Ўзбекистон Республикаси Вазирлар Маҳкамасининг
қарори
Қорақалпоғистон қишлоқ хўжалиги ва агротехнологиялар институтини ташкил этиш чора-тадбирлари тўғрисида
Республикамизда охирги йилларда ўқув-педагогик жараёнга инновацион илғор ва халқаро таълим стандартларини жорий этиш, кадрлар салоҳиятини ошириш ва профессор-ўқитувчилар меҳнатини рағбатлантириш, шунингдек, таълим муассасаларининг моддий-техника базасини мустаҳкамлаш бўйича қатор чора-тадбирлар амалга оширилди.
Қишлоқ хўжалиги соҳаси ва тармоқлари учун кадрлар тайёрлаш сифатини тубдан яхшилаш, фан, таълим ва ишлаб чиқаришнинг самарали интеграциясини таъминлаш, ҳудудларнинг юқори малакали кадрларга бўлган эҳтиёжини қондириш мақсадида Вазирлар Маҳкамаси қарор қилади:
1. Ўзбекистон Республикаси Қишлоқ хўжалиги вазирлиги, Олий ва ўрта махсус таълим вазирлиги, Иқтисодий тараққиёт ва камбағалликни қисқартириш вазирлиги, Молия вазирлиги ҳамда Қорақалпоғистон Республикаси Вазирлар Кенгашининг 2021/2022 ўқув йилидан бошлаб Тошкент давлат аграр университетининг Нукус филиали негизида Қорақалпоғистон қишлоқ хўжалиги ва агротехнологиялар институтини (кейинги ўринларда — Институт) ташкил этиш тўғрисидаги таклифига розилик берилсин.
2. Қорақалпоғистон қишлоқ хўжалиги ва агротехнологиялар институти фаолиятини ташкил этиш бўйича чора-тадбирлар дастури 1-иловага мувофиқ тасдиқлансин.
3. Белгилансинки:
Институтда таълимнинг кредит-модуль тизими жорий этилади. Бунда, ҳафтада беш кунлик ўқиш ҳамда ҳафтанинг шанба куни мустақил ўзлаштириш куни деб белгиланади;
Институтнинг фаолияти Ўзбекистон Республикаси Қишлоқ хўжалиги вазирлиги томонидан мувофиқлаштирилади;
Институтга қабул параметрлари белгиланган тартибда ҳар йили тасдиқланадиган республика олий таълим муассасаларига ўқишга қабул қилишнинг давлат буюртмаси параметрларидан келиб чиққан ҳолда аниқланади.
4. Ўзбекистон Республикаси Қишлоқ хўжалиги вазирлиги, Олий ва ўрта махсус таълим вазирлиги ҳамда Инновацион ривожланиш вазирлигининг Институтда 2021/2022 ўқув йилидан бошлаб ташкил этиладиган қўшма таълим дастурларининг ўқув режалари ва фан дастурлари Институт томонидан хорижий олий таълим муассасалари билан келишган ҳолда мустақил тасдиқланиши тўғрисидаги таклифи маъқуллансин.
5. Ўзбекистон Республикаси Қишлоқ хўжалиги вазирлиги Қорақалпоғистон Республикаси Вазирлар Кенгаши билан биргаликда:
бир ой муддатда олий таълим муассасалари учун белгиланган нормативларга мувофиқ Институтнинг тузилмаси ва устави тасдиқланишини ҳамда белгиланган тартибда давлат рўйхатидан ўтказилишини таъминлаш;
икки ой муддатда Институтда ўқув-методик жараённинг ташкил этиш, штатлар жадвали ва харажатлар сметасини тасдиқлаш, уни ўқув-лаборатория жиҳозлари ва компьютер техникаси билан таъминлаш бўйича аниқ чора-тадбирларни амалга ошириш;
ҳар йилнинг 20 августига қадар Институтни олий таълим ва илмий-тадқиқот муассасалари, тегишли йўналишлар бўйича ишлаб чиқариш ташкилотларининг катта амалий тажрибага эга мутахассисларидан иборат бўлган юқори малакали кадрлар билан танлов асосида тўлдириш;
Институт профессор-ўқитувчилари, илмий ва техник-муҳандис ходимларининг ҳар йили Ўзбекистон ҳамда хорижий давлатларнинг етакчи таълим муассасаларида, илмий-тадқиқот марказларида, агрокластерларда, кооперацияларда ва йирик ишлаб чиқариш ташкилотларида стажировка ўташи бўйича дастурлар тайёрланишини ҳамда амалга оширилишини таъминлаш;
хорижий олий таълим муассасалари билан ҳамкорликда ташкил этиладиган қўшма таълим дастурларининг ўқув режаларини хорижий экспертлар иштирокида ишлаб чиқилишини таъминлаш;
2022/2023 ўқув йилидан бошлаб Қорақалпоғистон тупроқ иқлим-шароитини ҳисобга олиб, ер деградацияси ва атроф-муҳит мониторингини замонавий технологиялар асосида олиб боришда геоахборот тизимларидан фойдаланиш мақсадида Институт тузилмасида Германия Халқаро ҳамкорлик ташкилоти билан ҳамкорликда «Геоахборот тизимлари» маркази ва лабораториясини ташкил этиш;
давлат-хусусий шериклик тамойиллари асосида ёки хусусий сектор иштирокида Институт ҳузурида илмий ишланмаларни амалиётга жорий этиш ва талабаларнинг бевосита ишлаб чиқаришда иштирокини таъминловчи «Кичик инновацион корхоналар»ни ташкил этиш чораларини кўриш;
ислоҳотларнинг ҳозирги босқичига ҳамоҳанг тарзда ўзбек ва қорақалпоқ тилларида янги авлод дарсликлари ва ўқув қўлланмалари туркумини хорижий олимлар, олий таълим ва аграр соҳада самарали фаолият юритаётган мутахассисларни жалб этган ҳолда тайёрлаш, шунингдек, ўқув режалари ва дастурларини янгилаш ҳамда қайта кўриб чиқиш бўйича икки ой муддатда чора-тадбирлар дастурини ишлаб чиқиш;
Институтнинг ахборот-ресурс марказини маҳаллий ва хорижий ўқув, илмий ва бадиий адабиётлар билан таъминлаш чораларини кўрсин.
6. Қорақалпоғистон Республикасида мойли экинлар селекцияси, уруғчилиги, мойли экинларни етиштириш ва қайта ишлаш соҳаларига илм-фанни татбиқ этиш мақсадида Институт ҳузурида давлат муассасаси шаклидаги «Мойли экинлар селекцияси, уруғчилиги ва етиштириш агротехнологиялари» ўқув-илмий маркази (кейинги ўринларда — Марказ) ташкил этилсин.
7. Қуйидагилар Марказнинг асосий вазифалари ва фаолият йўналишлари этиб белгилансин:
мойли экинларни парваришлашнинг био, нано ва ресурстежамкор ҳамда интенсив технологияларини қишлоқ хўжалиги ишлаб чиқаришига жорий этиш;
Институтнинг «Ахборот-маслаҳат маркази» (Ехtension-center) ҳудудидаги ер майдонларида ички ва ташқи бозор эҳтиёжларидан келиб чиққан ҳолда, мойли экинларнинг серҳосил, шўр ва қурғоқчиликка, касаллик ҳамда зараркунандаларга чидамли, маҳсулот сифати ва мойдорлик даражаси юқори бўлган нав ва дурагайлари селекцияси ҳамда уруғчилигини йўлга қўйиш;
суғориладиган ва чўл-яйлов ҳудудларининг тупроқ-иқлим шароитлари учун мойли экинларни етиштириш агротехнологияларини ишлаб чиқиш;
илмий ходимларнинг илғор инновацион технологияларни яратиш бўйича ташаббускорлигини қўллаб-қувватлаш, жисмоний шахсларнинг новаторлик ғояларини қишлоқ хўжалиги ишлаб чиқаришига жорий этишга кўмаклашиш;
кластерлар, кооперациялар, фермер, деҳқон хўжаликлари ва томорқа ер эгалари учун мойли экинларни етиштириш бўйича кўргазмали ўқув-семинарларни ташкил этиш ҳамда тавсиялар ишлаб чиқиш.
8. Ўзбекистон Республикаси Қишлоқ хўжалиги вазирлиги, Инновацион ривожланиш вазирлиги, Олий ва ўрта махсус таълим вазирлиги, Олий аттестация комиссиясининг 2022 йилдан бошлаб Институтнинг илмий салоҳиятини ошириш учун олий таълимдан кейинги таълим (докторантура)га қишлоқ хўжалиги ихтисосликлари бўйича қабул параметрларини 3 баробарга ошириш ҳамда минтақадаги бошқа олий таълим ва илмий ташкилотларнинг имкониятларидан келиб чиқиб, ихтисослашган илмий кенгаш ташкил этиш тўғрисидаги таклифи маъқуллансин.
9. Ўзбекистон Республикаси Қишлоқ хўжалиги вазирлиги, Ташқи ишлар вазирлиги, Олий ва ўрта махсус таълим вазирлиги, «Эл-юрт умиди» жамғармаси билан биргаликда:
нуфузли хорижий илмий ташкилотлар билан ҳамкорликда лойиҳаларни амалга ошириш ва Институтнинг илмий педагогик ходимларини халқаро анжуманларда иштирокини таъминлаш;
2021 йил 15 июлга қадар Институт ва Вьетнам аграр университети билан биргаликда шоличилик йўналишида қўшма факультет ташкил қилиш бўйича ҳамкорлик алоқаларини ўрнатсин;
2021/2022 ўқув йилидан бошлаб дунёнинг Япония, Хитой, Россия, Жанубий Корея ва бошқа ривожланган давлатларнинг шоличиликка ва қишлоқ хўжалиги экинлари етиштиришга ихтисослашган муассасаларида Институтнинг ёш истиқболли кадрлари ва илмий-педагогик ходимларини мақсадли равишда хорижда малакасини ошириш ва стажировкага юбориш бўйича аниқ чора-тадбирларни белгиласин.
10. Ўзбекистон Республикаси Инновацион ривожланиш вазирлиги Қишлоқ хўжалиги вазирлиги ҳамда Қорақалпоғистон Республикаси Вазирлар Кенгаши билан биргаликда уч ой муддатда ҳудуднинг тупроқ-иқлим шароитидан келиб чиқиб, мойли экинларнинг серҳосил, касаллик ва зараркунандаларга чидамли, маҳсулот сифати ва мойдорлик даражаси юқори бўлган нав ва дурагайлари селекцияси ҳамда уруғчилигини йўлга қўйиш бўйича мақсадли фундаментал ва амалий лойиҳалар танловини эълон қилсин.
11. Қорақалпоғистон қишлоқ хўжалиги ва агротехнологиялар институти ҳузуридаги «Мойли экинлар селекцияси, уруғчилиги ва агротехнологияси» ўқув-илмий марказининг тузилмаси 2-иловага мувофиқ тасдиқлансин.
12. Қуйидагилар:
а) Институт фаолиятини молиялаштириш манбалари этиб қуйидагилар белгилансин:
Ўзбекистон Республикаси Давлат бюджети маблағлари;
тўлов-контракт асосида ўқитишдан тушадиган маблағлар;
хўжалик фаолиятидан ва шартнома асосида хизматлар кўрсатишдан тушадиган тушумлар;
халқаро молия институтлари ва донор ташкилотларнинг техник кўмаги ва грантлари;
жисмоний ва юридик шахсларнинг ҳомийлик хайриялари;
Олдинги таҳрирга қаранг.
қонунчилик ҳужжатлари билан тақиқланмаган бошқа манбалар;
(12-банднинг «а» кичик банди еттинчи хатбошиси Ўзбекистон Республикаси Вазирлар Маҳкамасининг 2022 йил 4 апрелдаги 153-сонли қарори таҳририда — Қонунчилик маълумотлари миллий базаси, 05.04.2022 й., 09/22/153/0266-сон)
б) Марказ фаолиятини молиялаштириш манбалари этиб қуйидагилар белгилансин:
Ўзбекистон Республикаси Давлат бюджетидан давлат илмий-техник дастурлари доирасида бажариладиган мақсадли фундаментал, илмий-амалий ва инновацион лойиҳалар молиялаштириб борилишини таъминлаш учун ажратиладиган маблағлар;
хўжалик фаолиятидан ва шартнома асосида хизматлар кўрсатишдан тушадиган тушумлар;
халқаро молия институтлари ва донор ташкилотларнинг техник кўмаги ва грантлари;
жисмоний ва юридик шахсларнинг ҳомийлик хайриялари;
қонун ҳужжатлари билан тақиқланмаган бошқа манбалар.
13. Белгилаб қўйилсинки, Институтни сақлаш харажатлари 2021 йилда Ўзбекистон Республикасининг республика бюджетидан биринчи даражали бюджет маблағларини тақсимловчи сифатида Ўзбекистон Республикаси Қишлоқ хўжалиги вазирлигига ажратиладиган маблағлар доирасида амалга оширилади, 2022 йилдан бошлаб эса Ўзбекистон Республикаси Давлат бюджети параметрларида назарда тутилади.
14. Қорақалпоғистон Республикаси Вазирлар Кенгаши Институтга хориждан ва Ўзбекистон Республикасининг бошқа ҳудудларидан ишга таклиф этилган мутахассисларни турар жой билан таъминлаш мақсадида Нукус шаҳрида қурилаётган арзон уй-жойлардан имтиёзли шартлар асосида эҳтиёждан келиб чиққан ҳолда ажратилишини таъминласин.
15. Ўзбекистон Республикаси Қишлоқ хўжалиги вазирлиги, Қорақалпоғистон Республикаси Вазирлар Кенгашининг:
Институтга Тошкент давлат аграр университети Нукус филиалининг Қорақалпоғистон Республикаси, Нукус шаҳри, Қ. Абданбетов кўчасида жойлашган бино ва иншоотларини тегишли ҳудуди билан биргаликда оператив бошқарув ҳуқуқи асосида текин бериш, унинг ўқув ва лаборатория жиҳозлари, транспорт воситалари, қишлоқ хўжалиги техникалари, компьютер техникалари, ўқув адабиётлари ҳамда бошқа мол-мулкини топшириш;
Тошкент давлат аграр университети Нукус филиалининг барча талабаларини Институтнинг мос таълим йўналишлари ва мутахассисликларига ўтказиш ҳамда 2021/2022 ўқув йилидан бошлаб битирувчи курс талабаларига белгиланган тартибда Институт дипломини бериш;
бошқа ҳудудлардан ишга қабул қилинган профессор-ўқитувчиларни Институтда фаолият юритган даврида турар жой билан таъминлаш тўғрисидаги таклифлари маъқуллансин.
16. Мазкур қарорнинг бажарилишини назорат қилиш Ўзбекистон Республикаси Бош вазирининг аграр ва озиқ-овқат соҳаларини ривожлантириш масалалари бўйича ўринбосари Ш.М. Ғаниев, Ўзбекистон Республикаси қишлоқ хўжалиги вазири Ж.А. Ходжаев ҳамда Қорақалпоғистон Республикаси Вазирлар Кенгаши Раиси Қ.Р. Сариев зиммасига юклансин.
Ўзбекистон Республикасининг Бош вазири А. АРИПОВ
Тошкент ш.,
2021 йил 4 май,
275-сон
Вазирлар Маҳкамасининг
2021 йил 4 майдаги 275-сон қарорига
1-ИЛОВА
Қорақалпоғистон қишлоқ хўжалиги ва агротехнологиялар институти фаолиятини ташкил этиш бўйича
ЧОРА-ТАДБИРЛАР ДАСТУРИ

Т/р

Чора-тадбирлар номи

Бажариш муддати

Молиялаштириш манбалари

Бажариш учун масъуллар

I. Институт фаолиятини ташкил этиш

1.

Қорақалпоғистон қишлоқ хўжалиги ва агротехнологиялар институтининг устави ва тузилмасини ишлаб чиқиш, тасдиқлаш ҳамда давлат рўйхатидан ўтказиш.

Бир ой муддатда

-

Қишлоқ хўжалиги вазирлиги, Қорақалпоғистон Республикаси Вазирлар Кенгаши

2.

Институтда раҳбарлик фаолиятини (проректорлар, бўлим бошлиқлари, факультет деканлари) олиб бориш учун номзодлар рўйхатини шакллантириш.

2021 йил май

-

Қишлоқ хўжалиги вазирлиги, Қорақалпоғистон Республикаси Вазирлар Кенгаши

3.

Институтнинг 2021/2022 ўқув йилига мўлжалланган харажатлар сметасини, штатлар жадвалини ишлаб чиқиш ҳамда белгиланган тартибда тасдиқлаш.

2021 йил июнь

Ўзбекистон Республикаси Давлат бюджети параметрлари доирасида

Қишлоқ хўжалиги вазирлиги, Қорақалпоғистон Республикаси Вазирлар Кенгаши, тегишли вазирлик ва идоралар

II. Институтда 2021/2022 ўқув йилини самарали ташкил этиш

4.

2020/2021 ўқув йилидан бошлаб биринчи босқич талабаларини ўқитишда кредит-модуль тизимини босқичма-босқич жорий этиш.

2021/2022 ўқув йилидан бошлаб

-

Қишлоқ хўжалиги вазирлиги, Олий ва ўрта махсус таълим вазирлиги

5.

Талабаларнинг мустақил таълим олишлари учун масофавий электрон таълим платформасини ташкил этиш ҳамда электрон ахборот ресурс манбалари (тақдимотлар, тарқатма материаллар, маъруза матнлари, видео ва аудио дарслар) билан бойитиб бориш.

2021/2022 ўқув йили давомида

Институтнинг мазкур мақсадлар учун назарда тутилган бюджетдан ташқари маблағлари доирасида

Қишлоқ хўжалиги вазирлиги, Олий ва ўрта махсус таълим вазирлиги

6.

Институтнинг талабалари учун ўқув ва ишлаб чиқариш амалиётлари базасини яратиш мақсадида Институт мутахассис кадрларининг истеъмолчилари ҳисобланган ҳудудий ташкилотлар, кластерлар, кооперациялар, хўжалик бирлашмалари билан ишга жойлаштириш ва амалиётларни ташкил этиш бўйича ҳамкорлик шартномаларини тузиш ҳамда талабаларнинг амалиётларини замонавий технопаркларга ва илғор тажрибага эга ташкилотларда ташкил этиш.

Ўқув жараёни жадвали асосида

-

Қишлоқ хўжалиги вазирлиги, Қорақалпоғистон Республикаси Вазирлар Кенгаши, Қорақалпоғистон қишлоқ хўжалиги ва агротехнологиялар институти

7.

Институтнинг ахборот-ресурс марказини ўзбек ва қорақалпоқ тилидаги ўқув, илмий ва бадиий адабиётлар билан таъминлаш чораларини кўриш ҳамда етишмаётган ўқув адабиётларини, шунингдек, янги авлод дарсликлари ва ўқув қўлланмаларини яратиш режасини ишлаб чиқиш.

2021/2022 ўқув йили давомида

Институтнинг мазкур мақсадлар учун назарда тутилган бюджетдан ташқари маблағлари доирасида

Қишлоқ хўжалиги вазирлиги, Олий ва ўрта махсус таълим вазирлиги

8.

Қишлоқ хўжалиги соҳаси ривожланган хорижий давлатларнинг халқаро рейтингда етакчи олий таълим ва илмий ташкилотлари рўйхатини шакллантириш ҳамда улар билан ҳамкорлик алоқаларини ўрнатиш.

Доимий

-

Қишлоқ хўжалиги вазирлиги

9.

Институт профессор-ўқитувчилари илмий-тадқиқот ишлари ва амалий машғулотлар олиб бориши ва талабалар малакавий амалиётларини ўташи учун зарур шарт-шароитларни яратиш мақсадида соҳа корхоналарида ўқув-амалиёт марказларини ташкил этиш ҳамда уларнинг фаолиятини такомиллаштириш.

2022 йил февраль

-

Қишлоқ хўжалиги вазирлиги, Қорақалпоғистон Республикаси Вазирлар Кенгаши, Қорақалпоғистон қишлоқ хўжалиги ва агротехнологиялар институти

III. Институтнинг таълим хизматини кўрсатиш фаолиятини тизимли ташкил этиш ҳамда моддий-техник базасини мустаҳкамлаш бўйича амалга ошириладиган ишлар

Ўқув жараёни бўйича

10.

Ўқув жараёни ва қишлоқ хўжалигига рақамли технологияларни жорий этиш мақсадида тор ихтисосликлар бўйича хорижий давлатларнинг нуфузли олий таълим муассасалари ва илмий ташкилотларига институтнинг профессор-ўқитувчиларини малака ошириш ҳамда стажировка ўташ учун юбориш, шунингдек, қишлоқ хўжалигининг долзарб йўналишлари бўйича вебинар дарс машғулотларини ташкил этиш.

2021 — 2025 йиллар давомида келишув асосида

Институтнинг мазкур мақсадлар учун назарда тутилган бюджетдан ташқари маблағлари доирасида

Қишлоқ хўжалиги вазирлиги

11.

Замонавий технологиялар ва интерактив таълим усулларини ҳамда талабаларнинг мустақил ўқув ва амалий фаолиятини ривожлантириш орқали амалиёт ўташ, шунингдек, ўқитувчи ва талабанинг ўзаро масофавий ҳамкорлигини таъминлашга, уларда инновацион ва таҳлилий фикрлашни ривожлантиришга мўлжалланган модулли, объектга йўналтирилган ва динамик таълим муҳитини кенг жорий қилиш.

2021 — 2023 йиллар

Институтнинг мазкур мақсадлар учун назарда тутилган бюджетдан ташқари маблағлари доирасида

Қишлоқ хўжалиги вазирлиги, Олий ва ўрта махсус таълим вазирлиги

12.

Хорижий олимлар ва мутахассисларни жалб этган ҳолда, янги авлод дарсликлари ва ўқув қўлланмалари туркумини тайёрлаш ҳамда ахборот-ресурс маркази фондини доимий янгилаб бориш мақсадида Институтнинг харажатлар сметасига ўқув адабиётларини харид қилиш ҳамда чоп этиш, шунингдек, муаллифлар меҳнатини рағбатлантириш учун маблағлар ажратилишини назарда тутиш.

2021 — 2025 йиллар

Институтнинг мазкур мақсадлар учун назарда тутилган бюджетдан ташқари маблағлари доирасида

Қишлоқ хўжалиги вазирлиги

13.

Ҳудудларни ижтимоий-иқтисодий ривожлантириш дастурлари ҳамда қишлоқ хўжалигида олиб борилаётган кенг қамровли ислоҳотларни инобатга олган ҳолда, янги таълим йўналишлари ва мутахассисликлари бўйича кадрлар тайёрлаш юзасидан таклифлар тайёрлаш.

Ҳар йили 1 ноябрга қадар

-

Қишлоқ хўжалиги вазирлиги, Қорақалпоғистон Республикаси Вазирлар Кенгаши

Илмий-тадқиқот ишлари бўйича

14.

Институт ҳузуридаги «Мойли экинлар селекцияси, уруғчилиги ва етиштириш агротехнологиялари» ўқув-илмий марказининг моддий-техник базасини мустаҳкамлаш.

2021-2022 йиллар давомида

Давлат илмий-техник дастурларини амалга ошириш учун Инновацион ривожланиш вазирлиги томонидан ўтказиладиган танловлар асосида Ўзбекистон Республикаси Давлат бюджетидан ажратиладиган маблағлар

Қишлоқ хўжалиги вазирлиги, Инновацион ривожланиш вазирлиги, Қорақалпоғистон Республикаси Вазирлар Кенгаши

15.

Ҳар йили қишлоқ хўжалиги соҳасидаги олий таълим муассасаларининг иқтидорли битирувчиларини танлаш ва педагогик фаолиятга фаол жалб қилиш.

2022 — 2025 йиллар

-

Қишлоқ хўжалиги вазирлиги, Олий ва ўрта махсус таълим вазирлиги

16.

Қишлоқ хўжалиги вазирлиги тизимидаги илмий ташкилотлар Фанлар академиясининг илмий ташкилотлари билан биргаликда қўшма илмий-тадқиқотларни амалга ошириши ва илмий-методик ишланмаларни ишлаб чиқиши учун шароитлар яратиб бериш.

Доимий

Давлат илмий-техник дастурларини амалга ошириш учун Инновацион ривожланиш вазирлиги томонидан ўтказиладиган танловлар асосида Ўзбекистон Республикаси Давлат бюджетидан ажратиладиган маблағлар

Қишлоқ хўжалиги вазирлиги, Фанлар академияси, Қорақалпоғистон Республикаси Вазирлар Кенгаши

17.

Профессор-ўқитувчилар, илмий-тадқиқотчилар, талабаларнинг инновацион технологияларни яратиш ҳамда жорий этиш борасидаги ташаббускорлигини ва моддий манфаатдорлигини ошириш мақсадида давлат хусусий-шериклик шартлари асосида кичик инновацион ташкилотларни ташкил этиш.

2022 — 2025 йилларда

Ташаббускорларнинг маблағалари ҳисобидан

Қишлоқ хўжалиги вазирлиги, Инновацион ривожланиш вазирлиги, Қорақалпоғистон Республикаси Вазирлар Кенгаши

18.

Ҳудудларнинг тупроқ-иқлим шароитини яхшилашга доир муаммоларнинг ечимига қаратилган илмий лойиҳалар танловини эълон қилиш учун таклифлар тайёрлаш.

2021 йил июнь

Давлат илмий-техник дастурларини амалга ошириш учун Инновацион ривожланиш вазирлиги томонидан ўтказиладиган танловлар асосида Ўзбекистон Республикаси Давлат бюджетидан ажратиладиган маблағлар

Қишлоқ хўжалиги вазирлиги, Инновацион ривожланиш вазирлиги, Қорақалпоғистон Республикаси Вазирлар Кенгаши

19.

Институтнинг профессор-ўқитувчиларини ҳар йили Ўзбекистон ҳамда хорижий давлатларнинг етакчи таълим муассасалари ва илмий ташкилотларида, агрокластерларда, кооперацияларда, йирик ишлаб чиқариш корхоналарида стажировка ўташи бўйича чора-тадбирлар дастурини ишлаб чиқиш.

2021 йил ноябрь

-

Қишлоқ хўжалиги вазирлиги, Инновацион ривожланиш вазирлиги, «Эл-юрт умиди» жамғармаси, Қорақалпоғистон Республикаси Вазирлар Кенгаши

Маънавий-маърифий ишлар бўйича

20.

Ўзбекистон Республикаси Президенти томонидан илгари сурилган 5 ташаббусни амалиётга кенг жорий этиш:

1-ташаббус бўйича — талаба ёшларни мусиқа ва санъатга жалб қилиш, уларда эстетик дид ва касбий этикани шакллантириш мақсадида танловлар, кўргазмалар, санъат ва маданият масканларида очиқ дарслар ўтказиш, театр ва музейларга ташрифларни уюштириш, иқтидорли талабалардан ташкил топган «Ёш ҳаваскорлар» ашула ва рақс ансамблини тузиш;

2-ташаббус бўйича — спорт мажмуаларида тўгараклар фаолиятини самарали ташкил этиш ва уларга талаба қизларни янада кенгроқ жалб қилиш, талабаларнинг қизиқиш ва таклифлари асосида янги спорт тўгаракларини очиш, «Саломатлик сари мустаҳкам қадам» акцияси ва спорт турлари бўйича олий таълим муассасалариаро уч босқичли ўйинларни ўтказиш;

3-ташаббус бўйича — талаба ёшларда Интернет жаҳон ахборот тармоғидан тўғри фойдаланиш маданиятини ривожлантириш мақсадида уларнинг қизиқишлари бўйича клублар, компьютер технологиялари, лойиҳа ва дастурлаш бўйича компьютер дастурлари, интернет саводхонлиги тўгараклари, онлайн-викториналар, IT-олимпиадалар ташкил этиш, таълим фаолияти билан боғлиқ электрон дастурлар, QR-код электрон кутубхоналар жорий этиш;

4-ташаббус бўйича — талаба ёшларни бадиий адабиётга қизиқтириш, уларда ватанпарварлик, ватан тақдирига дахлдорлик, фидойилик туйғусини тарбиялаш мақсадида «Бир талабага — бир китоб» акцияси, «Энг фаол китобхон» танлови, «Ёш адабиётчилар» клубларини, турли мавзулардаги танловларни ташкил этиш;

5-ташаббус бўйича — талаба қизларнинг ижтимоий фаоллигини ошириш мақсадида уларнинг бўш вақтини мазмунли ташкил этиш, «Бизнес леди» мактаби (бизнес режа тузишга ўргатиш), «Тадбиркор талаба» клуби, «Оила мактаби» тренинглари, тикувчилик, каштачилик, миллий ҳунармандчилик курсларини йўлга қўйиш, қизларни ички салоҳиятини очишга кўмаклашадиган ижодий ва фан тўгаракларини ташкил қилиш.

2021/2022 ўқув йилидан бошлаб доимий

Институтнинг мазкур мақсадлар учун назарда тутилган бюджетдан ташқари маблағлари доирасида, ҳомийлик маблағлари ҳисобидан

Қишлоқ хўжалиги вазирлиги, Қорақалпоғистон Республикаси Вазирлар Кенгаши

21.

Институтда таҳсил олаётган иқтидорли талабаларнинг Ўзбекистон Президенти ва номдор стипендияларга эълон қилинган танловларда ҳамда республика ва халқаро танловларда иштирокини таъминлаш.

2021/2022 ўқув йилидан бошлаб

-

Қишлоқ хўжалиги вазирлиги, Олий ва ўрта махсус таълим вазирлиги, Қорақалпоғистон Республикаси Вазирлар Кенгаши

Халқаро ҳамкорлик бўйича

22.

Хорижий ҳамкорлар билан биргаликда қишлоқ хўжалиги соҳаси бўйича кадрларни тайёрлаш борасида қўшма таълим дастурларини (double degree) амалга ошириш, ўқув-таълим жараёнига хорижий олимлар ва мутахассисларни фаол жалб қилиш ҳамда илмий-тадқиқот ишларини олиб бориш бўйича ҳамкорлик алоқаларини кенгайтириш.

2021 йилдан бошлаб доимий

Халқаро молия институтлари маблағлари ва хорижий донор ташкилотлари грантлари

Қишлоқ хўжалиги вазирлиги, Олий ва ўрта махсус таълим вазирлиги, Ташқи ишлар вазирлиги, Қорақалпоғистон Республикаси Вазирлар Кенгаши

23.

Истиқболли битирувчиларни республика ва хорижий давлатларнинг етакчи олий таълим муассасалари ва илмий ташкилотларига магистратура ва докторантурага мунтазам юбориш орқали Институтнинг илмий-педагогик салоҳиятини ошириш.

2021 — 2025 йиллар

«Эл-юрт умиди» жамғармаси

«Эл-юрт умиди» жамғармаси, Қишлоқ хўжалиги вазирлиги, Ташқи ишлар вазирлиги, Қорақалпоғистон Республикаси Вазирлар Кенгаши

Вазирлар Маҳкамасининг
2021 йил 4 майдаги 275-сон қарорига
2-ИЛОВА
Қорақалпоғистон қишлоқ хўжалиги ва агротехнологиялар институти ҳузуридаги «Мойли экинлар селекцияси, уруғчилиги ва етиштириш агротехнологиялари» ўқув-илмий марказининг
ТУЗИЛМАСИ

Директор

Илмий-техник
кенгаш*

Директорнинг ўқув, илмий ишланмалар
ва ишлаб чиқариш бўйича ўринбосари

Мойли экинларни етиштиришда
сув ва ресурстежамкор
инновацион технологияларни
жорий этиш бўлими

2

Ўсимликларни ҳимоя қилишда
инновацион технологияларни
жорий этиш бўлими

2

Мойли экинларнинг янги
навларини синаш, селекцияси
ва уруғчилигиниташкил этиш
бўлими

2

Малака ошириш ҳамда ўқув
курсларини ташкил этиш
бўлими

2

Илмий тадқиқотларни молиялаштириш
ва тижоратлаштириш бўйича
мутахассис

1

* Илмий-техник кенгаш таркибига кластерлар, кооперациялар, фермер хўжаликлари фаолиятини такомиллаштириш, мавжуд муаммоларни илмий асосда ҳал этиш мақсадида илмий-тадқиқот ва олий таълим муассасаларининг етакчи илмий-педагог ходимлари ҳамда ишлаб чиқариш соҳасидаги тажрибали мутахассислар қўшимча тарзда жалб этилади.
(Қонун ҳужжатлари маълумотлари миллий базаси, 05.05.2021 й., 09/21/275/0415-сон, Қонунчилик маълумотлари миллий базаси, 05.04.2022 й., 09/22/153/0266-сон)