1.06.00.00.00 Ижтимоий таъминот ва ижтимоий суғурта тўғрисидаги қонунчилик. Ижтимоий ҳимоя / 06.06.00.00 Пенсиялар / 06.06.17.00 Ногиронликни белгилаш;
2.06.00.00.00 Ижтимоий таъминот ва ижтимоий суғурта тўғрисидаги қонунчилик. Ижтимоий ҳимоя / 06.10.00.00 Ногиронлар ва фуқароларнинг бошқа тоифаларининг ижтимоий ҳимояси]
[ТСЗ:
1.Ижтимоий-маданий масалалар / Ижтимоий суғурта, ижтимоий таъминот ва ижтимоий ҳимоя]
Ўзбекистон Республикаси Вазирлар Маҳкамасининг
қарори
Ўзгалар парваришига муҳтож бўлган ёлғиз кексалар ва ногиронлиги бўлган шахсларнинг рўйхатини шакллантириш тартиби тўғрисида низомни тасдиқлаш ҳақида
LexUZ шарҳи
Мазкур қарор Ўзбекистан Республикаси Вазирлар Маҳкамасининг 2024 йил 11 мартдаги 123-сонли «Ўзгалар парваришига муҳтож шахсларга ижтимоий хизмат ва ёрдам кўрсатишнинг сифат жиҳатидан янги тизимини жорий этиш тўғрисида»ги қарорига асосан ўз кучини йўқотган.
Ўзбекистон Республикаси Президентининг «Маҳалла институтини янада такомиллаштириш чора-тадбирлари тўғрисида» 2017 йил 3 февралдаги ПФ-4944-сон Фармони ижросини таъминлаш, аҳолининг ижтимоий эҳтиёжманд тоифаларини аниқлаш ҳамда уларни ижтимоий қўллаб-қувватлаш бўйича фуқароларнинг ўзини ўзи бошқариш, соғлиқни сақлаш ва молия органлари ҳамкорлигини янада мустаҳкамлаш мақсадида Вазирлар Маҳкамаси қарор қилади:
1. Ўзгалар парваришига муҳтож бўлган ёлғиз кексалар ва ногиронлиги бўлган шахсларнинг рўйхатини шакллантириш тартиби тўғрисида низом иловага мувофиқ тасдиқлансин.
2. Аҳолининг ижтимоий эҳтиёжманд тоифаларига қонун ҳужжатларида белгиланган тартибда кўрсатилаётган ижтимоий хизматлар мониторинги Ўзбекистон Республикаси Президенти ҳузуридаги Ижтимоий ҳимоя миллий агентлиги, Қорақалпоғистон Республикаси Вазирлар Кенгаши, вилоятлар ва Тошкент шаҳри ҳокимликлари Фуқароларнинг ўзини ўзи бошқариш органлари фаолиятини мувофиқлаштириш бўйича республика кенгаши, Иқтисодиёт ва молия вазирлиги ҳамда бошқа манфаатдор вазирликлар ва идоралар билан биргаликда олиб борилади.
Белгилаб қўйилсинки, ҳудудда истиқомат қилувчи фуқароларга қонун ҳужжатларига мувофиқ ижтимоий ҳимоя қилиш бўйича амалга оширилаётган чора-тадбирлар доирасида фуқароларнинг ўзини ўзи бошқариш органлари томонидан юборилган сўровларига белгиланган тартибда тегишли маълумотлар тақдим этилиши учун туман (шаҳар) «Инсон» ижтимоий хизматлар маркази масъулдирлар.
(2-банд Ўзбекистон Республикаси Вазирлар Маҳкамасининг 2023 йил 15 декабрдаги 665-сонли қарори таҳририда — Қонунчилик маълумотлари миллий базаси, 18.12.2023 й., 09/23/665/0942-сон)
3. Фуқароларнинг ўзини ўзи бошқариш органлари фаолиятини мувофиқлаштириш бўйича республика кенгаши, Ўзбекистон Республикаси Молия вазирлиги, Соғлиқни сақлаш вазирлиги ҳамда Бандлик ва меҳнат муносабатлари вазирлиги:
аҳолининг ижтимоий эҳтиёжманд тоифаларини қўллаб-қувватлаш, уларга ижтимоий хизматлар кўрсатиш йўналишидаги фаолиятларини мувофиқлаштириш юзасидан ҳамкорликни янада кучайтирсинлар;
ҳар йил якунига кўра фуқаролар йиғинида (фуқаролар вакилларининг йиғилишида) аҳолини ижтимоий ҳимоя қилиш соҳасида амалга оширилган ишлар юзасидан тегишли тармоқларнинг ҳисоботларини эшитиш, йўл қўйилган хато ва камчиликларни муҳокама қилиш ҳамда уларни бартараф этиш тўғрисида ҳамкорликда чора-тадбирлар ишлаб чиқиш амалиётини жорий этсинлар.
4. Вазирликлар ва идоралар ўзлари қабул қилган норматив-ҳуқуқий ҳужжатларни бир ой муддатда ушбу қарорга мувофиқлаштирсинлар.
5. Мазкур қарорнинг бажарилишини назорат қилиш Ўзбекистон Республикаси Бош вазирининг ўринбосари ― Ўзбекистон Республикаси молия вазири Ж.А. Қўчқоров, Ўзбекистон Республикаси соғлиқни сақлаш вазири А.К. Шадманов зиммасига юклансин.
Ўзбекистон Республикасининг Бош вазири А. АРИПОВ
Тошкент ш.,
2018 йил 5 апрель,
264-сон
Вазирлар Маҳкамасининг 2018 йил 5 январдаги 264-сон қарорига ИЛОВА
Ўзгалар парваришига муҳтож бўлган ёлғиз кексалар ва ногиронлиги бўлган шахсларнинг рўйхатини шакллантириш тартиби тўғрисида
НИЗОМ
1-боб. Умумий қоидалар
1. Ушбу Низом ўзгалар парваришига муҳтож бўлган ёлғиз кексалар ва ногиронлиги бўлган шахсларнинг рўйхатини шакллантириш тартибини белгилайди.
2. Ўзгалар парваришига муҳтож бўлган ёлғиз кексалар ва ногиронлиги бўлган шахсларнинг рўйхатини шакллантиришда ва уларни ижтимоий қўллаб-қувватлашни ташкил этишда қуйидаги асосий тамойилларга амал қилинади:
қонунийлик;
инсонпарварлик;
профилактик йўналтирилганлик;
аниқ йўналтирилганлик ва индивидуал ёндашув;
ижтимоий адолат.
3. Ўзгалар парваришига муҳтож бўлган ёлғиз кексалар ва ногиронлиги бўлган шахслар қуйидагича аниқланади:
уйма-уй юриш чоғида;
жисмоний ва юридик шахслар томонидан берилган ахборот асосида;
ижтимоий хизматларга муҳтож шахс мустақил равишда мурожаат этганда.
4. Ижтимоий қўллаб-қувватлашга муҳтож бўлган кам таъминланган оилалар рўйхатини шакллантириш ва уларни ижтимоий қўллаб-қувватлаш Ўзбекистон Республикаси Вазирлар Маҳкамасининг 2013 йил 15 февралдаги 44-сон қарори билан тасдиқланган Кам таъминланган оилаларга ижтимоий нафақалар ва моддий ёрдам тайинлаш ва тўлаш тартиби тўғрисидаги Низом асосида амалга оширилади.
2-боб. Ўзгалар парваришига муҳтож бўлган ёлғиз кексалар ва ногиронлиги бўлган шахсларнинг рўйхатини шакллантириш тартиби
5. Ўзгалар парваришига муҳтож бўлган ёлғиз кексалар ва ногиронлиги бўлган шахсларнинг рўйхатини шакллантириш ушбу Низомга 1-иловага мувофиқ схема бўйича амалга оширилади.
6. Туман (шаҳар) «Инсон» ижтимоий хизматлар маркази:
а) фуқароларнинг ўзини ўзи бошқариш органлари билан биргаликда уйма-уй юриш чоғида тўпланган ахборотга асосан ўзгалар парваришига муҳтож бўлган ёлғиз кексалар ва ногиронлиги бўлган шахсларни аниқлаб, уларнинг рўйхатини тузади ва тасдиқлайди.
Ушбу рўйхатга ижтимоий қўллаб-қувватлашга муҳтож шахс, унинг оила аъзоси ёки ваколатли вакили мурожаати ёхуд жисмоний ва юридик шахслар томонидан берилган ахборот асосида ҳам қўшимча киритилади;
б) рўйхат асосида тегишли штат бирликлари, ижтимоий хизмат харажатларининг ҳисоб-китобини ҳар ой якуни бўйича ишлаб чиқиб, Ўзбекистон Республикаси Президенти ҳузуридаги Ижтимоий ҳимоя миллий агентлигининг ҳудудий бошқармасига (кейинги ўринларда — Ҳудудий бошқарма) юборади.
(6-банд Ўзбекистон Республикаси Вазирлар Маҳкамасининг 2023 йил 15 декабрдаги 665-сонли қарори таҳририда — Қонунчилик маълумотлари миллий базаси, 18.12.2023 й., 09/23/665/0942-сон)
(7-банд Ўзбекистон Республикаси Вазирлар Маҳкамасининг 2023 йил 15 декабрдаги 665-сонли қарорига асосан ўз кучини йўқотган — Қонунчилик маълумотлари миллий базаси, 18.12.2023 й., 09/23/665/0942-сон)
(8-банд Ўзбекистон Республикаси Вазирлар Маҳкамасининг 2023 йил 15 декабрдаги 665-сонли қарорига асосан ўз кучини йўқотган — Қонунчилик маълумотлари миллий базаси, 18.12.2023 й., 09/23/665/0942-сон)
(9-банд Ўзбекистон Республикаси Вазирлар Маҳкамасининг 2023 йил 15 декабрдаги 665-сонли қарорига асосан ўз кучини йўқотган — Қонунчилик маълумотлари миллий базаси, 18.12.2023 й., 09/23/665/0942-сон)
10. Ҳудудий бошқарма тақдим этилган рўйхатлар ва ҳисоб-китоблар асосида туман (шаҳар) «Инсон» ижтимоий хизматлар марказларидаги ижтимоий ходим ассистентларининг тегишли штат бирликларини ва харажатларини белгиланган тартибда кўриб чиқади ва ҳар йили 1 апрелга қадар рўйхатдан ўтказиш учун Ўзбекистон Республикаси Президенти ҳузуридаги Ижтимоий ҳимоя миллий агентлигига тақдим этади.
(10-банднинг биринчи хатбошиси Ўзбекистон Республикаси Вазирлар Маҳкамасининг 2023 йил 15 декабрдаги 665-сонли қарори таҳририда — Қонунчилик маълумотлари миллий базаси, 18.12.2023 й., 09/23/665/0942-сон)
Йил давомида ўзгалар парваришига муҳтож бўлган ёлғиз кексалар ва ногиронлиги бўлган шахслар рўйхатига қўшимчалар киритилганда, харажатларнинг молиялаштириш манбаи аниқлангандан сўнг, уч иш куни мобайнида харажатлар сметасига ўзгартириш киритилади.
11. Туман (шаҳар) «Инсон» ижтимоий хизматлар маркази рўйхатдан ўтказилган харажатлар сметаси доирасида белгиланган тартибда тегишли ижтимоий хизматлар кўрсатади.
(11-банд Ўзбекистон Республикаси Вазирлар Маҳкамасининг 2023 йил 15 декабрдаги 665-сонли қарори таҳририда — Қонунчилик маълумотлари миллий базаси, 18.12.2023 й., 09/23/665/0942-сон)
3-боб. Ногиронлиги бўлган шахсларнинг рўйхатини шакллантириш тартиби
12. Ногиронлиги бўлган шахсларнинг рўйхатини шакллантириш ушбу Низомга 2-иловага мувофиқ схема бўйича амалга оширилади.
13. Туман (шаҳар) тиббиёт бирлашмаси участка врачи уйма-уй юриш чоғида аниқлаган, касалликка чалинган шахсларга даволаш-профилактика муассасасининг тегишли мутахассисларига бир иш куни мобайнида йўлланма беради.
Ушбу йўлланмани туман (шаҳар) тиббиёт бирлашмаси участка врачи касалликка чалинган шахс, унинг оила аъзоси ёки ваколатли вакили мурожаати ёхуд жисмоний ва юридик шахслар томонидан берилган ахборот асосида ҳам касалликка чалинган шахсларга даволаш-профилактика муассасасининг тегишли мутахассисларига йўлланма бериши мумкин.
14. Даволаш-профилактика муассасасидаги тегишли мутахассис касалликка чалинган шахсни касаллик туридан келиб чиқиб, бир ой мобайнида белгиланган тартибда Тиббий-маслаҳат комиссиясига касалликка чалинган шахснинг ҳужжатларини тайёрлаб юборади.
15. Тиббий-маслаҳат комиссияси раиси ёки масъул шахси касалликка чалинган шахснинг ҳужжатларини касаллик турига кўра белгиланган муддатларда расмийлаштириб, туман, туманлараро, шаҳар ва ихтисослаштирилган тиббий-ижтимоий эксперт комиссияларига (кейинги ўринларда ТИЭК деб аталади) такдим этади.
(15-банд Ўзбекистон Республикаси Вазирлар Маҳкамасининг 2022 йил 8 февралдаги 62-сонли қарори таҳририда — Қонунчилик маълумотлари миллий базаси, 08.02.2022 й., 09/22/62/0111-сон)
16. ТИЭКлар ҳужжатлар қабул қилинган кундан бошлаб икки ҳафта мобайнида ногиронлик гуруҳи, сабаби ва муддатини белгилайди.
ТИЭК маълумотноманинг бир қисмини ногиронлиги бўлган шахсга ёки унинг вакилига, иккинчи қисмини Молия вазирлиги ҳузуридаги бюджетдан ташқари Пенсия жамгармасига ўн кун мобайнида такдим этади.
(16-банд Ўзбекистон Республикаси Вазирлар Маҳкамасининг 2022 йил 8 февралдаги 62-сонли қарори таҳририда — Қонунчилик маълумотлари миллий базаси, 08.02.2022 й., 09/22/62/0111-сон)
17. Ногиронлиги бўлган шахсларнинг кўрик ишларидаги маълумотлари уч иш куни мобайнида «ТИЭК дастури»га тегишли ТИЭК врач-эксперти ва ҳамшираси томонидан киритилади.
«ТИЭК дастури» бўйича ногиронлиги бўлган шахслар рўйхати ҳар ойда бир марта шакллантирилади.
(17-банд Ўзбекистон Республикаси Вазирлар Маҳкамасининг 2022 йил 8 февралдаги 62-сонли қарори таҳририда — Қонунчилик маълумотлари миллий базаси, 08.02.2022 й., 09/22/62/0111-сон)
18. Молия вазирлиги ҳузуридаги Бюджетдан ташқари Пенсия жамғармасининг тегишли туман (шаҳар) бўлими томонидан ногиронлиги бўлган шахс ёки унинг ваколатли вакилининг ногиронлик пенсияси (нафақа) олиш учун аризаси ва пенсия тайинлаш тўғрисидаги ҳужжатлари тақдим этилгандан сўнг ўн кундан кечиктирмасдан пенсия тайинлаш масаласи кўриб чиқилади.
Пенсия тайинлаш рад этилган тақдирда, тегишли қарор чиқарилгандан кейин беш кун мобайнида аризачига ёки унинг ваколатли вакилига пенсия тайинлаш рад этилгани ҳақида рад этиш сабаблари ва шикоят бериш тартиби кўрсатилган хабарномани беради ёки жўнатади ҳамда айни чоғда барча ҳужжатларни қайтаради.
4-боб. Якунловчи қоида
19. Мазкур Низом талаблари бузилишида айбдор бўлган шахслар қонун ҳужжатларига мувофиқ жавоб берадилар.
Ўзгалар парваришига муҳтож бўлган ёлғиз кексалар ва ногиронлиги бўлган шахсларнинг рўйхатини шакллантириш тартиби тўғрисида низомга
1-ИЛОВА
Ўзгалар парваришига муҳтож бўлган ёлғиз кексалар ва ногиронлиги бўлган шахсларнинг рўйхатини шакллантириш
СХЕМАСИ
Босқичлар
Субъектлар
Тадбирлар
Муддатлар
1-босқич
Туман (шаҳар) «Инсон» ижтимоий хизматлар маркази
1. Фуқароларнинг ўзини ўзи бошқариш органлари билан биргаликда уйма-уй юриш чоғида тўпланган ахборотга асосан ўзгалар парваришига муҳтож бўлган ёлғиз кексалар ва ногиронлиги бўлган шахсларни аниқлаб, рўйхатини шакллантиради ва тасдиқлайди.
1. Тақдим этилган рўйхатлар ва ҳисоб-китоблар асосида туман (шаҳар) «Инсон» ижтимоий хизматлар марказининг тегишли штат бирликлари ва харажатларини белгиланган тартибда кўриб чиқади ва тасдиқлайди ҳамда рўйхатдан ўтказиш учун Агентликка тақдим этади.
Ҳар йилнинг 1 апрелига қадар
2. Йил давомида ўзгалар парваришига муҳтож бўлган ёлғиз кексалар ва ногиронлиги бўлган шахслар рўйхатига қўшимчалар киритилганда, харажатларнинг молиялаштириш манбаи аниқлангандан сўнг харажатлар сметасига ўзгартириш киритади.
Уч иш куни мобайнида
3-босқич
Туман (шаҳар) «Инсон» ижтимоий хизматлар маркази
Рўйхатдан ўтказилган харажатлар сметаси доирасида тегишли ижтимоий хизматлар кўрсатади.
Белгиланган тартибда
(1-илованинг матни Ўзбекистон Республикаси Вазирлар Маҳкамасининг 2023 йил 15 декабрдаги 665-сонли қарори таҳририда — Қонунчилик маълумотлари миллий базаси, 18.12.2023 й., 09/23/665/0942-сон)
Ўзгалар парваришига муҳтож бўлган ёлғиз кексалар ва ногиронлиги бўлган шахсларнинг рўйхатини шакллантириш тартиби тўғрисида низомга 2-ИЛОВА
Ногиронлиги бўлган шахсларнинг рўйхатини шакллантириш
Тиббий-маслаҳат комиссияси раиси ёки масъул шахси касалликка чалинган шахснинг ҳужжатларини расмийлаштириб, туман, туманлараро, шаҳар ва ихтисослаштирилган Тиббий-ижтимоий эксперт комиссиялари (ТИЭК)га тақдим этади.
Касаллик турига кўра белгиланган муддатларда
Тиббий-меҳнат эксперт комиссиялари
ТИЭКлар ҳужжатлар қабул қилинган кундан бошлаб ногиронлик гуруҳи, сабаби ва муддатини белгилайди.
Икки ҳафта мобайнида
ТИЭК маълумотноманинг бир қисмини ногиронлиги бўлган шахсга ёки унинг вакилига, иккинчи қисмини Молия вазирлиги ҳузуридаги бюджетдан ташқари Пенсия жамғармасига тақдим этади.
Ўн кун мобайнида
Ногиронлиги бўлган шахсларнинг кўрик ишларидаги маълумотлари «ТИЭК дастури»га тегишли ТИЭК врач-эксперти ва ҳамшираси томонидан киритилади.
Уч иш куни мобайнида
«ТИЭК дастури» бўйича ногиронлиги бўлган шахслар рўйхати шакллантирилади.
Ногиронлиги бўлган шахс ёки унинг ваколатли вакилининг ногиронлик пенсияси (нафақа) олиш учун аризаси ва пенсия тайинлаш тўғрисидаги ҳужжатлари тақдим этилгандан сўнг пенсия тайинлаш масаласи кўриб чиқилади.
Ўн кундан кечиктирмасдан
Пенсия тайинлаш рад этилган тақдирда. тегишли қарор чиқарилгандан кейин пенсия тайинлаш рад этилгани ҳақида рад этиш сабаблари ва шикоят бериш тартиби кўрсатилган хабарномани аризачига ёки унинг ваколатли вакилига беради ёки жўнатади ҳамда айни чоғда барча ҳужжатларни қайтаради.
Беш кун мобайнида
(2-илова Ўзбекистон Республикаси Вазирлар Маҳкамасининг 2022 йил 8 февралдаги 62-сонли қарори таҳририда — Қонунчилик маълумотлари миллий базаси, 08.02.2022 й., 09/22/62/0111-сон)
(Қонун ҳужжатлари маълумотлари миллий базаси, 05.04.2018 й., 09/20/264/0830-сон; Қонунчилик маълумотлари миллий базаси, 08.02.2022 й., 09/22/62/0111-сон; 18.12.2023 й., 09/23/665/0942-сон)
LexUZ шарҳи