Ўзбекистон Республикаси Президентининг
Фармони
2026 йилда энергия самарадорлигини янада ошириш, энергия ресурсларини тежаш ва улардан оқилона фойдаланишнинг қўшимча чора-тадбирлари тўғрисида
Иқтисодиёт тармоқлари ва ижтимоий соҳада энергия самарадорлигини ошириш, энергия ресурсларини тежаш ва улардан оқилона фойдаланишни таъминлаш, сунъий интеллект технологияларидан фойдаланган ҳолда катта ҳажмдаги маълумотларни таҳлил қилиш, шунингдек, кадрларни қайта тайёрлаш ва уларнинг малакасини ошириш тизимини такомиллаштириш мақсадида қарор қиламан:
I. Мақсадлар
1. Ушбу Фармонни қабул қилишдан кўзланган асосий мақсад этиб иқтисодиёт тармоқлари ва ижтимоий соҳа объектларининг энергия самарадорлигини янада ошириш, энергия тежамкор технологиялар ва қайта тикланувчи энергия манбаларини жорий қилишни кенгайтириш орқали 2026 йилда 4,3 миллиард кВт соат электр энергиясини ҳамда 2,8 миллиард метр куб табиий газни тежаш, шу жумладан:
(а) республика ҳудудларида:
(i) якка тартибдаги ва кўп квартирали уйлар, ижтимоий соҳа объектларининг энергия самарадорлигини ошириш ҳамда хўжалик юритувчи субъектларда замонавий энергия тежамкор технологияларни жорий этиш ҳисобидан 2,6 миллиард кВт соат электр энергияси ва 932,4 миллион метр куб табиий газ;
(ii) йирик қуёш ва шамол электр станцияларида қўшимча 4,3 миллиард кВт соат яшил электр энергиясини ишлаб чиқариш ҳисобидан 1,3 миллиард метр куб табиий газ;
(iii) оғир тоифадаги маҳаллаларда 270 МВтлик кичик қувватдаги қуёш фотоэлектр станцияларини ўрнатиш ҳисобидан 35 миллион метр куб табиий газ;
(б) 25 та йирик тармоқ корхоналарида электр энергияси ва табиий газдан оқилона фойдаланиш ҳисобидан 1,6 миллиард кВт соат электр энергияси ва 553 миллион метр куб табиий газ тежалишига эришиш белгилансин.
II. Тартиб ва қоидалар
2. Белгилансинки:
(а) 2026 йил 1 июлдан бошлаб вазирлик ва идоралар, давлат ташкилотлари ва ижтимоий соҳа муассасалари ҳамда давлат иштирокидаги корхоналарнинг янги қуриладиган, реконструкция (модернизация) қилинадиган ва мукаммал таъмирланадиган бино ва иншоотларида энергия самарадорлигининг «С» ва ундан юқори тоифасига эга бўлиш талаби киритилади;
(б) электр энергияси ва табиий газни истеъмолчиларни тармоқдан ажратиш ва чеклов киритиш ҳисобидан тежашга йўл қўйилмайди.
3. Энергия самарадорлиги миллий агентлигига (кейинги ўринларда — Агентлик) Энергия самарадорлигини рағбатлантириш ва қўллаб-қувватлаш жамғармаси орқали энергия сервис компаниялари (кейинги ўринларда — ЭСКО) томонидан давлат буюртмалари асосида кўрсатиладиган энергия сервис хизматлари учун кафолатланган тўловларни амалга ошириш ҳуқуқи берилсин.
III. Ташкилий чора-тадбирлар
4. Қуйидагилар:
(а) 2026 йилда электр энергияси ва табиий газни тежашнинг мақсадли кўрсаткичлари 1-иловага мувофиқ;
(б) 2026 йилда энергия самарадорлигини янада ошириш, энергия ресурсларини тежаш ва улардан оқилона фойдаланиш бўйича «йўл харитаси» 2-иловага мувофиқ тасдиқлансин.
5. Вазирлар Маҳкамаси:
(а) икки ҳафта муддатда қуйидаги йўналишларда мақсадли кўрсаткичларни ҳудудлар ва тармоқ корхоналари кесимида тасдиқлаш тўғрисидаги қарорларни қабул қилсин:
(i) 2026 йилда энергия самарадорлиги бўйича амалга ошириладиган дастурлар ҳамда аниқ чора-тадбирлар асосида электр энергияси ва табиий газни республика ҳудудлари кесимида тежаш;
(ii) 25 та йирик тармоқ корхоналарида бир бирлик маҳсулот ишлаб чиқариш (хизмат кўрсатиш) учун сарфланадиган энергия ресурслари миқдорини белгилаш ҳамда уларда электр энергияси ва табиий газни тежаш;
(б) бир ой муддатда энергия аудити хулосалари асосида республика ва маҳаллий ижро этувчи ҳокимият органлари, давлат иштирокидаги корхоналар, шу жумладан, тижорат банклари ҳамда суғурта компаниялари биноларининг энергия самарадорлигини ошириш ҳамда уларни қайта тикланувчи энергия манбалари қурилмалари билан жиҳозлаш бўйича манзилли дастур ва тармоқ жадвалларини тасдиқласин. Бунда биноларнинг энергия самарадорлигини ошириш лойиҳаларини қуйидаги манбалар ҳисобидан молиялаштириш назарда тутилсин:
(i) республика ва маҳаллий ижро этувчи ҳокимият органларида — уларнинг харажатлар сметасидаги тўртинчи гуруҳ харажатларининг камида 5 фоизи ҳамда бюджетдан ташқари маблағларининг камида 15 фоизи ҳисобидан;
(ii) давлат иштирокидаги корхоналар, шу жумладан, тижорат банклари ва суғурта компанияларида — ўз маблағлари ҳисобидан.
6. Агентлик:
(а) Иқтисодиёт ва молия вазирлиги, Энергетика вазирлиги билан биргаликда 2026 йилдан бошлаб ҳар йили энергия сарфи белгиланган нормативлардан кескин ошиб кетган давлат объектларида халқаро стандартлар ва энергия сервис механизмлари асосида энергия самарадорлигини тубдан яхшилаш дастурларини амалга оширсин;
(б) Рақамли технологиялар вазирлиги билан биргаликда 2026 йил 1 октябрга қадар объектлар кесимида катта ҳажмдаги маълумотлар (Big Data), бизнес-таҳлил (Business Intellegence) ва сунъий интеллект технологиялари асосида энергия истеъмолини ва самарадорлик кўрсаткичларини таҳлил қилиб бориш амалиётини йўлга қўйсин;
(в) 2026 йил 1 августга қадар якка тартибдаги ва кўп квартирали уйлар, нотурар бинолар ҳамда ижтимоий соҳа объектлари учун энергия самарадорлиги бўйича эталон кўрсаткичларни (Benchmark) жорий қилиш юзасидан Вазирлар Маҳкамасига таклиф киритсин.
7. Қурилиш ва уй-жой коммунал хўжалиги вазирлиги Агентлик, Ўзбекистон техник жиҳатдан тартибга солиш агентлиги ҳамда бошқа манфаатдор вазирлик ва идоралар билан биргаликда 2026 йил якунига қадар қурилиш соҳасидаги норматив ҳужжатларни стратегик ҳамкор — «ILF Consulting Engineers» компаниясининг энергия самарадорлигини ошириш бўйича халқаро стандартлар асосида ишлаб чиқилган тавсияларидан келиб чиққан ҳолда такомиллаштирсин.
Бунда бино ва иншоотларнинг лойиҳа ҳужжатларида табиий ёруғликлардан самарали фойдаланиш ечимлари ҳамда диспетчерлик бошқарувига эга «ақлли» (smart) иситиш, совитиш ва шамоллатиш тизимларини жорий қилиш кўзда тутилсин.
8. Иқтисодиёт ва молия вазирлиги:
(а) 2027 йилдан бошлаб ҳар йили:
(i) ушбу Фармоннинг 6-банди «а» кичик бандида кўзда тутилган дастурлар учун талаб қилинадиган маблағларни ижтимоий ва ишлаб чиқариш инфратузилмасини ривожлантириш дастурлари доирасида режалаштирсин;
(ii) энергия самарадорлигини таъминлаш лойиҳалари амалга ошириладиган давлат ташкилотлари ва ижтимоий соҳа муассасаларида ЭСКОларга ушбу лойиҳалар натижасида тежаладиган энергия ресурслари қийматига тенг миқдордаги тўловлар учун Агентликнинг Энергия самарадорлигини рағбатлантириш ва қўллаб-қувватлаш жамғармасига зарур маблағларни ажратиб борсин.
Бунда тежаладиган энергия ресурслари қиймати ушбу объектларда санитария нормалари ва қоидалари талаблари асосида ҳақиқатда сарфланиши лозим бўлган энергия ресурслари ҳажмидан келиб чиқиб ҳисобланади;
(б) Қурилиш ва уй-жой коммунал хўжалиги вазирлиги, Агентлик, Энергетика вазирлиги, Мактабгача ва мактаб таълими вазирлиги ҳамда Соғлиқни сақлаш вазирлиги билан биргаликда уч ой муддатда табиий газ ва марказлашган иссиқлик таъминоти билан таъминланмаган давлат ижтимоий соҳа муассасалари биноларини қуриш, реконструкция (модернизация) қилиш ва мукаммал таъмирлаш бўйича лойиҳа ҳужжатларини ишлаб чиқишда уларнинг энергия самарадорлигини ошириш тадбирлари билан бир вақтда иссиқлик насослари ҳамда бошқа муқобил қурилма ва ускуналар ёрдамида иситиш, совитиш ва шамоллатиш тизимларини жорий этишни кенгайтириш ҳақида таклиф киритсин.
9. Агентлик Иқтисодиёт ва молия вазирлиги, Инвестициялар, саноат ва савдо вазирлиги билан биргаликда 2026 йил 1 сентябрга қадар иқтисодиёт тармоқлари ва ижтимоий соҳада энергия самарадорлигини ошириш лойиҳалари учун халқаро молия институтлари ҳамда хорижий ҳукумат молия ташкилотларидан 200 миллион АҚШ долларини жалб қилиш чораларини кўрсин.
10. Агентлик Рақамли технологиялар вазирлиги, масъул вазирлик ва идоралар билан биргаликда ахборот хавфсизлиги талаблари ва белгиланган тартибга риоя қилган ҳолда ушбу Фармонга 3-иловада келтирилган рўйхатга мувофиқ давлат органлари ҳамда ташкилотларининг маълумотлар базалари ва ахборот тизимлари «Рақамли ҳукумат» тизимининг идоралараро интеграциялашув платформаси ҳамда Ягона интерактив давлат хизматлари портали орқали Энергия самарадорлигини ошириш рақамли платформасига интеграция қилинишини таъминласин.
11. Миллий статистика қўмитаси Агентлик, Иқтисодий тадқиқотлар ва ислоҳотлар маркази, Иқтисодиёт ва молия вазирлиги, Энергетика вазирлиги билан биргаликда ҳар ярим йилда иқтисодиётнинг энергия сиғимини ҳисоблаш ва тегишли маълумотларни эълон қилиб бориш амалиётини жорий қилсин.
12. Қорақалпоғистон Республикаси Вазирлар Кенгаши, вилоятлар ва Тошкент шаҳри ҳокимликлари Агентлик билан биргаликда 2026 йил 1 июлга қадар ўз ҳудудида жойлашган 4 қават ва ундан юқори бўлган камида 20 тадан кўп квартирали уйларни Чиноз ва Олтиариқ туманларидаги тажриба асосида модернизация қилиш дастурини Вазирлар Маҳкамасига киритсин. Бунда қурилиш-таъмирлаш ишлари 2026 йил 1 сентябрга қадар бошланиши назарда тутилсин.
IV. Институционал салоҳиятни кучайтириш, истеъмолчиларда энергия тежамкорлик маданиятини ошириш
13. Ҳудудларда энергия самарадорлиги лойиҳалари амалга оширилишини жадаллаштириш мақсадида Агентликка қуйидаги қўшимча вазифалар юклансин:
(а) жойларда энергия самарадорлигини ошириш ишлари кўламини кенгайтириш ҳамда ягона ёндашувни таъминлаш;
(б) ҳудудларда энергия самарадорлиги лойиҳаларини амалга ошириш ҳамда энергия самарадор қурилма ва ускуналар жорий этилишини жадаллаштириш борасида ҳудудий ташкилотларнинг ўзаро ҳамкорлигини таъминлаш;
(в) қурилиш, реконструкция (модернизация) қилиш ва мукаммал таъмирлаш лойиҳалари яшил тамойиллар ва энергия самарадорлиги талаблари асосида амалга оширилишини ташкил қилишга кўмаклашиш;
(г) энергия самарадор қурилма ва ускуналар ҳамда қурилиш материаллари ишлаб чиқаришни кенгайтириш юзасидан таклифлар ишлаб чиқиш;
(д) ҳудудларда энергия самарадор қурилма ва ускуналарга сервис хизматларини кўрсатувчи объектлар («service point»лар) фаолиятини йўлга қўйиш ва кенгайтириш чораларини кўриш;
(ж) энергия самарадорлиги бўйича ҳудудий лойиҳаларнинг лойиҳавий бошқарув тамойили асосида амалга оширилишини мувофиқлаштириш ва мониторинг қилиш;
(з) ҳудудларда амалга оширилган энергия самарадорлиги лойиҳалари натижасида иқтисод қилинган энергия ресурсларининг ҳисобини юритиш ҳамда уларнинг натижадорлигини таҳлил қилиш;
(и) ушбу Фармон билан тасдиқланган мақсадли кўрсаткичлар ижросини доимий мониторинг қилиб бориш ҳамда кўрилаётган чоралар натижадорлиги юзасидан мунтазам равишда таҳлилий маълумотларни киритиб бориш.
14. Юкланган вазифалар бажарилишини сифатли ташкил қилиш мақсадида Агентликнинг ҳудудларда 3 та штат бирлигидан иборат Энергия самарадорлигини ошириш бўйича лойиҳа офислари ташкил қилинсин.
Қўшимча киритилаётган 42 та штат бирлиги Ўзбекистон Республикаси Президентининг 2025 йил 26 июндаги ПФ-105-сон Фармонига мувофиқ 2026 йил 1 январдан қисқартирилган бошқарув штат бирликлари ҳисобидан ажратилсин.
15. Олий таълим, фан ва инновациялар вазирлиги, Мактабгача ва мактаб таълими вазирлиги Агентлик билан биргаликда:
(а) 2026 йил 1 сентябрга қадар олий таълим ташкилотлари учун энергия самарадорлиги ҳамда энергия тежамкорлигига оид амалий билим ва кўникмаларни шакллантиришга қаратилган мавзуларни тегишли фанларнинг ўқув дастурларига киритсин ва амалиётга жорий этсин;
(б) 2026/2027 ўқув йилдан бошлаб мактабгача, умумий ўрта, ўрта махсус, касбий ва олий таълим ташкилотларида тегишлича тарбияланувчи, ўқувчи ва талабаларда энергия тежамкорлиги бўйича билим ва кўникмаларни шакллантиришга қаратилган тадбирларни ташкил этиб борсин.
16. Энергетика вазирлиги Олий таълим, фан ва инновациялар вазирлиги, Агентлик, Электр энергияси, нефть маҳсулотлари ва газдан фойдаланишни назорат қилиш инспекцияси билан биргаликда:
(а) 2026 йил 1 июлга қадар барча ҳудудлардаги муҳандислик-техника йўналишидаги олий таълим ташкилотларининг профессор-ўқитувчилари томонидан жойларга чиққан ҳолда ёқилғи-энергетика тармоғи корхоналарининг раҳбар ва техник ходимларини қайта тайёрлаш ҳамда уларнинг малакасини ошириш тизимини йўлга қўйсин;
(б) иқтисодиёт тармоқлари корхоналари ва тегишли вазирлик, идоралар эҳтиёжини ҳисобга олган ҳолда техника йўналишидаги олий таълим ташкилотларининг «70710410 — Энергия тежамкорлиги ва энергоаудит» магистратура мутахассислиги бўйича ўқишга қабул қилиш параметрларини 2026/2027 ўқув йили учун 25 фоизга оширсин.
17. Ўзбекистон маҳаллалари уюшмаси Агентлик, Камбағалликни қисқартириш ва бандлик вазирлиги, Ички ишлар вазирлиги, Ижтимоий ҳимоя миллий агентлиги, Солиқ қўмитаси, Оила ва хотин-қизлар қўмитаси ҳамда Ёшлар ишлари агентлиги билан биргаликда «маҳалла еттилиги» кўмагида аҳолига кундалик ҳаётда энергияни тежаш ва энергия самарадорлигини ошириш кўникмаларини сингдиришга қаратилган «Энергия самарадорлиги — фаровон ҳаёт гарови» умуммиллий ҳаракатини йўлга қўйсин ҳамда аҳоли ўртасида тарғибот ва ташвиқот ишларини амалга оширсин.
18. Ўзбекистон Миллий телерадиокомпанияси, Ўзбекистон Миллий ахборот агентлиги Адлия вазирлиги, Энергетика вазирлиги ва Агентлик билан биргаликда энергияни тежаш ва энергия самарадорлигини ошириш бўйича амалга оширилаётган чора-тадбирлар ҳамда энергия тежамкор ускуналарнинг афзалликларини оммавий ахборот воситаларида, шу жумладан, интернет ва ижтимоий тармоқларда кенг ёритиб борсин.
V. Фармон ижросини ташкил қилиш, таъминлаш ва назорат
19. Шундай тартиб ўрнатилсинки, унга кўра:
(а) ушбу Фармон билан тасдиқланган мақсадли кўрсаткичлар ва уларга эришиш тадбирлари бажарилишининг назорати «Энергия тежамкорлик» платформаси (кейинги ўринларда — Платформа) орқали юритилади.
Бунда Агентлик барча масъул ижрочиларга мақсадли кўрсаткичлар, тадбирлар ҳамда уларнинг бажарилиши тўғрисидаги маълумотларни Платформага онлайн киритиб бориш ҳамда тегишли ташкилотларга назорат қилиб бориш имкониятини яратади;
(б) республиканинг ҳар бир тумани (шаҳри) кесимида ёқилғи-энергия ресурсларини тежаш дастурлари ижросини таъминлаш, энергия самарадорлигини ошириш бўйича туман (шаҳар) идоралараро ишчи гуруҳлари тегишли ҳудуд бўйича тасдиқланган мақсадли кўрсаткичлар ва тадбирлар бажарилишини ҳар ҳафта муҳокама қилган ҳолда маълумотларни Платформага киритиб боради;
(в) 25 та йирик тармоқ корхоналари раҳбарлари тасдиқланган мақсадли кўрсаткичлар бажарилиши юзасидан ҳисоботларни ҳар ойда Платформага киритиб боради;
(г) Ёқилғи-энергия ресурсларидан фойдаланиш устидан давлат назоратини самарали ташкил этиш ва мувофиқлаштириш бўйича республика штаби ҳар ойда мақсадли кўрсаткичларнинг бажарилишини муҳокама қилиб, камчиликка йўл қўйган раҳбарларга нисбатан таъсир чораларини кўриб боради.
20. Бош прокуратура Электр энергияси, нефть маҳсулотлари ва газдан фойдаланишни назорат қилиш инспекцияси билан биргаликда ушбу Фармон ижроси юзасидан қатъий назорат ўрнатсин ҳамда мунтазам равишда жойига чиққан ҳолда тасдиқланган мақсадли кўрсаткичларнинг бажарилиши ҳаққонийлигини ўрганиб борсин.
21. Энергия самарадорлигини ошириш, энергия ресурсларини тежаш ва ундан оқилона фойдаланиш масалалари бўйича республика комиссияси ҳар чоракда энергия самарадорлигини ошириш ва энергия ресурсларидан оқилона фойдаланиш йўналишида амалга оширилаётган ишларнинг ҳолати ва натижадорлигини барча масъул идора ва муассасалар иштирокида танқидий муҳокама қилиб борсин ҳамда ушбу масалага масъулиятсизлик билан ёндашган раҳбарларга нисбатан лавозимидан озод этишгача бўлган чораларни кўрсин.
22. Ўзбекистон Республикаси Президентининг айрим ҳужжатларига 4-иловага мувофиқ ўзгартириш ва қўшимчалар киритилсин.
23. Фармоннинг ижросини самарали ташкил қилишга масъул ва шахсан жавобгар этиб Бош вазир ўринбосарлари А.Ж. Раматов ва Ж.А. Қўчқоров белгилансин.
24. Ушбу Фармон ижросини муҳокама қилиб бориш, ижро учун масъул ташкилотлар фаолиятини мувофиқлаштириш ва назорат қилиш Ўзбекистон Республикаси Бош вазири А.Н. Арипов ҳамда Ўзбекистон Республикаси Президенти Администрацияси департамент бошлиғи Д.Б. Кадиров зиммасига юклансин.
Ўзбекистон Республикаси Президенти Ш. МИРЗИЁЕВ
Тошкент ш.,
2026 йил 29 апрель,
ПФ-70-сон
Ўзбекистон Республикаси Президентининг 2026 йил 29 апрелдаги ПФ-70-сон Фармонига
1-ИЛОВА
2026 йилда электр энергияси ва табиий газни тежашнинг
МАҚСАДЛИ КЎРСАТКИЧЛАРИ

Т/р

Ҳудудлар номи

Электр энергиясини иқтисод қилиш

(млн кВт/соат)

Табиий газни иқтисод қилиш

(млн метр куб)

ЖАМИ

4 279,1

2 820,2

Якка тартибдаги ва кўп квартирали уйлар, ижтимоий соҳа объектлари ҳамда хўжалик юритувчи субъектларда энергия самарадорлигини ошириш ҳисобидан

1.

Қорақалпоғистон Республикаси

83,0

65,3

2.

Андижон вилояти

177,6

49,7

3.

Бухоро вилояти

133,0

63,0

4.

Жиззах вилояти

86,0

37,1

5.

Қашқадарё вилояти

248,5

37,8

6.

Навоий вилояти

150,8

31,1

7.

Наманган вилояти

172,4

55,8

8.

Самарқанд вилояти

260,0

71,8

9.

Сирдарё вилояти

74,0

26,0

10.

Сурхондарё вилояти

117,2

28,8

11.

Тошкент вилояти

279,1

164,4

12.

Фарғона вилояти

263,5

82,5

13.

Хоразм вилояти

124,0

57,4

14.

Тошкент шаҳри

465,0

161,7

Йирик тармоқ корхоналарида электр энергияси ва табиий газни тежаш тадбирларини амалга ошириш ҳисобидан

15.

25 та йирик тармоқ корхоналари

1 645,0

553,0

Йирик қуёш ва шамол электр станциялари ҳисобидан

16.

Йирик қуёш ва шамол электр станциялари

-

1 300,0

Оғир тоифадаги маҳаллаларда ўрнатиладиган кичик қувватли қуёш фотоэлектр станциялари ҳисобидан

17.

270 МВтлик кичик қувватли қуёш фотоэлектр станциялари

-

34,8

Ўзбекистон Республикаси Президентининг 2026 йил 29 апрелдаги ПФ-70-сон Фармонига
2-ИЛОВА
2026 йилда энергия самарадорлигини янада ошириш, энергия ресурсларини тежаш ва улардан оқилона фойдаланиш бўйича
«ЙЎЛ ХАРИТАСИ»

Т/р

Чора-тадбирлар номи

Амалга ошириш механизми

Бажариш муддати

Масъул ижрочилар

1.

Бюджет ташкилотлари ва бюджет маблағлари олувчиларнинг харажатлар сметасида 4-гуруҳ харажатларининг камида 5 фоизи ҳамда бюджетдан ташқари маблағларнинг камида 15 фоизини энергия самарадорлигини ошириш тадбирлари ва лойиҳалари учун режалаштириш.

1. Бюджет ташкилотлари ва бюджет маблағлари олувчиларнинг харажатлар сметасида тўртинчи гуруҳ харажатларининг камида 5 фоизи ҳамда бюджетдан ташқари маблағларнинг камида 15 фоизини энергия самарадорлигини ошириш тадбирлари ва лойиҳалари учун режалаштириш чораларини кўриш.

2. Режалаштирилган маблағлар ҳисобидан ушбу ташкилотларда энергия аудитини ўтказган ҳолда гелиоколлекторлар ўрнатиш, энергия истеъмоли юқори иситиш қозонларини янгилаш, қайта тикланувчи энергия манбалари қурилмалари билан жиҳозлаш ҳамда энергия ресурслари йўқотилишининг олдини олишга қаратилган таъмирлаш ишларини амалга ошириш.

2026 йил 1 майга қадар,

келгусида доимий

Иқтисодиёт ва молия вазирлиги

(Норқулов),

Қорақалпоғистон Республикаси Вазирлар Кенгаши, вилоятлар ва Тошкент шаҳри ҳокимликлари,

Энергия самарадорлиги миллий агентлиги

(Бадриддинов),

вазирлик ва идоралар

2.

Энергия самарадорлиги соҳасида рақамлаштиришни кенгайтириш.

1. Аҳолига Энергия самарадорлигини ошириш рақамли платформасидан фойдаланишда қулайлик яратиш мақсадида мобил илова (Android ва iOS тизимларида) яратиш.

2. Ситуацион марказни ташкил этиш ҳамда унда катта ҳажмдаги маълумотлар (Big Data), бизнес-таҳлил (Business Intellegence) ва сунъий интеллект технологиялари асосида:

2026 йил июль

Энергия самарадорлиги миллий агентлиги

(Бадриддинов),

Рақамли технологиялар вазирлиги

(Шерматов),

Иқтисодиёт ва молия вазирлиги

(Норқулов),

Қурилиш ва уй-жой коммунал хўжалиги вазирлиги

(Хидоятов)

аҳоли уй-жойлари, бино ва иншоотлар ҳамда иқтисодиёт тармоқларида объектлар кесимида энергия истеъмоли ҳолати, энергия самарадорлиги кўрсаткичлари, энергия аудити натижалари тўғрисидаги маълумотларни тўплашни йўлга қўйиш;

2026 йил сентябрь

маълумотларни таҳлил қилиш, энергия сарфи прогнозини шакллантириш, таҳлилларга асосланган дашбордлар яратиш ҳамда Платформада жойлаштирилган маълумотларни верификация қилиш жараёнларини автоматлаштириш.

2026 йил декабрь

3.

Бино ва иншоотларга энергия самарадорлиги бўйича тоифа бериш механизмини такомиллаштириш.

1. Бино ва иншоотларнинг энергия самарадорлигини ошириш бўйича хорижий тажрибани ўрганиш ҳамда Ўзбекистон шароитида қўллаш юзасидан таклифлар ишлаб чиқиш.

2026 йил июнь

Қурилиш ва уй-жой коммунал хўжалиги вазирлиги

(Хидоятов),

Энергия самарадорлиги миллий агентлиги

(Бадриддинов),

Ўзбекистон техник жиҳатдан тартибга солиш агентлиги

(Жуманазаров)

2. Бино ва иншоотларни энергия самарадорлиги бўйича тоифаларга ажратиш механизмини такомиллаштириш юзасидан норматив-ҳуқуқий ҳужжат лойиҳасини ишлаб чиқиш ва Вазирлар Маҳкамасига киритиш.

2026 йил сентябрь

3. Бино ва иншоотларда 1 метр квадрат майдонни иситиш, совитиш ва шамоллатиш учун сарфланадиган энергия ресурслари миқдорини камайтиришни назарда тутган ҳолда шаҳарсозлик норма ва қоидаларини такомиллаштириш.

2026 йил ноябрь

4.

Миллий қурилиш стандартларига бешта асосий халқаро сертификатлаш тизимлари (BREEAM, LEED, EDGE, WELL, Fitwell) талабларига мос «яшил» қурилиш меъёрларини интеграция қилиш.

1. Қурилиш меъёрлари ва қоидаларидаги турар ва нотурар жой биноларини янгидан қуриш, уларни реконструкция (модернизация) қилиш ва мукаммал таъмирлашда энергия самарадорлигини таъминлаш бўйича амалдаги талабларнинг халқаро талабларга мослигини таҳлил қилиш.

2026 йил июнь

Қурилиш ва уй-жой коммунал хўжалиги вазирлиги

(Хидоятов),

Энергия самарадорлиги миллий агентлиги

(Бадриддинов),

Ўзбекистон техник жиҳатдан тартибга солиш агентлиги

(Жуманазаров)

2. Миллий қурилиш стандартларига бешта асосий халқаро сертификатлаш тизимлари (BREEAM, LEED, EDGE, WELL, Fitwell) талабларига мос «яшил» қурилиш меъёрларини интеграция қилиш чораларини кўриш.

2026 йил сентябрь

5.

Мавжуд кўп квартирали уйлар, ижтимоий соҳа муассасалари ва бошқа маъмурий биноларни марказлашган иссиқлик таъминотига улаш ҳамда давлат-хусусий шериклик асосида янги марказлашган иситиш тизимларини ташкил этиш.

1. Марказлашган иссиқлик таъминотига улаш имконияти мавжуд бўлган кўп квартирали уйлар, ижтимоий соҳа муассасалари ва бошқа маъмурий биноларни хатловдан ўтказиш.

2026 йил июнь

Қурилиш ва уй-жой коммунал хўжалиги вазирлиги

(Хидоятов),

«Иссиқликтаъминоти» АЖ

(Тўраев),

Қорақалпоғистон Республикаси Вазирлар Кенгаши, вилоятлар ва Тошкент шаҳри ҳокимликлари

2. Хатлов натижаларига кўра истеъмолчиларни қўшимча қамраб олиш бўйича Вазирлар Маҳкамасига таклиф киритиш.

2026 йил июль

6.

Давлат ташкилотларидаги энергия менежерлари фаолиятини баҳолаш тизимини жорий қилиш.

1. Энергия менежерлари фаолияти самарадорлигини баҳолаш мезонларини ишлаб чиқиш.

2026 йил июль

Энергия самарадорлиги миллий агентлиги

(Бадриддинов),

Ўзэнергоинспекция

(Исакулов)

2. Энергия менежерлари фаолияти бўйича ҳисобот бериш тизимини жорий этиш.

2026 йил август

7.

Тунги ёритиш тизимларини энергия тежамкор муқобил ёритиш тизимларига ўтказиш, шу жумладан, ЭСКО механизмларини қўллаган ҳолда модернизация қилиш.

1. Тунги ёритиш тизимларининг энергия сарфини таҳлил қилиш ҳамда ресурсларни юқори тежаш имкониятларидан келиб чиқиб, тунги ёритиш тизимлари энергия самарадорлиги ошириладиган кўчаларнинг манзилли рўйхатини тасдиқлаш.

2. Тунги ёритиш тизимларини ЭСКО механизмларини қўллаган ҳолда энергия тежамкор муқобил ёритиш тизимларига ўтказиш ва модернизация қилиш.

Бунда электр таъминоти корхоналари томонидан янги қуриладиган йўллар (бундан тоифаланган объектлар ва марказий кўчалар мустасно) учун техник шартлар беришда тунги ёритиш тизимларини фақатгина энергия тежамкор муқобил ёритиш тизимлари асосида ташкил этишни кўзда тутиш.

2026 йилдан бошлаб Дастур асосида

Қорақалпоғистон Республикаси Вазирлар Кенгаши, вилоятлар ва Тошкент шаҳри ҳокимликлари,

Энергия самарадорлиги миллий агентлиги

(Бадриддинов),

Қурилиш ва уй-жой коммунал хўжалиги вазирлиги

(Хидоятов),

Автомобиль йўллари қўмитаси

(Турсунов),

Ўзэнергоинспекция

(Исакулов),

«Ҳудудий электр тармоқлари» АЖ

(Аскаров)

8.

Марказлашган иссиқлик таъминоти йўналишида энергия самарадорлигини ошириш, энергия тежовчи технологияларни ва ускуналарни кенг жорий қилиш.

1. Марказлашган иссиқлик таъминоти истеъмолчиларида ўрнатилган иссиқ сув ҳисоблагичлари реестрини шакллантириш.

2026 йил июль

Қурилиш ва уй-жой коммунал хўжалиги вазирлиги

(Хидоятов),

«Иссиқликтаъминоти» АЖ

(Тўраев)

Энергия самарадорлиги миллий агентлиги

(Бадриддинов),

Иқтисодиёт ва молия вазирлиги

(Норқулов)

2. Етказиб берилган иссиқлик энергиясини «smart» технологиялар асосида ҳисоблашни йўлга қўйиш юзасидан Вазирлар Маҳкамасига таклиф киритиш.

2026 йил июль

3. Ишлаб чиқариладиган иссиқлик энергиясидан оқилона ва самарали фойдаланиш мақсадида молиялаштириш манбаидан қатъи назар, барча иссиқлик тизимларини модернизация ва реконструкция қилиш лойиҳалари доирасида кўп квартирали уйларнинг ички иссиқлик тизимларини янгилаш, мавжуд бўлмаган объектларда қайта тикланишини таъминлаш.

Доимий

4. Янги қурилаётган ҳамда марказлашган иссиқлик таъминотига уланадиган кўп квартирали уйлар, ижтимоий соҳа муассасалари ва бошқа маъмурий биноларда иссиқлик энергияси истеъмоли ва сарфини назорат қилиш мақсадида иситиш ускуналарига термодатчиклар (ҳароратни назорат қилиш ва тартибга солиш қурилмалари) ўрнатилишини жорий этиш.

2027 йил июль

9.

Қишлоқ ва сув хўжалиги объектларида SCADA ва бошқа рақамли мониторинг ва бошқарув тизимларини жорий этиш орқали суғоришни автоматлаштириш, насос станцияларини назорат қилиш, сув етказиб беришни мониторинг қилиш ҳамда насос агрегатларининг энергия истеъмолини реал вақт режимида кузатиш имкониятини яратиш.

1. Қишлоқ ва сув хўжалиги объектларида SCADA ва бошқа рақамли мониторинг ва бошқарув тизимларини жорий этиш бўйича хорижий тажрибани ўрганиш.

2026 йил июнь

Қишлоқ хўжалиги вазирлиги

(Абдураҳмонов),

Сув хўжалиги вазирлиги

(Хамраев),

Иқтисодиёт ва молия вазирлиги

(Норқулов),

Энергетика вазирлиги

(Мирзамаҳмудов),

«Ўзэнергосотиш» АЖ

(Обиджонов),

Ўзэнергоинспекция

(Исакулов)

2. Барча қишлоқ ва сув хўжалиги объектларини ўрганиб чиқиб, биринчи навбатда, энергия истеъмоли юқори бўлган объектларни танлаб олиш.

2026 йил июль

3. Танлаб олинган объектларда SCADA ва бошқа рақамли мониторинг ва бошқарув тизимларини жорий этиш бўйича хорижий ҳамкорларни жалб этиш ва музокаралар ўтказиш.

2026 йил август

4. Музокаралар натижасига кўра лойиҳаларни молиялаштириш ва амалга ошириш бўйича чора-тадбирларни ишлаб чиқиш.

2026 йил октябрь

10.

Марказлашган ичимлик суви ва оқова сув ҳамда иссиқлик таъминотида энергия самарадор қурилмаларни қўллаш ва йўқотишларни камайтириш.

Реконструкция ва модернизация қилиш ишлари ҳажмини белгилашни фақатгина энергия аудити хулосасига кўра аниқлаш тизимини йўлга қўйиш, янги қурилиш, реконструкция ва модернизация қилиш лойиҳаларини қатъиян энергия самарадор технологияларга асосланган ҳолда электрон моделлаштириш асосида амалга ошириш.

2026 йилдан бошлаб доимий

Қурилиш ва уй-жой коммунал хўжалиги вазирлиги

(Хидоятов),

«Ўзсувтаъминот» АЖ

(Суванкулов),

«Иссиқликтаъминоти» АЖ

(Тўраев),

Энергия самарадорлиги миллий агентлиги

(Бадриддинов)

11.

Қурилиш материалларини халқаро стандартлар асосида энергия самарадорлиги бўйича тоифалаш ва миллий стандартларни қабул қилиш.

1. Қурилиш материалларини энергия самарадорлиги бўйича тоифалаш тизими юзасидан илғор хорижий тажриба ва стандартларни ўрганиш.

2026 йил июнь

«Ўзсаноатқурилишматериаллари» уюшмаси

(Рахимов),

Ўзбекистон техник жиҳатдан тартибга солиш агентлиги

(Жуманазаров),

Қурилиш ва уй-жой коммунал хўжалиги вазирлиги

(Хидоятов),

Энергия самарадорлиги миллий агентлиги

(Бадриддинов),

Иқтисодиёт ва молия вазирлиги

(Норқулов)

2. Ўрганишлар асосида қурилиш материалларининг энергия самарадорлигини баҳолаш, тоифасини белгилаш ва сертификатлаш учун техник регламентларни ишлаб чиқиш. Ушбу йўналиш бўйича ISO, EN ва бошқа нуфузли халқаро ташкилотларнинг стандартларини миллий тизимга мослаштириш ҳамда жорий этиш.

2026 йил июль

3. Қурилиш материаллари (термоизоляция, панель, блок, ойна, ғишт, эшик, деразалар ва бошқалар) учун энергия самарадорлиги бўйича минимал талабларни белгилаш.

2026 йил август

4. Қурилиш материаллари учун энергия самарадорлиги тоифасини белгиловчи ихтиёрий сертификатлаш тизимини йўлга қўйиш.

2026 йил сентябрь

12.

Синов лабораторияларида ўтказиладиган энергия самарадорлиги бўйича синовлардаги ўлчовлар ишончлилигини таъминлаш учун қўлланаётган эталонлар ва юқори аниқликдаги ўлчаш воситаларининг метрологик кузатилувчанлигини таъминлаш.

1. Фаолият юритаётган синов лабораторияларини ҳамда уларда фойдаланилаётган эталонлар ва юқори аниқликдаги ўлчаш воситаларини хатловдан ўтказиш.

2. Қиёслашдан ўтказилиши лозим бўлган ўлчаш воситалари туркумларининг рўйхатига асосан (10.02.2025 й., рўйхат рақами 3606) энергия самарадорлигини ўлчаш бўйича лабораторияларда қўлланаётган эталонлар ва юқори аниқликдаги ўлчаш воситаларини мунтазам равишда белгиланган тартибда метрологик текширувдан ўтказиш.

Доимий

Қурилиш ва уй-жой коммунал хўжалиги вазирлиги

(Хидоятов),

Ўзбекистон техник жиҳатдан тартибга солиш агентлиги

(Жуманазаров),

Энергия самарадорлиги миллий агентлиги

(Бадриддинов),

Иқтисодиёт ва молия вазирлиги

(Норқулов)

13.

Республиканинг ҳар бир ҳудудида энергия аудиторларини қайта тайёрлаш бўйича ўқув курсларини ташкил этиш.

1. Ҳудудлардаги муҳандислик-техника йўналишидаги олий таълим ташкилотларида энергия аудиторларини қайта тайёрлаш бўйича ўқув курсларини ташкил этиш.

2026 йил июль

Энергия самарадорлиги миллий агентлиги

(Бадриддинов),

Олий таълим, фан ва инновациялар вазирлиги

(Шарипов),

Ўзэнергоинспекция

(Исакулов),

Камбағалликни қисқартириш ва бандлик вазирлиги

(Захидов)

2. Энергия аудиторларини тайёрлаш бўйича ўқув курсларини ташкил этишда масофавий ўқиш ва имтиҳон топшириш имконини берувчи электрон модуллар яратиш.

2026 йил декабрь

14.

«Ноль энергия сарфли бинолар» (Zero Energy Buildings) концепцияси асосида тажриба лойиҳаларини оммалаштириш чораларини кўриш.

1. «Ноль энергия сарфли бинолар» (Zero Energy Building) концепциясини жорий этиш юзасидан хорижий тажрибани ўрганиш.

2026 йил июль

Энергия самарадорлиги миллий агентлиги

(Бадриддинов),

Қурилиш ва уй-жой коммунал хўжалиги вазирлиги

(Хидоятов),

Иқтисодиёт ва молия вазирлиги

(Норқулов)

2. «Ноль энергия сарфли бинолар» (Zero Energy Building) концепцияси асосида лойиҳаларни амалга ошириш мақсадида тегишли сертификатлар тақдим этиш бўйича норматив-ҳуқуқий ҳужжат лойиҳасини ишлаб чиқиш ва Вазирлар Маҳкамасига киритиш.

2026 йил август

3. Глобал экологик жамғарма (GEF), Яшил иқлим жамғармаси (GCF), Халқаро қайта тикланувчи энергия агентлиги (IRENA), Жаҳон банки ва бошқа халқаро молия институтлари билан «Ноль энергия сарфли бинолар» концепцияси асосидаги тажриба лойиҳаларини амалга ошириш учун грант маблағларини жалб қилиш бўйича музокаралар ўтказиш.

2026 йил сентябрь

15.

«Оқ сертификатлар» тизимини жорий этиш.

1. «Оқ сертификатлар» тизимини жорий этиш бўйича илғор хорижий тажрибани Ўзбекистонда қўллаш имкониятларини халқаро консультантларни жалб қилган ҳолда ўрганиш.

2026 йил август

Энергия самарадорлиги миллий агентлиги

(Бадриддинов),

Иқтисодиёт ва молия вазирлиги

(Норқулов)

2. «Оқ сертификатлар» тизимини жорий этиш, тизимнинг самарали ишлаши учун тегишли механизмлар, қоидалар ва мажбуриятларни назарда тутувчи норматив-ҳуқуқий ҳужжат лойиҳасини тайёрлаш ҳамда Вазирлар Маҳкамасига киритиш.

2026 йил декабрь

16.

Халқаро молия институтларидан ЭСКО компанияларига узоқ муддатли имтиёзли кредит линияларини жалб этиш.

1. ЭСКО компаниялари учун узоқ муддатли имтиёзли кредит линиялари маблағларини жалб этиш юзасидан халқаро молия институтлари билан музокаралар ўтказиш.

2026 йил сентябрь

Иқтисодиёт ва молия вазирлиги

(Норқулов),

Инвестициялар, саноат ва савдо вазирлиги

(Кудратов),

Энергия самарадорлиги миллий агентлиги

(Бадриддинов)

2. Музокаралар натижасига кўра паст фоизли кредит линияларини жалб қилиш ва ушбу кредитларни маҳаллий ЭСКО компанияларига ажратиш чораларини кўриш.

2026 йил октябрь

3. Халқаро ташкилотлар (WB, ADB, EBRD, UNDP, GIZ) билан институционал ҳамкорликни янада кенгайтириш, ЭСКО лойиҳаларини молиялаштириш учун узоқ муддатли имтиёзли кредит линияларини жалб қилиш, EPC (Energy Performance Contracting) механизмларини халқаро тажриба асосида стандартлаш ва миллий ЭСКО бозори учун MRV (Measurement, Reporting, Verification) талабларини жорий этиш.

2026 йил декабрь

17.

ЭСКО механизмлари асосида энергия самарадорлигини ошириш тизимини жорий этиш.

1. Энергия самарадорлигини ошириш ва энергия ресурсларини тежаш бўйича ЭСКО механизмларини, биринчи навбатда, давлат муассасаларида жорий қилиш бўйича таклифлар ишлаб чиқиш.

2026 йил август

Энергия самарадорлиги миллий агентлиги

(Бадриддинов),

Иқтисодиёт ва молия вазирлиги

(Норқулов),

Қорақалпоғистон Республикаси Вазирлар Кенгаши, вилоятлар ва Тошкент шаҳри ҳокимликлари

2. Давлат муассасалари раҳбарлари ва масъул ходимлари учун хорижий тажриба асосида ЭСКО механизмлари бўйича ўқув курсларини жорий қилиш.

2026 йил декабрь

18.

Энергия ресурслари тежалиши кўрсаткичларини ҳисоблаш ва бир бирлик маҳсулот ишлаб чиқаришга энергия ресурси сарфини меъёрлаш механизмларини такомиллаштириш.

1. Энергия ресурслари тежалиши кўрсаткичларини ҳисоблаш ва бир бирлик маҳсулот ишлаб чиқаришга энергия ресурси сарфини меъёрлаш бўйича хорижий тажрибани ўрганиш.

2. Бинолар ва иқтисодиёт тармоқларида энергия ресурслари тежалиши кўрсаткичларини ҳисоблаш методологияси ҳамда йирик корхоналарда бир бирлик маҳсулот ишлаб чиқаришга энергия ресурси сарфини меъёрлаш тартибини ишлаб чиқиб, Вазирлар Маҳкамасига киритиш.

2026 йил сентябрь

Энергия самарадорлиги миллий агентлиги

(Бадриддинов),

Миллий статистика қўмитаси

(Ҳамраев),

Ўзэнергоинспекция

(Исакулов),

Иқтисодиёт ва молия вазирлиги

(Норқулов),

Қурилиш ва уй-жой коммунал хўжалиги вазирлиги

(Хидоятов)

19.

Мажбурий энергия аудитдан ўтказиш тизимини такомиллаштириш.

Мажбурий энергия аудитдан ўтказиш тизимини такомиллаштириш юзасидан норматив-ҳуқуқий ҳужжат лойиҳасини ишлаб чиқиш ва Вазирлар Маҳкамасига киритиш. Бунда:

Давлат энергетика реестрига субъектларни киритишнинг мезонларини қайта кўриб чиқиш;

Давлат энергетика реестрини янгиланган мезонлар ва риск-таҳлиллар асосида шакллантириш ҳамда жараённи рақамлаштириш;

энергия аудит натижадорлигини таъминлашга қаратилган чоралар белгилаш;

энергия аудит натижасида тавсия этилган чора-тадбирлар ижросини қатъийлаштириш ва доимий мониторинг қилиб бориш тартибини жорий этиш.

2026 йил сентябрь

Энергия самарадорлиги миллий агентлиги

(Бадриддинов),

Ўзэнергоинспекция

(Исакулов),

Иқтисодиёт ва молия вазирлиги

(Норқулов),

Энергетика вазирлиги

(Мирзамаҳмудов)

20.

Якка тартибдаги ва кўп квартирали уйлар, нотурар бинолар ҳамда ижтимоий соҳа объектлари учун энергия самарадорлиги бўйича эталон кўрсаткичларни (Benchmark) жорий қилиш.

Қуйидагиларни назарда тутувчи норматив-ҳуқуқий ҳужжат лойиҳасини ишлаб чиқиш ва Вазирлар Маҳкамасига киритиш:

якка тартибдаги ва кўп квартирали уйлар, нотурар бинолар ҳамда ижтимоий соҳа объектлари учун энергия самарадорлиги бўйича эталон кўрсаткичларни (Benchmark) жорий қилиш;

энергия ресурслари истеъмоли ҳажмидан келиб чиқиб, якка тартибдаги ва кўп квартирали уйлар, нотурар бинолар ҳамда ижтимоий соҳа объектлари кесимида уларнинг энергия самарадорлиги рейтингини шакллантириш;

энергия самарадорлиги ошиб бораётган объектлар учун рағбатлантириш чораларини белгилаш;

энергия ресурслари истеъмоли асоссиз равишда ошиб бораётган объектларни энергия аудитдан ўтказиш ҳамда истеъмолни камайтириш юзасидан аниқ чоралар белгилаш.

2026 йил август

Энергия самарадорлиги миллий агентлиги

(Бадриддинов),

Қурилиш ва уй-жой коммунал хўжалиги вазирлиги

(Хидоятов),

Ўзэнергоинспекция

(Исакулов),

Иқтисодиёт ва молия вазирлиги

(Норқулов)

21.

«Энергияни тежаш, ундан оқилона фойдаланиш ва энергия самарадорлигини ошириш тўғрисида»ги Қонунни янги таҳрирда ишлаб чиқиш.

«Энергияни тежаш, ундан оқилона фойдаланиш ва энергия самарадорлигини ошириш тўғрисида»ги Қонунни қуйидагиларни назарда тутган ҳолда янги таҳрирда ишлаб чиқиш ва Вазирлар Маҳкамасига киритиш:

энергия самарадорлиги соҳасида расмий статистикани шакллантириш механизмларини такомиллаштириш ва макроиқтисодий индикаторларни жорий қилиш;

«энергия самарадорлиги» ва «энергияни тежаш» тушунчаларини илғор хорижий тажрибадан келиб чиқиб, қайта кўриб чиқиш ҳамда соҳада тартибга солиш мезонлари таъсирчанлигини ошириш;

энергия аудитидан ўтказиш тартиблари ва ҳисоботларни аниқ мақсадларга йўналтириш механизмларини такомиллаштириш;

энергия сервис хизматларини кўрсатиш орқали даромад олишнинг ҳуқуқий асослари ва кафолатларини кучайтириш ҳамда механизмларини такомиллаштириш;

энергия менежменти тизими билан қамраб олинадиган соҳаларни кенгайтириш.

2026 йил декабрь

Энергия самарадорлиги миллий агентлиги

(Бадриддинов),

Иқтисодиёт ва молия вазирлиги

(Норқулов),

Қурилиш ва уй-жой коммунал хўжалиги вазирлиги

(Хидоятов),

Энергетика вазирлиги

(Мирзамаҳмудов),

Ўзэнергоинспекция

(Исакулов)

22.

Ўзбекистонда 2035 йилгача энергия самарадорлигини ошириш стратегияси лойиҳасини ишлаб чиқиш.

1. Ўзбекистонда 2035 йилгача энергия самарадорлигини ошириш стратегияси лойиҳасини тайёрлаш.

2. Стратегия лойиҳасини халқаро ва маҳаллий консультант, экспертлар билан муҳокама қилиш ва уни такомиллаштириш.

3. Стратегияни тасдиқлаш юзасидан қарор лойиҳасини ишлаб чиқиб, Вазирлар Маҳкамасига киритиш.

2026 йил декабрь

Энергия самарадорлиги миллий агентлиги

(Бадриддинов),

Иқтисодиёт ва молия вазирлиги

(Норқулов),

Қурилиш ва уй-жой коммунал хўжалиги вазирлиги

(Хидоятов),

Энергетика вазирлиги

(Мирзамаҳмудов),

Ўзэнергоинспекция

(Исакулов)

Ўзбекистон Республикаси Президентининг 2026 йил 29 апрелдаги ПФ-70-сон Фармонига
3-ИЛОВА
Энергия самарадорлигини ошириш рақамли платформасига интеграция қилинадиган давлат органлари ва ташкилотларининг маълумотлар базалари ва ахборот тизимлари
РЎЙХАТИ

Т/р

Ахборотлар номи

Маълумотлар тақдим этадиган ташкилотлар

1.

Энергия самарадорлиги соҳасида ажратилган субсидиялар тўғрисида маълумотлар

Иқтисодиёт ва молия вазирлиги

2.

«Шаффоф қурилиш» миллий ахборот тизими маълумотлари

Қурилиш ва уй-жой коммунал хўжалиги вазирлиги

Бинолар энергия самарадорлигини ҳисоблаш бўйича электрон тизим маълумотлари

3.

Сув хўжалиги тизимидаги сув насосларининг электр энергияси истеъмоли ва сув сарфи тўғрисида маълумотлар

Сув хўжалиги вазирлиги

4.

Қишлоқ хўжалиги тизимидаги сув насосларининг электр энергияси истеъмоли ва сув сарфи тўғрисида маълумотлар

Қишлоқ хўжалиги вазирлиги

5.

Корхона ва ташкилотларнинг ягона давлат регистри маълумотлари

Миллий статистика қўмитаси

Энергия самарадорлиги соҳасидаги статистика маълумотлари

6.

Қуёш фотоэлектр станцияси ўрнатганлик учун тақдим этилган имтиёзлар тўғрисида маълумотлар

Солиқ қўмитаси

«Электрон давлат хизматлари — my.soliq.uz» портали «Қуёшли хонадон» хизмати маълумотлари

7.

Кўчмас мулк объектларига бўлган ҳуқуқларнинг давлат реестри маълумотлари

Кадастр агентлиги

Кўчмас мулк объектлари манзиллари реестри маълумотлари

Оммавий геопортал маълумотлари

Географик объектлар номларининг давлат реестри маълумотлари

8.

Давлат иштирокидаги корхоналар тўғрисида маълумотлар

Давлат активларини бошқариш агентлиги

9.

«Техник тартибга солиш» миллий ахборот тизими маълумотлари

Ўзбекистон техник жиҳатдан тартибга солиш агентлиги

10.

Метеорологик кузатувлар ягона тизими маълумотлари

Гидрометеорология хизмати агентлиги

11.

«Энергоназорат» платформаси маълумотлари

Электр энергияси, нефть маҳсулотлари ва газдан фойдаланишни назорат қилиш инспекцияси

12.

Истеъмолчиларнинг электр энергияси истеъмоли ва ҳисоб-китоблар ҳолати тўғрисида маълумотлар

«Ҳудудий электр тармоқлари» АЖ,

«Ўзэнергосотиш» АЖ

13.

Истеъмолчиларнинг табиий газ истеъмоли ва ҳисоб-китоблар ҳолати тўғрисида маълумотлар

«Ҳудудгазтаъминот» АЖ,

«Ўзтрансгаз» АЖ,

«Ўзгазтрейд» АЖ

14.

Истеъмолчиларнинг ичимлик суви истеъмоли ва ҳисоб-китоблар ҳолати тўғрисида маълумотлар

«Ўзсувтаъминот» АЖ

Ичимлик суви таъминоти тизимидаги сув насосларининг электр энергияси истеъмоли тўғрисида маълумотлар

15.

Истеъмолчиларнинг иссиқлик таъминоти ва ҳисоб-китоблар ҳолати тўғрисида маълумотлар

«Иссиқликтаъминоти» АЖ,

«Veolia Energy Tashkent» МЧЖ ХК

Ўзбекистон Республикаси Президентининг 2026 йил 29 апрелдаги ПФ-70-сон Фармонига
4-ИЛОВА
Ўзбекистон Республикаси Президентининг айрим ҳужжатларига киритилаётган ўзгартириш ва қўшимчалар
1. Ўзбекистон Республикаси Президентининг 2023 йил 25 январдаги ПФ-14-сон Фармони билан тасдиқланган Республика ижро этувчи ҳокимият органлари — вазирликлар, қўмиталар, агентликлар ва инспекциялар ҳамда улар ҳудудий ва туман (шаҳар) бўлинмаларининг жами бошқарув ходимларининг умумий чекланган сонининг «35. Вазирлар Маҳкамаси ҳузуридаги Энергия самарадорлиги миллий агентлиги» бўлими «Жами бошқарув штат бирликлари сони» ва «Давлат бюджети ҳисобидан» устунларидаги «36» рақами «78» рақами билан алмаштирилсин.
2. Ўзбекистон Республикаси Президентининг 2024 йил 23 августдаги «Ёқилғи-энергетика тармоғида давлат назорати тизимини такомиллаштириш чора-тадбирлари тўғрисида»ги ПФ-118-сон Фармонида:
биринчи хатбоши қуйидаги таҳрирда баён этилсин:
«5. Энергия самарадорлигини ошириш, энергия ресурсларини тежаш ва улардан оқилона фойдаланиш масалалари бўйича республика комиссияси таркиби 2-иловага мувофиқ тасдиқлансин»;
иккинчи хатбоши чиқариб ташлансин;
(б) 2-илова қуйидаги таҳрирда баён этилсин:
«Ўзбекистон Республикаси Президентининг 2024 йил 23 августдаги ПФ-118-сон Фармонига
2-ИЛОВА
Энергия самарадорлигини ошириш, энергия ресурсларини тежаш ва улардан оқилона фойдаланиш масалалари бўйича республика комиссияси
ТАРКИБИ

А.Н. Арипов

—

Ўзбекистон Республикаси Бош вазири, Республика комиссияси раиси

А.Ж. Раматов

—

Ўзбекистон Республикаси Бош вазирининг ўринбосари

Ж.А. Қўчқоров

—

Ўзбекистон Республикаси Бош вазирининг ўринбосари

С.И. Самадов

—

Ўзбекистон Республикаси Бош прокурори ўринбосари

И.И. Норқулов

—

Ўзбекистон Республикаси иқтисодиёт ва молия вазирининг биринчи ўринбосари

Б.Э. Захидов

—

Ўзбекистон Республикаси камбағалликни қисқартириш ва бандлик вазири

И.Ю. Абдураҳмонов

—

Ўзбекистон Республикаси қишлоқ хўжалиги вазири

Ш.Р. Хамраев

—

Ўзбекистон Республикаси сув хўжалиги вазири

Ш.С. Хидоятов

—

Ўзбекистон Республикаси қурилиш ва уй-жой коммунал хўжалиги вазири

И.Р. Махкамов

—

Ўзбекистон Республикаси транспорт вазири

Ж.Т. Мирзамаҳмудов

—

Ўзбекистон Республикаси энергетика вазири

Б.Ф. Исламов

—

Ўзбекистон Республикаси тоғ-кон саноати ва геология вазири

Ш.Х. Шерматов

—

Ўзбекистон Республикаси рақамли технологиялар вазири

А.А. Худаяров

—

Ўзбекистон Республикаси соғлиқни сақлаш вазири

Э.Г. Каримова

—

Ўзбекистон Республикаси мактабгача ва мактаб таълими вазири

К.А. Шарипов

—

Ўзбекистон Республикаси олий таълим, фан ва инновациялар вазири

А.И. Икрамов

—

Ўзбекистон Республикаси спорт вазири

О.А. Назарбеков

—

Ўзбекистон Республикаси маданият вазири

А.Р. Жуманазаров

—

Ўзбекистон техник жиҳатдан тартибга солиш агентлиги директори

Ш.Х. Ходжаев

—

Энергетика бозорини ривожлантириш ва тартибга солиш агентлиги директори

Д.А. Исакулов

—

Электр энергияси, нефть маҳсулотлари ва газдан фойдаланишни назорат қилиш инспекцияси бошлиғи

Ф.Ж. Пулатов

—

Солиқ қўмитаси раиси

З.Б. Бадриддинов

—

Энергия самарадорлиги миллий агентлиги директори

С.Қ. Эшқувватов

—

Қурилиш ва уй-жой коммунал хўжалиги соҳасида назорат қилиш инспекцияси бошлиғи

Ў.Б. Сувонқулов

—

Энергия самарадорлиги миллий агентлиги директори ўринбосари, Республика комиссияси котиби

Изоҳ: Республика комиссияси аъзолари бошқа ишга ўтган тақдирда, унинг таркибига ушбу лавозимларга янги тайинланган ёки зиммасига тегишли функцияларни бажариш юкланган шахслар киритилади».
3. Ўзбекистон Республикаси Президентининг 2025 йил 27 мартдаги «Энергия самарадорлигини ошириш соҳасида давлат бошқарувини такомиллаштириш ва энергия сервис компаниялари хизматлари бозорини ривожлантириш чора-тадбирлари тўғрисида»ги ПФ-63-сон Фармонининг 13-банди қуйидаги таҳрирда баён этилсин:
«13. Агентлик бошқарув ходимларининг чекланган штатлари сони 78 та этиб белгилансин.
Бунда Агентликнинг ҳудудларга масъул бўлган ходимлари ўз фаолиятини тизимли равишда ҳудудларда амалга оширади ҳамда уларнинг фаолиятини самарали ташкил қилиш ва зарур шароитлар (алоҳида хона, офис жиҳозлари, компьютер, принтер ва алоқа жамламалари, мебель ва бошқа зарур жиҳоз ва ускуналар) билан таъминлаш Қорақалпоғистон Республикаси Вазирлар Кенгаши Раиси, вилоятлар ва Тошкент шаҳри ҳокимларининг биринчи ўринбосарлари зиммасига юкланади».
4. Ўзбекистон Республикаси Президентининг 2019 йил 22 августдаги «Иқтисодиёт тармоқлари ва ижтимоий соҳанинг энергия самарадорлигини ошириш, энергия тежовчи технологияларни жорий этиш ва қайта тикланувчи энергия манбаларини ривожлантиришнинг тезкор чора-тадбирлари тўғрисида»ги ПҚ-4422-сон қарорида:
биринчи — учинчи хатбошилар чиқариб ташлансин;
тўртинчи — ўнинчи хатбошилар тегишинча биринчи — еттинчи хатбошилар деб ҳисоблансин;
(б) 5 ва 6-иловалар ўз кучини йўқотган деб ҳисоблансин.
5. Ўзбекистон Республикаси Президентининг 2025 йил 1 апрелдаги «Ёқилғи-энергия ресурсларидан ноқонуний фойдаланиш ва беҳуда сарфланишининг олдини олиш ҳамда энергия самарадорлигини ошириш бўйича чора-тадбирларни такомиллаштириш тўғрисида»ги ПҚ-133-сон қарорида:
(а) 2-банддаги «энергия балансини ишлаб чиқиш, уларнинг кўрсаткичларини бажариш, энергияни» сўзлари «ёқилғи-энергия ресурсларини» сўзлари билан алмаштирилсин;
(б) 3-банднинг «д» кичик банди ўз кучини йўқотган деб ҳисоблансин;
рус тилидаги матннинг биринчи хатбошиси қуйидаги таҳрирда баён этилсин:
«5. Возложить персональную ответственность и предупредить о принятии строгих мер в данном направлении»;
«ж» кичик банд қуйидаги таҳрирда баён этилсин:
«(ж) энергетика вазирига — иқтисодиёт тармоқлари ва аҳоли хонадонларини ёқилғи-энергия ресурслари билан барқарор таъминлаш бўйича»;
қуйидаги мазмундаги «з» ва «и» кичик бандлар билан тўлдирилсин:
«(з) олий таълим, фан ва инновациялар вазирига — энергия самарадорлигини ошириш йўналишида олий таълим ташкилотларини жалб қилган ҳолда, илмий-техник ўрганишларни ташкил этиш ва натижаларини амалиётга жорий этиш юзасидан илмий асосланган таклифлар киритиш бўйича;
(и) Энергия самарадорлиги миллий агентлиги директорига — энергия самарадорлигини ошириш бўйича ҳар йили тасдиқланадиган мақсадли кўрсаткичлар бажарилиши юзасидан мониторинг ўрнатиш ва амалга оширилган ишлар юзасидан Вазирлар Маҳкамасига таҳлилий маълумотлар киритиб бориш бўйича шахсий жавобгарлик юклатилсин ҳамда бу борада қатъий чоралар кўрилиши тўғрисида огоҳлантирилсин»;
«а» кичик бандда «Ш.А. Аминов» сўзлари «С.И. Самадов» сўзлари билан алмаштирилсин;
«б», «в» ва «г» кичик бандлар ўз кучини йўқотган деб ҳисоблансин;
(д) 1-илованинг номланишидаги «энергия балансини ишлаб чиқиш, уларнинг кўрсаткичларини бажариш, энергияни» сўзлари «ёқилғи-энергия ресурсларини» сўзлари билан алмаштирилсин;
номланишидаги «энергия балансини ишлаб чиқиш, уларнинг кўрсаткичларини бажариш, энергияни» сўзлари «ёқилғи-энергия ресурсларини» сўзлари билан алмаштирилсин;
1 ва 2-бандлар ўз кучини йўқотган деб ҳисоблансин;
(з) 6-илова ўз кучини йўқотган деб ҳисоблансин.
(Қонунчилик маълумотлари миллий базаси, 30.04.2026 й., 06/26/70/0430-сон)