Ўзбекистон Республикаси Президентининг
Қарори
«Tashkent Pharma Park» инновацион илмий-ишлаб чиқариш фармацевтика кластерини ташкил этиш тўғрисида
Инновацион ва юқори сифатли дори воситаларини, тиббий буюмлар ва тиббий техника воситаларини ишлаб чиқаришни ташкил этиш, аҳолининг ушбу маҳсулотларга бўлган эҳтиёжини қондириш, фармацевтика соҳаси мутахассисларини халқаро таълим стандартлари асосида ва талаб юқори бўлган мутахассисликлар бўйича тайёрлашни, фармацевтика таълимининг халқаро илмий ҳамжамият тизимига изчил интеграциялашувини таъминлаш ва республикада фармацевтика тармоғини янада ривожлантириш мақсадида:
Олдинги таҳрирга қаранг.
1. Ўзбекистон Республикаси Инвестициялар ва ташқи савдо вазирлиги, Соғлиқни сақлаш вазирлиги, Иқтисодиёт ва саноат вазирлиги, Олий ва ўрта махсус таълим вазирлиги, Тошкент вилояти ҳокимлигининг Тошкент вилояти Зангиота туманида «Tashkent Pharma Park» инновацион илмий-ишлаб чиқариш фармацевтика кластерини (кейинги ўринларда — Кластер) ташкил этиш тўғрисидаги таклифи қабул қилинсин.
(1-банд Ўзбекистон Республикаси Президентининг 2022 йил 21 январдаги ПФ-55-сонли Фармони таҳририда — Қонунчилик маълумотлари миллий базаси, 22.01.2022 й., 06/22/55/0055-сон)
2. Белгилансинки, Кластер ўз ичига қуйидагиларни ташкил этишни қамраб олади:
а) қуйидагилардан иборат ўз инфратузилмасига эга бўлган Фармацевтика техник университети (кейинги ўринларда — Университет):
илмий-тадқиқот марказлари ва лабораториялар;
ўқув-илмий лабораториялари ва виварийлар;
фармакопея маркази;
меҳмонхонага эга симпозиумлар маркази;
талабалар, ўқитувчилар ва чет эллик ходимлар учун турар жой;
спорт-соғломлаштириш мажмуаси, сув ҳавзаси ва стадион;
б) инновацион дори воситалари, тиббий буюмлар ва тиббий техникалар ишлаб чиқаришга мўлжалланган ишлаб чиқариш майдонларидан иборат саноат зонаси (кейинги ўринларда — саноат зонаси).
3. Қуйидагилар:
а) Кластернинг асосий вазифалари ва фаолият йўналишлари этиб белгилансин:
халқаро тажрибани қўллаган ҳолда инновацион ечимлар (ноу-хау) ва юқори технологияларни жорий этиш орқали республиканинг фармацевтика тармоғини ривожлантириш;
фармацевтика тармоғида талаб юқори бўлган мутахассисликлар бўйича халқаро ўқитиш дастурларига мувофиқ малакали кадрлар тайёрлаш учун ихтисослаштирилган таълим инфратузилмасини яратиш;
халқаро инновацион тизимга интеграциялашиш, замонавий ўқув-лабораториялари ва илмий-тадқиқот марказлари, шунингдек, инновацион инфратузилмани яратиш орқали илмий-тадқиқот базасини ривожлантириш;
инновацион ва юқори сифатли дори воситалари, тиббий буюмлар ва тиббий техникани ишлаб чиқаришга мўлжалланган замонавий рақобатбардош ишлаб чиқаришларни ташкил этиш учун, шу жумладан хорижий фармацевтика компанияларининг инвестициялари ва илғор технологияларини жалб қилиш;
илмий-таълим ва тадқиқот марказларининг илмий-техник ва инновацион дастурлар, танловлар ҳамда грантларда иштирок этиши учун шарт-шароитларни таъминлаш;
тажриба ва маълумотларнинг доимий алмашинувини ташкил этиш орқали хорижнинг ушбу йўналишдаги илмий-тадқиқот марказлари билан ҳамкорликни йўлга қўйиш, халқаро тадқиқот дастурлари, анжуманлар ва симпозиумларда амалий иштирок этишни таъминлаш;
б) Университетнинг асосий вазифалари ва фаолият йўналишлари этиб белгилансин:
дори воситалари, тиббий буюмлар ва тиббий техника ишлаб чиқариш, косметология, тармоқ ва бизнесни бошқариш соҳаларида халқаро таълим стандартларига мувофиқ малакали кадрлар тайёрлаш;
фармацевтика тармоғида кадрлар тайёрлаш тизимини такомиллаштириш ва модернизация қилишга йўналтирилган инновацион ва самарали таълим дастурлари ва ўқитиш шаклларини жорий этиш;
таълим ва фаннинг узлуксизлиги ва узвийлиги, шунингдек, уларнинг жаҳон таълими ва илмий ҳамжамиятга интеграциялашуви ҳисобига мутахассислар ва илмий-педагогик кадрларни қайта тайёрлаш ва уларнинг малакасини оширишни амалга ошириш;
фармацевтика таълими, фан ва ишлаб чиқаришнинг яқин интеграцияси учун шарт-шароитлар яратиш;
фармация, биотехнология, биофармация, фармацевтика тармоғи учун дори воситалари, тиббий буюмлар ва тиббий техникалар ишлаб чиқиш ҳамда уларни қўллаш соҳасида фундаментал ва амалий тадқиқотлар ўтказиш;
хорижий мамлакатларнинг етакчи таълим муассасалари, илмий-тадқиқот марказлари ва ишбилармон доиралари билан узоқ муддатли алоқаларни ривожлантириш ва мустаҳкамлаш.
Иқтисодий ҳамкорлик ва тараққиёт жамғармаси (EDCF) линиялари бўйича Корея Республикаси Ҳукуматининг узоқ муддатли имтиёзли кредитларини жалб қилиш орқали ўз инфратузилмасига эга бўлган Университетни ташкил этиш тўғрисида дастлабки келишувга эришилганлиги маълумот учун қабул қилинсин.
4. Қуйидагилар:
«Tashkent Pharma Park» инновацион илмий-ишлаб чиқариш фармацевтика кластерини ташкил этиш концепцияси 1-иловага мувофиқ;
«Tashkent Pharma Park» инновацион илмий-ишлаб чиқариш фармацевтика кластерини ташкил этиш бўйича амалий чора-тадбирлар режаси 2-иловага мувофиқ;
Олдинги таҳрирга қаранг.
(4-банднинг тўртинчи хатбошиси Ўзбекистон Республикаси Президентининг 2024 йил 10 январдаги ПҚ-14-сонли қарорига асосан чиқарилган — Қонунчилик маълумотлари миллий базаси, 11.01.2024 й., 07/24/14/0015-сон)
«Tashkent Pharma Park» инновацион илмий-ишлаб чиқариш фармацевтика кластери ҳудудида транспорт, муҳандислик-коммуникация ва ишлаб чиқариш инфратузилмасини ривожлантириш дастури 4-иловага мувофиқ тасдиқлансин.
5. Қуйидагилар:
«Tashkent Pharma Park» инновацион илмий-ишлаб чиқариш фармацевтика кластерининг васийлик кенгаши 5-иловага мувофиқ таркибда;
Давлат муассасаси шаклидаги «Tashkent Pharma Park» инновацион илмий-ишлаб чиқариш фармацевтика кластерини ривожлантириш дирекцияси (кейинги ўринларда — Дирекция) ташкил этилсин.
Белгилансинки, Дирекция фаолиятини мувофиқлаштириш Ўзбекистон Республикаси Соғлиқни сақлаш вазирлиги ҳузуридаги Фармацевтика тармоғини ривожлантириш агентлиги (кейинги ўринларда — Агентлик) томонидан амалга оширилади.
6. Қуйидагилар:
а) Васийлик кенгашининг асосий вазифалари этиб белгилансин:
Кластер ҳудудида инвестиция лойиҳаларини амалга оширишда давлат органлари фаолиятини мувофиқлаштириш;
илмий-техник ишланмаларни молиялаштириш ва стратегик лойиҳаларни амалга ошириш учун халқаро грантларни жалб қилишда кўмаклашиш;
Кластернинг илмий-тадқиқот ва таълим салоҳиятини ривожлантириш йўналишларини белгилаш;
Университетнинг моддий-техник базасини мустаҳкамлашга, уни замонавий ўқув-лаборатория ва тажриба-саноат ускуналари билан жиҳозлашга кўмаклашиш;
мазкур қарор билан белгиланган вазифалар Дирекция томонидан бажарилишини мониторинг қилиш;
б) Дирекциянинг асосий вазифалари этиб белгилансин:
илғор хорижий тажрибани, Кластерни халқаро ҳамжамиятга интеграция қилишни инобатга олган ҳолда уни ривожлантириш, шунингдек, Кластернинг илмий-тадқиқот ва ишлаб чиқариш ташкилотлари ўртасида барқарор кооперацион алоқаларни йўлга қўйиш;
фармацевтика соҳасида биринчи илмий шаҳарчани яратишда таълим, илмий ва ишлаб чиқариш салоҳиятидан самарали фойдаланиш;
қўшма илмий тадқиқотларни амалга оширишда академик, таълим ва тармоқ илм-фани ўртасида ўзаро самарали ҳамкорликни таъминлаш;
Кластер аъзоларини рўйхатдан ўтказиш ва уларга тегишли гувоҳномаларни бериш, Кластер иштирокчиларининг реестрини юритиш;
инвесторлар ва Кластер иштирокчилари ўз зиммасига олган мажбуриятларини лозим даражада бажариши устидан назоратни амалга ошириш;
Дирекция томонидан ишлаб чиқилган бош режага мувофиқ, Агентликнинг қарорига асосан тасдиқланган инвестиция лойиҳаларини Кластер ҳудудида жойлаштириш;
саноат зонаси ҳудудида инвестиция лойиҳаларининг ўз вақтида амалга оширилиши, ишга туширилиши ва Кластер иштирокчилари самарали фаолият юритишини таъминлаш учун уларга зарур инфратузилма (электр энергияси, газ ва сув таъминоти, канализация, кириш йўллари ва бошқалар) яратиш билан боғлиқ масалаларни ҳал этишда амалий ёрдам кўрсатиш;
Олдинги таҳрирга қаранг.
Кластерни ривожлантиришга хорижий ва маҳаллий мутахассислар ва маслаҳатчиларни жалб қилиш;
(6-банд «б» кичик бандининг тўққизинчи хатбошиси Ўзбекистон Республикаси Президентининг 2025 йил 28 январдаги ПФ-13-сонли Фармони таҳририда — Қонунчилик маълумотлари миллий базаси, 29.01.2025 й., 06/25/13/0080-сон)
республика фармацевтика тармоғини ривожлантиришнинг муҳим йўналишларини амалга оширишда стратегик инвесторларни аниқлаш нуқтаи назаридан Кластер ҳудудида жойлаштириш учун таклиф қилинаётган инвестиция лойиҳаларини тайёрлаш ва экспертиза қилиш.
Ўзбекистон Республикаси Вазирлар Маҳкамаси бир ой муддатда Дирекция фаолиятини ташкил этиш тўғрисида ҳукумат қарорини қабул қилсин.
7. Белгилансинки,
Олдинги таҳрирга қаранг.
а) Кластер ҳудудида инвестиция лойиҳалари халқаро молия институтлари/хорижий ҳукумат молия ташкилотлари маблағлари ҳамда тўғридан-тўғри инвестициялар, жумладан чет эл инвестицияларини жалб қилиш ҳисобига амалга оширилади;
(7-банднинг «а» кичик банди Ўзбекистон Республикаси Президентининг 2025 йил 28 январдаги ПФ-13-сонли Фармони таҳририда — Қонунчилик маълумотлари миллий базаси, 29.01.2025 й., 06/25/13/0080-сон)
б) инвестиция лойиҳаларини амалга ошириш тўғрисида қарор ушбу лойиҳага илғор технологияларни жалб қилиш, инновацияларни татбиқ этиш даражаси ва ишлаб чиқаришнинг рақобатбардошлилиги тўғрисида Дирекциянинг ижобий хулосаси олинганидан кейин Агентлик томонидан қабул қилинади;
в) Кластер аъзолари ҳамда Дирекцияга нисбатан Ўзбекистон Республикаси Президентининг 2016 йил 26 октябрдаги «Эркин иқтисодий зоналар фаолиятини фаоллаштириш ва кенгайтиришга доир қўшимча чора-тадбирлар тўғрисида»ги ПФ-4853-сон Фармонининг 3 ва 4-бандлари татбиқ этилади;
г) Дирекциянинг таъминоти, шу жумладан унинг ходимлари меҳнатига ҳақ тўлаш ва моддий рағбатлантириш, шунингдек, асосий воситаларни сотиб олиш қуйидаги манбалар ҳисобидан амалга оширилади:
Агентлик қошидаги Ўзбекистон Республикаси Фармацевтика тармоғини қўллаб-қувватлаш ва ривожлантириш бюджетдан ташқари жамғармаси маблағлари;
Дирекция бошқарувидаги ер участкалари, бинолар ва иншоотларни ижарага беришдан тушган тушумлар;
Дирекция томонидан шартнома асосида кўрсатиладиган хизматларни реализация қилишдан тушган тушумлар;
Ўзбекистон Республикаси Давлат бюджетидан ажратиладиган маблағлар;
хорижий ва халқаро ташкилотларнинг грантлари;
жисмоний ва юридик шахсларнинг хайрия маблағлари;
қонун билан тақиқланмаган бошқа манбалар.
Олдинги таҳрирга қаранг.
д) Кластер ҳудудида ер участкаларини ажратиш уларни Дирекция томонидан электрон онлайн аукционга чиқариш орқали Ўзбекистон Республикаси Президентининг 2018 йил 21 декабрдаги «Эркин иқтисодий зоналар фаолиятини мувофиқлаштириш ва бошқариш тизимини янада такомиллаштириш чора-тадбирлари тўғрисида»ги ПФ-5600-сон Фармонида белгиланган тартибда амалга оширилади.
(7-банд Ўзбекистон Республикаси Президентининг 2022 йил 13 июндаги ПФ-153-сонли Фармонига асосан «д» кичик банд билан тўлдирилган — Қонунчилик маълумотлари миллий базаси, 13.06.2022 й., 06/22/153/0518-сон)
Олдинги таҳрирга қаранг.
8. Агентликка Кластерни ташкил этиш мақсадида Дирекциянинг талабномаларига кўра Ўзбекистон Республикаси Фармацевтика тармоғини қўллаб-қувватлаш ва ривожлантириш бюджетдан ташқари жамғармаси ва «Фармацевтика маҳсулотлари хавфсизлиги маркази» ДМ маблағлари ҳисобидан қуйидаги чора-тадбирларга тўловларни амалга оширишга рухсат берилсин:
(8-банднинг биринчи хатбошиси Ўзбекистон Республикаси Президентининг 2025 йил 28 январдаги ПФ-13-сонли Фармони таҳририда — Қонунчилик маълумотлари миллий базаси, 29.01.2025 й., 06/25/13/0080-сон)
Кластер ҳудудининг бош режаси ва батафсил режалаштириш лойиҳаси, лойиҳа ҳужжатларини ишлаб чиқиш ҳамда қурилиш-монтаж ишларини амалга ошириш;
Олдинги таҳрирга қаранг.
консалтинг ва инжиниринг хизматларини кўрсатишда иштирок этадиган хорижий ва маҳаллий мутахассислар ҳамда маслаҳатчиларнинг меҳнатига ҳақ тўлаш;
(8-банднинг учинчи хатбошиси Ўзбекистон Республикаси Президентининг 2025 йил 28 январдаги ПФ-13-сонли Фармони таҳририда — Қонунчилик маълумотлари миллий базаси, 29.01.2025 й., 06/25/13/0080-сон)
Университет профессор-ўқитувчиларининг хорижий таълим ва илмий-тадқиқот муассасаларида амалиёт ўташи бўйича харажатлар;
жисмоний ва юридик шахсларга тегишли бўлган ер участкасида жойлашган турар жой, ишлаб чиқариш бинолари ва бошқа бинолар, иншоотлар ва дарахтзорлар бузилиши сабабли, ер участкаси олиб қўйилганда мулкдорларга етказилган зарарни қоплаш.
9. Тошкент вилояти ҳокимлиги бир ой муддатда:
Олдинги таҳрирга қаранг.
Ўзбекистон Республикаси Қурилиш вазирлиги, Ўзбекистон Республикаси Давлат солиқ қўмитаси ҳузуридаги Кадастр агентлиги ҳамда Дирекция билан биргаликда ер участкасининг чегараларини белгилаган ҳолда Кластерни жойлаштириш учун ажратиладиган ҳудудларни топографик тасвирга олишни таъминлансин;
Кластер ташкил этиш учун Тошкент вилояти Зангиота туманида кейинчалик кенгайтириш имкониятини инобатга олган ҳолда, умумий майдони 130 гектар ер участкаси ажратилишини таъминласин.
(9-банднинг иккинчи ва учинчи хатбошилари Ўзбекистон Республикаси Президентининг 2022 йил 21 январдаги ПФ-55-сонли Фармони таҳририда — Қонунчилик маълумотлари миллий базаси, 22.01.2022 й., 06/22/55/0055-сон)
10. Кластер қурилиши доирасида Дирекция, истисно тариқасида, қишлоқ хўжалигига мўлжалланмаган мақсадларда олиб қўйиладиган суғориладиган ерлар учун компенсация тўловларини тўлашдан озод қилинсин.
11. Иқтисодиёт ва саноат вазирлиги, Молия вазирлиги, Инвестициялар ва ташқи савдо вазирлиги ҳар йили тегишли йиллар учун Ўзбекистон Республикаси Инвестиция дастурининг параметрларини шакллантиришда «Tashkent Pharma Park» инновацион илмий-ишлаб чиқариш фармацевтика кластери ҳудудида транспорт, муҳандислик-коммуникация ва ишлаб чиқариш инфратузилмасини ривожлантириш дастурини амалга ошириш учун капитал қўйилмалар лимитларини ва зарур марказлаштирилган инвестициялар ажратилишини назарда тутсин.
12. Ўзбекистон Республикаси Ташқи ишлар вазирлиги Агентлик буюртманомаларига биноан белгиланган тартибда Кластер ҳудудида инвестиция лойиҳаларини амалга ошириш даврида жалб қилинадиган хорижий мутахассислар, шунингдек, уларнинг оила аъзоларига консуллик ва бошқа йиғимларни ундирмасдан кириш визалари расмийлаштирилишини таъминласин.
Олдинги таҳрирга қаранг.
13. Ўзбекистон Республикаси Ички ишлар вазирлиги Агентлик буюртманомаларига биноан белгиланган тартибда Кластер ҳудудида инвестиция лойиҳаларини амалга ошириш даврида жалб қилинадиган хорижий мутахассисларга давлат божи ундирмасдан кўп марталик визалар берилишини ва узайтирилишини, шунингдек, турган жойи бўйича рўйхатдан ўтказилишини ва унинг муддати узайтирилишини таъминласин.
(13-банд Ўзбекистон Республикаси Президентининг 2026 йил 9 июндаги ПФ-109-сонли Фармони таҳририда — Қонунчилик маълумотлари миллий базаси, 10.06.2026 й., 06/26/109/0580-сон)
14. Ўзбекистон Республикаси Бандлик ва меҳнат муносабатлари вазирлиги белгиланган тартибда республикага ишчи кучини (Ўзбекистон Республикаси фуқароси бўлмаганлар орасидан) жалб этишга рухсатномалар берилишини (муддати узайтирилишини), шунингдек, ушбу фуқароларга Ўзбекистон Республикаси ҳудудида меҳнат фаолияти билан шуғулланиш ҳуқуқини берувчи тасдиқномалар берилишини (муддати узайтирилишини) таъминласин.
 LexUZ шарҳи
Қаранг: Вазирлар Маҳкамасининг 2022 йил 22 февралдаги 86-сон қарори билан тасдиқланган Махсус электрон тизим орқали рухсат этиш хусусиятига эга айрим ҳужжатларни бериш тартиб-таомиллари тўғрисида ягона низомга 20-илова.
15. Мазкур қарорнинг ижросини назорат қилишда қуйидаги тартиб ўрнатилсин:
инвестициялар ва ташқи савдо вазири С.У. Умурзоқов — узоқ муддатли хорижий имтиёзли кредитларни ўз вақтида жалб қилган ҳолда белгиланган муддатларда Кластерни, шу жумладан Университет ва саноат зонасини ташкил этиш бўйича ишларнинг самарали ташкил этилишини, масъул идоралар ва ташкилотлар фаолияти мувофиқлаштирилишини, аниқланган муаммо ва камчиликлар тезкорлик билан бартараф этилишини таъминласин;
Агентлик директори в.б. С.Х. Кариев — Кластерни самарали бошқариш тизимини яратиш, уни шакллантириш жараёнида юзага келадиган кундалик масалаларни ҳал қилиш, саноат зонаси ҳудудида юқори сифатли дори воситалари, тиббий буюмлар ва тиббий техника ишлаб чиқариш бўйича инновацион қувватларни жойлаштириш, ишлаб чиқарилаётган фармацевтика маҳсулотларининг рақобатбардошлигини ошириш, ушбу соҳадаги академик ва илмий-тадқиқот муҳитини ривожлантиришни таъминласин;
Тошкент вилояти ҳокими Р.К. Холматов — ер участкасининг чегараларини аниқласин ва транспорт, муҳандислик-коммуникация ва ишлаб чиқариш инфратузилмасини таъминлаган ҳолда уни Кластер ташкил этиш учун ажратсин, Кластер, шу жумладан Университет ва саноат зонаси фаолиятини ташкил этишда ҳар томонлама кўмаклашсин.
Ўзбекистон Республикаси Президенти Ш. МИРЗИЁЕВ
Тошкент ш.,
2020 йил 28 январь,
ПҚ-4574-сон
Ўзбекистон Республикаси Президентининг 2020 йил 28 январдаги ПҚ-4574-сон қарорига
 1-ИЛОВА
«Tashkent Pharma Park» инновацион илмий-ишлаб чиқариш фармацевтика кластерини ташкил этиш
концепцияси
«Tashkent Pharma Park» инновацион илмий-ишлаб чиқариш фармацевтика кластерини ташкил этиш концепцияси (кейинги ўринларда — Концепция) мамлакатнинг фармацевтика тармоғида ўқув, илмий-тадқиқот салоҳиятини ривожлантириш тизимини шакллантиришга, энг яхши хорижий ўқув дастурлари асосида фармацевтика соҳасида кадрларни ўқитиш ва тайёрлашга, чуқур илм талаб қиладиган ва юқори технологияли янги ишлаб чиқаришларни яратишга қаратилган.
1-боб. Умумий қоидалар
Фармацевтика тармоғининг ҳозирги таҳлили шуни кўрсатадики, маҳаллий фармацевтика бозори ва фармацевтика саноати замонавий соғлиқни сақлаш эҳтиёжларини етарли даражада қаноатлантириш ҳамда аҳолининг касалликларга чалиниш ва ўлимлар сонини камайтириш муаммоларини ҳал қилиш имконини бермаяпти.
Ташқи бозорларга қарамликни минималлаштириш, фармацевтика саноатини ҳар томонлама такомиллаштириш ва уни ривожланишнинг инвестицион моделидан инновацион моделига ўтказиш учун шароит яратиш мақсадида мамлакатда дори-дармон хавфсизлигини таъминлаш, иқтисодиётнинг фармацевтика секторини модернизация қилиш, чуқур илм талаб қиладиган ва юқори технологияли янги ишлаб чиқаришларни яратиш, товарлар ва хизматлар экспортини кўпайтириш, илғор илмий-техник ишланмаларни молиялаштириш зарурати мавжуд.
Хусусан, фармацевтика тармоғи маҳсулот турларига кўра иқтисодий жиҳатдан ривожланган мамлакатларнинг шундай тармоқларидан орқада қолмоқда. Айниқса, ижтимоий аҳамиятга эга дори-дармонлар, жарроҳлик асбоб-ускуналари, стерилланган бир марталик катетерлар, ўтказувчи катетерлар, тикув материаллари, диализаторлар, анестетик ва нафас олиш ускуналари, кардиожарроҳлик, нейрожарроҳлик ва травматологияда юқори технологик жарроҳлик аралашувларда ишлатиладиган материаллар етишмаслиги яққол сезилмоқда.
2-боб. Кластернинг мақсад ва вазифалари
Ушбу Концепция «Tashkent Pharma Park» инновацион илмий-ишлаб чиқариш фармацевтика кластерини (кейинги ўринларда — Кластер) ташкил этишдан кўзланган мақсадлар ва унинг вазифаларини белгилайди.
Кластерни ташкил этишдан мақсад республиканинг фармацевтика тармоғини қуйидаги уч йўналишда ривожлантириш ҳисобланади:
фармацевтика фанини ривожлантириш;
фармацевтикада таълим тизимини такомиллаштириш;
чуқур илм талаб қиладиган ва юқори технологияли ишлаб чиқаришларни ташкил қилиш.
Кластернинг вазифалари ва фаолият йўналишлари қуйидагилардан иборат:
халқаро тажрибани қўллаган ҳолда инновацион ечимлар (ноу-хау) ва юқори технологияларни жорий этиш орқали республиканинг фармацевтика тармоғини ривожлантириш;
замонавий ўқув-лабораториялари ва илмий-тадқиқот марказлари, шунингдек, инновацион инфратузилмани яратиш;
дори воситалари, тиббий буюмлар ва тиббий техникаларни экспертиза қилиш бўйича марказ фаолиятини ташкил этиш;
илмий-тадқиқот базасини халқаро инновацион тизимга интеграциялаш орқали ривожлантириш;
тажриба ва маълумотларнинг доимий алмашинувини ташкил этиш орқали хорижнинг ушбу йўналишдаги илмий-тадқиқот марказлари билан ҳамкорликни йўлга қўйиш, халқаро тадқиқот дастурлари, анжуманлар ва симпозиумларда амалий иштирок этишни таъминлаш;
дори воситалари ва тиббий буюмларни ишлаб чиқаришга мўлжалланган замонавий рақобатбардош ишлаб чиқаришларни ташкил этиш учун, шу жумладан хорижий фармацевтика компанияларининг инвестициялари ва илғор технологияларини жалб қилиш;
фармацевтика тармоғида талаб юқори бўлган мутахассисликлар бўйича халқаро ўқитиш дастурларига мувофиқ малакали кадрлар тайёрлаш, шу жумладан инновацион дори воситалари ва тиббий жиҳозларни ишлаб чиқиш учун ихтисослаштирилган таълим инфратузилмасини яратиш;
илмий-таълим ва тадқиқот марказларининг илмий-техник ва инновацион дастурлар, танловлар ва грантларда иштирок этиши учун шарт-шароитларни таъминлаш.
3-боб. Кластерни ривожлантиришнинг асосий йўналишлари
Кластер иккита асосий йўналишдан иборат:
1. Кластернинг академик, илмий-тадиқот, клиник олди ва клиник таркибий қисмлари жойлашадиган технопарк яратиш.
2. Етакчи фармацевтика компаниялари, тиббий буюмлар ва тиббий техника ишлаб чиқарувчи корхоналарнинг ишлаб чиқариш майдонлари жойлашадиган фармацевтика саноат зонасини яратиш.
Олдинги таҳрирга қаранг.
Кластер ҳудудидаги лойиҳаларни молиялаштириш тўғридан-тўғри инвестицияларни, шу жумладан хорижий инвестицияларни жалб қилиш ҳисобига амалга оширилади.
(2-банднинг иккинчи хатбошиси Ўзбекистон Республикаси Президентининг 2025 йил 28 январдаги ПФ-13-сонли Фармони таҳририда — Қонунчилик маълумотлари миллий базаси, 29.01.2025 й., 06/25/13/0080-сон)
Фармацевтика, косметология, ишлаб чиқариш технологияси, бизнесни бошқариш ва бошқа соҳалар бўйича мутахассислар тайёрлайдиган кўп тармоқли университет (кейинги ўринларда — университет) барпо этиш кўзда тутилади. Университет қуйидаги инфратузилмани ўз ичига олади:
янги дори воситалари ва биотехнологик препаратлар ишлаб чиқиш ва ишлаб чиқаришга татбиқ қилиш, шунингдек, фаолият кўрсатаётган ишлаб чиқаришларни такомиллаштириш, тажриба-экспериментал ишлаб чиқариш билан бирга клиник олди тадқиқотларни ўтказиш бўйича илмий-тадқиқот марказлари ва лабораториялар;
ўқув-илмий лабораториялари ва виварийлар;
фармакопея маркази;
меҳмонхонага эга симпозиум маркази;
талабалар, ўқитувчилар ва чет эллик ходимлар учун турар жойлар;
спорт-соғломлаштириш мажмуаси, сув ҳавзаси ва стадион.
Халқаро таълим муассасасини ташкил этишнинг ушбу модели хориждаги шундай ўқув муассасаларида қўлланилади.
Шунингдек, кластер моделига саноат зонаси ҳам интеграциялаштирилган бўлиб, унда инновацион дори воситалари ва тиббий техника ишлаб чиқарувчи корхоналар жойлаштирилади.
Келгусида Кластер ҳудудида чет эл клиникалари, тиббиёт марказлари ва бошқа зарур инфратузилмаларни жойлаштириш кўзда тутилмоқда, бу эса умуман Кластерни уйғун равишда ривожлантиради.
Ушбу йўналишларни амалга ошириш қуйидагиларга ёрдам беради:
таълим жараёнининг илмий ва ўқув-услубий таъминотини ривожлантириш орқали малакали кадрлар тайёрлаш тизимини такомиллаштириш;
фармацевтика тармоғининг ҳозирги ривожланиш тенденциялари ва эҳтиёжларини инобатга олган ҳолда фармацевтика саноати учун мутахассислар тайёрлаш сифатини ошириш;
илмий-тадқиқот институтларининг моддий-техник базасини жаҳон стандартларига мувофиқ янгилаш;
олий ўқув юртлари ва илмий муассасалар профессор-ўқитувчиларининг илмий-амалий жараёндаги иштирокини моддий рағбатлантириш орқали уларнинг юқори малакали кадрлар тайёрлашда, янги илмий ишланмалар ва технологияларни жорий этишдаги ролини ошириш;
энг самарали генерик дори воситалари турини кенгайтириш орқали янги дори воситаларини ишлаб чиқиш тизимини такомиллаштириш, янада яхшиланган фармакокинетик ва фармакодинамик хусусиятларга эга янги, замонавий инновацион дори шакллари, фаол моддани организмга мақсадли етказиб бериш тизимларини яратиш;
инновацион самарали дори воситалари ва тайёр дори шаклларини яратиш ва ишлаб чиқишга йўналтирилган илмий тадқиқотларни давлат томонидан қўллаб-қувватлаш;
Ўзбекистондаги ўсимликлар, ҳайвонлар ва микроорганизмлардан ажратиб олинган биологик фаол бирикмаларнинг электрон маълумотлар базасини яратиш, фармацевтика саноатида ишлатиш учун ўсимликлар, микроорганизмлар ва ҳайвонлардан биологик фаол моддалар олиш технологиясини ишлаб чиқиш.
Кластерни ривожлантириш мезонларидан бири бу экспертлик марказини ташкил этиш, илмий-тадқиқот базасини ривожлантириш, биофармацевтика саноатини ривожлантиришда халқаро тажрибани жорий этиш, маҳаллий мутахассисларни умум эътироф этилган халқаро стандартларга мувофиқ равишда ўқитиш, янги жиҳозлар, муҳандис-техник кадрлар тайёрлашда зарур бўлган мезон ва мутахассисликлар ҳисобланади.
Кластер ривожланишининг бошқа бир мезони бу халқаро кластер ҳамжамиятларига қўшилиш, хорижий илмий-тадқиқот марказлари ва клиникалар билан шериклик алоқаларини йўлга қўйиш, халқаро симпозиумлар, конференциялар, ярмаркалар ўтказиш, Кластерни Марказий Осиё минтақасидаги ўқув ва илмий-тадқиқот ишлари маркази сифатида шакллантириш ҳисобланади.
Лойиҳанинг ўзига хослиги шундан иборатки, кўп тармоқли университетда ўзининг экотизими яратилади, бу эса таълим ва илмий-тадқиқот таркибий қисмларининг ҳамоҳанг ривожланишига имкон беради. Уларнинг барчаси бир-бири билан ўзаро боғлиқ бўлади ва маҳаллий кадрларни тайёрлаш ушбу майдонларда амалга оширилади.
Кўп тармоқли университетнинг кампуси (талабалар шаҳарчаси) қуйидаги функционал элементларни ўз ичига олади:
ўқув бинолари;
ўқув-илмий лабораториялар;
илмий-тадқиқот маркази;
виварийга эга клиник олди тадқиқотлар маркази;
фармакопея маркази;
ўқув-илмий кутубхона;
илмий-тажриба линиялари;
коворкинг маркази, бизнес акселератор;
талабалар, ўқитувчилар ва чет эллик ходимлар учун турар жойлар;
спорт-соғломлаштириш мажмуаси, стадион;
меҳмонхонага эга симпозиум маркази.
4-боб. Кутилаётган натижалар
Концепцияни амалга оширишдан кутилаётган натижалар қуйидагилар бўлиши лозим:
аҳолини фармацевтика ва унга ёндош соҳаларда юқори малакали кадрлар билан таъминлаш;
фармацевтика тармоғида тадқиқотлар ва ишланмаларни янада ривожлантириш учун илғор илмий-техник базанинг фаолият олиб бориши;
илм-фан ва таълимни миллий инновацион тизимнинг кадрлар таъминоти сифатида интеграциялаш;
Кластер ҳудудида чуқур илм талаб қиладиган ва юқори технологияли ишлаб чиқаришларнинг фаолият олиб бориши;
фармацевтика соҳасида биринчи «илм шаҳарчаси» нинг шаклланиши.
5-боб. Лойиҳани молиялаштириш
Олдинги таҳрирга қаранг.
Кластернинг илмий-таълим таркибий қисмини молиялаштириш манбаи Корея Эксимбанкининг Иқтисодий ҳамкорлик ва тараққиёт жамғармаси (EDCF) линияси бўйича 188,7 миллион АҚШ доллари миқдоридаги узоқ муддатли кредитлари ҳисобланади.
(5-бобнинг биринчи хатбошиси Ўзбекистон Республикаси Президентининг 2024 йил 10 январдаги ПҚ-14-сонли қарори таҳририда — Қонунчилик маълумотлари миллий базаси, 11.01.2024 й., 07/24/14/0015-сон)
Кредит линиясининг шартлари:
лойиҳанинг ижтимоий йўналтирилганлиги, лойиҳа таркибий қисмларида тижорат компонентининг йўқлиги;
кредит муддати — 40 йил, шу жумладан имтиёзли давр — 10 йил;
Олдинги таҳрирга қаранг.
фоиз ставкаси: I босқич учун — йиллик 0,10 фоиз, II босқич учун — йиллик 0,05 фоиз.
(5-бобнинг бешинчи хатбошиси Ўзбекистон Республикаси Президентининг 2024 йил 10 январдаги ПҚ-14-сонли қарори таҳририда — Қонунчилик маълумотлари миллий базаси, 11.01.2024 й., 07/24/14/0015-сон)
Лойиҳани иккита фазада қурилиш-монтаж ишларини босқичма-босқич молиялаштириш ва амалга ошириш билан рўёбга чиқариш кўзда тутилган.
I фазани молиялаштириш 2019 йил 16 августда Сеул шаҳрида «Сиёсий мулоқот» (Policy Dialogue) доирасида имзоланган Протокол («Aide Memoire») натижаларига биноан 2018 — 2020 йилларга мўлжалланган амалдаги Ҳадли битим (Framework agreement) доирасида (лойиҳа 2020 йилга киритилган) режалаштирилган.
II фазани молиялаштириш Ўзбекистон учун келажакдаги Ҳадли битим (Framework agreement) доирасида 2021 йилга режалаштирилган.
Қурилиш босқичлари.
I босқич: кўп тармоқли университет:
ўқув бинолари;
ўқув-илмий лабораториялар;
виварийга эга клиник олди тадқиқотлар маркази;
фармакопея маркази;
ўқув-илмий кутубхона;
спорт-соғломлаштириш мажмуаси, стадион;
коворкинг маркази, бизнес акселератор;
талабалар, ўқитувчилар ва чет эллик ходимлар учун турар жой;
муҳандислик коммуникациялари.
II босқич: кўп тармоқли университет:
илмий-тадқиқот маркази;
илмий-тажриба линиялари;
меҳмонхонага эга симпозиум маркази;
муҳандислик коммуникациялари.
6-боб. Манфаатдор томонларнинг иштироки ва маслаҳатлашувлар
Лойиҳанинг концептуал қисмини амалга оширишда қуйидаги ташкилотларнинг етакчи мутахассислари иштирок этдилар:
Ўзбекистон Республикаси Соғлиқни сақлаш вазирлиги ҳузуридаги Фармацевтика тармоғини ривожлантириш агентлиги;
Тошкент вакциналар ва зардоблар илмий-тадқиқот институти;
Ўзбекистон кимё-фармацевтика илмий-тадқиқот институти;
Тошкент фармацевтика институти;
етакчи хорижий ва маҳаллий фармацевтика маҳсулотлари ва тиббий техника ишлаб чиқарувчилар.
Ўзбекистон Республикаси фармацевтика тармоғининг ҳозирги ҳолати бўйича тадқиқотлар ўтказилди.
Фармацевтика кластери ташкил этиш масаласини ўрганиш учун Ўзбекистон Республикаси Соғлиқни сақлаш вазирлиги ҳузуридаги Фармацевтика тармоғини ривожлантириш агентлиги томонидан Ўзбекистон Республикаси Иқтисодиёт ва саноат вазирлиги кўмагида Германиянинг «Berlin Economics» иқтисодий гуруҳининг Ўзбекистондаги маслаҳатчилари жалб қилинди. Германия гуруҳи томонидан Ўзбекистонда фармацевтика кластерини ривожлантириш ва кластерли ечимларни бошқариш бўйича йўл харитаси ишлаб чиқилди.
Кореялик қуйидаги ҳамкорлар билан доимий равишда маслаҳатлашувлар олиб борилмоқда:
Корея Республикаси Соғлиқни сақлаш ва ижтимоий таъминот вазирлиги;
Корея Республикаси Фармацевтика ишлаб чиқарувчилари уюшмаси (KPBMA);
KBIOHealth — «ОSОNG» биофармацевтик технопаркининг бошқарув компанияси (Корея Республикаси);
KHIDI — Корея Республикаси соғлиқни сақлаш ва фармацевтикани ривожлантириш институти.
Ўзбекистон Республикаси Президентининг 2020 йил 28 январдаги ПҚ-4574-сон қарорига
2-ИЛОВА
«Tashkent Pharma Park» инновацион илмий-ишлаб чиқариш фармацевтика кластерини ташкил этиш бўйича амалий
ЧОРА-ТАДБИРЛАР РЕЖАСИ

Т/р

Тадбирлар номлари

Aмалга ошириш муддатлари

Молиялаштириш манбаси

Масъул ижрочилар

Вазирлар Маҳкамасида назорат учун масъул

Тайёргарлик босқичи

1.

Кластерни ташкил этиш учун ер участкасини ажратиш ва зарур ҳужжатларни расмийлаштириш.

2020 йил
январь-февраль

Фармацевтика тармоғини ривожлантириш агентлиги қошидаги бюджетдан ташқари Ўзбекистон Республикаси Фармацевтика тармоғини қўллаб-қувватлаш ва ривожлантириш жамғармаси (кейинги ўринларда — Фармацевтика тармоғини ривожлантириш агентлиги жамғармаси)

Тошкент вилояти ҳокимлиги
(Р. Холматов),

Фармацевтика тармоғини ривожлантириш агентлиги

(С. Кариев)

А. Арипов

2.

Кластер ташкил этиш мақсадида ер участкаси олиб қўйишда жисмоний ва юридик шахсларга тегишли бўлган турар жой, ишлаб чиқариш бинолари, бошқа бинолар ва иншоотларни бузиш билан боғлиқ зарарларни қоплаш масалаларини ҳал қилиш.

2020 йил
январь-февраль

Фармацевтика тармоғини ривожлантириш агентлиги жамғармаси

Тошкент вилояти ҳокимлиги
(Р. Холматов)

Давергеодезкадастр (А. Абдуллаев),

Фармацевтика тармоғини ривожлантириш агентлиги

(С. Кариев),

Инвестициялар ва ташқи савдо вазирлиги
(Л. Кудратов)

Ж. Қўчқоров

3.

Кластер дирекцияси фаолиятини ташкил этиш тўғрисида, жумладан Кластер дирекциясининг штатлар жадвалини тасдиқлаш, асосий воситалар ва моддий-техника базасини сотиб олишни кўзда тутувчи ҳукумат қарорини қабул қилиш.

2020 йил

февраль-март

Фармацевтика тармоғини ривожлантириш агентлиги жамғармаси

Фармацевтика тармоғини ривожлантириш агентлиги

(С. Кариев),

Адлия вазирлиги
(Р. Давлетов)

Молия вазирлиги
(Т. Ишметов)

Ж. Қўчқоров

4.

Кластернинг вақтинчалик дала офисини қуриш.

2020 йил

май — август

Фармацевтика тармоғини ривожлантириш агентлиги жамғармаси

Фармацевтика тармоғини ривожлантириш агентлиги

(С. Кариев)

А. Раматов

I босқич

Кластернинг саноат объектларини ва илмий-ўқув қисми I фазасини қуриш (амалга ошириш муддати: 2020 — 2023 йиллар)

5.

Ўзбекистон Республикаси Соғлиқни сақлаш вазирлиги ҳузуридаги Фармацевтика тармоғини ривожлантириш агентлигининг «Дори воситалари, тиббий буюмлар ва
тиббий техника экспертизаси ва стандартлаштириш давлат маркази» ДУКнинг янги биноси қурилиши.

2020 йил июнь — 2022 йил март

Фармацевтика тармоғини ривожлантириш агентлиги жамғармаси,
«Дори воситалари, тиббий буюмлар ва тиббий техника экспертизаси ва стандартлаштириш давлат маркази» ДУК маблағлари ҳамда
қонун ҳужжатларида тақиқланмаган бошқа молиявий манбалар.

Фармацевтика тармоғини ривожлантириш агентлиги

(С. Кариев)

А. Раматов

6.

Дирекциянинг маъмурий биносини қуриш.

2020 йил июнь — 2021 йил май

Фармацевтика тармоғини ривожлантириш агентлиги жамғармаси

Фармацевтика тармоғини ривожлантириш агентлиги

(С. Кариев)

А. Раматов

7.

Кластернинг саноат қисми учун истиқболли лойиҳаларнинг инвестиция пакетларини шакллантириш.

2020 йил
март-апрель

Фармацевтика тармоғини ривожлантириш агентлиги жамғармаси

Фармацевтика тармоғини ривожлантириш агентлиги

(С. Кариев),

Инвестициялар ва ташқи савдо вазирлиги
(Л. Кудратов)

А. Арипов

8.

Кластернинг саноат зонасини ривожлантириш учун хорижий инвесторларни жалб қилиш мақсадида «роуд-шоу» ўтказиш.

Доимий равишда (инвестицион пакетлар шакллантирилгандан сўнг)

Фармацевтика тармоғини ривожлантириш агентлиги жамғармаси

Фармацевтика тармоғини ривожлантириш агентлиги

(С. Кариев),

Инвестициялар ва ташқи савдо вазирлиги
(Л. Кудратов)

А. Арипов

9.

Кластернинг саноат зонаси лойиҳаларини биргаликда амалга ошириш учун хорижий ҳамкорларни аниқлаш.

2020 йил
октябрь

—

Фармацевтика тармоғини ривожлантириш агентлиги

(С. Кариев),

Инвестициялар ва ташқи савдо вазирлиги
(Л. Кудратов)

А. Арипов

10.

Кластернинг саноат зонаси лойиҳаларини амалга ошириш учун ер майдонларини ажратиш.

2020 йил
ноябрь

—

Фармацевтика тармоғини ривожлантириш агентлиги

(С. Кариев),

Инвестициялар ва ташқи савдо вазирлиги
(Л. Кудратов)

А. Арипов

11.

Ташқи инфратузилмани Кластер ҳудудигача олиб келиш.

2020 йил
август

2020 — 2022 йилларга мўлжалланган Инвестиция дастури доирасида ажратиладиган маблағлар

Тошкент вилояти ҳокимлиги

(Р. Холматов),
Уй-жой коммунал хизмат кўрсатиш вазирлиги (М. Салиев),

«Ўзбектелеком» АК (Н. Хасанов),

Энергетика вазирлиги

(А. Султанов),

«Ўзтрансгаз» АЖ

(У. Сайидов)

Ўзбекистон Республикаси Транспорт вазирлиги ҳузуридаги Автомобиль йўллари қўмитаси

(А. Абдувалиев)

А. Раматов

12.

Кластернинг саноат зонасида қурилиш-монтаж ишларини бошлаш.

2020 йил
декабрь

Тўғридан-тўғри, шу жумладан хорижий инвестициялар

Фармацевтика тармоғини ривожлантириш агентлиги

(С. Кариев),

Инвестициялар ва ташқи савдо вазирлиги
(Л. Кудратов)

А. Раматов

13.

Кластернинг илмий-ўқув зонаси I фаза лойиҳаси техник-иқтисодий асосини ишлаб чиқиш учун маслаҳатчини танлаш.

2020 йил
январь-февраль

Фармацевтика тармоғини ривожлантириш агентлиги жамғармаси

Фармацевтика тармоғини ривожлантириш агентлиги

(С. Кариев),

Инвестициялар ва ташқи савдо вазирлиги
(Л. Кудратов)

А. Арипов

14.

Бутун фармацевтика кластерини яратиш бўйича бош режани ўз ичига олган лойиҳанинг техник-иқтисодий асосини (I фаза) ишлаб чиқиш ва белгиланган тартибда келишиш.

2020 йил
апрель-май

Фармацевтика тармоғини ривожлантириш агентлиги жамғармаси

Фармацевтика тармоғини ривожлантириш агентлиги

(С. Кариев),

Молия вазирлиги
(Т. Ишметов),

Инвестициялар ва ташқи савдо вазирлиги
(Л. Кудратов)

Ж. Қўчқоров

15.

Лойиҳанинг техник-иқтисодий асосини (I фаза) Корея томони билан келишиш.

2020 йил
июль-август

—

Инвестициялар ва ташқи савдо вазирлиги
(Л. Кудратов),

Фармацевтика тармоғини ривожлантириш агентлиги

(С. Кариев)

А. Арипов

16.

EDCF жамғармаси билан фармацевтика кластерининг илмий-ўқув қисмини ташкил этиш (I фаза) бўйича лойиҳани муҳокама қилиш баёнини (MOD) имзолаш.

2020 йил
сентябрь-октябрь

—

Фармацевтика тармоғини ривожлантириш агентлиги

(С. Кариев),

Молия вазирлиги
(Т. Ишметов),

Инвестициялар ва ташқи савдо вазирлиги
(Л. Кудратов)

А. Арипов

17.

EDCF жамғармаси билан фармацевтика кластерининг илмий-ўқув қисмини ташкил этиш (I фаза) бўйича имтиёзли молиялаштириш шартларини келишиш ва қарз шартномасини имзолаш.

2020 йил
ноябрь

—

Фармацевтика тармоғини ривожлантириш агентлиги

(С. Кариев),

Молия вазирлиги
(Т. Ишметов),

Инвестициялар ва ташқи савдо вазирлиги
(Л. Кудратов)

Ж. Қўчқоров

18.

Фармацевтика кластерининг илмий-ўқув қисмини ташкил этиш (I фаза) бўйича Корея маслаҳатчиларини аниқлаш учун тендер ўтказиш.

2021 йил
февраль

Корея Эксимбанкининг EDCF жамғармаси

Фармацевтика тармоғини ривожлантириш агентлиги

(С. Кариев),

Инвестициялар ва ташқи савдо вазирлиги
(Л. Кудратов)

А. Арипов

19.

Корея маслаҳатчилари томонидан I фазани амалга ошириш режасини ва лойиҳа-смета ҳужжатларини ишлаб чиқиш.

2021 йил
сентябрь

Корея Эксимбанкининг EDCF жамғармаси

Фармацевтика тармоғини ривожлантириш агентлиги
(С. Кариев),

Инвестициялар ва ташқи савдо вазирлиги
(Л. Кудратов)

А. Арипов

20.

I фазани ташкил этиш учун бош пудратчини танлаш.

2021 йил
декабрь

Корея Эксимбанкининг EDCF жамғармаси

Фармацевтика тармоғини ривожлантириш агентлиги

(С. Кариев),

Инвестициялар ва ташқи савдо вазирлиги
(Л. Кудратов)

А. Раматов

21.

I фазани амалга ошириш доирасида зарур жиҳозлар ва инвентарлар рўйхатини аниқлаш ва уларни етказиб бериш тартиб-таомилларини бошлаш.

2021 йил
декабрь

Корея Эксимбанкининг EDCF жамғармаси

Давлат божхона қўмитаси

(М. Азимов),

Фармацевтика тармоғини ривожлантириш агентлиги

(С. Кариев)

А. Раматов

22.

Қурилиш-монтаж ишларини бошлаш (I фаза).

2022 йил
январь

Корея Эксимбанкининг EDCF жамғармаси

Фармацевтика тармоғини ривожлантириш агентлиги

(С. Кариев),

Инвестициялар ва ташқи савдо вазирлиги
(Л. Кудратов)

А. Раматов,

А. Арипов

23.

Кластер кадрлар захирасининг малакасини ошириш учун стажировкаларни ўтказиш.

2020 йил майдан бошлаб (доимий равишда)

«KOICA» агентлиги,

Корея Эксимбанкининг EDCF жамғармаси,

Фармацевтика тармоғини ривожлантириш агентлиги жамғармаси,

«Эл-юрт умиди» жамғармаси

Фармацевтика тармоғини ривожлантириш агентлиги
(С. Кариев),

Инвестициялар ва ташқи савдо вазирлиги
(Л. Кудратов),

Ташқи ишлар вазирлиги
(А. Камилов),

«Эл-юрт умиди» жамғармаси
(А. Бекмурадов)

А. Арипов

24.

Ўрнатиш ва ишга тушириш ишлари.

2023 йил
ноябрь-декабрь

Корея Эксимбанкининг EDCF жамғармаси

Фармацевтика тармоғини ривожлантириш агентлиги

(С. Кариев)

А. Раматов

25.

Iфазани фойдаланишга топшириш.

2023 йил
декабрь

—

Фармацевтика тармоғини ривожлантириш агентлиги

(С. Кариев),

Инвестициялар ва ташқи савдо вазирлиги
(Л. Кудратов)

А. Раматов

II босқич

Кластернинг илмий-ўқув қисми II фаза объектларини қуриш (амалга ошириш муддати: 2021 — 2024 йиллар)

26.

Кластернинг илмий-ўқув қисми II фазаси лойиҳасининг техник-иқтисодий асосини ишлаб чиқиш учун маслаҳатчини танлаш.

2021 йил
январь

Фармацевтика тармоғини ривожлантириш агентлиги жамғармаси

Фармацевтика тармоғини ривожлантириш агентлиги

(С. Кариев),

Инвестициялар ва ташқи савдо вазирлиги
(Л. Кудратов)

А. Арипов

27.

Лойиҳанинг техник-иқтисодий асосини ишлаб чиқиш ва белгиланган тартибда келишиш (II фаза).

2021 йил
апрель-май

Фармацевтика тармоғини ривожлантириш агентлиги жамғармаси

Фармацевтика тармоғини ривожлантириш агентлиги

(С. Кариев),

Молия вазирлиги
(Т. Ишметов),

Инвестициялар ва ташқи савдо вазирлиги
(Л. Кудратов)

Ж. Қўчқоров

28.

Лойиҳанинг техник-иқтисодий асосини (II фаза) Корея томони билан келишиш.

2021 йил
июль-август

—

Инвестициялар ва ташқи савдо вазирлиги
(Л. Кудратов),

Фармацевтика тармоғини ривожлантириш агентлиги

(С. Кариев)

А. Арипов

29.

EDCF жамғармаси билан фармацевтика кластерининг илмий-ўқув қисмини ташкил этиш (II фаза) бўйича лойиҳани муҳокама қилиш баёнини (MOD) имзолаш.

2021 йил
сентябрь-октябрь

—

Фармацевтика тармоғини ривожлантириш агентлиги

(С. Кариев),

Молия вазирлиги
(Т. Ишметов),

Инвестициялар ва ташқи савдо вазирлиги
(Л. Кудратов)

Ж. Қўчқоров

30.

EDCF жамғармаси билан фармацевтика кластерининг илмий-ўқув қисмини ташкил этиш (II фаза) бўйича имтиёзли молиялаштириш шартларини келишиш ва қарз шартномасини имзолаш.

2021 йил
ноябрь

—

Фармацевтика тармоғини ривожлантириш агентлиги

(С. Кариев),

Молия вазирлиги
(Т. Ишметов),

Инвестициялар ва ташқи савдо вазирлиги
(Л. Кудратов)

Ж. Қўчқоров

31.

II фазани амалга ошириш бўйича Корея маслаҳатчиларини аниқлаш учун тендер ўтказиш.

2022 йил
февраль

Корея Эксимбанкининг EDCF жамғармаси

Фармацевтика тармоғини ривожлантириш агентлиги

(С. Кариев),

Инвестициялар ва ташқи савдо вазирлиги
(Л. Кудратов)

А. Арипов

32.

Корея маслаҳатчилари томонидан II фазани амалга ошириш режасини ва лойиҳа-смета ҳужжатларини ишлаб чиқиш.

2022 йил
сентябрь

Корея Эксимбанкининг EDCF жамғармаси

Фармацевтика тармоғини ривожлантириш агентлиги

(С. Кариев),

Инвестициялар ва ташқи савдо вазирлиги
(Л. Кудратов)

А. Арипов

33.

Лойиҳа бўйича бош пудратчини танлаш (II фаза).

2022 йил
декабрь

Корея Эксимбанкининг EDCF жамғармаси

Фармацевтика тармоғини ривожлантириш агентлиги

(С. Кариев),

Инвестициялар ва ташқи савдо вазирлиги
(Л. Кудратов)

А. Раматов

34.

Зарур жиҳозлар ва инвентарлар рўйхатини аниқлаш ва уларни етказиб бериш тартиб-таомилларини бошлаш.

2022 йил
декабрь

Корея Эксимбанкининг EDCF жамғармаси

Фармацевтика тармоғини ривожлантириш агентлиги

(С. Кариев),

Давлат божхона қўмитаси

(М. Азимов)

А. Раматов

35.

Қурилиш-монтаж ишларини бошлаш (II фаза).

2023 йил
январь

Корея Эксимбанкининг EDCF жамғармаси

Фармацевтика тармоғини ривожлантириш агентлиги

(С. Кариев),

Инвестициялар ва ташқи савдо вазирлиги
(Л. Кудратов)

А. Раматов

36.

Ўрнатиш ва ишга туширишишлари.

2024 йил
октябрь-ноябрь

Корея Эксимбанкининг EDCF жамғармаси

Фармацевтика тармоғини ривожлантириш агентлиги

(С. Кариев)

А. Раматов

37.

Фойдаланишга топшириш (II фаза).

2024 йил
декабрь

—

Фармацевтика тармоғини ривожлантириш агентлиги

(С. Кариев),

Инвестициялар ва ташқи савдо вазирлиги
(Л. Кудратов)

А. Раматов

Олдинги таҳрирга қаранг.
(3-илова Ўзбекистон Республикаси Президентининг 2024 йил 10 январдаги ПҚ-14-сонли қарорига асосан ўз кучини йўқотган — Қонунчилик маълумотлари миллий базаси, 11.01.2024 й., 07/24/14/0015-сон)
Ўзбекистон Республикаси Президентининг 2020 йил 28 январдаги ПҚ-4574-сон қарорига
4-ИЛОВА
«Tashkent Pharma Park» инновацион илмий-ишлаб чиқариш фармацевтика кластери ҳудудида транспорт, муҳандислик-коммуникация ва ишлаб чиқариш инфратузилмасини ривожлантириш
дастури

Т/р

Тадбирлар номи

Амалга ошириш механизми

Қиймати
(млн.сўм)*

Амалга ошириш муддатлари

Масъул ижрочилар

1.

Ичимлик суви тизимини кластер ҳудудигача олиб келиш.

2 та ер ости қудуғи, 2 та ЭЦВ насоси, 1 та 600 м3 резервуар (РЧВ), 2 та юқори босимли насос, 2 та ПЎни бошқариш шити, 1 та трансформатор, 2 та сувни зарарсизлантириш ускунаси, ҳар бир линияда назорат зулфлари ва ёнғин гидрантларини ўрнатиш, шунингдек, 5,5 км масофага қувур тортиш.

7800

2020 йил
1 август

Уй-жой коммунал хизмат кўрсатиш вазирлиги
(М. Салиев),

Тошкент вилояти ҳокимлиги (Р. Холматов)

2.

Канализация тизимини кластер ҳудудигача олиб келиш.

1 та оқова иншоотини (КНС) қуриш, 2 та насос, 2 та бошқарув шити, 2 та дезинфекциялаш ускунаси, 1 та трансформатор ўрнатиш. 3,5 км масофага оқава тармоғини тортиш.

4200

2020 йил
1 июнь

Уй-жой коммунал хизмат кўрсатиш вазирлиги
(М. Салиев),

Тошкент вилояти ҳокимлиги (Р. Холматов)

3.

Алоқа, интернет, IP телефония тизимларини кластер ҳудудигача ўрнатиш.

956-АТС телекоммуникация узелидан кластер ҳудудигача 7,7 км оптик толали кабел тортиш, 44 та телефон қудуқлари (ККС-2) ва 7,0 кмга Д-100 полиэтилен қувури ўтказган ҳолда узунлиги 7,7 км (мавжуд телефон қудуқлари орқали 4,2 км, қуриш орқали 3,5 км) оптик толали алоқа линиясини тортиш.

420

2020йил
1 июнь

«Ўзбектелеком» АК

(Н. Хасанов),

Тошкент вилояти ҳокимлиги (Р. Холматов)

4.

Электр тармоқларини Кластер ҳудудигача ўрнатиш.

1. Электр энергиянинг асосий манбаи бўлган 35/10 кВ кучланишли «Ёқуб» КСдан кластер ҳудудигача, 2 та қисмга алоҳида ячейка ўрнатган ҳолда электр кабель тармоғини улаш, 1 та трансформатор ўрнатиш.

2. 35/10 кВ кучланишли «Ёқуб» КСдан чиқувчи 10 кВ кучланишли «Қўрғон-1» фидерасидан захира электр ҳаво (кабель) тармоғини ўтказиш, 1 та трансформатор ўрнатиш.

1780

2020 йил
1 июль

«Ҳудудий электр тармоқлари» АЖ
(У. Мустафоев),

Тошкент вилояти ҳокимлиги (Р. Холматов)

5.

Кластер ҳудудигача газ таъминоти тармоқларини ўрнатиш.

Қибрай тумани, Оқ қовоқ шаҳарчаси, «СоюзНИХИ ГТС» коллекторидан Д-219 мм юқори босимли ер ости газ қувуридан табиий газни кластер ҳудудигача узунлиги 2,0 км, тахминий диаметри 159 мм газ қувури орқали олиб келиш.

1680

2020 йил
1 июль

«Ўзтрансгаз» АЖ
(У. Сайидов),

Тошкент вилояти ҳокимлиги (Р. Холматов),

6.

Кластер ҳудудигача автотранспорт йўлларини тортиш, таъмирлаш ва реконструкция қилиш.

15200 кв.м масофада 4К693 автомобиль йўлини (Улуғбек — Оқ қовоқ — Чирчиқ 0 — 8 км) таъмирлаш.

1850

2020 йил
1 июнь

Транспорт вазирлиги ҳузуридаги Автомобиль йўллари қўмитаси

(А. Абдувалиев),

Тошкент вилояти ҳокимлиги (Р. Холматов)

Изоҳ:
2020 — 2022 йилларга Ўзбекистон Республикасининг Инвестиция дастури доирасида ажратиладиган маблағлар молиялаштириш манбалари ҳисобланади;
харажатларнинг қиймати тахминий бўлиб, якуний қиймат кўрсаткичлари батафсил лойиҳа-смета ҳужжатларини тайёрлаш, товарларни (ишларни, хизматларни) етказиб бериш бўйича тендер савдолари натижаларига кўра аниқланади.
Ўзбекистон Республикаси Президентининг 2020 йил 28 январдаги ПҚ-4574-сон қарорига
5-ИЛОВА
«Tashkent Pharma Park» инновацион илмий-ишлаб чиқариш фармацевтика кластерининг васийлик кенгаши
ТАРКИБИ

1.

С.У. Умурзоқов

—

Ўзбекистон Республикаси инвестициялар ва ташқи савдо вазири, Васийлик кенгаши раиси

2.

С.Х. Кариев

—

Ўзбекистон Республикаси Соғлиқни сақлаш вазирлиги ҳузуридаги Фармацевтика тармоғини ривожлантириш агентлиги директори в.б.

3.

Б.К. Юсупалиев

—

Ўзбекистон Республикаси соғлиқни сақлаш вазирининг биринчи ўринбосари

4.

Ш.Р. Ражаббаев

—

Ўзбекистон Республикаси инновацион ривожланиш вазирининг биринчи ўринбосари в.б.

5.

Б.Ш. Усмонов

—

Ўзбекистон Республикаси иқтисодиёт ва саноат вазири ўринбосари

6.

Р.К. Холматов

—

Тошкент вилояти ҳокими

7.

Х.К. Жалилов

—

Давлат фармакопеяси бош муҳаррири

8.

А.А. Ашуров

—

Тошкент вакцина ва зардоблар илмий-тадқиқот институти директори

9.

А.А. Комилов

—

«Dori-Darmon» АК бошқаруви раисининг ўринбосари

10.

С.Р. Исанбаев

—

«Dentafill Plyus» МЧЖ директори

11.

А.А. Соипов

—

«Jurabek Laboratories» МЧЖ ҚК тижорат директори

Изоҳ: Васийлик кенгаши аъзолари бошқа ишга ўтган тақдирда, унинг таркибига ушбу лавозимга янги тайинланган ёки тегишли функцияларни бажариш зиммасига юкланган шахслар киритилади.
(Қонун ҳужжатлари маълумотлари миллий базаси, 28.01.2020 й., 07/20/4574/0085-сон; 27.01.2021 й., 06/21/6146/0065-сон; Қонунчилик маълумотлари миллий базаси, 22.01.2022 й., 06/22/55/0055-сон; 13.06.2022 й., 06/22/153/0518-сон; 11.01.2024 й., 07/24/14/0015-сон; 29.01.2025 й., 06/25/13/0080-сон; 10.06.2026 й., 06/26/109/0580-сон)