Ўзбекистон Республикаси Президентининг

қарори

Қишлоқ хўжалиги майдонларидаги қўшимча имкониятлардан фойдаланган ҳолда маҳсулот етиштиришни кўпайтиришга доир чора-тадбирлар тўғрисида

Қишлоқ хўжалигига мўлжалланган ер участкаларининг дала четлари ҳамда каналлар, суғориш ва коллектор-дренаж тармоқлари атрофидаги майдонларда, соҳилбўйи минтақалари бундан мустасно, (кейинги ўринларда — дала четлари) ҳамда аҳоли томорқаси, хонадонлар ва кўп қаватли уйлар олди, маҳалланинг ички кўчаларида қишлоқ хўжалиги маҳсулотлари етиштирилишини самарали ташкил қилиш ва кўпайтириш орқали мамлакатнинг экспорт кўрсаткичларини ошириш мақсадида:

1. Белгилансинки, дала четлари ҳамда аҳоли томорқаси, хонадонлар ва кўп қаватли уйлар олди, маҳалланинг ички кўчаларида қишлоқ хўжалиги маҳсулотлари етиштириш тизимини такомиллаштириш бўйича қуйидаги янги тартиб жорий этилади:

а) қишлоқ хўжалиги маҳсулотлари етиштиришни ташкил қилиш бўйича:

Ўсимликлар карантини ва ҳимояси агентлигига (кейинги ўринларда — Агентлик) дала четларида ҳамда аҳоли томорқаси, хонадонлар ва кўп қаватли уйлар олди, маҳалланинг ички кўчаларида маҳсулот етиштириш, қишлоқ хўжалиги субъектларига уруғ ва кўчатлар етказиб бериш ҳамда етиштирилган маҳсулотларни экспортга йўналтиришни ташкил қилиш вазифаси юклатилади;

Агентлик йил давомида даромадли экинлар экиш ва уларни экспорт қилиш учун мева-сабзавот маҳсулотларини экспорт қилувчи тадбиркорларнинг талабларини ўрганади;

Сув хўжалиги вазирлиги тегишли дала четларида сув таъминоти мавжудлиги ва ушбу ерларга экин экилиши ирригация ва мелиорация тадбирлари амалга оширилишига тўсқинлик қилмаслиги юзасидан, Агросаноатни ривожлантириш агентлиги эса тупроқ-иқлим шароитидан келиб чиқиб, мева ва узум навлари юзасидан хулосаларни Агентликка тақдим этади;

Агентлик ҳар йили 1 январга қадар талабни ҳисобга олган ҳолда, шунингдек, ҳар бир туман ва маҳалланинг иқлим шароитидан, бу ердаги аҳолининг тажрибасидан келиб чиқиб, экин турлари бўйича Қорақалпоғистон Республикаси Вазирлар Кенгаши, вилоятлар ва Тошкент шаҳри ҳокимликларига таклиф беради;

ўсимликлар карантини ва ҳимояси давлат инспекторлари ҳар бир қишлоқ хўжалиги маҳсулотлари етиштирувчиларига алоҳида бириктирилади;

қишлоқ хўжалиги маҳсулотлари етиштирувчиларига дала четларини иккиламчи ижарага беришни ташкил қилиш учун дала четларига доир маълумотлар (жумладан, мулкчилик шакли, сув таъминотига оид) Агентлик томонидан «Agrokoʻmakchi» мобиль дастурида кенг жамоатчиликка эълон қилиб борилади;

Қорақалпоғистон Республикаси Вазирлар Кенгаши, вилоятлар ва Тошкент шаҳри ҳокимликлари томонидан ҳар йили 1 февралга қадар тегишли йил ҳосили учун дала четларида экин экиш ишларини ташкил этиш ва етиштириладиган маҳсулотнинг прогноз кўрсаткичлари бўйича тегишли қарорлар қабул қилинади;

Агентлик ҳар йили 15 февралга қадар ҳар бир контурга уруғ, кўчат тарқатадиган ва маҳсулотни сотиб оладиган тадбиркорларни аниқлаб, қишлоқ хўжалиги маҳсулотлари етиштирувчиларга боғлаб беради;

б) дала четларидан самарали фойдаланган қишлоқ хўжалиги маҳсулотлари етиштирувчиларни қўллаб-қувватлаш бўйича:

ички фитосанитария сертификати бир йил давомида бепул берилади;

дала четларига экилган «in-vitro» усулида яратилган мевали пайвандтагли кўчатларни сотиб олиш харажатларининг 50 фоизи миқдорида, бироқ ҳар бир мевали пайвандтагли кўчатга 25 минг сўмдан ошмаган ҳолда Агросаноатни ривожлантириш ва қўллаб-қувватлаш давлат мақсадли жамғармасидан белгиланган тартибда субсидия ажратилади.

2. Агросаноатни ривожлантириш агентлиги Агросаноатни ривожлантириш ва қўллаб-қувватлаш давлат мақсадли жамғармасидан маблағларни тижорат банкларининг буюртманомаларига асосан Марказий банкнинг асосий ставкасида тижорат банкларига ресурс сифатида йўналтирсин. Бунда Агросаноатни ривожлантириш агентлигининг тавсиясига кўра:

қишлоқ хўжалиги маҳсулотлари етиштирувчилари дала четини ўзлаштириш ва маҳсулот етиштириш учун зарур бўлган уруғ, кўчатлар, минерал ўғитлар, кимёвий препаратлар, моддий-техник ресурслар билан таъминланади;

сув билан таъминлаш учун насос ва қувурларни ўрнатиш харажатларининг 50 фоиздан кўп бўлмаган қисмини қарз олувчининг банк карталарига ўтказиш йўли билан 6 ойгача имтиёзли давр билан 12 ой муддатга йиллик Марказий банкнинг асосий ставкасидан 4 фоизлик пункт юқори ставкада кредитлар ажратилади.

Мазкур ресурслар Ўзбекистон Республикаси Президентининг 2024 йил 30 сентябрдаги ПҚ-344-сон қарорига асосан Агросаноатни ривожлантириш ва қўллаб-қувватлаш давлат мақсадли жамғармасига Давлат бюджетидан ажратиладиган ссуда маблағлари ҳисобидан йўналтирилади.

3. Ўзбекистон Республикаси Президентининг 2023 йил 12 апрелдаги «Қишлоқ хўжалиги корхоналари дала четларидаги ер майдонларида маҳсулот етиштириш тизимини такомиллаштириш чора-тадбирлари тўғрисида»ги ПҚ-121-сон қарорига мувофиқ:

а) Ўзбекистон фермер, деҳқон хўжаликлари ва томорқа ер эгалари кенгаши (А. Хаитов) қуритиш цехи ва совиткичли омборхоналарни харид қилишга Фермер, деҳқон хўжаликлари ва томорқа ер эгаларини қўллаб-қувватлаш жамғармаси ҳисобидан 50 миллиард сўм маблағ ажратиши;

б) ушбу маблағлар Фермер, деҳқон хўжаликлари ва томорқа ер эгаларини қўллаб-қувватлаш жамғармаси томонидан:

қишлоқ хўжалиги маҳсулотлари етиштирувчиларга 36 ойгача имтиёзли давр билан 84 ой муддатга йиллик 14 фоиз ставкада ажратилиши, бунда кредит суммасининг 60 фоизи бўйича гаров таъминоти сифатида ўрнатиладиган қуритиш цехи ва совиткичли омборхоналар олиниши, 40 фоизи бўйича гаров таъминоти сифатида уларнинг қайтмаслик хатарини суғурта қилиш бўйича суғурта полиси олиниши;

ташаббускорларга қуритиш цехи ва совиткичли омборхоналар ўрнатиб берилгандан сўнг маҳсулот етказиб берувчининг ҳисоб рақамига ўтказиб бериш шарти билан ажратилиши белгиланганлиги маълумот учун қабул қилинсин.

Марказий банк Фермер, деҳқон хўжаликлари ва томорқа ер эгаларини қўллаб-қувватлаш жамғармасининг маблағларидан самарали фойдаланиш мақсадида тижорат банклари томонидан ташаббускорларга кредитларни Ўзбекистон Республикаси Президентининг 2023 йил 12 апрелдаги ПҚ-121-сон қарори 6-бандида белгиланган талаблар асосида Марказий банкнинг асосий ставкасидан 4 фоизлик пункт юқори ставкада Оилавий тадбиркорликни ривожлантириш дастурларининг ягона электрон платформаси орқали ажратиб бориш чораларини кўрсин. Бунда мазкур кредитлар мева-сабзавот маҳсулотларини қуритиш ва қадоқлашга мўлжалланган ускуналар, стеллажлар ҳамда пластик яшиклар харид қилиш учун ҳам ажратилиши белгилаб қўйилсин.

4. Қуйидагилар:

Агентлик директори бошчилигида дала четлари, каналлар, суғориш ва коллектор-дренаж тармоқларининг атрофларидаги майдонларда, аҳоли томорқаси, хонадонлар ва кўп қаватли уйлар олди ҳамда маҳалланинг ички кўчаларида қишлоқ хўжалиги маҳсулотлари етиштирилишини ташкил қилишни мувофиқлаштириш бўйича республика ишчи гуруҳи (кейинги ўринларда — Республика ишчи гуруҳи) 1-иловага мувофиқ таркибда;

дала четлари, каналлар, суғориш ва коллектор-дренаж тармоқларининг атрофларидаги майдонларда, аҳоли томорқаси, хонадонлар ва кўп қаватли уйлар олди ҳамда маҳалланинг ички кўчаларида қишлоқ хўжалиги маҳсулотлари етиштирилишини ташкил қилишни мувофиқлаштириш бўйича ҳудудий ва туманлар ишчи гуруҳлари (кейинги ўринларда — ҳудудий ва туман ишчи гуруҳи) 2 ва 3-иловаларга мувофиқ таркибда ташкил этилсин.

Республика ишчи гуруҳига (И. Эргашев) қуйидаги вазифалар юклатилсин:

ҳар бир туман бўйича дала четларидаги ҳамда хонадон ва кўп қаватли уйлар олди, маҳалланинг ички кўчаларидаги ер майдонларини ўрганиб, аниқ ўлчамларини тасдиқлаш;

туман (шаҳар) ҳокимлари ва Кадастр агентлигининг ҳудудий бўлимлари томонидан мулкчилик ҳуқуқи аниқланмаган дала четларидан фойдаланиш ҳуқуқини белгилаш ва давлат рўйхатидан ўтказиш ишларини ташкил қилиш;

ҳар бир туман кесимида дала четларида ҳамда аҳоли томорқаси, хонадонлар ва кўп қаватли уйлар олди, маҳалланинг ички кўчаларида экин экиладиган майдон ва маҳсулот турларини ўз ичига олувчи маълумотлар базасини тегишли йилнинг 15 февралига қадар шакллантириш;

дала четларида ҳамда аҳоли томорқаси, хонадонлар ва кўп қаватли уйлар олди, маҳалланинг ички кўчаларида экиш учун ҳудудларнинг тупроқ-иқлим шароитига мос уруғ ва кўчатлар танлаб олиниши бўйича тавсиялар бериш ҳамда агротехник тадбирларни субъектлар кесимида ташкил қилиш;

ҳосилдор уруғ ва кўчат навларининг, шунингдек, минерал ўғит ва кимёвий препаратларнинг ўз вақтида етказиб берилишини ташкил этиш;

етиштирилган қишлоқ хўжалиги маҳсулотларининг сотувини, шу жумладан, «Uzex Agro» электрон савдо платформаси орқали ташкил қилиш.

5. Дала четлари ҳамда хонадонлар ва кўп қаватли уйлар олди, маҳалланинг ички кўчаларига доир маълумотларни рақамлаштириш мақсадида бир ой муддатда:

а) Қишлоқ хўжалиги вазирлиги Ўзбекистон фермер, деҳқон хўжаликлари ва томорқа ер эгалари кенгаши билан биргаликда — дала четларига доир;

Сув хўжалиги вазирлиги — каналлар, суғориш ва коллектор-дренаж тармоқлари атрофидаги майдонларга доир;

Олдинги таҳрирга қаранг.

Кадастр агентлиги Ўзбекистон маҳаллалари уюшмаси билан биргаликда — хонадонлар ва кўп қаватли уйлар олдидаги ер майдонлари, маҳалланинг ички кўчаларига доир маълумотларни ердан фойдаланувчилар ва ер участкалари чегаралари кесимида хатловдан ўтказиб, Қишлоқ хўжалиги вазирлигининг Геоахборот тизимига киритсин ҳамда Кадастр ва кўчмас мулкларни рўйхатдан ўтказиш интеграцион ахборот тизимидаги (UZKAD) маълумотларнинг мазкур бандда назарда тутилаётган давлат ташкилотларига тақдим қилинишини таъминласин;

(5-банд «а» кичик бандининг учинчи хатбошиси Ўзбекистон Республикаси Президентининг 2025 йил 8 апрелдаги ПҚ-136-сонли қарори таҳририда — Қонунчилик маълумотлари миллий базаси, 10.04.2025 й., 07/25/136/0321-сон)

б) Агентлик Геоахборот тизимига киритилган маълумотларни «e-Fitouz» автоматлаштирилган ахборот тизимига интеграция қилсин;

в) Космик тадқиқотлар ва технологиялар агентлиги дронлардан фойдаланган ҳолда хатловдан ўтказиш ишларига кўмаклашсин.

6. Шундай тартиб жорий қилинсинки, унга мувофиқ дала четларига ҳар йили 1 апрелга қадар экин экмаганлик ва йил давомида маҳсулот етиштирмаганлик ҳолатлари аниқланганда (форс-мажор ҳолатлари бундан мустасно):

қишлоқ хўжалиги маҳсулотлари етиштирувчиларга уларнинг барча қишлоқ хўжалигига мўлжалланган ерлари учун ер солиғи ставкаси уч карра миқдорида ҳисобланади;

Қишлоқ хўжалигини давлат томонидан қўллаб-қувватлаш жамғармасидан белгиланган тартибда ажратиладиган кредит ресурслари ҳисобидан молиялаштириш тўхтатилади;

дала четларини иккиламчи ижарага олган ижарачиларга Агросаноат мажмуи устидан назорат қилиш инспекцияси томонидан базавий ҳисоблаш миқдорининг ўн бараваригача миқдорда жарима қўлланади.

7. Республика, ҳудудий ва туман ишчи гуруҳларига қуйидаги ваколатлар берилсин:

дала четларини иккиламчи ижарага олиш истагини билдирган талабгорлар рўйхатини (кейинги ўринларда — талабгорлар) шакллантириш. Бунда талабгорлар рўйхатини шакллантиришда камбағал оилаларнинг аъзоларига устуворлик берилади;

дала четларига ҳар йили 1 апрелга қадар экин экмаган ва йил давомида маҳсулот етиштирмаган ердан фойдаланувчиларга нисбатан далолатнома расмийлаштириб, жарима қўллаш учун Агросаноат мажмуи устидан назорат қилиш инспекциясига тақдим қилиш, шунингдек, Қишлоқ хўжалигини давлат томонидан қўллаб-қувватлаш жамғармасидан ажратиладиган кредит ресурслари ҳисобидан молиялаштиришни тўхтатиш юзасидан тегишли тижорат банкларига мурожаат қилиш;

доимий фойдаланиш ҳуқуқи асосида берилган ерларда жойлашган дала четларидан бир йил мобайнида унумли фойдаланмаганлиги юзасидан ушбу ерлар бириктирилган давлат органларига тақдимномалар киритиш;

дала четларининг эгалик қилувчиси, фойдаланувчиси ва ижарачиси ҳар йили 1 апрелга қадар ушбу ер майдонига экин экмаган ёки иккиламчи ижарага бермаганда, дала четларини талабгорларга тўғридан-тўғри ўн йилгача муддатга иккиламчи ижарага бериш ҳақида дала четларининг эгалик қилувчиси, фойдаланувчиси ва ижарачисига талабнома киритиш.

8. Ушбу қарорда белгиланган чора-тадбирларнинг самарали ва ўз вақтида амалга оширилишини таъминлаш мақсадида:

а) Сув хўжалиги вазирлиги (Ш. Хамраев) дала четларида экилган қишлоқ хўжалиги экинларини ўз вақтида сув билан таъминлаш учун масъул эканлиги кўрсатиб ўтилсин;

б) Статистика агентлиги (Б. Бегалов) Агентлик (И. Эргашев) билан биргаликда 2025 йил 1 мартга қадар Статистика агентлигининг интеграциялашган ахборот тизимини Агентликнинг «Agrokoʻmakchi» мобиль дастурига интеграция қилиш орқали республика бозорларидаги кузатиладиган маҳсулотлар нархлари тўғрисидаги маълумотлар алмашинувини йўлга қўйсин;

в) Агентлик (И. Эргашев) дала четларида қишлоқ хўжалиги экинларини етиштириш, уларни зарарли организмлардан ҳимоя қилишнинг уйғунлашган, самарали ва инновацион услубларини жорий қилиш бўйича таклифлар ишлаб чиқилиши ҳамда ҳар бир ҳудудда семинар ва тренинглар ўтказилишини ташкил қилсин;

г) Қорақалпоғистон Республикаси Вазирлар Кенгаши Раиси, вилоятлар ва Тошкент шаҳри ва ҳокимлари:

ишчи гуруҳларнинг тавсиясига асосан, дала четида етиштирилган маҳсулотларни аҳолига етказиб берувчи тадбиркорларга ҳар бир туман (шаҳар)да деҳқон бозорлари, савдо марказлари ва транспорт қатнови гавжум автомобиль йўллари четларидан жой ажратиб беришни, ҳаракатланувчи кўчма дўконлар фаолиятини йўлга қўйсин;

дала четларидан самарали фойдаланиш ва қўшимча қишлоқ хўжалиги маҳсулотларини етиштириш бўйича Фарғона, Андижон ва Наманган вилоятларидаги илғор тажрибага эга уста деҳқонлар томонидан 4-иловага мувофиқ республиканинг бошқа ҳудудларида ҳар йили март — апрель ойларида ҳамда такрорий экин экиладиган июнь — июль ойларида ҳар ҳафтанинг икки куни мобайнида кўргазмали семинарлар ташкил қилсин.

Андижон (Ш. Абдурахмонов), Наманган (Ш. Абдуразаков) ва Фарғона (Х. Бозаров) вилоятлари ҳокимликлари мазкур қарорга 4-иловага мувофиқ кўргазмали семинарлар ташкил қилиш учун илғор тажрибага эга уста деҳқонларнинг республиканинг бошқа ҳудудларига юборилишини ташкил қилсин.

Олдинги таҳрирга қаранг.

9. Республика ишчи гуруҳи ва ҳудудий ишчи гуруҳлар фаолияти юзасидан маълумотларни умумлаштириш, таҳлил қилиш, чора-тадбирлар ва тегишли таклифлар ишлаб чиқиш учун масъул бўлган Агентлик марказий аппаратида 8 та штат бирлигидан иборат бошқарма, Қорақалпоғистон Республикаси Ўсимликлар карантини ва ҳимояси агентлиги, вилоятлар ва Тошкент шаҳар ўсимликлар карантини ва ҳимояси бошқармаларида 2 та штатдан иборат бўлимлар ташкил қилинсин.

(9-банднинг биринчи хатбошиси Ўзбекистон Республикаси Президентининг 2025 йил 8 апрелдаги ПҚ-136-сонли қарори таҳририда — Қонунчилик маълумотлари миллий базаси, 10.04.2025 й., 07/25/136/0321-сон)

Белгилансинки, мазкур штат бирликлари, истисно тариқасида, 2025-2026 йиллар учун жорий этилади ҳамда Ўсимликлар карантини ва ҳимояси тизимини ривожлантириш жамғармаси ҳисобидан сақланади.

10. Қуйидагилар:

қишлоқ хўжалигига мўлжалланган ер участкаларининг дала четлари ҳамда каналлар, суғориш ва коллектор-дренаж тармоқлари атрофидаги майдонларда экспортбоп мевали дарахтлар экиш прогноз кўрсаткичлари 5 ва 6-иловаларга мувофиқ;

қишлоқ хўжалигига мўлжалланган ер участкаларининг дала четлари ҳамда каналлар, суғориш ва коллектор-дренаж тармоқлари атрофидаги майдонларни аниқлаш мезонлари 7-иловага мувофиқ;

қишлоқ хўжалиги маҳсулотлари етиштирувчилари томонидан дала четлари ҳамда каналлар, суғориш ва коллектор-дренаж тармоқлари атрофидаги майдонларда қишлоқ хўжалиги маҳсулотлари самарали етиштирилишини ташкил қилиш бўйича чора-тадбирлар дастури 8-иловага мувофиқ тасдиқлансин.

11. Қишлоқ хўжалиги вазирлиги, Агентлик ва тижорат банкларининг қарздорлик сабабли банклар балансига олинган иссиқхона комплекслари, қайта ишлаш цехлари ва музлаткичли омборлардан (кейинги ўринларда — объектлар) самарали фойдаланиш бўйича янги тартибни жорий қилиш тўғрисидаги қуйидаги таклифларига розилик берилсин:

Бош вазир ўринбосари Ж. Ходжаев ва Агентлик директори И. Эргашев икки ҳафта муддатда ҳар бир объектни ишончли бошқарувга олишга талабгор бўлган камида уч нафар тажрибали тадбиркорлар рўйхатини шакллантиради ҳамда уларни тижорат банкларига доимий равишда тақдим қилиб боради;

тижорат банклари томонидан тажрибали (ижобий кредит тарихи ва доимий пул айланмасига эга бўлган) тадбиркорларга объектлар уч йил муддатга ишончли бошқарувга берилади, бунда лойиҳа доирасида пул тушумлари бўйича операциялар тўлиқ банк орқали амалга оширилиши белгиланади;

объектлардан келиб тушадиган даромаднинг 50 фоизи тижорат банкларига ўтказилади, бунда объектлар қиймати бўйича қарздорлик мос равишда камайтирилади;

бир йил ичида ижобий фаолият юритган тақдирда, объектлар тажрибали тадбиркорларга 10 йил муддатга бўлиб тўлаш шарти билан сотилади.

Бош вазир ўринбосари Ж. Ходжаев, Марказий банк раиси Т. Ишметов, қишлоқ хўжалиги вазири И. Абдурахмонов ҳамда Агентлик директори И. Эргашев ушбу бандда белгиланган чора-тадбирларнинг самарали бажарилиши учун масъул ва жавобгар этиб белгилансин.

12. Ўзбекистон Республикаси Олий Мажлиси Қонунчилик палатасига озиқ-овқат хавфсизлигини таъминлаш мақсадида қишлоқ хўжалиги ерларидан самарали фойдаланиш бўйича амалдаги қонунчиликни такомиллаштириш юзасидан тегишли қонун лойиҳасини ишлаб чиқиш тавсия этилсин.

13. Ахборот ва оммавий коммуникациялар агентлиги, Ўзбекистон Миллий ахборот агентлиги ва Ўзбекистон Миллий телерадиокомпаниясига Агентлик билан биргаликда ушбу қарорнинг мазмун-моҳияти ҳамда мақсад ва вазифаларини оммавий ахборот воситаларида кенг ёритиш тавсия этилсин.

14. Вазирлар Маҳкамасининг 2021 йил 29 апрелдаги 258-сон қарори билан тасдиқланган Давлат бошқаруви ва маҳаллий давлат ҳокимияти органларида хизмат автотранспорт воситаларини бириктириш меъёрлари изоҳ қисмининг тўққизинчи хатбошиси «Кадастр» сўзларидан кейин «Ўсимликлар карантини ва ҳимояси агентлиги» сўзлари билан тўлдирилсин.

15. Агентлик манфаатдор вазирлик ва идоралар билан биргаликда икки ой муддатда қонунчилик ҳужжатларига ушбу қарордан келиб чиқадиган ўзгартириш ва қўшимчалар тўғрисида Вазирлар Маҳкамасига таклифлар киритсин.

16. Мазкур қарорнинг ижросини самарали ташкил қилишга масъул ва шахсий жавобгар этиб Агентлик директори И.К. Эргашев, Бош прокурор ўринбосари Ж.Ж. Хатамов, ички ишлар вазири ўринбосари С.А. Нишанбаев, Агросаноат мажмуи устидан назорат қилиш инспекцияси раҳбари А.Ж. Вахабов, қишлоқ хўжалиги вазири И.Ю. Абдурахмонов, сув хўжалиги вазири Ш.Р. Хамраев, Кадастр агентлиги директори Ф.Ж. Пулатов, Ўзбекистон фермер, деҳқон хўжаликлари ва томорқа ер эгалари кенгаши раиси А.А. Хаитов, Ўзбекистон маҳаллалари уюшмаси раиси К.К. Куранбаев, Қорақалпоғистон Республикаси Вазирлар Кенгаши Раиси, Тошкент шаҳар ва вилоятлар ҳокимлари белгилансин.

Қарор ижросини ҳар чоракда муҳокама қилиб бориш, ижро учун масъул идоралар фаолиятини мувофиқлаштириш ва назорат қилиш Ўзбекистон Республикаси Бош вазири А.Н. Арипов зиммасига юклансин.

Ўзбекистон Республикаси Президенти Ш. МИРЗИЁЕВ

Тошкент ш.,

2024 йил 30 декабрь,

ПҚ-465-сон

Ўзбекистон Республикаси Президентининг 2024 йил 30 декабрдаги ПҚ-465-сон қарорига
1-ИЛОВА

Дала четлари, каналлар, суғориш ва коллектор-дренаж тармоқларининг атрофларидаги майдонларда, аҳоли томорқаси, хонадонлар ва кўп қаватли уйлар олди ҳамда маҳалланинг ички кўчаларида қишлоқ хўжалиги маҳсулотлари етиштирилишини ташкил қилишни мувофиқлаштириш бўйича

РЕСПУБЛИКА ИШЧИ ГУРУҲИ

И. Эргашев	—	Ўсимликлар карантини ва ҳимояси агентлиги директори, ишчи гуруҳ раҳбари
Ж. Хатамов	—	Ўзбекистон Республикаси Бош прокурорининг ўринбосари, ишчи гуруҳ раҳбари ўринбосари
С. Нишанбаев	—	ички ишлар вазири ўринбосари, ишчи гуруҳ раҳбари ўринбосари
Қ. Юлдашев	—	қишлоқ хўжалиги вазири ўринбосари
Р. Қаршиев	—	сув хўжалиги вазири ўринбосари
К. Куранбаев	—	Ўзбекистон маҳаллалари уюшмаси раиси
А. Хаитов	—	Ўзбекистон фермер, деҳқон хўжаликлари ва томорқа ер эгалари кенгаши раиси
Б. Хамраев	—	Ўсимликлар карантини ва ҳимояси агентлиги директорининг биринчи ўринбосари
Лавозимига кўра	—	Агросаноат мажмуи устидан назорат қилиш инспекцияси бошлиғининг ўринбосари
О. Пирмонов	—	Агросаноатни ривожлантириш агентлиги директорининг ўринбосари
М. Мирмақсудов	—	Кадастр агентлиги директорининг ўринбосари
А. Қадиров	—	Қишлоқ хўжалиги вазирлиги бошқарма бошлиғи
Д. Анарбаев	—	Ўсимликлар карантини ва ҳимояси агентлиги бошқарма бошлиғи, ишчи гуруҳ котиби

Изоҳ: Ишчи гуруҳ аъзолари бошқа ишга ўтган тақдирда, унинг таркибига ушбу лавозимга янгидан тайинланган ёки тегишли функцияларни бажариш зиммасига юкланган шахслар киритилади.

Ўзбекистон Республикаси Президентининг 2024 йил 30 декабрдаги ПҚ-465-сон қарорига
2-ИЛОВА

ҲУДУДИЙ ИШЧИ ГУРУҲИ

Лавозимига кўра	—	Қорақалпоғистон Республикаси Вазирлар Кенгаши Раисининг ва вилоятлар ҳокимларининг қишлоқ ва сув хўжалиги масалалари бўйича ўринбосарлари — Қорақалпоғистон Республикаси қишлоқ хўжалиги вазири, вилоятлар қишлоқ хўжалиги бошқармалари бошлиқлари, шунингдек, Тошкент шаҳри ҳокимининг молия-иқтисодиёт ва камбағалликни қисқартириш масалалари бўйича биринчи ўринбосари, ҳудудий ишчи гуруҳ раҳбари
Лавозимига кўра	—	Қорақалпоғистон Республикаси прокурори, вилоятлар ва Тошкент шаҳри прокурорининг аграр ва озиқ-овқат соҳаларини ривожлантириш масалалари бўйича ўринбосари, ҳудудий ишчи гуруҳ раҳбарининг ўринбосари
Лавозимига кўра	—	Қорақалпоғистон Республикаси ички ишлар вазири, Тошкент шаҳри ва Тошкент вилояти ички ишлар бош бошқармалари, вилоятлар ички ишлар бошқармаларининг ўринбосари, ҳудудий ишчи гуруҳ раҳбарининг ўринбосари
Лавозимига кўра	—	Қорақалпоғистон Республикаси ва вилоятлар ирригация тизимлари ҳавза бошқармалари бошлиқлари
Лавозимига кўра	—	Агросаноат мажмуи устидан назорат қилиш инспекциясининг ҳудудий бошқармалари бошлиқлари
Лавозимига кўра	—	Қорақалпоғистон Республикаси Ўсимликлар карантини ва ҳимояси агентлиги, вилоятлар ва Тошкент шаҳри ўсимликлар карантини ва ҳимояси бошқармалари бошлиқлари
Лавозимига кўра	—	Ўзбекистон маҳаллалари уюшмасининг Қорақалпоғистон Республикаси, вилоятлар ва Тошкент шаҳар бошқармалари бошлиқлари
Лавозимига кўра	—	Ўзбекистон фермер, деҳқон хўжаликлари ва томорқа ер эгалари кенгаши вилоят филиали раҳбари
Лавозимига кўра	—	Қорақалпоғистон Республикаси ва вилоятлар агросаноатни ривожлантириш бошқармалари бошлиқлари
Лавозимига кўра	—	Кадастр агентлигининг Қорақалпоғистон Республикаси, вилоятлар ва Тошкент шаҳри бошқармалари бошлиқлари
Лавозимига кўра	—	Қорақалпоғистон Республикаси Вазирлар Кенгаши Раисининг ва вилоятлар ҳокимларининг қишлоқ ва сув хўжалиги масалалари бўйича ўринбосарлари — Қорақалпоғистон Республикаси қишлоқ хўжалиги вазирининг ва вилоятлар қишлоқ хўжалиги бошқармалари бошлиқларининг ер масалалари бўйича ўринбосари, шунингдек, Тошкент шаҳри қишлоқ хўжалиги бошқармаси бошлиғи
Лавозимига кўра	—	Қорақалпоғистон Республикаси Ўсимликлар карантини ва ҳимояси агентлиги, вилоятлар ва Тошкент шаҳри ўсимликлар карантини ва ҳимояси бошқармалари ички фитосанитар назорати бўлимлари бошлиқлари, вилоят ишчи гуруҳи котиби

Ўзбекистон Республикаси Президентининг 2024 йил 30 декабрдаги ПҚ-465-сон қарорига
3-ИЛОВА

ТУМАН ИШЧИ ГУРУҲИ

Лавозимига кўра	—	Туман (шаҳар) ҳокими, туман ишчи гуруҳи раҳбари
Лавозимига кўра	—	Туман (шаҳар) прокурори, туман ишчи гуруҳи раҳбарининг ўринбосари
Лавозимига кўра	—	Туман (шаҳар) ички ишлар бўлими бошлиғи, туман ишчи гуруҳи раҳбарининг ўринбосари
Лавозимига кўра	—	Туман (шаҳар) солиқ инспекцияси бошлиғи, туман ишчи гуруҳи раҳбарининг ўринбосари
Лавозимига кўра	—	Туман (шаҳар) ҳокимининг қишлоқ ва сув хўжалиги масалалари бўйича ўринбосари — туман (шаҳар) қишлоқ хўжалиги бўлими бошлиғи
Лавозимига кўра	—	Туман (шаҳар) «Сув етказиб бериш хизмати» давлат муассасаси директори
Лавозимига кўра	—	Туман (шаҳар) агросаноат мажмуи устидан назорат қилиш инспекцияси бошлиғи
Лавозимига кўра	—	Туман (шаҳар) ўсимликлар карантини ва ҳимояси бўлими бошлиғи
Лавозимига кўра	—	Ўзбекистон маҳаллалари уюшмасининг туман (шаҳар) бўлими бошлиғи
Лавозимига кўра	—	Фермер, деҳқон хўжаликлари ва томорқа ер эгалари кенгашининг туман (шаҳар) кенгаши раҳбари
Лавозимига кўра	—	Туман (шаҳар) кадастр бўлими бошлиғи
Лавозимига кўра	—	Туман (шаҳар) ўсимликлар карантини ва ҳимояси бўлими прогнозлаштириш ва мониторинг қилиш бўйича бош мутахассиси, туман ишчи гуруҳи котиби

Ўзбекистон Республикаси Президентининг 2024 йил 30 декабрдаги ПҚ-465-сон қарорига
4-ИЛОВА

Фарғона, Андижон ва Наманган вилоятидаги уста деҳқонларнинг республика ҳудудларида дала четлари ҳамда каналлар, суғориш ва коллектор-дренаж тармоқларининг атрофларидаги майдонлардан самарали фойдаланиш бўйича кўргазмали семинарлар ташкил қилиш учун

бириктирилиши

Т/р	Семинар ўтказиладиган ҳудудлар номи	Семинар ўтказишга масъул вилоятлар
1.	Қорақалпоғистон Республикаси, Хоразм вилояти	Фарғона вилояти
2.	Жиззах, Сирдарё, Тошкент ва Самарқанд вилоятлари	Андижон вилояти
3.	Бухоро, Навоий, Қашқадарё ва Сурхондарё вилоятлари	Наманган вилояти

Ўзбекистон Республикаси Президентининг 2024 йил 30 декабрдаги ПҚ-465-сон қарорига
5-ИЛОВА

Республикада 2025 йилда дала четлардаги майдонларга мевали дарахтлар экиш

ПРОГНОЗ КЎРСАТКИЧЛАРИ

Т/р	Ҳудудлар номи	Фермерлар сони	Жами дала четига мевали дарахт экиладиган майдон, (га)	2025 йилда кўчатлар экиш		*шундан*
				2025 йилда кўчатлар экиш		олча		олхўри		беҳи		узум		бодом		чилон жийда		тут дарахти
				майдон, (га)	кўчат сони, (минг дона)	майдон, (га)	кўчат сони, (минг дона)	майдон, (га)	кўчат сони, (минг дона)	майдон, (га)	кўчат сони, (минг дона)	майдон, (га)	кўчат сони, (минг дона)	майдон, (га)	кўчат сони, (минг дона)	майдон, (га)	кўчат сони, (минг дона)	майдон, (га)	кўчат сони, (минг дона)
1.	Қорақалпоғистон Республикаси	2 656	905	905	890	453	385			91	77	27	30			181	91	154	308
2.	Андижон	4 167	2 159	2 159	1 684	216	183	432	281	216	183	432	475	648	324	130	65	86	173
3.	Бухоро	188	3 057	3 057	2 950	611	520	611	397	306	260	153	168			764	382	611	1 223
4.	Жиззах	4 273	4 023	4 023	3 581	805	684	805	523	402	342	805	885			845	422	362	724
5.	Қашқадарё	5 319	4 154	4 154	3 230	208	177	831	540	415	353	831	914	1 246	623	415	208	208	415
6.	Навоий	281	255	255	262	51	43	51	33	26	22	13	14			54	27	61	123
7.	Наманган	2 066	555	555	441	56	47	111	72	56	47	111	122	167	83	28	14	28	56
8.	Самарқанд	7 559	3 623	3 623	3 333	725	616	1 087	706	362	308	725	797			362	181	362	725
9.	Сурхондарё	3 844	2 218	2 218	1 708	444	377	444	288	222	189	111	122	665	333	177	89	155	311
10.	Сирдарё	4 833	3 638	3 638	3 274	1 455	1 237	728	473	364	309	182	200			509	255	400	800
11.	Тошкент вилояти	6 675	1 690	1 690	1 656	338	287	338	220	169	144	338	372			253	127	253	507
12.	Фарғона	2 669	2 483	2 483	2 005	124	106	497	323	248	211	497	546	745	372	199	99	174	348
13.	Хоразм	3 072	1 101	1 101	1 130	496	421			110	94	33	36			231	116	231	463
14.	Тошкент шаҳри	163	30	30	25	11	9	8	5	3	3	3	3	2	1	3	2	1	2
Жами:		47 765	29 891	29 891	26 167	5 990	5 092	5 941	3 861	2 989	2 541	4 259	4 685	3 472	1 736	4 152	2 076	3 088	6 176

Ўзбекистон Республикаси Президентининг 2024 йил 30 декабрдаги ПҚ-465-сон қарорига
6-ИЛОВА

Республикада 2025 йилда каналлар, суғориш ва коллектор-дренаж тармоқлари атрофидаги майдонларга мевали дарахтлар экиш

ПРОГНОЗ КЎРСАТКИЧЛАРИ

Т/р	Ҳудудлар номи	Жами дала четига мевали дарахт экиладиган майдон, (га)	2025 йилда кўчатлар экиш		*шундан*
			2025 йилда кўчатлар экиш		олча		олхўри		беҳи		узум		бодом		чилон жийда		тут дарахти
			майдон, (га)	кўчат сони, (минг дона)	майдон, (га)	кўчат сони, (минг дона)	майдон, (га)	кўчат сони, (минг дона)	майдон, (га)	кўчат сони, (минг дона)	майдон, (га)	кўчат сони, (минг дона)	майдон, (га)	кўчат сони, (минг дона)	майдон, (га)	кўчат сони, (минг дона)	майдон, (га)	кўчат сони, (минг дона)
1.	Қорақалпоғистон Республикаси	99	99	97	49	42			10	8	3	3			20	10	17	34
2.	Андижон	42	42	33	4	4	8	5	4	4	8	9	13	6	3	1	2	3
3.	Бухоро	1 292	1 292	1 247	258	220	258	168	129	110	65	71			323	162	258	517
4.	Жиззах	266	266	237	53	45	53	35	27	23	53	59			56	28	24	48
5.	Қашқадарё	939	939	730	47	40	188	122	94	80	188	207	282	141	94	47	47	94
6.	Навоий	145	145	149	29	25	29	19	15	12	7	8			31	15	35	70
7.	Наманган	27	27	21	3	2	5	4	3	2	5	6	8	4	1	1	1	3
8.	Самарқанд	358	358	330	72	61	107	70	36	30	72	79			36	18	36	72
9.	Сурхондарё	546	546	420	109	93	109	71	55	46	27	30	164	82	44	22	38	76
10.	Сирдарё	305	305	275	122	104	61	40	31	26	15	17			43	21	34	67
11.	Тошкент	61	61	60	12	10	12	8	6	5	12	13			9	5	9	18
12.	Фарғона	5 905	5 905	5 311	1 476	1 255	1 063	691	709	602	768	844	650	325	590	295	650	1 299
13.	Хоразм	33	33	34	15	13			3	3	1	1			7	4	7	14
Жами:		10 019	10 019	8 944	2 250	1 913	1 895	1 232	1 120	952	1 225	1 347	1 116	558	1 256	628	1 157	2 315

Ўзбекистон Республикаси Президентининг 2024 йил 30 декабрдаги ПҚ-465-сон қарорига
7-ИЛОВА

Қишлоқ хўжалигига мўлжалланган ер участкаларининг дала четлари ҳамда каналлар, суғориш ва коллектор-дренаж тармоқлари атрофидаги майдонларни аниқлаш

МЕЗОНЛАРИ

1. Экин далаларининг каналлар, суғориш ва коллектор-дренаж тармоқлари билан туташган жойи ёки мазкур тармоқлар билан экин ери ўртасидаги чегара чизиғи, шунингдек, қишлоқ хўжалигига мўлжалланган ерлар ва сув фонди ерлари тоифасидаги йўллар, ариқлар, лотоклар, каналлар, коллекторлар ва дренажларнинг қирғоқлари бўйлаб экин еригача бўлган фойдаланилмайдиган суғориш имконияти мавжуд ва шўрланмаган ерлар.

2. Экин далаларининг атрофларида фойдаланилмасдан қолиб кетган дала йўллари.

3. Каналлар, суғориш тармоқлари ва коллектор-дренаж тармоқларининг соҳилбўйи минтақа майдонларидан ташқари фойдаланилмаётган ерлар.

Ўзбекистон Республикаси Президентининг 2024 йил 30 декабрдаги ПҚ-465-сон қарорига
8-ИЛОВА

Қишлоқ хўжалиги маҳсулотлари етиштирувчилари томонидан дала четлари ҳамда каналлар, суғориш ва коллектор-дренаж тармоқлари атрофидаги майдонларда қишлоқ хўжалиги маҳсулотлари самарали етиштирилишини ташкил қилиш бўйича

ЧОРА-ТАДБИРЛАР ДАСТУРИ

Олдинги таҳрирга қаранг.

Т/р	Чора-тадбирлар	Ижро муддати	Масъул ижрочилар
1.	Дала четларида ҳамда каналлар, суғориш ва коллектор-дренаж тармоқлари атрофидаги майдонларда ҳар йили 1 апрелгача экин экмаганлик ва йил давомида маҳсулот етиштирмаганлик учун Ўзагроинспекция томонидан жарима қўллаш бўйича Ўзбекистон Республикасининг Маъмурий жавобгарлик тўғрисидаги кодексига ўзгартиш ва қўшимчаларни назарда тутувчи қонун лойиҳасини Олий Мажлис Қонунчилик палатасига киритиш.	Уч ой муддатда	Ўзагроинспекция, Карантин агентлиги
2.	Дала четлари ҳамда каналлар, суғориш ва коллектор-дренаж тармоқлари атрофидаги майдонларда 1 апрелгача экин экмаганлик ва йил давомида маҳсулот етиштирмаганлик учун ер солиғини 3 карра ставкада ҳисоблаш тўғрисида Солиқ кодексига ўзгартиш ва қўшимчалар киритишни назарда тутувчи қонун лойиҳасини Олий Мажлис Қонунчилик палатасига киритиш.	Уч ой муддатда	Қишлоқ хўжалиги вазирлиги, Карантин агентлиги, Солиқ қўмитаси
3.	Вазирлар Маҳкамасининг 2024 йил 30 январдаги 55-сон қарори билан тасдиқланган Тадбиркорлик субъектларининг барқарорлик рейтингини аниқлаш тартиби тўғрисида низомга дала четларида ҳамда каналлар, суғориш ва коллектор-дренаж тармоқлари атрофидаги майдонларда маҳсулот етиштирган қишлоқ хўжалиги корхоналарига Тадбиркорлик субъектларининг барқарорлик рейтингини ҳисоблашда қўшимча балл беришни назарда тутувчи ўзгартириш ва қўшимчалар киритиш бўйича Ҳукумат қарори лойиҳасини Вазирлар Маҳкамасига киритиш.	Бир ой муддатда	Карантин агентлиги, Савдо-саноат палатаси
4.	Дала четларига ҳамда каналлар, суғориш ва коллектор-дренаж тармоқлари атрофидаги майдонларга экилган «in-vitro» усулида яратилган мевали пайвандтагли кўчатларни сотиб олиш харажатларининг 50 фоизи учун, бироқ ҳар бир мевали пайвандтагли кўчатга 25 минг сўмдан ошмаган миқдорда субсидия бериш тартибини жорий қилиш юзасидан Ҳукумат қарори лойиҳасини Вазирлар Маҳкамасига киритиш.	Бир ой муддатда	Қишлоқ хўжалиги вазирлиги, Иқтисодиёт ва молия вазирлиги, Агросаноатни ривожлантириш агентлиги
5.	Дала четлари ҳамда каналлар, суғориш ва коллектор-дренаж тармоқлари атрофидаги майдонларни иккиламчи ижарага олувчилар учун мақбул шароитларни яратиш мақсадида дала четларида экин экиладиган майдонлар бўйича маълумотларни тоифаларга (мулкчилик шакли, сув таъминоти даражаси) ажратиш ҳамда Карантин агентлигининг «Agrokoʻmakchi» мобиль дастурида кенг жамоатчиликка эълон қилиш тизимини йўлга қўйиш.	Икки ой муддатда	Карантин агентлиги, Қишлоқ хўжалиги вазирлиги, Сув хўжалиги вазирлиги, Кадастр агентлиги, Қорақалпоғистон Республикаси Вазирлар Кенгаши, вилоятлар ва Тошкент шаҳри ҳокимликлари
6.	Дала четлари, каналлар, суғориш ва коллектор-дренаж тармоқларининг атрофларидаги майдонларда, аҳоли томорқаси, хонадон ва кўп қаватли уйлар олди ҳамда маҳалланинг ички кўчаларида маҳсулот етиштирувчиларни кафолатли харид қиладиган тадбиркорлар билан боғлаш.	Бир ой муддатда	Карантин агентлиги, Қорақалпоғистон Республикаси Вазирлар Кенгаши, вилоятлар ва Тошкент шаҳри ҳокимликлари
7.	Ҳар бир тумандаги ҳудудларнинг тупроқ-иқлим ва сув таъминоти шароитини ҳисобга олган ҳолда дала четларида етиштириладиган сердаромад қишлоқ хўжалиги экинларини экиш бўйича тавсия ишлаб чиқиш. Бунда маҳаллий шароитдаги имкониятлардан келиб чиқиб, сизот суви яқин ерларга олча, олхўри, беҳи, жийда, тут, терак, ошқовоқ, супурги, ширин жўхори, малина, суви танқис ерларга қизилмия, узум, бодом, анор, мойли (кунжут, рапс) ва дуккакли (зира, нўхат, ловия, мош) экинларга устувор эътибор қаратиш.	Бир ой муддатда	Карантин агентлиги, Ўзбекистон фермер, деҳқон хўжаликлари ва томорқа ер эгалари кенгаши, Сув хўжалиги вазирлиги, Қишлоқ хўжалигида билим ва инновациялар миллий маркази
8.	Карантин агентлиги тизимидаги Республика агрокимёвий таҳлил маркази ҳар йили 1 мартга қадар дала четлари ва суғориш, коллектор-дренажлар атрофларидаги майдонлар тупроқларини агрокимёвий таҳлилдан ўтказиш ҳамда экин турларига мос равишда минерал ўғитларга бўлган илмий талаб ишлаб чиқилишини таъминлаш.	Ҳар йили 1 мартга қадар	Карантин агентлиги, Республика агрокимёвий таҳлил маркази
9.	Ўсимликлар карантини ва ҳимояси тизимини ривожлантириш жамғармаси ҳисобидан Республика ишчи гуруҳи ва ҳудудий ишчи гуруҳлар фаолияти юзасидан маълумотларни умумлаштириш, таҳлил қилиш, чора-тадбирлар ва тегишли таклифлар ишлаб чиқиш учун масъул бўлган Карантин агентлиги марказий аппаратида 8 та штат бирлигидан иборат бошқарма, Қорақалпоғистон Республикаси Ўсимликлар карантини ва ҳимояси агентлиги ҳамда вилоятлар бошқармаларида 2 тадан штатдан иборат бўлимлар ташкил қилиш.	Бир ой муддатда	Карантин агентлиги, Иқтисодиёт ва молия вазирлиги, Қишлоқ хўжалиги вазирлиги

(8-илова Ўзбекистон Республикаси Президентининг 2025 йил 14 февралдаги ПФ-22-сонли Фармони таҳририда — Қонунчилик маълумотлари миллий базаси, 18.02.2025 й., 06/25/22/0156-сон)

(Қонунчилик маълумотлари миллий базаси, 03.01.2025 й., 07/25/465/0007-сон; 20.01.2025 й., 06/25/7/0051-сон; 18.02.2025 й., 06/25/22/0156-сон; 10.04.2025 й., 07/25/136/0321-сон)