштирокчиси расман хабардор қилинган (таклиф этилган) сана тендер очилган сана ҳисобланади.
29. Ўтказиладиган тендерлар доирасида тендер таклифларини тайёрлаш муддати тендер комиссияси томонидан белгиланади ва тендер очилиши тўғрисидаги эълонда кўрсатилади.
30. Тендер комиссияси тендер таклифларини тақдим этиш муддатини узайтириш тўғрисида қарор қабул қилиши мумкин. Бу қарор тендернинг барча қатнашчиларига тарқатилади.
31. Ҳар бир аниқ ҳолатда тендер комиссияси тендерда қатнашиш учун талабгор томонидан қўйиладиган закалат (ёки банк кафолати)ни қўшиш тартиби, унинг миқдори ва шаклини белгилайди. Закалат миқдори хариднинг ҳисоблаб чиқилган қийматининг 1—5 фоизи миқдорида бўлишига йўл қўйилади. Закалат буюртмачининг ёки ишчи органнинг (ихтисослаштирилган ташкилот ишчи орган ҳисобланган ҳолатда) субҳисоб рақамига қўйилади. Ватанимиз ишлаб чиқарувчилари (етказиб берувчилар)нинг закалати миллий валюта — сўмда қўйилади.
32. Тендер таклифлари фақат муҳрланган икки қаватли конвертларда қабул қилинади. Ишчи органнинг номи ва манзили кўрсатилган ташқи конвертда тендер қатнашчиси томонидан закалат қўйилганлигини тасдиқловчи ҳужжат бўлади. Ички конвертда тендер таклифи, савдо эълон қилинган товарнинг номи ва таклифларни қабул қилиш учун белгиланган сана тўғрисидаги маълумотлар мавжуд бўлади. Барча ҳужжатлар рўйхатдан ўтказиш дафтарида топширувчи ва қабул қилиб олувчи шахснинг тилхати остида сана ва қабул қилиш вақти қайд этилган ҳолда қабул қилинади. Рўйхатдан ўтказиш дафтари ип ўтказиб тикилган, тартиб рақами қўйилган ва буюртмачи ёки ишчи орган (ихтисослаштирилган ташкилот)нинг гербли муҳри билан тасдиқланган бўлиши керак.
33. Конвертларни очиш тартиб-қоидаси регламенти, уларни кўриб чиқиш ва махфийлик чора-тадбирларига риоя қилган ҳолда уларни сақлаш тартиби тендер комиссияси томонидан белгиланади.
34. Тендер комиссияси тендер буюртмаларини қабул қилишнинг сўнгги санасини, конвертларни очиш вақти ва жойини белгилайди. Кўрсатиб ўтилган санадан кейин олинган таклифлар кўриб чиқилмайди ва конвертлар очилмасдан тендер қатнашчисига қайтарилади. Агар тендер қатнашчиси кўрсатиб ўтилган санадан кейин ўзгартиришлар киритса ёки ўз таклифини қайтиб олса, закалат унга қайтарилмайди. Тендер қатнашчиси ўз таклифини тендер буюртмаларини қабул қилишнинг охирги санасидан камида 5 кун олдин қайтариб олиш ҳуқуқига эгадир.
35. Тендер комиссияси мажлисини ўтказиш учун кворум унинг таркибининг 70 фоизини ташкил этади. Тендер комиссиясининг барча мажлислари ва қабул қилинган барча қарорлари баённомалар билан расмийлаштирилиши керак. Тендер қатнашчиларининг таклифлари мавжуд бўлган конвертларни очиш бевосита тендер комиссияси мажлисида амалга оширилади. Тендер комиссияси мажлисининг баённомасида тендер қатнашчилари томонидан таклиф этилган таклифларнинг тендер ҳужжатлари талабларига мувофиқлиги қайд этилади.
36. Тендер таклифларини кўриб чиқиш муддати тендер комиссияси томонидан конвертлар очилган пайтдан бошлаб белгиланади. Ушбу муддат харид қилинадиган товарнинг турига боғлиқ бўлади ва 3 ойдан ортиқ бўлиши мумкин эмас. Таклифларни кўриб чиқишда уларнинг тендер ҳужжатлари талабларига мувофиқлиги аниқланади, зарур ҳужжатлар мавжудлиги ва улар расмийлаштирилишининг тўғрилиги текширилади.
37. Тендер комиссияси тушган таклифларнинг тендер шартларига мувофиқлигини текширади ва республика шароитларида таклиф этилаётган препаратларни синаб кўришнинг ижобий натижасини ҳисобга олган ҳолда ғолибларни «нарх-сифат (самарадорлик)» принципи бўйича аниқлайди.
38. Тендерни ташкил этиш ва ўтказиш чиқимлари, шунингдек эксперт ташкилотларининг хизматларига сотиб олинган тендер ҳужжатлари учун қатнашчилар томонидан қўшилган маблағлар ҳисобига ҳақ тўланади.
39. Тендер ўтказилгандан кейин буюртмачи ёки ишчи орган (ихтисослаштирилган ташкилот) қатнашчиларга (ғолибдан ташқари) уларнинг закалатларини банк операциялари ўтказиш чиқимларини чиқариб ташлаган ҳолда қайтаради. Закалат тендер ғолиби эълон қилган пайтдан бошлаб белгиланган муддат мобайнида, бироқ 11 банк кунидан кечикмай қайтарилади. Тендер ғолибининг закалати кафолат ва тендер ғолиби томонидан бундай контракт шартлари зарур тарзда бажарилиши сифатида контракт шартларини бажариш тамом бўлгунга қадар тендер буюртмачисининг тасарруфида туриши мумкин.
40. Тендерда қатнашиш ҳуқуқини бошқа юридик шахсларга беришга йўл қўйилмайди.
41. Агар:
тендер ёпилиши муддати тамом бўлган пайтгача бирорта ҳам тендер таклифи тушмаса;
тендерда фақат битта қатнашчининг таклифи тақдим этилган бўлса;
тақдим этилган барча тендер таклифларида ҳужжатларнинг зарур комплекти мавжуд бўлмаса, тендерлар тендер комиссияси томонидан бўлиб ўтмаган деб эълон қилиниши мумкин.
42. Агар тушган тендер таклифларидан ҳеч бири тендер ҳужжатлари шартларига мувофиқ бўлмаса, тендер бўлиб ўтган, бироқ салбий натижали деб ҳисобланади.
X. Тендер таклифларини баҳолаш тартиби
43. Тендер таклифларини баҳолаш тендер комиссияси томонидан белгиланган муддат мобайнида ўтказилади. Тендер қатнашчилари ёки уларнинг вакиллари тендер таклифларини баҳолашда ҳозир бўлишга ҳақли эмас. Баҳолаш давомида тендер комиссияси тушунтиришлар олиш учун талабгорларни таклиф этиш, улардан қўшимча маълумотларни ва тасдиқномаларни сўраш ҳуқуқига эгадир. Тендер якунларини чиқаришда тендер қатнашчилари ёки уларнинг ишончли шахслари ҳозир бўлишлари мумкин.
44. Тендер комиссияси тендер таклифларини баҳолаш учун эксперт ва консалтинг ташкилотлари вакилларини жалб қилиши мумкин.
45. Тендер қатнашчиларининг тақдим этилган таклифлари билан танишгандан кейин тендер комиссиясининг ҳар бир аъзоси асосланган ёзма хулоса ёзишга ҳақлидир.
46. Тендер ғолиби тўғрисидаги қарор тендер комиссияси томонидан қабул қилинади ҳамда таъсирчан моддалар ва тайёр кимёвий препаратларни импорт қилиш учун контракт тузишга асос ҳисобланади.
47. Тендер таклифларини кўриб чиқиш ва баҳолаш тўғрисидаги ахборот баҳолаш тартиб-қоидасига расман алоқадор бўлмаган шахсларга маълум қилинмайди. Тендер комиссияси аъзолари ва жалб этилган экспертлар ушбу ахборот ошкор қилинганлиги учун жавоб берадилар.
48. Арифметик хато ёки бошқа хатолар мавжуд бўлган тақдирда тендер комиссияси тендер таклифини рад этишга ёхуд тендер доирасида тендер таклифини бундан кейин кўриб чиқиш шартларини белгилашга, бу ҳақда тендер қатнашчисини хабардор қилишга ҳақлидир.
49. Тендер таклифларини баҳолаш ва тендер ғолибини аниқлаш тендер ҳужжатларида баён қилинган мезонлар асосида амалга оширилади. Шунингдек тақдим этилган тендер таклифларининг қўшимча техник, ташкилий ва тижорат устунликлари, шунингдек тендер қатнашчисининг нуфузи ҳам эътиборга олиниши мумкин.
50. Тендер комиссиясининг баённомасида қуйидагилар ҳақидаги маълумотлар мавжуд бўлади:
тендер ғолиби ва тендер ғолибидан кейин энг юқори балларга эга бўлган захирадаги қатнашчилар номи;
тендер комиссияси таркиби;
овоз бериш натижалари;
тендер қатнашчилари тендер таклифларининг йиғма жадвали;
тендер ғолиби билан контрактни имзолаш муддатлари.
Протокол тендер комиссиясининг ҳозир бўлган аъзолари томонидан имзоланиши ва тендер комиссияси раиси томонидан тасдиқланиши керак.
51. Агар тендер ғолиби контракт тузишни рад этса, контракт тузиш ҳуқуқи биринчи захирадаги қатнашчига ўтади.
52. Агар тендер бўлиб ўтмаса ёки салбий натижали бўлса тендерни қайтадан ўтказиш мумкин.
53. Тендер ўтказиш билан боғлиқ низолар Ўзбекистон Республикаси қонун ҳужжатларида белгиланган тартибда кўриб чиқилади.
XI. Тендер натижалари бўйича контрактлар тузиш, экспертизадан ўтказиш ва уларнинг бажарилиши мониторинги
54. Тендер комиссияси мажлиси протоколининг тасдиқланган нусхалари ва тендер шартлари «Ўзбектендерконсалтинг» агентлиги томонидан тилхат остида Ўзбекистон томонидан буюртмачига ва Ўзбекистон Республикаси Ташқи иқтисодий алоқалар, инвестициялар ва савдо вазирлигига берилади.
55. Буюртмачи қонун ҳужжатларига, тендер шартларига ва тендер комиссияси мажлисининг протоколига мувофиқ тендер ғолиби билан контракт тузади. Контракт тузилгандан кейин ғолиб умумий қабул қилинган халқаро қоидалар ва урф-одатларга мувофиқ контракт суммасининг 10 фоизигача миқдорда буюртмачи фойдасига контракт бажарилиши кафолатини тақдим этиши шарт (перфоманс бонд).
56. Ўзбекистон Республикаси Ташқи иқтисодий алоқалар, инвестициялар ва савдо вазирлиги қонун ҳужжатларига, тендер шартларига ва тендер комиссияси мажлиси протоколига мувофиқ контрактни экспертизадан ўтказади.
57. Тендер ғолиби томонидан қабул қилинган контракт мажбуриятлари бажарилиши мониторингини олиб бориш «Ўзбектендерконсалтинг» агентлиги томонидан амалга оширилади. Тендер контрактлари бажарилиши устидан назорат қилиш буюртмачи томонидан «Ўзбектендерконсалтинг» агентлигига тақдим этиладиган маълумотлар асосида тендер комиссияси томонидан амалга оширилади.
58. Тендерларни ўтказиш билан боғлиқ бўлган низолар Ўзбекистон Республикаси қонун ҳужжатларида белгиланган тартибда кўриб чиқилади.
XII. Жавобгарлик
59. Қуйидагилар:
ишчи орган таркибига кирадиган шахслар — тушган тендер таклифларининг ҳисобга олиниши, сақланиши ва махфийлиги;
тендер комиссияси раиси ва аъзолари — ахборот ошкор қилинганлиги, тендер қатнашчилари, тендер комиссиясининг қолган аъзолари ва жалб этилган экспертлар билан битишувга йўл қўйилмаслиги, шунингдек бошқа ҳуқуққа зид хатти-ҳаракатлар учун қонунда назарда тутилган тарзда жавоб берадилар.
60. Контрактни миқдор, сифат ва техник параметрлар бўйича бажармаган тендер ғолиби Ўзбекистон Республикаси қонун ҳужжатларида назарда тутилган тарзда жавоб беради.
(Ўзбекистон Республикаси қонун ҳужжатлари тўплами, 2006 й., 8-сон, 54-модда; 2009 й., 21-сон, 252-модда; 2017 й., 11-сон, 161-модда, Қонун ҳужжатлари маълумотлари миллий базаси, 10.12.2018 й., 09/18/995/2287-сон)
