Мамлакатимизда ишбилармонлик муҳитини яхшилаш ва тадбиркорлик фаолиятини амалга ошириш учун қулай шарт-шароитлар яратиш бўйича тизимли ишлар амалга оширилмоқда.

Шу билан бирга, қонунчилик ҳужжатларида қурилиш объектларига ёки ишлаб чиқариш (хизмат кўрсатиш) корхоналарига ишлаш мақсадида келган ва ушбу объектларнинг яшаш учун мослаштирилган жойларида яшаб, меҳнат фаолияти билан шуғулланаётган шахсларни вақтинча турган жойи бўйича рўйхатга олиш тартибининг белгиланмаганлиги тадбиркорлар учун ноқулайлик туғдирмоқда.

Тадбиркорлик субъектлари учун ходимларни ишга ёллашда қўшимча қулайликлар яратиш, шунингдек, қурилиш объектлари ёки ишлаб чиқариш (хизмат кўрсатиш) корхоналарининг яшаш учун мослаштирилган жойларида яшаб, меҳнат фаолияти билан шуғулланаётган шахсларни вақтинча турган жойи бўйича рўйхатга олиш тартибини соддалаштириш мақсадида Вазирлар Маҳкамаси қарор қилади:

1. Ўзбекистон Республикаси Ҳукуматининг иловага мувофиқ айрим қарорларига қурилиш объектларида ёки ишлаб чиқариш (хизмат кўрсатиш) корхоналарида ишлаш мақсадида келган ва ушбу объектларнинг яшаш учун мослаштирилган жойларида яшаб, меҳнат фаолияти билан шуғулланаётган шахсларни мазкур қурилиш объектларига ёки ишлаб чиқариш (хизмат кўрсатиш) корхоналарига вақтинча турган жойи бўйича рўйхатга олиш тартибини назарда тутувчи ўзгартириш ва қўшимчалар киритилсин.

2. Ўзбекистон Республикаси Қурилиш ва уй жой коммунал хўжалиги вазирлиги манфаатдор вазирлик ва идоралар билан биргаликда қурилиш объектларида ёки ишлаб чиқариш (хизмат кўрсатиш) корхоналарида ишлаш мақсадида келган ва ушбу объектларнинг яшаш учун мослаштирилган жойларида яшаб, меҳнат фаолияти билан шуғулланаётган шахслар учун зарур шарт-шароитлар яратилганлиги, техника хавфсизлиги, ёнгин хавфсизлиги, санитария-эпидемиология режими талабларига қатъий риоя этилаётганлиги доимий назорат қилиб борилишини таъминласин.

3. Ўзбекистон Республикаси Ички ишлар вазирлиги манфаатдор вазирлик ва идоралар билан биргаликда ўзлари қабул қилган норматив-ҳуқуқий ҳужжатларни бир ой муддатда ушбу қарорга мувофиқлаштирсин.

4. Мазкур қарорнинг бажарилишини назорат қилиш Ўзбекистон Республикаси ички ишлар вазири П.Р. Бобожонов зиммасига юклансин.

1. Вазирлар Маҳкамасининг 2018 йил 22 октябрдаги 845-сон қарори билан тасдиқланган Ўзбекистон Республикаси фуқароларини доимий яшаш жойи ва вақтинча турган жойи бўйича рўйхатга олиш тартиби тўғрисидаги низомда:

қуйидаги мазмундаги 36¹-банд билан тўлдирилсин:

«36¹. Қурилиш объектларида ёки ишлаб чиқариш (хизмат кўрсатиш) корхоналарида ишлаш мақсадида келган ва ушбу объектларининг яшаш учун мослаштирилган жойларида (вақтинча иншоотлар, мослаштирилган бинолар ва контейнер уйларда) яшаётган фуқаролар ушбу қурилиш объектлари ёки ишлаб чиқариш (хизмат кўрсатиш) корхоналарига «Манзил» тизими орқали вақтинча турган жойи бўйича рўйхатга олинади.

Бунда фуқароларни қурилиш объектлари ёки ишлаб чиқариш (хизмат кўрсатиш) корхоналарига вақтинча турган жойи бўйича рўйхатга олиш мазкур қурилиш объектлари ёки ишлаб чиқариш (хизмат кўрсатиш) корхоналарида яшаш учун мослаштирилган жойларнинг мавжудлиги, рўйхатга олинаётган фуқаролар турар жой билан (техника хавфсизлиги, ёнгин хавфсизлиги, санитария-эпидемиология режими талабларига риоя этилган ҳолда) таъминланганлиги ҳамда уларни вақтинча турган жойи бўйича рўйхатга олиш ҳақида қурилиш объектлари ёки ишлаб чиқариш (хизмат кўрсатиш) корхоналари раҳбарларининг хати (розилиги) асосида амалга оширилади»;

44-банднинг биринчи хатбошисидаги «ва вақтинча» сўзлари чиқариб ташлансин.

2. Вазирлар Маҳкамасининг 2019 йил 28 декабрдаги 1049-сон қарори билан тасдиқланган Ўзбекистон Республикаси фуқароларини Тошкент шаҳри ва Тошкент вилоятида доимий яшаш ва вақтинча турган жойи бўйича рўйхатга олиш тартиби тўғрисидаги низомда:

қуйидаги мазмундаги 52¹-банд билан тўлдирилсин:

«52¹. Қурилиш объектларида ёки ишлаб чиқариш (хизмат кўрсатиш) корхоналарида ишлаш мақсадида келган ва ушбу объектларининг яшаш учун мослаштирилган жойларида (вақтинча иншоотлар, мослаштирилган бинолар ва контейнер уйларда) яшаётган фуқаролар ушбу қурилиш объектлари ёки ишлаб чиқариш (хизмат кўрсатиш) корхоналарига «Манзил» тизими орқали вақтинча турган жойи бўйича рўйхатга олинади.

Бунда фуқароларни қурилиш объектлари ёки ишлаб чиқариш (хизмат кўрсатиш) корхоналарига вақтинча турган жойи бўйича рўйхатга олиш мазкур қурилиш объектлари ёки ишлаб чиқариш (хизмат кўрсатиш) корхоналарида яшаш учун мослаштирилган жойларнинг мавжудлиги, рўйхатга олинаётган фуқаролар турар жой билан (техника хавфсизлиги, ёнгин хавфсизлиги, санитария-эпидемиология режими талабларига риоя этилган ҳолда) таъминланганлиги ҳамда уларни вақтинча турган жойи бўйича рўйхатга олиш ҳақида қурилиш объектлари ёки ишлаб чиқариш (хизмат кўрсатиш) корхоналари раҳбарларининг хати (розилиги) асосида амалга оширилади»;

64-банддаги «ва вақтинча» сўзлари чиқариб ташлансин.

3. Вазирлар Маҳкамасининг 2020 йил 28 сентябрдаги 593-сон қарори билан тасдиқланган Ўзбекистон Республикаси ҳудудида чет эл фуқаролари ва фуқаролиги бўлмаган шахсларни вақтинча турган жойи бўйича рўйхатга олиш тартиби тўғрисидаги низомда:

12-банднинг «б» кичик банди «турар жой берган жисмоний» сўзларидан кейин «ва юридик» сўзлари билан тўлдирилсин;

қуйидаги мазмундаги 40¹-банд билан тўлдирилсин:

«40¹. Қурилиш объектларида ёки ишлаб чиқариш (хизмат кўрсатиш) корхоналарида ишлаш мақсадида келган ва ушбу объектларнинг яшаш учун мослаштирилган жойларида (вақтинча иншоотлар, мослаштирилган бинолар ва контейнер уйларда) яшаётган яшаш гувоҳномаси ёки ID-картага эга бўлган чет эл фуқаролари ва фуқаролиги бўлмаган шахслар ушбу қурилиш объектлари ёки ишлаб чиқариш (хизмат кўрсатиш) корхоналарига «Манзил» тизими орқали вақтинча турган жойи бўйича рўйхатга олинади.

Бунда қурилиш объектлари ёки ишлаб чиқариш (хизмат кўрсатиш) корхоналарига яшаш гувоҳномаси ёки ID-картага эга бўлган чет эл фуқаролари ва фуқаролиги бўлмаган шахсларни вақтинча турган жойи бўйича рўйхатга олиш мазкур қурилиш объектлари ёки ишлаб чиқариш (хизмат кўрсатиш) корхоналарида яшаш учун мослаштирилган жойларнинг мавжудлиги, рўйхатга олинаётган яшаш гувоҳномаси ёки ID-картага эга бўлган чет эл фуқаролари ва фуқаролиги бўлмаган шахслар турар жой билан (техника хавфсизлиги, ёнгин хавфсизлиги, санитария-эпидемиология режими талабларига риоя этилган ҳолда) таъминланганлиги ва уларни вақтинча турган жойи бўйича рўйхатга олиш ҳақида қурилиш объектлари ёки ишлаб чиқариш (хизмат кўрсатиш) корхоналари раҳбарларининг хати (розилиги) асосида амалга оширилади».