|
Ҳужжат кучини йўқотган " " 22.02.2021
|
Ўзбекистон Республикаси Вазирлар Маҳкамасининг
қарори
«СИНО» ОЧИҚ АКЦИЯДОРЛИК ЖАМИЯТИНИ РИВОЖЛАНТИРИШНИ ҚЎЛЛАБ-ҚУВВАТЛАШ ЧОРА-ТАДБИРЛАРИ ТЎҒРИСИДА
LexUZ шарҳиМазкур қарор Ўзбекистон Республикаси Вазирлар Маҳкамасининг 2021 йил 22 февралдаги 87-сонли «Ўзбекистон Республикаси Ҳукуматининг ўз аҳамиятини йўқотган айрим қарорларини ўз кучини йўқотган деб ҳисоблаш тўғрисида (Ўзбекистон Республикаси Президентининг «Ўз аҳамиятини йўқотган қонунчилик ҳужжатларини қайта кўриб чиқиш тизимини жорий этиш орқали мамлакатда ишбилармонлик муҳитини яхшилаш чора-тадбирлари тўғрисида» 2020 йил 27 сентябрдаги ПФ-6075-сон Фармони)»ги қарорига асосан ўз кучини йўқотган.
«Сино» очиқ акциядорлик жамиятида совутиш ва музлатиш ускуналари ишлаб чиқаришни кенгайтириш учун қулай шарт-шароитлар яратиш, бутловчи буюмлар ва узелларни маҳаллийлаштириш негизида уларнинг янги турлари ва моделларини ишлаб чиқаришни ўзлаштириш, экспорт салоҳиятини янада кенгайтириш мақсадида Вазирлар Маҳкамаси қарор қилади:
1. Қуйидагилар:
корхоналар банкротлиги санацияси масалалари бўйича Ҳукумат комиссияси томонидан тасдиқланган таркибий ўзгартириш дастурига мувофиқ «Сино» очиқ акциядорлик жамиятида (Самарқанд шаҳри) совутиш ва музлатиш техникаси ишлаб чиқариш учун бутловчи буюмлар ва деталларни маҳаллийлаштириш даражасини 80 фоизгача етказишни таъминлаган ҳолда 2009 йилга бориб 250,0 мингтагача совутиш ва музлатиш ускунаси ишлаб чиқариш қувватларини янада кучайтириш назарда тутилганлиги;
«Сино» очиқ акциядорлик жамияти томонидан «ТС—Технолоджи» (АҚШ), «Хенан Хенфей Электрик Ко» (ХХР) ва «Хайр групп Ко Лтд» (ХХР) хорижий компаниялари билан контрактлар тузилганлиги, халқаро стандартларга мувофиқ бўлган совутиш ва музлатиш техникаси ишлаб чиқариш учун замонавий технология асбоб-ускуналари ва бутловчи буюмлар етказиб бериш бошланганлиги;
«Сино» очиқ акциядорлик жамияти томонидан 2004 йилда 2400 та совутиш ва музлатиш техникасини экспортга сотиш ва уни экспорт қилиш ҳажмини 2009 йилда 25 мингтага етказиш назарда тутилганлиги маълумот учун қабул қилинсин.
2. «Сино» очиқ акциядорлик жамияти, истисно тариқасида, беш йил муддатга:
олиб келинаётган технология асбоб-ускуналари ва уларга эҳтиёт қисмлар, шунингдек совутиш ва музлатиш ускунаси ишлаб чиқаришнинг технологик жараёнида фойдаланиладиган материаллар, қисмлар ва бутловчи материаллар учун божхона тўловлари тўлашдан (божхона расмийлаштируви йиғимларидан ташқари);
совутиш ва музлатиш ускуналарини ишлаб чиқаришни маҳаллийлаштириш доирасида ишлаб чиқарилган ускуналар ва маҳсулотлар юзасидан фойда (даромад) солиғидан, шунингдек мулк солиғи, ер солиғи, экология солиғи, қўшилган қиймат солиғи ва маҳаллий солиқлар тўлашдан озод этилсин.
3. Белгилансинки, мазкур қарорнинг 2-бандида кўрсатилган имтиёзлар берилиши ҳисобига бўшаб қоладиган маблағлардан фақат совутиш ва музлатиш ускуналари ишлаб чиқаришни маҳаллийлаштириш бўйича қувватларни барпо этиш ва ривожлантириш, уларга бутловчи деталлар ва узеллар ишлаб чиқариш, ассортиментни кенгайтириш, ишлаб чиқариладиган совутиш ва музлатиш ускунасининг дизайни ва сифатини яхшилаш учун фойдаланилади.
Ўзбекистон Республикаси Давлат солиқ қўмитаси бўшаб қолган маблағлардан мақсадли ва самарали фойдаланилиши устидан қатъий назорат ўрнатсин.
Берилган имтиёзлар ҳисобига бўшаб қолган маблағлардан «Сино» очиқ акциядорлик жамияти ўзга мақсадларда фойдаланган тақдирда, мазкур қарорда назарда тутилмаган эҳтиёжлар учун фойдаланилган маблағлар ҳажми белгиланган тартибга бюджетга олиб қўйилади.
4. Мазкур қарорнинг бажарилишини назорат қилиш Ўзбекистон Республикаси Бош вазирининг ўринбосари Р.С. Азимов зиммасига юклансин.
Вазирлар Маҳкамасининг Раиси И. КАРИМОВ
Тошкент ш.,
2003 йил 15 декабрь,
549-сон
